É dzóm da vé mot mvin
7
Befariseo ya beyágale métsiŋŋ benziŋ,
ébá bé ngá sɔ́ á Yerusalen,
bé ngá nzu kóán Yesus á mféŋŋ.
Markos 7.1-23
2 Éde,
niané bé ngá yén beyága benziŋ béye béyága beñ béé dzí mfémm,
mó mé tɔɔ́ bɔ́ mvin,
dá yíli ná kaa mɔ ásop.
3 (Amú ná befariseo ya bejudio bése băá dzí ngé kaa ná bé tára sop mó mvéáñ,
á mfá ábaale omvúgá míkúkúmá.
4 Éyɔŋ bá sɔ́ fe míseŋ mí mákít,
băá dzí ngé kaa ná bé myam mendzímm.
Abwiññ mam mefé má mé ne fe ná bá ñɔŋ mfá ábaale mɔ,
amvála ané nsopbán mekɔ́p,
nsopbán mendák,
ya fe nsopbán bífela.)
5 Éde befariseo ya beyágale métsiŋŋ bé ngá síli ñí ná,
“Amú dzé béyága bwe băá wulu amvála ané omvúgá míkúkúmá wá dzó,
fáve ná bá dzí mó mé tɔɔ́ bɔ́ mvin?”
6 Ané a ngá dzó bɔ́ ná,
“Á bot meduk,
nde Esaía aá yem kúlu ádzó dí mfá wenan,
amvála ané é ne ntsilann ná,
‘Áyɔŋ dí dá vé ma esémm ya biyéá,
ve mílém myeba myá mí ne ma oyaáp.
7 Bá kaŋ ma á nzeze nkaŋann,
méyágalé meba mé ne fáve metsiŋŋ mé bot.’ ”
8 “Mína lík memvéná mé Nzamá míní ke yémbe ómvúgá bot été.
[Amvála ané nsopbán mekɔ́p ya bilas,
ya fe ábɔ abwiññ mam amvála ané émá].”
9 A ngá dzó fe bɔ́ ná,
“Mína mína tsam fe memvéná mé Nzamá á mvwaá ya mvwaá été,
mfá ábaale ómvúgá wenan.
10 Amú ná Moisés a ngá dzó ná,
‘Sémeŋé ésúá bá ñuá’,
ya fe ná,
‘É mot aa kɔ́bɔ éséá abé,
ngé ki ñiá,
aa yian wú.’
11 Ve mína mína dzó ná ngé mot aa dzó éséá ngé ki ñiá ná,
‘Amvála avwálá áse ma tɔɔ́ wa vé,
me nii yaá dɔ ané Korbán’ (dá yíli ná,
“bivévé mfá Nzamá”);
12 mínăá lík fe ñí ná á bɔ éséá ngé ki ñiá dzam.
13 Amvála te édɔ mína lík ná efíá Nzamá é bɔ kaa ábelé eban,
akála ómvúgá wenan.
Éwɔ míní mana yágale á mína ya mína été.
Mína bɔ fe abwiññ mam afé amvála ané émá méte.”
14 Éde Yesus a ngá bera lwée nkuna bot,
ané a ngá dzó bɔ́ ná,
“Á bot bése,
béágán ma,
míní wók fe:
15 Dzóm enziŋ é sés mot átán ná ngé é ñíi ébe éñe é ne ñí vé mvin.
Fáve ná é dzóm dá sɔ́ mot été,
édɔ dá vé ñí mvin.
16 [Ngé mot enziŋ a belé melɔ́ méye áwók,
á wókge.]”
17 Éde,
niané a ngá lík nkuna bot,
a ñíi á ndá,
ané béyága beñ bé ngá síli ñí ádzó nganán te.
18 Éde a ngá síli bɔ́ ná,
“Ye ná mína mínăá wók ki dɔ?
Ye mínăá wók ná é dzóm áse dá ñíi ébe mot ná dá sɔ́ átán é sés ñí vé mvin,
19 amú ná dăá ñíi nlém weñ été,
ve ósaŋŋ weñ été,
é kwíñ fe mébí?”
