É mot a mbé a belé nsísim mvin á Gadara
5
Éde bé ngá sian á mfá máŋ áyát,
ábeŋŋ sí bot béye á Gadara.
Markos 5.1-20
2 Éde niané a ngá kólo á byéa été,
etéññ te ébyen mot enziŋ a ngá nzu koan ya ñí,
eé sɔ́ mésɔŋ été,
a belé nsísim mvin ó ñúu,
3 ná étɔbɔga deñ dá é mbé fe mésɔŋ été.
Mot enziŋ ĕé mbé ki fe ñí áká atwaa ya bekalamekéná.
4 Ákoan ná bé ká yaá ñí abwiññ biyɔŋ ya bekalamekéná ó mó ya mebɔ,
ve a ngá bɔ eé téñ bekalamekéná béte,
éde ná mot enziŋ ĕé mbé a belé ábímm nguu é ne ñí kɔk.
5 Eyɔŋ ése,
a ngá wulu alú ya ó mos mésɔŋ été ya míkoó été,
eé ke aa yón ya tun é ñúu deñ ya mekwá.
6 Éde niané a ngá yén Yesus eé nzu oyaáp,
ané a ngá sɔ́ mbíí a sɔ́ ñí kútbe ó sí ású.
7 Ané a ngá yónán ya kíŋŋ oyaáp ó yóp,
eé dzó ná,
“Nzá dzam me belé bía wa,
á Yesus,
é Mwán é Nzamá a ne Oyaáp Óyóp?
Ma dzaa wa engóngɔ́ɔ́ mfá Nzamá ná o táa ma ndágle!”
8 Amú ná Yesus aá dzó ñí ná,
“Nsísim mvin,
kólogé ébe mot te!”
9 Éde Yesus a ngá síli ñí ná,
“O ne eyola á yá?”
Ané ñí a ngá yalan ya ñí ná,
“Me ne eyola ná Enzuk (1,000),
amú ná bí ne abwiññ.”
10 Éde a ngá bíra dzaa Yesus engóngɔ́ɔ́ ná a táa bɔ́ lóm átán ébe ábeŋŋ sí te.
11 Mora nkuna bengwiññ ó mbé ó véa,
weé dzí bebeñ á nkoó enziŋ.
12 Ané misísim míte mí ngá dzaa ñí engóngɔ́ɔ́,
myeé dzó ná,
“Lómŋe bía ébe bengwiññ á mfá ye ná bí ke ñíi ébe bɔ́.”
13 Ané a ngá lík bɔ́ dɔ.
Éde misísim mí mvin mí ngá kwíñ,
mí mana ke ñíi bengwiññ ó ñúu.
Ané nkuna bengwiññ óse táŋ ané bengwiññ binzuk bí beáñ (2,000) ó ngá mana tée mbíí ó ke ku ó máŋ été,
atéé ye ekóndómm áyóp,
bé ŋga wú abúk á máŋ été.
14 Éde é bot bé ngá baale bengwiññ bé ngá túp mibíí,
ané bé ngá ke kat é bot á kísoan ya é bot míyéŋ fwéñ.
Ané bot bé ngá nzu yén é dzam é ngá bɔban.
15 Éde bé ngá sian é vóm Yesus a mbé,
ané bé ngá yén é mot a mbé a belé mimbéa misísim,
a tɔɔ́ ósí,
a baga byém ya fe ná kén é ntɔɔ́ ñí mvwaá,
éñí a mbé a belé enzuk (1,000) misísim,
éde bé ngá kɔ wɔŋŋ.
16 Ané é bot bé ngá yén dɔ bé ngá kat é bot bevɔ́ɔ́ fwéñ é dzam é ngá bɔban ébe é mot a mbé a belé mimbéa misísim,
ya fe édí bengwiññ.
17 Éde bé ngá tára ná bá dzaa ñí engóngɔ́ɔ́ ná a kólo bɔ́ ábeŋŋ sí deba.
18 Niané Yesus a ngá daŋ á byéa été,
éde é mot a mbé a belé mimbéa misísim a ngá dzaa ñí engóngɔ́ɔ́ ná a lík ñí ná a ke bá ñí.
19 Yesus eé ndzí dɔ yébe,
ve a ngá dzó ñí ná,
“Kéŋ é ndá dzwe,
ébe é bot bwe,
o kat bɔ́ ábímm bora bé mam Ntí a bɔ yaá wa,
ya amvála aá yén wa engóngɔ́ɔ́.”
20 Éde mot te a ngá ke,
á ŋga tára ná aa ke aa kat á Dekapolis,
ábímm bora bé mam Yesus a ngá bɔ ñí;
éde bot bése bé ngá ku mevoó.
