2 Niané mos Sátará ó ngá kwíñ,

éde Yesus a ngá tára ná a yágale bot á sinagoga été.

Ané abwiññ bot é ngá voŋbe éyɔŋ bé ngá wók ñí,

bé ŋga dzó ná,

“É mam má má sɔ́ é mot ñí o vé?

Nzá amvála kén é ne ñí mvéán dí?

É báá dzé abwiññ biwólo bí mam aá bɔ ya é mó meñ?

3 Nde se káfina éñe ñí,

é mwán María,

mwanñaŋ Jakobo ya José ya Judas ya Simón?

Nde bekéá bé sés ó vá bíabe bɔ́?”

Éde bé ngá dzímle mbwínánn ébe éñe.

4 Ané Yesus a ngá dzó bɔ́ ná,

“Nkúlu medzó a ne kaa ngaŋŋ,

fáve ébe é dzeá deñ émyen ya é bot béñ été ya fe é ndá dzeñ.”

5 Éde ĕé mbé fe bɔ eyágán dzam enziŋ ó véa;

fáve ná a ngá séñ avítsaŋ mikúkwann émí a ngá bere mó.

6 Éde a ngá ku avoó akála é kaa mbwínánn weba.

Ané a ngá ke aa boman meá méye méféŋŋ eé yágale.

7 Éde a ngá lwée béyága beñ awóm ya bé beáñ,

éde a ngá tára ná a lóm bɔ́ bé beáñ ya bé beáñ,

eé vé bɔ́ nguu ye ádzwée misísim mí mvin.

8 Éde a ngá mánan bɔ́ ná bé táa ke ya dzóm enziŋ mfá ékena deba;

ngé bidzí,

ngé mfák,

ngé moann,

fáve ntúmm,

9 ya mengop.

“Míní táa bwát biwómán bí beáñ.”

10 Ané Yesus a ngá dzó fe bɔ́ ná,

“É vóm áse mína ye ñíi á ndá,

tɔbɔgán ó véa akekwíñ ané mína kólo vóm te,

11 ya é vóm áse bá ye mína bɔ kaa áñɔŋ,

ngé kaa ki mína ábéá,

kólogán ó véa,

sasgán fe mbúlgé ó ne mébɔ menan ásí,

á mfá é ngañiá a ye bɔ́ bwaale.

[Bébélá ma dzó mína ná á mos ye á nkíkgán misaŋ,

éwí kísoan te wá ye daŋ ya mvéáñ álot éwí Sodoma ya Gomora.]”

12 Éde béé ke bá kat mbamba fwéñ,

bé ngá dzó ná mot áse á dzoban.

13 Ané bé ngá vea abwiññ mimbéa misísim,

bé ngá wáa fe abwiññ mikúkwann mbwánn,

béé séñ myɔ.

14 Ané kéza Erodes a ngá wók dzam te,

amú ná éyola Yesus é ngá mana belé éwógá,

bot benziŋ bé ŋga dzó ná,

“Juan Ndubot a wómo yaá míwúán été,

ya akála te édɔ a belé ya dɔ nguu mfá ábɔ biyágán bí mam.”

15 Ve é bot bevɔ́ɔ́ bá bé ngá dzó ná,

“A ne Elías.”

Éde,

é bot bevɔ́ɔ́ bá bé ngá dzó ná,

“A ne nkúlu medzó amvála ané mbɔ́ɔ́ enziŋ ye ókuá.”

16 Ve niané Erodes a ngá wók dɔ,

ané a ngá dzó ná,

“Juan,

éñí me ngá kík nló,

á wómo yaá!”

17 Amú ná Erodes émyen éñe a ngá lóm bot ná bé ke biñ Juan,

éde a ngá fet ñí á mbok ya étɔm Erodias,

é miningá mwanñaŋ Felipe,

ná Erodes aá lúk ñí.

18 Amú ná Juan a ngá bɔ,

eé dzó ñí ná,

“Atsiŋŋ dăá yébe wa ná o lúk é miningá mwanñɔŋ.”

19 Akála te édɔ Erodias a mbé a belé ya ñí ya nlém abé,

eé kómo fe ñí ywíñ.

Ve ĕé mbé dɔ bɔ,

20 amú ná Erodes a ngá kɔ Juan wɔŋŋ,

eé yem ná a mbé é mot a ne nzósoó ya eki.

