É nganán bebɔ biséññ béye áfúp midzík mí vino
20
“Amú ná édzwée ngɔ́mán ye á dzóp dá fonan ya myenn afúp enziŋ a ngá kólo ekúná kírí ná aa ke aa dzéŋ bebɔ biséññ mfá áfúp midzík mí vino deñ.
2 Éde,
a ngá kwíñ kíŋŋ bábe bebɔ biséññ ná aa ye yáán ya bɔ́ táŋ denario mbɔ́ɔ́,
ané a ngá lóm bɔ́ áfúp deñ.
3 Ané a ngá bera ke bebeñ,
ané méwola ebuú ye kíkírí,
véa a ngá yén bebɔ biséññ befé bé tɔɔ́ bivovoba á nseŋ mákít.
4 Éde a ngá dzó bot béte ná,
‘Mína keŋán fe áfúp dam,
ma ye yáán ya mína ntáŋ ó ne nzósoó.’
Véa bé kéñ.
5 Ané a ngá bera ke bebeñ ané amyeré,
ya méwola mé léa ye ngɔgáse,
eé bɔ dzam avɔ́ɔ́.
6 Ve,
niané a ngá bera ke ané méwola mé tán ye ngɔgáse,
éde a ngá koan ya bot befé bé téle,
ané a ngá síli bɔ́ ná,
‘Amú dzé míní tɔɔ́ ó vá ngúrá ntéññ mos bivovoba?’
7 Éde bé ngá yalan ñí ná,
‘Amú ná mot enziŋ eé ndzí bía ñɔŋ éséññ.’
Ané a ngá dzó bɔ́ ná,
‘Mína,
keŋán fe áfúp dam.’
8 Niané ŋgɔgɔ́ e ngá kwíñ,
edé myenn afúp te a ngá dzó é kabatás weñ ná,
‘Lwéegé bebɔ biséññ,
o kee bɔ́ ntáŋ éséññ weba,
wa tára ya ébá bé mvá súgan sɔ́ akekwíñ ébá bé mvá tára sɔ́.’
9 Niané é bot a ngá ñɔŋ éséññ ané méwola mé tán ye ngɔgáse bé ngá sɔ́,
kada mot ye ébe bɔ́ á ŋga ñɔŋ denario mbɔ́ɔ́.
10 Éde,
éyɔŋ é bot bé ngá tára ñɔŋ éséññ bé ngá sɔ́,
béé bwíni ná ébɔ́ bá ye daŋ ñɔŋ;
ve,
bá bé ŋga yáán fe kada mot ye ébe bɔ́ denario mbɔ́ɔ́.
11 Ve,
niané bé ngá ñɔŋ dɔ,
bé ŋga ke bá kéá ya myenn ndá,
12 béé dzó ná,
‘É bot bé mvá súgan sɔ́ bá,
bé bɔ eséññ táŋ áwola avɔ́ɔ́,
ve wa o belan yaá bɔ́ ntéññ mbɔ́ɔ́ ané bía,
bía é bot bí nzomo adziít eséññ ngúrá ntéññ mos,
ya fe ayóŋ.’
13 Ve,
ñí a ngá yalan,
eé dzó mbɔ́ɔ́ ye été ná,
‘Á mwíi,
meé ndzí wa bɔ é dzam é ne ekúkwát;
nde bía wa bĭá kwíñ kíŋŋ ná ma ye yáán ya wa denario mbɔ́ɔ́?
14 Ñɔŋŋe é dzóm dwe,
o kéñ;
ve,
ma ma kómo vé é mot a mvá súgan sɔ́ ñí ábímm me mvá vé fe wa.
15 Ye ná ma me sés filí ye ábɔ é dzam ma kómo ya é dzóm é ne éedam?
Ngé ki ná,
ye wa bɔ ma evínn,
amú ná me ne mbamba mot?’ ”
16 “Néa,
éñe é bot bé téle ó mvús bá ye súgan ósú,
ébá bá bé téle ósú bá ó mvús.
[Amú ná abwiññ bot é ne nlwéán,
ve avítsaŋ édɔ é ne ntɔ́pbán.]”
