É dzóm dá vé mot mvin
15
Éde beyágale métsiŋŋ benziŋ bábe befariseo béye á Yerusalen bé ngá nzu koan ébe Yesus,
béé dzó ná,
2 “Amú dzé béyága bwe bá tsam ómvúgá mikúkúmá?
Amú ná băá sop mó éyɔŋ bá dzí.”
3 Ané,
ñí a ngá yalan ya bɔ́ ná,
“Amú dzé mína mína tsam memvéná mé Nzamá akála ómvúgá wenan?
4 Amú Nzamá a ngá dzó ná,
‘Sémeŋé ésúá bá ñuá’,
ya fe ná,
‘É mot aa kɔ́bɔ éséá abé,
ngé ki ñiá,
aa yian wú.’
5 Ve,
mína mína dzó ná é mot aa dzó éséá ngé ki ñiá ná,
‘É dzóm áse ma tɔɔ́ wa vwála ya dɔ,
é ntɔɔ́ ma bivévé á mfá Nzamá;’
6 a sés fe ntsinann amvála enziŋ ná á séme éséá ngá ki ñiá.
Amvála te édɔ mína lík ná efíá Nzamá é bɔ kaa ábelé eban,
akála ómvúgá wenan.
7 Á bot meduk!
Nde Esaía aá yem kúlu ádzó dí á mfá wenan,
éyɔŋ a ngá dzó ná,
8 ‘Áyɔŋ dí dá vé ma esémm ya biyéá,
ve mílém myeba myá mí ne ma oyaáp.
9 Bá kaŋ ma á nzeze nkaŋann,
méyágalé meba mé ne fáve metsiŋŋ mé bot.’ ”
10 Éde eyɔŋ a ngá lwée nkuna bot,
ané a ngá dzó bɔ́ ná,
“Béágán,
yemŋán fe ná;
11 se é dzóm dá ñíi mot ánu édɔ dá vé mot mvin;
fáve ná,
é dzóm dá kwíñ mot ánu,
édɔ dá vé mot mvin.
12 Eyɔŋ te,
beyága bé ngá yit ñí bebeñ,
béé dzó ñí ná,
“Ye wa yem fá ná,
befariseo bé bábe niané bé wók bifíá bwe?”
13 Ané Yesus a ngá yalan ná,
“Élé ése é Tará a ne á dzóp été eé ndzí beñ,
bá ye dɔ téñ.
14 Líkgán bɔ́;
bé ne mídzíndzímm myá lére mídzíndzímm mívɔ́ɔ́ nzenn.
Éde,
ngé ndzíndzímm wá lére ndzíndzímm mbɔ́ɔ́ nzenn;
bé beáñ bá ye ku ébéññ.”
15 Éde Pedro a ngá yalan ya ñí ná,
“Katge bía ané é nganán ñí da yíli.”
16 Ané a ngá dzó ná,
“Ye ná mína míní ngén fe kaa áyem wók?
17 Ye mínăá yem ná é dzóm áse dá ñíi mot ánu dá ke ósaŋŋ,
véa,
é kéñ fe édúk été?
18 Ve é dzóm dá kwíñ mot ánu dá sɔ́ á nlém,
dzóm te édɔ dá vé mot mvin.
19 Amú ná mbéa bá atémŋa,
nywíán bot,
medzíán,
ngé ki mísémm mí eveák,
dzíp,
ávé é ngañiá é ne mineá,
ya nkɔ́bɔ abé;
é ne mam méte má sɔ́ á nlém.
20 Mam méte émɔ mé ne é mam má vé mot mvin;
ve ádzí kaa átára sop mó dăá vé mot mvin.
Mbwínánn ngwan Kananita
21 Éde,
Yesus eé kólo ó véa,
ané a ngá ke mébeŋŋ mésí méye á Tiro ya Sidón.
22 Véa,
miningá enziŋ ya ábeŋŋ sí te a tɔɔ́ ngwan Kananita á ŋga yón,
eé dzó ná,
“Á Ntí,
é Mwán David yénŋe ma engóngɔ́ɔ́;
bembéa misísim mí belé ngwan dzam abé.”