É mwán Yairo
21 Niané Yesus a ngá bera búlán á mfá máŋ áyát á byéa été,
mora nkuna bot ó ngá nzu ñí kóán míféŋŋ;
a tɔɔ́ á nsá máŋ.
Markos 5.21-43
22 Éde ntébosú enziŋ ye á sinagoga,
a tɔɔ́ eyola ná Yairo,
a ngá sɔ́.
Niané a ngá yén Yesus,
éde a ngá ku ñí mébɔ ósí;
23 á ŋga dzaa ñí engóngɔ́ɔ́ abwiññ,
eé dzó ná,
“Oyomm ngwan dzam ó ŋga ye yaá áwú;
nzá ñí bere mó á mfá ye ná á tɔbɔ mvwaá,
á niŋ fe.”
Miningá aa nama Yesus etóp
24 Éde Yesus a ngá ke bá ñí,
mora nkuna bot ó ŋga bee ñí,
weé fít fe ñí.
25 Miningá enziŋ a mbé ó véa á koan ná a ntɔɔ́ awóm mibú ya mibú mí beáñ,
eé dzuk ná mekií má kwíñ ábum.
26 Ákoan ná a bíra yaá fe dzuk é mó abwiññ bedɔ́kira,
a mana yaá fe dzímle é dzóm áse a mbé a belé,
ve kaa áyén avwálá enziŋ.
Fáve ná,
eé keéke abé.
27 Éyɔŋ a ngá wók bá kɔ́bɔ ádzó Yesus,
a tɔɔ́ á nkuna bot été,
a ngá yit ñí á mvús,
a nama ñí etóp,
28 amú ná a ngá dzó á nlém été ná,
“Ngé me túga nama atwaa bítóp byeñ,
ma ye tɔbɔ mvwaá.”
29 Etéññ te ébyen,
éde mekií má kígi ñí,
á ŋga wórán é ñúu deñ été ná a séñban yaá ébe ókwann weñ.
30 Tám te fe Yesus ñí a ngá ñú táŋ ná nguu e kólo ñí ó ñúu,
éde a ngá veŋan é vóm nkuna bot ó mbé,
ané a ngá síli ná,
“Nzá á nama ma bitóp?”
31 Éde beyága bé ngá dzó ñí ná,
“O téa ané nkuna bot wá fít wa,
ve wa wa dzó ná,
‘Nzá á nama ma?’ ”
32 Éde a ngá ke a dága míféŋŋ myeñ mfá áyén nzá á nama ñí.
33 Ve miningá te,
eé kɔ wɔŋŋ ya ku ngom,
eé ñú fe táŋ ya é dzam é bɔ ñí,
ané a ngá sɔ́,
á ku ósí ébe ású Yesus,
éde a ngá dzó ñí bébélá áse.
34 Éde Yesus a ngá dzó ñí ná,
“Á mwán,
mbwínánn we ó séñ yaá wa [ó koro yaá].
Kéŋ mvwaá,
o ntɔɔ́ fe mvwaá ébe ókwann we.”
35 Ntéññ a ngá kɔ́bɔ néa,
bot benziŋ bé ngá sian béé sɔ́ é ndá ntébosú ye á sinagoga,
béé dzó ná,
“Ngwan dwe é wú yaá,
dzé fe wa fáŋ bera ndágle Nyágale?”
36 Ve Yesus,
eé wók é dzam bé ngá kɔ́bɔ,
a ngá dzó ntébosú ye á sinagoga ná,
“O táa kɔ wɔŋŋ,
síígé bwíni etámm.”
37 Véa,
eé ndzí ki lík ná mot enziŋ á ke bá ñí,
fáve Pedro ya Jakobo bá mwanñaŋ Juan.
38 Éde bé ngá sian é ndá ntébosú ye á sinagoga,
ané Yesus a ngá yén nzɔgɔ ya é bot bé ngá yi,
ya ábíra bɔ miyónn.
39 Niané a ngá ñíi,
éde a ngá dzó bɔ́ ná,
“Amú dzé mína bɔ nzɔgɔ ya áyi?
Mwann miningá a sés nwúán,
fáve ná a bóo óyó.”
40 Ané bé ngá kpógo ñí.
Ve ñí a ngá kúlu bésesé átán,
éde a ngá ñɔŋ éséá mwann miningá ya ñiá mwann miningá ya é bot bábe bɔ́ bé mbé,
éde a ngá ñíi é vóm mwann miningá a mbé.
41 Éde a ngá biñ mwann miningá enam,
a dzóo ñí ná,
“Talita kumi (édɔ bá kelan nkɔ́bɔ Arameo ná,
“Á mwann miningá,
ma dzó wa ná,
Tébegé!”).”