“É dzóm dá kwíñ ébe mot,
dzóm te édɔ dá vé ñí mvin.
21 Amú ná á mílém mí bot été,
é ne mbéa bá atémŋa,
nsémm eveák,
dzíp,
nywíán bot,
má sɔ́ été.
22 Medzíán,
onzáŋŋ akúmm,
mbéa bé mam,
meduk,
ndzálánn bivéé,
evínn,
nkɔ́bɔ abyann,
engúŋ,
ya kaa kén.
23 Mebé méte mése é ne má sɔ́ mot été,
émɔ fe má vé ñí mvin.”
Miningá ye á Sirofenisia
24 Edé a ngá tébe,
a kólo ó véa,
ané a ngá ke mébeŋŋ mésí méye á Tiro ya Sidón.
Éde a ngá ñíi ndá enziŋ,
éñe kaa ákómo ná mot enziŋ a yem dɔ;
ve,
ñí a ĕé mbé sɔbɔ.
Markos 7.24-37
25 Ve etéññ te ébyen,
é miningá a mbé a belé oyomm ngwan dzeñ e belé nsísim mvin ó ñúu,
a ngá wók béé kɔ́bɔ ádzó Yesus,
ané a ngá ke,
a kútbe mébɔ ó sí Yesus.
26 Miningá te a mbé ngwan griega,
ebíbyála ye á Sirofenisia.
Éde a ngá dzaa ñí engóngɔ́ɔ́ ná a tsílán ngwan dzeñ mbéa nsísim ó mbé ñí ó ñúu.
27 Éde Yesus a ngá dzó ñí ná,
“Líkge ná bwán bé tára dzéñ,
amú é sés mvéáñ ná bé ñɔŋ mfémm bwán ná bé kee wɔ́ bemvú.”
28 Ve miningá te a ngá yalan ya ñí ná,
“Á Ntí,
é ne ané wa dzó,
ve bemvú bá dzí atwaa médzá má ku bwán ó téble ásí.”
29 Ané Yesus a ngá dzó ñí ná,
“Ya amú eyalann te,
kéŋ;
mbéa nsísim á kólo yaá ngwan dwe ó ñúu.”
30 Éde éyɔŋ a ngá búlán é ndá dzeñ,
a ngá koan ya ngwan dzeñ e bóo énɔŋŋ;
ya fe ná mbéa nsísim á kólo yaá ñí ó ñúu.
Yesus aa séñ mvúmvúk
31 Yesus a ngá bera kólo ábeŋŋ sí ye á Tiro,
eé lot á Sidón,
éde a ngá sian ó máŋ méye á Galilea,
eé kíkgán ábeŋŋ sí ye á Dekapolis.
32 Ané bé ngá sɔ́ ya ñí mot enziŋ a tɔɔ́ ndwá,
eé kɔ́bɔ fe ekágbe,
éde bé ngá dzaa ñí engóngɔ́ɔ́ ná a bere ñí mó.
33 Éde Yesus a ngá vea ñí á nkuna bot été,
a kéñ ya ñí évwíñ,
ané a ngá sɔ́m ñí anu melɔ́ ósí,
a túp fe ñí menden ó dém.
34 Éde,
eé bére mís ó yóp,
á ŋga kɔŋle,
ané a ngá dzó ñí ná,
“Efata!”
(Dzam te dá yíli ná,
“Yɔ́ŋbe!”)
35 Etéññ te ébyen melɔ́ meñ mé ngá yɔ́ŋbe,
ané ékágbe deñ dá é ngá mana fe,
á ŋga kɔ́bɔ mvéáñ.
36 Éde Yesus a ngá mánan bɔ́ ná bé táa dɔ dzó mot enziŋ;
afáŋbɔ ná a ngá bíra bɔ́ dɔ mánan,
ve bá bé ngá bíra dɔ daŋ kat.
37 Ané bé ngá bíra voŋbe abwiññ,
bé ŋga dzó ná,
“Aa bɔ dzam áse mvéáñ.
Atwaa mindwándwá myá aa bɔ ná mí wók,
mivúmvúk ná myá mí kɔ́bɔ.”