Áwú Juan Ndubot
14
Tám te Erodes,
éñí a ngá dzwée á Galilea,
a ngá wók éwógá Yesus;
2 éde,
a ngá dzó bébɔ biséññ béñ ná,
“Mot te a ne Juan Ndubot,
a wómo yaá fe míwúán été,
ya akála te édɔ a belé ya dɔ nguu mfá ábɔ biyágán bí mam.”
3 Amú ná Erodes a ngá biñ Juan,
a mana ñí ká,
a fet fe ñí á mbok,
ya étɔm Erodias,
é miningá mwanñaŋ Felipe.
4 Amú Juan a ngá dzó ñí ná,
“Atsiŋŋ dăá yébe wa ná o belé miningá te.”
5 Éde,
Erodes eé kómo ñí ywíñ,
ve,
a ngá kɔ ayɔŋ ngúrá wɔŋŋ,
akála ná é ngá ñɔŋ Juan ané nkúlu medzó.
6 Ve éyɔŋ Erodes a ngá dzémle fét ndzálánn mibú,
Erodias ngwan dzeñ,
é ŋga dzém énzénzaŋ deba été,
ané dzam te é ngá tɔbɔ Erodes mvéáñ.
7 Akála te édɔ a ngá kyaa ñí ya nkanann sɔŋ ná a vé ñí é dzóm áse aa ye ñí dzaa.
8 Ve,
é tɔɔ́ ná ñiá a mana yaá ñí túm ásí,
éde a ngá dzó ná,
“Vá ma,
nló Juan Ndubot éfela été ó vá.”
9 Ané kéza a ngá tɔbɔ eywiññ,
ve ákála nkanann sɔŋ weñ,
ya fe akála é bot bábe bɔ́ bé mbé bé tɔɔ́ ó téble,
éde a ngá mánan ná bé kee ñí wɔ́.
10 Véa,
a ngá mánan á ndá míbok ná bé kík Juan nló.
11 Ané bé ngá sɔ́ ya nló Juan éfela été,
éde bé ngá kee wɔ́ mwann miningá te,
ñí á kee fe wɔ́ ñiá.
12 Éde béyága Juan bé ngá sian,
bé ñɔŋ mbim,
bé kéñ wɔ́ dzep;
ané bé ngá ke dɔ kat Yesus.
Yesus aa vé nkuna bot bidzí
13 Niané Yesus a ngá wók dɔ,
éde a ngá kólo ó véa á byéa été,
a kéñ vóm enziŋ évwíñ etámm.
Niané mikuna mí bot mí ngá yem dɔ,
éde bé ngá bee ñí ósí béé sɔ́ békísoan beba.
14 Niané Yesus a ngá sis ósí,
ané a ngá yén mora nkuna bot,
éde a ngá yén bɔ́ engóngɔ́ɔ́,
véa á ŋga séñ míkúkwann myeba.
15 Niané ŋgɔgɔ́ e ngá kwíñ,
ané béyága beñ bé ngá yit ñí bebeñ,
béé dzó ná,
“É vóm wí ó ne évwíñ,
ŋgɔgɔ́ da eé ntɔɔ́ fe;
yáágán ya mikuna mí bot ná bé ke á meá ná bébyen bé kus bidzí.”
16 Ve Yesus ñí a ngá yalan ya bɔ ná,
“Băá yian ke;
mína bébyen váán bɔ́ é dzóm bá dzí.”
17 Éde bá bé ngá dzó ñí ná,
“Bí belé ó vá fáve mifémm mí tán ya kwaás é beáñ.”
18 Ané ñí a ngá dzó bɔ́ ná,
“Nzaán ma ya byɔ ó vá.”
19 Niané a ngá mánan nkuna bot ná ó tɔbɔ ósí bílwá été;
ané a ngá ñɔŋ mifémm mí tán ya kwaás é beáñ bíte,
a bére mís á dzóp été,
á ŋga vé abwará ya byɔ,
éde a ngá kap mifémm,
á ŋga kee myɔ beyága,
ná beyága bá bé kee nkuna bot.
20 Éde bésesé bé ngá dzí,
bé dzéñ.
Ané bé ngá mana kóán mebukga bitun táŋ awóm mikpéñ ya mikpéñ mí beáñ ndzálánn.
21 É bot bé ngá dzí bé mbé befám táŋ binzuk bí tán (5,000),
kaa áláŋ biningá ya bɔ́ŋŋ.
Yesus aa wulu mendzímm áyóp
22 Etéññ te ébyen,
éde Yesus a ngá bɔ ná beyága bé daŋ á byéa été á mfá ye ná bé tára ñí ke ósú á mfá áyát,
ntéññ a ngá yáán ya mikuna mí bot.
23 Niané a ngá mana yáán ya mikuna mí bot,
ané a ngá bét nkoó etámm,
ná aa ke yaglan.
Éyɔŋ alú é ngá kwíñ émyen a mbé ó véa etámm.
24 Ve ákoan ná byéa ó ntɔɔ́ oyaáp á máŋ été,
mikebá myá mí ngá ndágle fe wɔ́,
amú ná évúŋ é ngá sɔ́ wɔ́ ósú.
25 Éde,
bebeñ ané méwola mé tán ye á alú,
Yesus a ngá ke é vóm bé mbé,
eé wulu á máŋ áyóp.
26 Niané beyága bé ngá yén ñí eé wulu á máŋ áyóp,
bé ŋga ku ngom,
béé dzó ná,
“A ne kónn!”
“Yémŋán nguu,
a ne ma!
Míní táa kɔ wɔŋŋ!”
28 Véa Pedro a ngá dzó ñí ná,
“A Ntí,
ngé a ne wa,
mánaŋán ma ná me nzu é vóm o né,
meé wulu méndzímm áyóp.”
29 Éde a ngá dzó ñí ná,
“Nzá!”
Ané Pedro a ngá kólo á byéa été,
á ŋga wulu méndzímm áyóp,
eé ke é vóm Yesus a mbé.
30 Ve,
niané a ngá yén mora évúŋ,
á ŋga kɔ wɔŋŋ,
ané a ngá ñáŋán,
eé yón,
ná,
“A Ntí korogé ma!”
31 Ané,
etéññ te ébyen,
Yesus a ngá sám wéá ná a biñ ñí,
eé dzó ñí ná,
“Á é mot a belé mbwínánn avítsaŋ.
Amú dzé o yep á nlém été?”
32 Éde,
ntéññ bé ngá daŋ á byéa été,
ané evúŋ é ngá sim.
33 Éde é bot bé mbé á byéa été bé ngá kaŋ ñí,
béé dzó ná,
“Bébélá,
wa o ne é Mwán Nzamá.”
Yesus aa séñ mikúkwann á Genesaret
34 Niané bé ngá kígán máŋ,
ané bé ngá ke sian ábeŋŋ sí ye á Genesaret.
35 Éde,
é bot béye vóm te béé yem ñí,
ané bé ngá lóm ná bé ke bá kat dɔ vóm te áse ya mévóm má boman ñí,
béé sɔ́ ya ñí é bot bése bé mbé bé belé akwann.
36 Ané,
bé ngá dzaa ñí engóngɔ́ɔ́ ná á lík bɔ́ ná bé nama ñí atwaa afaáp etóp deñ;
éde é bot bése bé ngá nama dɔ bé ngá tɔbɔ mvwaá.
Jesús camina sobre el agua (Mateo 14.22-36)