23 Ve Yesus ñí eé ndzí yalan ya ñí dzam enziŋ.
Éde béyága beñ,
béé yit ñí bebeñ,
ané bé ngá dzaa ñí ná,
“Yáágán ya ñí,
amú aa nzu aa yón bía á mvús.”
24 Éde Yesus a ngá yalan ná,
“Bá lóm ma fáve ébe mítómá mí mana yaá dzími áyɔŋ Israel été.”
25 Ve,
miningá te,
a ngá yít bebeñ a kútbe ó sí ébe ású deñ,
eé dzó ná,
“Á Ntí,
vwálagé ma!”
26 Ané Yesus a ngá yalan ná,
“É sés mvéáñ ná bé ñɔŋ mfémm bwán ná bá kee wɔ́ bemvú.”
27 Ve,
miningá te ñí a ngá dzó ná,
“Á Ntí é ne bébélá;
ve atwaa bemvú bá bá dzí fe médzá má ku é bot bé ne ya bɔ́ ó téble ásí.”
28 Éyɔŋ te,
éde Yesus a ngá yalan ya ñí ná,
“Á miningá,
mbwínánn we ó ne onén!
Eé bɔɔ́ge wa amvála ané wa kómo.”
Ané ngwan deñ é ngá tɔbɔ mvwaá atéé ye áwola te.
Yesus aa séñ abwiññ mikúkwann
29 Éde Yesus,
eé kólo ó véa a ngá ke sian á nsá máŋ méye á Galilea,
ané a ngá ke á nkoó óyóp,
a tɔbɔ ósí ó véa.
30 Ané abwiññ bot é ngá yit ñí bebeñ,
béé sɔ́ ya miyéyém,
mibóbók,
midzíndzímm,
mimvúmvúk ya abwiññ mikúkwann mifé;
éde bé ngá bwíi myɔ mébɔ ósí meñ.
Ané a ngá séñ myɔ,
31 akekwíñ ná nkuna bot ó ngá kám éyɔŋ ó ngá yén ná mimvúmvúk mí ŋga kɔ́bɔ yaá,
miyéyém mí ŋga tɔbɔ yaá mvwaá,
mibóbók mí ŋga wulu yaá,
mídzíndzímm mí ŋga yén yaá;
ané bé ngá vé Nzamá ye Israel dúmá.
Yesus aa vé nkuna bot bidzí
32 Ve Yesus,
niané a ngá lwée béyága beñ,
éde a ngá dzó bɔ́ ná,
“Ma yén nkuna bot wí engóngɔ́ɔ́,
amú ná é ntɔɔ́ melú mé léa avé bíabe bɔ́ bí tɔbɔ ó vá,
ébɔ́ kaa ábelé é dzóm bá dzí;
măá kómo ki yáán ya bɔ́,
béé wók nzeñ,
bé nza ke bá kip ya nzeñ ókaŋŋ été.”
33 Ané,
beyága bé ngá síli ñí ná,
“Vóm mbé bía ye koan ya ábímm bidzí é mora nkuna bot wí ó ne dzéñ éyáŋŋ été ó vá?”
34 Ané,
Yesus a ngá dzó bɔ́ ná,
“Míní belé mifémm táŋ á yá?”
Éde,
bé ngá yalan ná,
“Zaŋgbéá,
ya ayomm akúkwaás.”
35 Éde,
eé mánan nkuna bot ná ó mana tɔbɔ ósí metsɔɔ́;
36 ané,
a ngá ñɔŋ mifémm zaŋgbéá ya kwaás;
niané a ngá vé akíba,
éde a ngá kap myɔ,
á ŋga kee myɔ béyága beñ,
bá bé ŋga kee nkuna bot.
37 Ané,
bésesé bé ngá dzí,
bé dzéñ;
éde bé ngá kóán ábímm bítun é ngá buk táŋ mikpéñ zaŋgbéá ndzálánn.
38 Ábímm bot é ngá dzí é mbé befám binzuk bí nii (4,000),
kaa áláŋ biningá ya bɔ́ŋŋ.
39 Éde,
niané a ngá mana yáán ya mikuna mí bot,
ané a ngá daŋ á byéa été,
a kéñ ábeŋŋ sí ye á Magadán.