É ndem Jonás
16
Éde,
befariseo bábe besaduseo bé ngá ke koan ya Yesus,
ná bé bóble ñí,
bé ŋga dzaa ñí ná á lére bɔ́ ndem enziŋ ye á dzóp.
2 Ve,
ñí a ngá yalan ya bɔ́ ná,
“Éyɔŋ ŋgɔgɔ́ da kwíñ mína dzó ná,
‘Dzóp dá ye bɔ mvéáñ,
amú ná dzóp dá yéne evélé’.
3 Kíkírí ñá mína dzó ná,
‘Okos wá ye bɔ émuú,
amú ná dzóp é belé mísínn,
dá vín fe.’
Édɔ ná mína yem kelan éfonann dzóp ya ámvála dá léreban,
ve míní sés kelan méndem má lére metám.
4 Mbéa myee bot ya bebɔ bibwan bá dzéŋ ndem,
ve bá băá ye bɔ́ vé ndem,
fáve éñí Jonás.”
Éde,
a ngá lík bɔ́,
a kéñ.
É levadura befariseo
5 Éde éyɔŋ beyága bé ngá sian á mfá mbɔ́ɔ́ áyát,
bé vwían ná bé sɔ́ ya bidzí.
6 Ané Yesus a ngá dzó bɔ́ ná,
“Dággán,
tɔbɔgán nkée ya é levadura befariseo ya fe besaduseo.”
7 Ve,
bá bé ngá ke bá síli ébyen ya ébyen,
béé dzó ná,
“Aa dzó dɔ akála ná bĭá sɔ́ ya bidzí!”
8 Ve niané Yesus a ngá ñú dɔ táŋ,
éde a ngá dzó bɔ́ ná,
“Á é bot bé belé avítsaŋ mbwínánn,
amú dzé mína ke mína síli ná mínĭí belé bidzí?
9 Ye ná míní ngén kaa áwók,
mínăá síman ki fe mífémm mí tán me ngá vé bot binzuk bí tán (5,000) bidzí,
éde míní ngá kóán mikpéñ táŋ?
10 Ye mínăá síman ki fe mífémm zaŋgbéá me ngá vé bot binzuk bí nii (4,000) bidzí,
mikpéñ míní ngá kóán táŋ á yá?
11 Amú dzé mínăá wók ná mĕé mvá kɔ́bɔ ya mína dzam mifémm,
fáve ná tɔbɔgán nkée ya é levadura befariseo ya besaduseo?”
12 Véa,
éñe bé ngá yem ná ĕé ngá dzó bɔ́ ná bé tɔbɔ nkée ya é levadura mifémm,
fáve ná méyágalé befariseo ya besaduseo.
Pedro aa dzó ná Yesus éñe a ne Kristo
13 Niané Yesus a ngá sian ábeŋŋ sí ye á Sesarea ye á Filipos,
éde a ngá síli béyága beñ ná,
“Bot bá dzó ná é Mwán Mot a ne nzá?”
14 Ané bé ngá dzó ná,
“Bot bevɔ́ɔ́ bá dzó ná Juan Ndubot,
ébá bevɔ́ɔ́ bá ná Elías,
ya fe ébá bevɔ́ɔ́ Jeremías ngé ki mot enziŋ ye bekúlu medzó.”
15 Éde a ngá síli bɔ́ ná,
“Ve mína,
mína dzó ná me ne nzá?”
16 Ané Simón Pedro a ngá yalan ná,
“Wa o ne Kristo,
é Mwán é Nzamá a ne ntétéá.”
17 Véa Yesus ñí a ngá yalan ya ñí ná,
“Á Simón,
é mwán Jonás,
abwará é bɔɔ́ge ya wa,
amú ná se mison é myɔ mí lére wa dɔ,
ngé ki mekií,
fáve é Tará a ne á dzóp été.
18 Ma ma dzó fe wa ná,
wa o ne Pedro,
éde ébe ákwá dí áyóp ma ye lóŋ ékóánn bebwíni dam;
éde mibéñ míye sí békónn myăá ye dɔ wún.
19 Wa ma ye kee bídzipga bíye édzwée ngɔ́mán ye á dzóp;
éde édí áse wa ye tsini á sí ó vá,
dá ye tɔbɔ ntsinann á dzóp;
édí áse dá wa ye tsii á sí ó vá,
dá ye tɔbɔ ntsiián á dzóp.”
20 Éde a ngá mánan beyága ná bé táa kat mot enziŋ ná éñe a ne Kristo.
Yesus aa kat áwú deñ fwéñ
21 Atéé ye tám te édɔ,
Yesus a ngá tára ná aa lére béyága beñ ná aa yian ke á Yerusalen,
ya fe a yén abwiññ midzuúk é mó mikúkúmá,
ya betébosú befára,
ya fe beyágale métsiŋŋ,
ná bá ye ñí ywíñ,
ve aa ye wómo alú léa.
22 Éde Pedro a ngá ke ya ñí évwíñ,
á ŋga tára ná a báma ñí dɔ,
eé dzó ná,
“Á Ntí,
yénŋe wámyen engóngɔ́ɔ́!
Dzam te dăá ye wa bɔ tám enziŋ!”
23 Ve Yesus,
eé veŋan,
éde a ngá dzó Pedro ná,
“Á Sátan,
tébegé ma ómvús!
O ne ma ekɔp obaá;
wăá tém fá é mam Nzamá,
fáve é mam bot.”
24 Éde Yesus a ngá dzó béyága beñ ná,
“Ngé mot enziŋ aa kómo ma bee,
á ñímŋe émyen mam,
á baga é krús deñ,
a bee fe ma.”
25 Amú ná éñí áse aa kómo koro éniŋ dzeñ,
aa ye dɔ dzímle.
Ve éñí áse ñí aa dzímle éniŋ dzeñ,
ákála dam,
aa ye koan ya dɔ.
26 Amú ná nzá abúánn mot aa ye ñɔŋ ngé aa wún eniŋ ngúrá,
ve a dzímle nsísim weñ?
Ngé ki ná nzá dzóm mot a ne foan ya dɔ ya nsísim weñ?
27 Amú ná é Mwán Mot a nkún sɔ́ ya é dúmá Éséá été,
bábe é baángel béñ,
véa éñe aa ye yáán ya kada mot,
amvála ané mbɔann weñ ó ne.
28 Ma dzó mína bébélá ná bot benziŋ bé ne ó vá ná băá ye kyak awú kaa ná bé tára yén é Mwán Mot eé sɔ́ édzwée ngɔ́mán deñ été.”