Yesus aa vé bot binzuk bí nii (4,000) bidzí
8
Melú méte,
mora nkuna bot ó ngá bera nzu kóán,
ébɔ́ kaa ábelé é dzóm bá dzí,
éde Yesus a ngá lwée béyága beñ a dzóo bɔ́ ná,
Markos 8.1-21
2 “Ma yén nkuna bot wí engóngɔ́ɔ́,
amú ná é ntɔɔ́ melú mé léa avé bíabe bɔ́ bí tɔbɔ ó vá,
ébɔ́ kaa ábelé é dzóm bá dzí.
3 Ngé me dzó ki bɔ́ ná bé ke méndá meba,
béé wók nzeñ,
bá ye ke bá ku mibim ókaŋŋ été,
amú ná bevɔ́ɔ́ béye été bá sɔ́ oyaáp.”
4 Ané béyága beñ bé ngá yalan ya ñí ná,
“Vóm mbé bé ne koan ya mifémm ná abímm bot dí é ne dzí éyáŋŋ été ó vá?”
5 Éde Yesus a ngá síli bɔ́ ná,
“Míní belé mifémm táŋ á yá?”
Ané bé ngá yalan ná,
“Zaŋgbéá.”
6 Éde a ngá mánan nkuna bot ná ó mana tɔbɔ ósí;
ané a ngá ñɔŋ mifémm zaŋgbéá,
éde niané a ngá vé akíba,
a ngá kap myɔ.
Ané a ngá ke a kee myɔ beyága ná bé ke bá téle myɔ é vóm bot bé mbé bé tɔɔ́,
ané bé ngá kap myɔ nkuna bot.
7 Bé mbé fe bé belé ayomm akúkwaás enziŋ,
éde niané a ngá vé abwará ya dɔ,
a mánan bɔ́ ná dá bé kap fe.
8 Éde bé ngá dzí,
bé dzéñ;
ané bé ngá kóán bítun bí ngá buk táŋ mikpéñ zaŋgbéá.
9 É bot bé ngá dzí bé mbé bot binzuk bí nii (4,000).
Éde a ngá yáán ya bɔ́.
10 Etéññ te ébyen Yesus a ngá daŋ á byéa été bábe béyága beñ,
éde a ngá ke ábeŋŋ sí ye á Dalmanuta.
Befariseo bá dzaa ndem
11 Éde befariseo bé ngá sɔ́,
bé ŋga tára bɔ bisó bábe Yesus,
béé dzéŋ ndem enziŋ ye á dzóp ébe éñe,
á mfá ye ná bé bóble ñí.
12 Éde Yesus a ngá vebe nguu á nsísim weñ été,
ané a ngá dzó ná,
“Amú dzé myee bot wí wá dzaa ndem?
Ma dzó mína bébélá ná băá ye lére myee bot wí ndem.”
13 Éde a ngá lík bɔ́,
a bera daŋ á byéa été,
ané a ngá ke mfá áyát.
É Levadura Befariseo
14 Éde béé ke,
beyága bé ngá vwían ná bé ke ya bidzí,
fáve mfémm mbɔ́ɔ́ éwɔ bé mbé bé belé á byéa été.
15 Éde Yesus a ngá vé bɔ́ mbámm,
eé dzó ná,
“Tɔbɔgán nkée ya é levadura befariseo ya éñí Erodes!”
16 Éde bé ngá dzó ébyen ya ébyen ná,
á dzó dɔ amú ná bĭí belé mifémm.
17 Éde Yesus eé yem dɔ,
a ngá dzó bɔ́ ná,
“Amú dzé mína ke mína dzó ná mínĭí belé mifémm?
Ye ná mínăá bé wók ngé ki áyem?
Ye milém mí ne mína aleét?
18 Ye míní belé mís,
ve kaa áyén?
Ye míní belé fe melɔ́,
ve kaa áwók?
Ye ná mínăá síman,
19 éyɔŋ me ngá vé bot binzuk bí tán (5,000) mifémm mí tán;
mikpéñ táŋ á yá míní ngá kóán?”
Ané bé ngá yalan ya ñí ná,
“Awóm ya mí beáñ.”
20 “Ya éyɔŋ me ngá vé bot binzuk bí nii (4,000) mifémm zaŋgbéá,
mikpéñ táŋ á yá mí ngá dzéñ ya bítun míní ngá kóán?”
