É nganán awóm bindúnn bíngwan
25
“Éde,
édzwée ngɔ́mán ye á dzóp dá ye fonan ya awóm bindúnn bíngwan,
ébyɔ bí ngá twáa béláma beba,
ané bé ngá kólo ná bá ke koan ya é fám da lúk miningá.
2 Bé tán béye été bé mbé mekút,
bé tán bevɔ́ɔ́ bá nkée.
3 Amú ná ébá bé mbé mekút,
bá twáa beláma beba,
ve bá kaa átwáa mbwánn fufúlu ya beláma;
4 ve,
ébá bé mbé nkée bé ngá ke ya mbwánn méfon été fufúlu ya béláma beba.
5 Niané é fám da lúk e ngá bem,
ané bésesé bé ngá wók óyó,
véa bé bómo ósí.
6 Éde bé ngá wók kíŋŋ énzénzaŋ alú,
deé yónán ná,
‘Dággán ná,
é fám da lúk miningá édɔ ñí!
Nzaán koan ya ñí.’
7 Ané bindúnn bíngwan bíte bíse bí ngá vee óyó,
éde bé ngá kom béláma beba.
8 Éde ébá bé mbé mekút bé ngá dzó ébá bé mbé nkée ná,
‘Váán bía oyomm mbwánn wenan,
amú ná béláma bea bé ŋga dzím yaá.’
9 Ve,
ébá bé mbé nkée bá bé ngá yalan ná,
‘Kaa,
ó nza bɔ kaa bía áyian bíabe mína;
dá yian ná míní ke ébe é bot bá kuan mbwánn,
ná míní kus á mfá wenan.’
10 Éde,
ntéññ bé ngá ke kus,
éñe é fám da lúk e ngá sian,
ané ébá bé mbé nkomann bé ngá ñíi ó fét alúkgán bábe bɔ́,
éde bé ngá dzip mbéñ.
11 Véa,
éñe ébá bevɔ́ɔ́ bá bé ngá sian,
bé ŋga dzaa ná,
‘Á Ntí!
Á Ntí!
Kúugé bía mbéñ!’
12 Ve,
ñí a ngá yalan ná,
‘Ma dzó mína bébélá ná măá yem mína.’
13 Édɔ ná,
tɔbɔgán evévéñ!
Amú ná mínăá yem mos,
ngé ki áwola [é Mwán Mot aa ye sɔ́].”
É nganán moann
14 “Amú ná,
édzwée ngɔ́mán ye á dzóp é ne amvála ané mot enziŋ,
ná éyɔŋ a ngá ke ékena,
aa lwée áloá deñ,
éde a ngá lígi ya bɔ́ ya é byém byeñ.
15 Ané a ngá kee mbɔ́ɔ́ baakúru bé tán,
éñí mbɔ́ɔ́ baakúru bé beáñ,
éñí mbɔ́ɔ́ ñá akúru mbɔ́ɔ́,
kada mot ya ábímm nguu deñ,
véa a kéñ ékena.
16 Éyɔŋ é mot a ngá ñɔŋ baakúru bé tán a ngá kólo,
éde a ngá ke bɔ ya bɔ́ okira,
véa aá wún baakúru bé tán befé.
17 Amvála te fe,
é mot a ngá ñɔŋ baakúru bé beáñ,
ñí aá wún baakúru bé beáñ befé.
18 Ve,
éñí ñí a ngá ñɔŋ akúru mbɔ́ɔ́ a ngá ke,
éde a ngá fá ébéññ ósí,
ané a ngá swaale é moann é mása weñ.
19 Niané abwiññ tám é ngá lot,
ané é mása aloá te a ngá sɔ́,
á ŋga bɔ bɔ́ sitwá.
20 Éde éñí a ngá ñɔŋ baakúru bé tán a ngá sɔ́ ya baakúru bé tán befé,
eé dzó ná,
‘Á mása,
waá kee ma baakúru bé tán;
dággé ná me wún yaá baakúru bé tán befé.’
21 Ané é mása weñ a ngá dzó ñí ná,
‘Á mbamba oloá bá tɔbɔ ya wɔ mebúnn,
mvéáñ!
O dzálá yaá mvéáñ ébe avítsaŋ byém;
ma ye wa téle ná o dzwée abwiññ.
Nzaá ñíi mésán é mása we!’
22 Éde,
éñí a ngá ñɔŋ baakúru bé beáñ ñí a ngá sɔ́ fe.
Ané a ngá dzó ná,
‘Á mása,
waá kee ma baakúru bé beáñ;
dággé ná,
me wún yaá bé beáñ befé.’
23 Éde é mása weñ a ngá dzó ñí ná,
‘Á mbamba ya oloá bá tɔbɔ ya wɔ mebúnn,
mvéáñ!
O dzálá yaá mvéáñ ébe avítsaŋ byém;
ma ye wa téle ná o dzwée abwiññ.
Nzaá ñíi mésán é mása we!’
24 Ve,
niané éñí a ngá ñɔŋ akúru mbɔ́ɔ́ a ngá sɔ́,
éde a ngá dzó ná,
‘Á mása,
me ngá yem ná o ne aleét mot,
wa yoo é vóm weé ndzí beñ,
wa kóán é vóm weé ndzí myea;
25 éde,
amú wɔŋŋ,
maá ke,
me swaale ákúru we á sí été;
dággé ná é dzóm dwe édɔ dí.’
26 Ve,
é mása weñ ñí a ngá yalan ya ñí ná,
‘Á mbéa oloá ya ndéndeát,
o ngá yem ná ma yoo é vóm meé ndzí beñ,
ma kóán fe é vóm meé ndzí myea.
27 Édɔ ná o ngá yian ke nii é moann wɔm é ndá bemoann,
ná niané má sɔ́ ngé má ñɔŋ é moann wɔm ya miséŋŋ áyóp.
28 Édɔ ná,
ñɔŋŋán ñí akúru,
míní kee ñí é mot a belé awóm baakúru.
29 Amú ná é mot áse a belé,
bá ye ñí bera vé,
véa,
aa ye belé abwiññ;
ve,
éñí ñí ĕé belé,
atwaa édí a belé,
dá bá ye ñí dɔ ñɔŋ.
30 Éde,
weagán óloá ó ne kaa eban te é dzíbi é ne átán;
ó wéñ éñe miyónn myá ye bɔ ya álaran mesoŋŋ.’ ”
Ákík meyɔŋ misaŋ
31 “Ve,
éyɔŋ é Mwán Mot aa ye sɔ́ é dúmá deñ été,
ya é [mifúfúp mí] baángel bése bábe bɔ́,
tám te aa ye tɔbɔ ósí étɔɔ́ édzwée ye é dúmá deñ;
32 ané meyɔŋ mése má ye kóán ébe ású deñ;
éde aa ye kána bevɔ́ɔ́ ya ébá bevɔ́ɔ́,
amvála ané nkálá mitómá aa kána mitómá békábán été.
33 Aa ye téle mitómá á mfá meyóm weñ;
ve,
bekábán bá á mfá meyéá weñ.
34 Véa kéza aa ye dzó ébá bé ne mfá meyóm weñ ná,
‘Nzaán,
mína é bot Tará a mana yaá vé abwará ya bɔ́;
ñɔŋŋán tsígá denan,
édzwée ngɔ́mán é ntɔɔ́ mína nkomann atéé ye mvelann éniŋ.
35 Amú ná me ngá wók nzeñ,
míní vé ma bidzí;
me ngá wók evéé,
míní ñúu ma mendzímm;
me mbé nnéŋ,
míní ñɔŋ ma;
36 me mbé swéswéññ,
míní bwára ma;
me mbé nkúkwann,
míní sɔ́ ma fép;
me mbé á mbok,
míní sɔ́ ébe ma.’
37 Véa benzósoó bé bot bá ye ñí dzó ná,
‘Á Ntí,
tám fé bí ngá yén wa wók nzeñ,
bí vé wa bidzí,
ngé ki weé wók evéé,
bí vé wa mendzímm?
38 Tám fé ki bí ngá yén wa ané nnéŋ,
bí ñɔŋ wa,
ngé ki swéswéññ,
bí bwára wa?
39 Tám fé ki bí ngá yén wa nkúkwann,
ngé ki á mbok,
bí sɔ́ wa fép?’
40 Kéza te aa ye yalan ya bɔ́ ná,
‘Bébélá ma dzó mína ná,
é tám míní ngá bɔ dɔ mot mbɔ́ɔ́ ye é bɔbédzaŋ bam bá,
atwaa ébá bá daŋ ya avítsaŋ,
ma míní ngá bɔ dɔ.’
41 Véa,
aa ye fe dzó ébá bé ne mfá méyéá weñ ná,
‘Kólogán ma ó mís,
bot bí boŋle,
keŋán é ndúán e ne mbéámbéá,
éñí é ntɔɔ́ nkomann mfá déble ya é baángel béñ.
42 Amú ná me ngá wók nzeñ,
mína kaa ma ávé bidzí;
me ngá wók evéé,
mína kaa ma ávé mendzímm;
43 me mbé nnéŋ,
mína kaa ma áñɔŋ;
me mbé swéswéññ,
mína kaa ma ábwará;
me mbé nkúkwann,
ya á mbok,
mína kaa me nzu fép.’
44 Éde,
bá bá ye fe yalan ná,
‘Á Ntí,
tám fé bí ngá yén wa weé wók nzeñ,
ngé ki evéé,
ngé ki ané nnéŋ,
ngé swéswéññ,
ngé ki nkúkwann,
ngé ki á mbok;
véa,
bía kaa ábelan ya wa?’
45 Ané ñí aa ye bɔ́ dzó ná,
‘Bébélá,
ma dzó mína ná é tám mína ngá bɔ dɔ kaa ábɔ mot mbɔ́ɔ́ ye ébá bá daŋ ya eban,
míníí ndzí ki ma dɔ bɔ.’
46 Éde,
ébá béte bá ye ke ákira é ne mbéámbéá,
ve benzósoó bé bot bá éniŋ é ne mbéámbéá.”