Éde Erodes a ngá kálá ñí.

Éde éyɔŋ a ngá bɔ eé wók medzó meñ,

nlém weñ ó ngá bɔ weé nzaman,

ve a ngá dziŋ a wók ñí.

21 Éyɔŋ mbamba tám e ngá kwíñ,

é mos Erodes a ngá dzéa mibú,

ané a ngá mana koman fét bidzí mfá békomandée béñ,

ya é bora bé bot béñ,

ya fe bedzwée béye á Galilea.

22 Éde éyɔŋ Erodias ngwan dzeñ e ngá nzu ñíi,

eé ŋga dzém,

dzam te é ngá tɔbɔ Erodes mvéáñ ya fe é bot bábe bɔ́ bé mbé bé tɔɔ́ ó téble;

ané kéza a ngá dzó mwann miningá te ná,

“Dzaagé ma é dzóm wa kómo,

ma ye wa dɔ vé.”

23 Éde a ngá kan ñí sɔŋ eé dzó ná,

“Ma ye wa vé é dzóm wa ye ma dzaa,

atwaa ma kána édzwée dam ó nzaŋŋ.”

24 Ané mwann miningá te a ngá kwíñ,

a kéñ dzó ñiá ná,

“Nzá dzóm ma ye ñí dzaa?”

Ané ñiá a ngá yalan ya ñí ná,

“Dzaagé ñí nló Juan Ndubot.”

25 Etéññ te ébyen a ngá dzíga sɔ́ avóó a nzu kwíñ ébe ású kéza ya é ndzaá deñ,

eé dzó ná,

“Ma kómo ná o vé ma áwola dí ébyen nló Juan Ndubot éfela été.”

26 Éde kéza a ngá bíra tɔbɔ eywiññ,

ve ya akála nkanann sɔŋ weñ ya fe akála é bot bábe bɔ́ bé mbé bé tɔɔ́ ó téble,

édɔ eé ndzí fe ñí kómo ñím é dzóm a ngá dzaa ñí.

27 Etéññ te ébyen éde kéza a ngá mánan mot mbɔ́ɔ́ ye ébá bé ngá kálá ndá mibok,

ané a ngá mánan ñí ná a nzu ya nló Juan.

28 Ané a ngá ke á kík ñí nló á ndá mibok.

Éde a ngá sɔ́ ya nló weñ éfela été.

Ané bé ngá kee wɔ́ mwann miningá te,

éde mwann miningá te a ngá kee wɔ́ ñiá.

29 Éyɔŋ béyága Juan bé ngá wók dzam te,

éde bé ngá sɔ́,

bé ñɔŋ mbim,

ané bé ngá dzep wɔ́ ó sɔŋ.

30 Baapostol bé ngá kóán bábe Yesus,

éde bé ngá kat ñí é mam mése bé ngá bɔ ya yágale.

31 Ané a ngá dzó bɔ́ ná,

“Nzaán évwíñ,

é vóm bot bé sés,

á mfá ye ná míní waabe avítsaŋ.”

Amú ná bot bé mbé abwiññ,

ébá bé ngá ke ya ébá bé ngá sɔ́,

akekwíñ ná bĕé mbé fe bé belé tám atwaa ná bá dzí.

32 Éde bé ngá ke á byéa été vóm enziŋ évwíñ.

33 Ve bot abwiññ bé ngá yén ané bá ke,

éde bé ngá yem dɔ.

Ané bé ngá ke mibíí fufúlu ó wéñ atéé ye bekísoan bése,

éde bé ngá tára ke sian kaa ná bá bé sian.

34 Niané bé ngá kólo á byéa été,

ané Yesus a ngá yén mora nkuna bot,

éde a ngá yén bɔ́ engóngɔ́ɔ́,

amú ná bé mbé amvála ané mítómá mí ne kaa mbaale;

éde a ngá tára ná a yágale bɔ́ abwiññ mam.

35 É tám é ngá bɔ ná ŋgɔgɔ́ eé ntɔɔ́,

béyága beñ bé ngá nzu koan ya ñí,

béé dzó ná,

“É vóm wí ó ne éyáŋŋ,

ŋgɔgɔ́ da eé ntɔɔ́ fe;

36 yáágán ya bɔ́ á mfá ye ná bé ke méfúp ya é meá mé ne méféŋŋ,

bé kus é dzóm bá dzí.”

