Yesus aa yágale mfá mvas
19
A ngá bɔ ná,
niané Yesus a ngá mana kɔ́bɔ bifíá bíte,
éde a ngá kólo á Galilea,
a kéñ ábeŋŋ sí ye á Judea á Yordán áyát.
2 Éde bora mikuna mí bot mí ngá bee ñí,
ané a ngá séñ bɔ́ ó véa.
3 Éde befariseo benziŋ bé ngá nzu koan ya ñí á mfá ye ná bé bóble ñí,
ané bé ngá síli ñí ná,
“Ye atsiŋŋ dá lére ná fám eé vé ngéá mvas amú akéá áse é ne bɔ?”
4 Ve ñí a ngá yalan ná,
“Ye ná míníí ndzí láŋ ná éñí a ngá vele bɔ́,
atéé ye átáraga aá vele bɔ́ ‘fám bá miningá?’
5 Éde fe a ngá dzó ná,
‘Amú dzam te,
fám da ye lík éséá bá ñiá,
a kéñ fulan bá ngéá,
véa,
bé sés fe bot bé beáñ,
fáve ná bé ntɔɔ́ ñúu fɔ́ɔ́?’
6 Édɔ é ne ná,
bé sés fe bot bé beáñ,
fáve ná ñúu fɔ́ɔ́.
Édɔ ná,
é dzóm Nzamá á lat yaá,
mot a táa dɔ kánan.”
7 Ané bá bé ngá síli ñí ná,
“Amú dzé Moisés a ngá mánan ná bé vé miningá kálara mvas,
véa,
bé suu ñí?”
8 Éde Yesus ñí a ngá yalan ya bɔ́ ná,
“Moisés aá lík ná míní vé é biningá benan mvas akála áleét milém denan;
atéé ye átáraga dá dĕé mbé néa.
9 Ve,
ma ma dzó mína ná,
é mot áse aa vé ngéá mvas,
ngé é sés akála nsémm eveák,
véa a kéñ lúk miningá mfé,
aa bɔ medzíán.
(Éde é mot ñí aa lúk é miningá bé suu,
ñí a bɔ fe medzíán).”
10 Ané béyága beñ bé ngá dzó ñí ná,
“Ngé élat fám bá miningá éñe é ne néa,
é ne mvéáñ ná kaa fáŋ álúk.”
11 Ve ñí a ngá dzó bɔ́ ná,
“Se bot bése ébɔ́ bé ne yébe dzam te,
fáve ébá bé vé yaá dzam te.
12 Amú ná bot benziŋ bé ne biyee ná bá byála dɔ atéé ye mébum beñiá été,
ébá bevɔ́ɔ́ bá bé ne biyee ná bot ébɔ́ bá bɔ bɔ́ dɔ,
é bot bevɔ́ɔ́ bá bé ngá bɔ bébyen biyee akála édzwée ngɔ́mán ye á dzóp.
É mot a ne yébe dzam te,
á yébegé dɔ.”
Yesus aa bwárán ya bɔ́ŋŋ
13 Ané bé ngá sɔ́ ya ñí ya bɔ́ŋŋ benziŋ mfá ábere bɔ́ mó,
ya áyaglan fe.
Ve,
beyága bé ngá báma bɔ́.
14 Véa éñe Yesus a ngá dzó bɔ́ ná,
“Líkgán bɔ́ŋŋ ná bé nzu ébe ma;
míní táa bɔ́ kam ya dɔ,
amú ná ébɔ́ bé ne ya édzwée ngɔ́mán ye á dzóp.”
15 Niané a ngá mana bɔ́ bere mó,
éde a ngá kólo ó véa.
Nkúkúmm ndómán
16 Éde,
mot enziŋ a ngá yit ñí bebeñ,
eé síli ñí ná,
“Á Nyágale nzá mbamba dzam ma yian bɔ,
á mfá ye ná me belé éniŋ é ne mbéámbéá?”
17 Ané Yesus a ngá yalan ya ñí ná,
“Amú dzé wa síli ma mfá é dzam é ne mvéáñ?
Mbɔ́ɔ́ éñe a ne mbamba mot;
ve,
ngé wa kómo ñíi éniŋ é ne mbéámbéá,
baalé memvéná.
18 Éde a ngá síli ñí ná,
“Mevé?”
Ané Yesus a ngá yalan ná,
“Kaa áywíñ mot;
kaa ábɔ medzíán;
kaa ádzíp;
kaa ávé é ngañiá é ne minéa;
19 sémeŋé ésúá bá ñuá;
dziŋŋe fe é mot mbɔ́ɔ́ ané wa dziŋ wámyen.”
20 Véa ndómán te da e ngá dzó ñí ná,
“Me mana baale ásesé te;
dzé é ngén dá dzéŋ ma?”
21 Éde Yesus a ngá yalan ya ñí ná,
“Ngé wa kómo bɔ ñá nzósoó,
kéŋ,
o kuan fe é byém o belé,
o vé byɔ biŋgóŋgɔ́ɔ́ bí bot;
éde,
wa ye belé ntam á dzóp été;
véa,
nzaá o bee ma.”
22 Ve,
niané ndómán te e ngá wók bifíá bíte,
éde a ngá ke eywiññ,
amú ná a mbé a belé abwiññ akúmm.
23 Éde Yesus a ngá dzó béyága beñ ná,
“Bébélá ma dzó mína ná é ne ayéñ ná nkúkúmm ó ñíi édzwée ngɔ́mán ye á dzóp.
24 Ma bera fe mína dzó ná dá daŋ ya ebúbú ná kamelio eé túgan ávéŋŋ ondondɔɔ été,
ye ná nkúkúmm mot ó ñíi édzwée ngɔ́mán Nzamá.”
25 Niané beyága bé ngá wók dɔ,
ané bé ngá bíra voŋbe abwiññ,
béé síli ná,
“Nzá fá aa ye tɔbɔ nkoránn?”
26 Ve Yesus,
eé dága bɔ́,
éde a ngá dzó bɔ́ ná,
“Mfá bot é sés bɔban,
ve mfá Nzamá mam mése mé ne bɔban.”
27 Éde Pedro a ngá yalan,
eé dzó ñí ná,
“Dággé ná,
bí mana lík ásesé ná bía bee wa;
dzé fá bía ye ñɔŋ?”
28 Ané Yesus a ngá dzó bɔ́ ná,
“Ma dzó mína bébélá ná mína é bot míní bee yaá ma,
é tám éniŋ dá ye bera tɔbɔ mfefeñ,
éyɔŋ é Mwán Mot aa ye tɔbɔ ósí étɔɔ́ édzwée ye á dúmá deñ,
mína mína ye fe tɔbɔ bítɔɔ́ bídzwée awóm ya bí beáñ ná mína kík awóm meyɔŋ ya meyɔŋ mé beáñ méye Israel misaŋ.
29 Éde éñí áse a lík yaá mendá,
ngé ki bɔbéñaŋ,
ngé ki bekéá,
ngé ki éséá,
ngé ki ñiá,
ngé ki bwán,
ngé ki mefóo mé sí,
akála éyola dam,
aa ye byɔ ñɔŋ álot táŋ ntet biyɔŋ,
aa ye fe ñɔŋ tsígá éniŋ é ne mbéámbéá.
30 Ve,
abwiññ é téle ósúá dá ye súgan ó mvús,
édí dá é téle ó mvús dá ósú.”