Yesus aa kat áwú deñ fwéñ éyɔŋ léa
17 Éde Yesus eé bét ná aa ke á Yerusalen,
ané a ngá ke ya awóm beyága ya beyága bé beáñ évwíñ,
bé tɔɔ́ ókaŋŋ été,
éde a ngá dzó bɔ́ ná,
18 “Dággán,
bía bét ná bía ke á Yerusalen,
véa é Mwán Mot bá ye ñí kee ébe betébosú befára ya beyágale métsiŋŋ,
bá ye ñí kík nsaŋ ná aa yian wú;
19 bá ye fe ñí kee bot béye meyɔŋ mefé ná bé kpógo ñí,
bé yít ñí ya áke fe ya ñí á krús,
éde álú léa aa ye wómo.”
Yesus aa yalan ya ñiá Santiago bá Juan
20 Ané ñiá é bwán Zebedeo a ngá nzu koan ya ñí bábe é bwán béñ,
éde a ngá kut ñí mebɔ́ŋŋ ó sí,
eé dzaa ñí dzam.
21 Ve Yesus a ngá síli ñí ná,
“Nzá dzam wa kómo?”
Ané ñí a ngá yalan ya ñí ná,
“Mánaŋán ná é bwán bam bé beáñ bá bé tɔbɔ ósí édzwée ngɔ́mán dwe,
mbɔ́ɔ́ á mfá méyóm we,
éñí mbɔ́ɔ́ ñí á mfá méyéá we.”
22 Ve Yesus a ngá yalan ná,
“Mínăá yem ki é dzam mína dzaa.
Ye míní ne ñú é kɔ́p me nkún ñú,
[ya átɔbɔ nduann ébe ámvála nduann ma me ne ya dɔ nduann]?”
Ané,
bé ngá dzó ñí ná,
“Bí ne ñú.”
23 Éde a ngá dzó bɔ́ ná,
“Bébélá mína ye ñú é kɔ́p dam,
[mína ye fe tɔbɔ nduann ámvála ma me tɔbɔ yaá fe nduann],
ve átɔbɔ ósí á mfá méyóm wɔm,
ngé ki á mfá méyéá wɔm,
é sés é dzam ma ma vé.
Fáve ná é ne á mfá ébá Tará á mana dɔ kom.”
24 Éde éyɔŋ beyága awóm bé ngá wók dzam te,
ané bé ngá yéá ya bɔbéñaŋ bé beáñ béte.
25 Ve Yesus ñí a ngá lwée bɔ́,
a dzóo bɔ́ ná,
“Mína yem ná bedzwée béye meyɔŋ mefé bá dzwée ya nguu,
ya fe ná bora bé bot béye été bá bá dzwée fe bɔ́ ya elaŋ.
26 Dá dăá bɔ amvála te énzénzaŋ denan,
fáve ná é mot aa kómo bɔ bora mot ébe mína,
aa yian bɔ mvwála bíséññ wenan.
27 Éde éñí ñí aa kómo bɔ ntébosú énzénzaŋ denan,
aa ye bɔ óloá wenan;
28 amvála te fe,
é Mwán Mot ñí eé ndzí sɔ́ ná bot bé belan ya ñí,
fáve ná éñe ábelan ya bot,
ya fe ná á vé éniŋ dzeñ akála ákoroga abwiññ bot.”
Yesus aa séñ midzíndzímm mí beáñ
29 Éde éyɔŋ bé ngá kólo á Yeriko,
mora nkuna bot ó ngá bee ñí.
30 Véa,
midzíndzímm mí beáñ mí mbé mí tɔɔ́ ó féñ nzenn,
niané mí ngá wók ná Yesus á ŋga lot yaá,
ané mí ngá yón,
ná,
“Á Ntí,
é Mwán David yénŋe bía engóngɔ́ɔ́!”
31 Éde,
bot bé ngá báma bɔ́ ná bé sis evóó.
Ve bá bé ngá daŋ bera yónyón abwiññ,
ná,
“Á Ntí é Mwán David,
yénŋe bía engóngɔ́ɔ́!”
32 Ané Yesus a ngá tébe,
a lwée bɔ́,
éde a ngá síli bɔ́ ná,
“Nzá dzam mína kómo ná me bɔ mína?”
33 Éde bé ngá yalan ñí ná,
“Á Ntí,
bía kómo ná é mís mea mé yɔ́ŋbe.”
34 Véa Yesus ñí a tɔɔ́ ndzálánn ya nlém engóngɔ́ɔ́,
ané a ngá nama bɔ́ mís,
etéññ te ébyen bé ŋga bera yén,
véa bé ŋga bee fe ñí.