37 Ve ñí a ngá yalan ya bɔ́ ná,

“Mína bébyen váán bɔ́ é dzóm bá dzí.”

Éde bé ngá síli ñí ná,

“Ye wa kómo ná bí ke kus mifémm táŋ bedenario mitet mí beáñ bí sɔ́ bɔ́ vé ná bé dzí?”

38 Ané a ngá síli bɔ́ ná,

“Míní belé mifémm táŋ á yá?

Keŋán dága.”

Éde niané bé ngá mana fas,

ané bé ngá yalan ya ñí ná,

“Bí belé mifémm mí tán ya kwaás é beáñ.”

39 Éde Yesus a ngá mánan bɔ́ ná bé bɔ ná bot bése bé tɔbɔ mengós ósí bílwá áyóp.

40 Éde bé ngá tɔɔ́ bot kada angós ntet,

émá mevɔ́ɔ́ má bot mewóm mé tán.

41 Ané a ngá ñɔŋ mifémm mí tán ya kwaás é beáñ,

a bére mís á dzóp été,

á ŋga vé abwará ya byɔ,

éde a ngá kap mifémm,

á ŋga kee myɔ beyága á mfá ye ná bá bé ke bá kap myɔ bot,

ya fe kwaás é beáñ ébe mot áse.

42 Ané bésesé bé ngá dzí,

bé dzéñ.

43 Éde bé ngá dzálá awóm mikpéñ ya mikpéñ mí beáñ ya bífús bí mfémm,

ya fe bífús bí kwaás.

44 É bot bé ngá dzí mifémm míte bé mbé befám táŋ binzuk bí tán (5,000).

45 Etéññ te ébyen,

éde Yesus a ngá bɔ béyága beñ ná bé daŋ á byéa été á mfá ye ná bé tára ñí ke ósú á mfá áyát,

á Betsaida,

ntéññ a ngá lígi a yáán ya nkuna bot.

46 Éde niané a ngá mana yáán ya bɔ́ a ngá ke á nkoó ná a ke yaglan.

47 Niané ŋgɔgɔ́ é ngá kwíñ,

byéa ó mbé énzénzaŋ máŋ été,

Yesus ñí á ósí émyen etámm.

48 Éyɔŋ a ngá yén ná bé teak yaá ya ndúkgán byéa,

amú ná evúŋ é ngá sɔ́ bɔ́ ósú,

bebeñ ané méwola mé tán ye á alú.

Éde a ngá ke é vóm bé mbé eé wulu á máŋ áyóp,

á ŋga kómo bɔ́ lot.

49 Ve,

niané bé ngá yén ñí eé wulu á máŋ áyóp,

ané bé ngá tém ná a ne kónn,

bé ŋga yón,

50 amú ná bésesé bé ngá yén ñí,

bé ŋga ku ngom.

Ve etéññ te ébyen a ngá kɔ́bɔ ya bɔ́,

eé dzó bɔ́ ná,

“Yémŋán nguu!

A ne ma!

Míní táa kɔ wɔŋŋ!”

51 Éde a ngá daŋ á byéa été bábe bɔ́,

évúŋ dá é sim fe;

ané bé ngá bíra voŋbe,

52 amú ákoan ná băá bé túga wók ádzó dzam mifémm,

ákoan ná milém myeba myá mí ngén fe aleét.

53 Niané bé ngá mana kígán,

éde bé ngá sian ábeŋŋ sí ye á Genesaret,

ané bé ngá tsini byéa ó véa.

54 Éyɔŋ bé ngá kólo á byéa été,

etéññ te ébyen bot bé ngá yem Yesus.

55 Bé ŋga ke bá ke avóó avóó ébe efús sí te áse,

ané bé ngá tára ná bá sɔ́ ya mikúkwann á bwann binɔŋŋ byeba été é vóm bé ngá wók ná Yesus á ntɔɔ́.

56 Éde é vóm áse a ngá ñíi,

ané á meá,

ané békísoan,

ngé ki miyéŋ,

bot bé ngá bɔ béé bwíi mikúkwann míseŋ,

bé ŋga dzaa ñí engóngɔ́ɔ́ ná á lík bɔ́ ná bé nama ñí atwaa afaáp etóp deñ;

éde é bot bése bé ngá nama dɔ bé ngá tɔbɔ mvwaá.