É nganán mbeñ mvɔŋ
13
Éde mos te Yesus a ngá kólo á ndá a kéñ tɔbɔ á nsá máŋ.
2 Ané abwiññ bot é ngá ke koan ya ñí,
éde a ngá daŋ á byeá a tɔbɔ été;
nkuna bot óse wá ó mbé ó téle á nsá máŋ.
3 Éde a ngá kɔ́bɔ bɔ́ abwiññ mam ya menganán,
eé dzó ná,
“Béágán!
Mbeñ mvɔŋ a ngá ke beñ mvɔŋ.
4 Véa,
eé beñ,
abímm mvɔŋ enziŋ é ngá ku á nzenn áyóp,
éde anwann é ngá sɔ́,
é mana dɔ dzí.
5 Ábímm avɔ́ɔ́ dá é ngá ku mékwá été,
é vóm sí dĕé mbé abwiññ;
ané e ngá dzíga féá,
amú ná sí e mbé avítsaŋ.
6 Ve,
niané nlódzóp ó ngá kwíñ,
éde é ngá wúlán;
ya amú kaa ábelé midzi,
ané é ngá kót.
7 Ve abímm avɔ́ɔ́ dá é ngá ku míséé été;
ané miséé mí ngá vém,
mí ŋga vé dɔ abúk.
8 Ve abímm avɔ́ɔ́ dá é ngá ku á mbamba sí;
éde e ngá wúm bibumá,
éñí ntet bibumá,
éñí fɔ́ɔ́ bibumá mewóm mé saman,
éñí fɔ́ɔ́ da bibumá mewóm mé léa.
9 É mot a belé melɔ́,
á wókge.
Amú dzé menganán
10 Éde,
beyága bé ngá yit ñí bebeñ,
bé ŋga síli ñí ná,
“Amú dzé wa kɔ́bɔ ya bɔ́ ya menganán?”
11 Éde a ngá yalan,
eé dzó ná,
“Mína bé vé yaá fá ná míní yem é mam má nzaman kén mot méye édzwée ngɔ́mán ye á dzóp,
ve mfá ébɔ́,
béé ndzí bɔ́ dɔ vé.
12 Amú ná é mot a belé,
éñe bá ye bera vé,
véa aa ye belé abwiññ.
Ve,
éñí ĕé belé,
atwaa édí a belé,
bá ye ñí dɔ vea.
13 Akála te édɔ,
ma kɔ́bɔ ya bɔ́ ya menganán;
amú ná atwaa bá dága,
băá yén;
atwaa bá béá,
băá wók,
ngé ki áyem.
14 Éde nkúlánn ádzó Esaía wá dzálában ébe bɔ́,
éwí wá dzó ná,
‘Ya melɔ́ mína ye wók,
ve mínăá ye yem;
míníí yén,
mína ye yén,
ve mínăá ye ñɔŋ dzam enziŋ.
15 Amú ná nlém áyɔŋ dí ó ntɔɔ́ aleét,
ya ndzuúk bá béá ya melɔ́ meba.
Mís má mé dzip yaá fe bɔ́;
a nza bɔ tám enziŋ ná bé yén ya mís,
bé wók ya melɔ́,
bé wórán ya nlém,
béé búlán ébe ma,
ma me séñ fe bɔ́.’
16 Ve,
abwará ya é mís menan,
amú má yén;
melɔ́ menan,
má má wók.
17 Amú ma dzó mína bébélá ná,
abwiññ bekúlu medzó ya benzósoó bé bot bé ngá kómo yén é mam mína yén má,
ve béé ndzí mɔ yén;
bé ngá kómo fe wók é mam mína wók má,
ve béé ndzí mɔ wók.”
Áyílíga é nganán mbeñ mvɔŋ
18 “Édɔ ná,
béágán ané nganán mbeñ mvɔŋ da yíli:
19 É mot áse aa wók efíá ye édzwée ngɔ́mán ye á dzóp,
ve kaa dɔ áyem,
véa,
mbéa mot aa sɔ́ aa téñ ñí é dzóm é tɔbɔ ñí mbeann á nlém weñ été.
Mot te éñe a ne é mvɔŋ e ngá ku á nzenn áyóp.
20 Ve,
éñí da e ne é mvɔŋ e ngá ku mékwá été,
é mot aa wók efíá Nzamá,
etéññ te ébyen aa ñɔŋ dɔ ya mesán;
21 ve,
émyen ĕé belé midzi,
a tɔbɔ fáve oyomm abɔ́ŋŋ tám;
niané aa yén midzuúk akála efíá,
ngé ki ná bá dzéŋ ñí ásí,
etéññ te ébyen aa dzímle mbwínánn.
22 Ve é mvɔŋ e ngá ku míséé été,
da e ne é mot aa wók efíá,
ve é mam má kele bot milém ó yóp é tám ñí,
ya meduk mé akúmm,
má mana ñí vé efíá abúk,
ané efíá dá súgan kaa fe áwúm bibumá.
23 Ve é mvɔŋ e ngá ku mbamba sí,
édɔ e ne é mot aa wók efíá,
eé yem dɔ;
mot te éñe aa wúm bibumá.
Éñí da wúm ntet,
éñí fɔ́ɔ́ mewóm mé saman,
éñí fɔ́ɔ́ da mewóm mé léa.”
É nganán mbéa elwá
24 Ané Yesus a ngá bera bɔ́ kan nganán fe,
eé dzó ná,
“Édzwée ngɔ́mán ye á dzóp dá fonan ya é mot a ngá beñ mbamba mvɔŋ áfúp deñ;
25 ve,
ntéññ bot bé ngá ke óyó,
nsíŋ ñí a ngá sɔ́,
éde a ngá beñ mbéa mvɔŋ énzénzaŋ trigo été,
ané a ngá ke.
26 Ve éyɔŋ trigo e ngá féá,
é ŋga wúm bibumá,
véa,
mbéa elwá ñí a ngá yéne fe.
27 Éde áloá myenn ndá é ngá ke ñí dzó ná,
‘A mása,
nde weé ndzí beñ mbamba mvɔŋ áfúp?
Amú dzé o mbelé mbéa elwá?’
28 Ve ñí a ngá dzó bɔ́ ná,
‘Nsíŋ éñe á sɔ́ dɔ bɔ.’
Éde aloá é ngá síli ñí ná,
‘Ye wa kómo ná bí ke dɔ téñ?’
29 Ve ñí a ngá dzó bɔ́ ná,
‘Kaa,
a nza bɔ ná éyɔŋ mína téñ mbéa elwá míní ŋga téñ fe mbamba mvɔŋ fufúlu.
30 Líkgán ná bé beáñ bé vém vóm mbɔ́ɔ́ akekwíñ éyɔŋ bá ye ñɔŋ bidzí;
éde ma ye dzó é bot bá ñɔŋ bidzí ná táragán téñ mbéa elwá,
míní ká ma ñí mibɔm ná bé dzígi ñí,
ve ñɔŋŋán trigo míní nii dɔ é sitúa dam.’ ”
É nganán nsɔ́ Mostasa
31 Éde Yesus a ngá bera bɔ́ kan nganán fe,
eé dzó ná,
“Édzwée ngɔ́mán ye á dzóp dá fonan ya nsɔ́ mostasa,
éwí mot a ngá ñɔŋ aa beñ wɔ áfúp deñ.
32 É tɔɔ́ fe ná éwɔ wá daŋ ya avítsaŋ álot mísɔ́ míse;
ve éyɔŋ ó vém yaá,
ó ne éwí wá daŋ ya ndén álot bilwá bíse,
ó veŋan elé,
akekwíñ ané anwann ye á dzóp dá sɔ́,
é ŋga lóŋ fe mumá mítem myeñ.”
É nganán levadura
33 Éde,
a ngá bera bɔ́ kan nganán fe ná,
“Édzwée ngɔ́mán ye á dzóp dá fonan ya é levadura miningá a ngá ñɔŋ,
a nii dɔ á vuvú été,
vuvú te e tɔɔ́ mivakgán mí léa,
akekwíñ ané ásesé a ngá mana vús.”
Mitsili myá dzálában
34 Éde Yesus a ngá kɔ́bɔ ya mikuna mí bot mam méte mése ya menganán,
ĕé ngá kɔ́bɔ ya bɔ́ dzam enziŋ kaa nganán.
35 Édɔ á mfá ye ná é dzam nkúlu medzó a ngá dzó é dzálában,
ná,
“Ma ye kúu anu dam ya menganán;
ma ye kúlu é mam má tɔɔ́ miswalann
atéé ye átáraga eniŋ.”
Áyílíga é nganán mbéa elwá
36 Niané a ngá lík mikuna mí bot,
a kéñ ñíi á ndá.
Ané béyága beñ bé ngá yit ñí bebeñ,
béé dzó ná,
“Katge bía ané é nganán mbéa elwá ye áfúp da yíli.”
37 Éde,
a ngá yalan ya bɔ́ ná,
“É mot a beñ mbamba mvɔŋ,
éñí a ne é Mwán Mot;
38 afúp dá é ne éniŋ dzí;
mbamba mvɔŋ ñí a ne bwán béye édzwée ngɔ́mán,
mbéa elwá a ne é bwán mbéa mot,
39 nsíŋ ñí a ngá beñ dɔ éñí a ne déble.
É tám bá ñɔŋ bidzí da e ne ásúgánn ye é tám ñí,
é bot bá ñɔŋ bidzí bá bé ne baángel.
40 Édɔ ná,
amvála avɔ́ɔ́ bá wɔ́gɔ mbéa elwá mibɔm bé ŋga dzígi ñí á ndúán,
amvála te fe dá ye bɔ ásúgánn é tám ñí.
41 É Mwán Mot aa ye mánan é baángel béñ ná bé mana vea,
édzwée ngɔ́mán deñ été,
é bot bése bá bɔ ná bot bé dzímle mbwínánn ya betsam metsiŋŋ.
42 Bá ye bɔ́ wea ébéññ ndúán été;
ó wéñ éñe bá ye yón ya álaran mesoŋŋ.
43 Véa,
benzósoó be bot bá ye feañ ané nlódzóp édzwée ngɔ́mán Éséá weba.
É mot a belé melɔ́,
á wókge.”
É nganán ewála ákúmm
44 “Édzwée ngɔ́mán ye á dzóp dá fonan ané ntam ó ne nswalann áfúp été,
niané mot a ngá yén wɔ́,
éde a ngá bera wɔ́ swala;
ya mesán akála ntam te,
a kéñ mana kuan é dzóm áse a belé ná aa kus afúp te.”
É nganán akwá perla
45 “Édzwée ngɔ́mán ye á dzóp dá fonan fe ya mbɔ okira aa dzéŋ mekwá mé perla mé ne mvéáñ;
46 niané a koan ya akwá perla e ne ya éban,
a kéñ mana kuan é dzóm áse a mbé a belé,
á kus dɔ.”
É nganán avwát
47 “Édzwée ngɔ́mán ye á dzóp dá fonan fe ya é mora avwát bá wea á máŋ été,
é mana biñ kwaás memvála mése.
48 Niané dá dzéñ,
bé sɔ́ ya dɔ á nsá máŋ,
ané bot bá tɔbɔ ósí bé ŋga tɔ́p é kwaás e ne mvéáñ,
béé nii dɔ mikpéñ été,
ve bá wea éñí e ne abé ó féñ.
49 Éñe ásúgánn é tám ñí dá ye bɔ néa;
baángel bá ye kólo,
bé ŋga kána mbéa bé bot énzénzaŋ benzósoó bé bot été;
50 bé kéñ bɔ́ wea ébéññ ndúán été;
ó wéñ éñe bá ye yón ya álaran mesoŋŋ.”
Mfefeñ ya nnomm
51 “Ye míní wók yaá é mam má mése?”
Ané bé ngá yalan ya ná,
“Bí wók yaá.”
52 Éde a ngá dzó bɔ́ ná,
“Amú dzam te,
nyágale metsiŋŋ áse ná á veŋan yaá nyága ye édzwée ngɔ́mán ye á dzóp,
aa fonan ané é myenn ndá aa vea ébe ntam weñ mifefeñ ya miyomm.”
Yesus a ne á Nasaret
53 Éde,
a ngá bɔ ná,
niané Yesus a ngá mana vé menganán má,
ané a ngá kólo ó véa.
54 Éde,
niané a ngá ke sian é dzeá deñ,
éde a ngá tára ná aa yágale bot á sinagoga weba été,
akekwíñ ná bé ŋga ku mevoó,
béé síli ná,
“Éñí aá ñɔŋ é kén ñí ya menguu má vóm mbé?
55 Nde se é mwán káfina éñe ñí?
Se ñiá éñe bá lwée ná María,
bɔbéñaŋ bá Jakobo,
José,
Simón,
ya Judas?
56 Nde bekéá bése bé sés bíabe bɔ́ ó vá?
Éñí aá ñɔŋ é mam má mése vóm mbé?”
57 Ané bé ngá dzímle mbwínánn ébe éñe.
Ve Yesus ñí a ngá dzó bɔ́ ná,
“Nkúlu medzó a ne kaa ngaŋŋ,
fáve é dzeá deñ émyen ya é ndá bot dzeñ.”
58 Éde,
eé ndzí fe bɔ abwiññ mam méye menguu ó wéñ,
akála é kaa mbwínánn weba.