Éde bé ngá yalan ya ñí ná,
“Zaŋgbéá.”
21 Ané a ngá síli bɔ́ ná,
“Ye ná míní ngén kaa áwók?”
Yesus aa séñ ndzíndzímm á Betsaida
22 Niané bé ngá sian á Betsaida,
éde bot benziŋ bé ngá sɔ́ ya ñí ya ndzíndzímm,
ané bé ngá dzaa ñí engóngɔ́ɔ́ ná a nama wɔ́.
Markos 8.22-38
23 Éde Yesus a ngá biñ ñí enam,
a kólo ya ñí á dzeá été;
éde niané a ngá túp ñí menden á mís,
a bere fe ñí mó,
ané a ngá síli ñí ná,
“Ye wa yén dzóm?”
24 Éde niané a ngá bére mís,
á ŋga dzó ná,
“Ma yén bot,
ve ma yén bɔ́ ané bilé byee wulu.”
25 Ané Yesus a ngá bera ñí bere mó ó mís,
éde a ngá túga dága,
ané é mís meñ mé ngá tɔbɔ mvwaá;
á ŋga yén dzóm áse mvéáñ.
26 Éde Yesus a ngá lóm ñí é ndá dzeñ eé dzó ná,
“O táa bera búlán é dzeá dí,
[o táa ki dɔ dzó mot enziŋ á dzeá].”
Pedro aa dzó ná Yesus éñí a ne Kristo
27 Yesus bábe béyága beñ bé ngá ke á meá méye á Sesarea ye á Filipos;
éde ókaŋŋ été Yesus a ngá síli béyága beñ ná,
“Nzá bot bá dzó ná me ne?”
28 Éde bé ngá yalan ya ñí ná,
“Bot bevɔ́ɔ́ bá dzó ná o ne Juan Ndubot,
ébá bevɔ́ɔ́ bá ná Elías,
ya fe ébá bevɔ́ɔ́ bá ná mot mbɔ́ɔ́ enziŋ ye bekúlu medzó.”
29 Ané a ngá síli bɔ́ ná,
“ve mína,
mína dzó ná me ne nzá?”
Éde Pedro eé yalan,
a ngá dzó ñí ná,
“O ne Kristo.”
30 Ané a ngá vé bɔ́ mbámm ná bé táa dɔ kat mot enziŋ.
Yesus aa kat béyága beñ ná aa ye wú
31 Éde Yesus a ngá tára ná a yágale bɔ́ ná é Mwán Mot aa yian dzuk ya abwiññ mam.
Mikúkúmá bábe betébosú befára ya beyágale métsiŋŋ,
bá ye ñí tep,
ané aa ye wú.
Ve nia melú mé léa aa ye wómo.
32 A ngá kɔ́bɔ mam méte éyéá été.
Éde Pedro a ngá ke ya ñí évwíñ,
á ŋga tára ná a báma ñí dɔ.
33 Ve Yesus ñí a ngá veŋan,
a dága béyága beñ,
éde a ngá báma Pedro,
eé dzó ná,
“Á Sátan,
kólogé ma ósú!
Wăá tém mam ané Nzamá aa tém mɔ,
fáve ané bot bá tém.”
34 Éde a ngá lwée nkuna bot ya béyága beñ,
ané a ngá dzó bɔ́ ná,
“Ngé mot enziŋ aa kómo ma bee,
a ñímŋe émyen mam,
a baga é krús deñ,
a bee fe ma.
35 Amú ná é mot aa ye kómo koro éniŋ dzeñ,
aa ye dɔ dzímle;
ve é mot aa ye dzímle éniŋ dzeñ ákála dam ya ákála mbamba fwéñ aa ye dɔ koro.
36 Amú ná,
é ne ya mot ya nzá eban ná á mana wún éniŋ ngúrá,
ve a dzímle nsísim weñ?
37 Amú ná,
nzá dzóm mot a ne vé mfá ákus éniŋ dzeñ?
38 Amú ná é mot áse aa wók ma osoán ya fe medzó mam,
á myee bot wí été ó ne bebɔ misémm ya bebɔ medzíán,
é Mwán Mot ñí aa ye fe ñí wók osoán,
éyɔŋ aa ye sɔ́ é dúmá Éséá weñ été bábe mífúfúp mí baángel.”