É mos Sátará
12
Tám te Yesus a ngá lot méfúp été é mos Sátará,
béyága beñ bá bé ