Yesus aa kat fwéñ ná templo dá ye bólo
24
Niané Yesus a ngá kólo á templo,
eé ke,
ané béyága beñ bé ngá yit ñí bebeñ mfá álére ñí mendá méye á yát templo.
2 Ve ñí a ngá yalan ya bɔ́ ná,
“Ye mínăá yén ásesé ñí?
Ma dzó mína bébélá ná,
ó vá,
akwá dăá ye lígi é bóo ákwá avɔ́ɔ́ áyóp ná băá ye dɔ wea ósí.
Méndem méye ásúgánn éniŋ
3 Éde,
Yesus a tɔɔ́ ósí á nkoó Álíba,
ané béyága beñ bé ngá nzu koan ya ñí évwíñ,
béé dzó ñí ná,
“Katge bía,
dzam te dá ye bɔban ódén,
nzá ndem ki dá ye yéne á mfá ásɔ́ɔ́ we,
ya á mfá asúgánn ye é tám ñí?
4 Éde Yesus a ngá yalan ya bɔ́ ná,
“Dággán ná mot enziŋ a táa míní bɔ ná míní lés.
5 Amú ná abwiññ bot dá ye sɔ́ ya éyola dam,
béé dzó ná,
‘Ma me ne Kristo.’
Édɔ ná,
bá ye bɔ ná abwiññ bot é lés.
6 Míní nkún wók ná melúmán mé ŋga nzu yaá,
ya fe meñíŋ melúmán.
Ve tɔbɔgán nkée ná míní táa sigan,
amú ná dá yian bɔban;
ve,
asúgánn dăá bé ó véa.
7 Amú ná ayɔŋ dá ye tébe ayɔŋ avɔ́ɔ́ á ngamm áyát,
édzwée ngɔ́mán dá é tébe édzwée ngɔ́mán evɔ́ɔ́ á ngamm áyát;
nzeñ da ye bɔ,
mifógán mí sí myá ye bɔban ébe mevóm ya mevóm.
8 Ve mam méte mése mé ne fáve átáraga mitéñ mí mye.
9 Édɔ ná,
bá ye mína kee ná míní yén midzuúk;
bá ye mína ywíñ,
meyɔŋ mése má ye mína víni akála éyola dam.
10 Édɔ ná,
abwiññ bot dá ye dzímle mbwínánn,
bevɔ́ɔ́ bá ye kuan ébá bevɔ́ɔ́,
bevɔ́ɔ́ bá ye víni ébá bevɔ́ɔ́.
11 Abwiññ minéneá bekúlu medzó dá ye váma,
bé ŋga duk abwiññ bot.
12 Édziŋŋ abwiññ bot dá ye vóbo,
amú ná ntsamann metsiŋŋ wá ye vém.
13 Ve é mot aa ye nzomo akekwíñ asúgánn,
mot te éñe aa ye tɔbɔ nkoránn.
14 Éde,
é mbamba fwéñ ye Édzwée ngɔ́mán ñí aa ye katban eniŋ ngúrá,
ané ngañiá á mfá meyɔŋ mése,
véa,
éñe asúgánn dá ye bɔ.
15 Édɔ ná,
éyɔŋ mína ye yén é dzam Nzamá aa víni,
édí dá sɔ́ ya ntsamann,
édí Nkúlu medzó Daniel a ngá dzó ya dɔ,
é ntéle é vóm ó ne eki (Wa,
é mot wa láŋ,
wókge),
16 tám te,
é bot bá ye tɔbɔ á Judea,
bé túpge bé kéñ míkoó.
17 Éde,
é mot aa ye tɔbɔ á ndzií áyóp,
a táa sigi ná a twáa byém é ndá dzeñ été.
18 Éñí aa ye tɔbɔ áfúp,
a táa búlán ó mvús ná aa twáa ékót deñ.
19 Ve,
ngwáa ya é biningá bá ye bɔ mebum,
ya ébá bá ye ñéa bwán melú méte!
20 Ve yaglánán ná ntúpbán wenan ó táa bɔban á mbéa metám mé mveŋ ya avép,
ngé mos Sátará;
21 amú ná tám te,
midzuúk myá ye bɔ abwiññ,
ámvála dăá bé tára bɔban atéé ye átáraga eniŋ anzukwíñ áwola dí,
dăá ye ki bera bɔban eyɔŋ enziŋ.
22 Éde,
ngé melú méte mé bɔ kaa ákígi,
ngé mot enziŋ ăá ye tɔbɔ nkoránn;
ve,
ya akála é bot bé ne mitɔ́pbán,
melú méte má ye kígi.
23 Éde ngé mot aa dzó mína ná,
‘Dággán,
Kristo éñe ñí,’
ngé ki ná,
‘A ne ólwí,’
míní táa ñí yébe.
24 Amú ná minéneá bekristo ya minéneá bekúlu medzó myá ye váma,
bé ŋga lére bora mendem ya biyágán bí mam á mfá ábɔ ná bot bé lés,
atwaa ébá bé ne mitɔ́pbán,
ngé dá é ne ki bɔban.
25 Yénŋán ná me tára yaá mína dɔ dzó.
26 Édɔ ná,
ngé bé dzó mína ná,
‘Dággán,
a ne ólwí,
éyáŋŋ été,’
míní táa ke;
ngé ki ná,
‘Dággán,
a ne bídziná été,’
míní táa yébe.
27 Amú ná amvála ané vevés da tée é vóm nlódzóp wá kwíñ á ŋga yéne akekwíñ é vóm wá dzím,
néa fe,
ásɔ́ɔ́ é Mwán Mot wá ye bɔ.
28 É vóm mbim ó bóo,
vóm te éñe mikúŋŋ myá ye kóán.”
Ásɔ́ɔ́ é Mwán Mot
29 “Ve,
niané midzuúk míye melú méte myá ye mana,
etéññ te ébyen,
‘Nlódzóp wá ye bɔ dzíbi,
ngomdan da dăá ye ki vé éyéá deñ,
atéteñ dá ye kóbo á dzóp,
ané menguu méye á dzóp má ye sukban.’
30 Eyɔŋ te éde é ndem é Mwán Mot dá ye yéne á dzóp;
éde meyɔŋ mése méye é sí ñí má ye tɔbɔ eywiññ,
véa éñe bá ye yén é Mwán Mot eé sɔ́ míkút míye á dzóp été,
ya nguu ya mora dúmá.
31 Éde aa ye lóm é baángel béñ ya mora kíŋŋ tɔ́ŋ,
bá ye kóán mítɔ́pbán mí bot myeñ ébe mifá mí sí mí nii,
atéé ye é vóm dzóp dá tára akekwíñ é vóm dá mana.”
Ayágalé é nganán elé Igera
32 “Biñŋán ayágalé é nganán elé Igera:
Éyɔŋ mítem myeñ mí ntɔɔ́ numm,
mí ŋga kúlu mifefeñ mékyéññ,
mína yem ná esep é ntɔɔ́ bebeñ.
33 Amvála te fe mína,
éyɔŋ mína ye yén é mam mése má,
yemŋán ná tám é ntɔɔ́ bebeñ á míbéñ.
34 Ma dzó mína bébélá ná myee bot wí wăá ye lot,
akekwíñ ná mam méte mése má bɔban.
35 Dzóp ya sí byá ye lot,
ve bífíá byam byăá ye lot amvála enziŋ.”
Mot enziŋ ăá yem áwola te
36 “Ve mfá mos te ya áwola te,
mot enziŋ ăá yem,
atwaa baángel béye á dzóp été,
[ngé ki Mwán,]
fáve Éséá etámm.
37 “Amú ná amvála ané mélú Noé,
éñe fe dá ye bɔ néa ásɔ́ɔ́ é Mwán Mot.
38 Amú ná mélú méte kaa ná mora mveŋ á nɔ́ŋ,
bot bé ngá dzí ya ñú,
béé lúk,
béé kee fe bengwan mélúk,
akekwíñ é mos Noé a ngá ñíi árka été.
39 Éde béé ndzí wók akekwíñ éyɔŋ mora mveŋ a ngá sɔ́ e mana bɔ́ vea bésesé;
éñe fe dá ye bɔ néa ásɔ́ɔ́ é Mwán Mot.
40 Tám te bot bé beáñ bá ye tɔbɔ áfúp,
bá ye ñɔŋ mbɔ́ɔ́ ye été,
éñí mbɔ́ɔ́ ñá bé lígi.
41 Biningá bé beáñ bá ye kwa bidzí akwá avɔ́ɔ́,
bá ye ñɔŋ mbɔ́ɔ́ ye été,
éñí mbɔ́ɔ́ ñá bé lígi.
42 Édɔ ná,
tɔbɔgán evévéñ,
amú ná mínăá yem nzá mos Ntí wenan aa ye sɔ́.
43 Ve,
yemŋán é dzam dí ná,
ngé myenn ndá á yem tám fé ye á alú ndzídzíp wá ye sian,
ngé aa ye tɔbɔ evévéñ kaa álík ná ndzídzíp ó bwíñ é ndá dzeñ.
44 Amú dzam te,
mína tɔbɔgán fe nkomann,
amú ná é Mwán Mot aa ye sɔ́ áwola mínăá yem.”
Mbamba oloá ya mbéa oloá
45 “Nzá a ne óloá wá túga dzálá ya mfefák,
éñí é mása weñ a ngá téle kabatás é ndá dzeñ,
á mfá ye ná á vé édí avɔ́ɔ́ ngap bidzí é tám dá yian?
46 Abwará ya óloá te,
éwí é mása weñ aa ye koan ya wɔ́,
weé bɔ amvála te,
éyɔŋ aa ye sɔ́.
47 Ma dzó mína bébélá ná aa ye wɔ́ téle ná ó dzwée é byém byeñ bíse.
48 Ve,
ngé mbéa oloá te ó dzó á nlém weñ été ná,
‘É mása wɔm aa bem,’
49 ó ŋga tára ná wá yít édí avɔ́ɔ́,
ó tébe fe ná wá dzí,
ya áñú bábe béfían meywa.
50 É mása oloá te aa ye sian é mos oloá te wăá yana;
ya fe áwola ó ne kaa áyem;
51 aa ye wɔ́ bíra lére bindáglé aa kee fe é ngap deñ bábe bot meduk;
ó weñ éñe miyónn myá ye bɔ ya fe álaran mesoŋŋ.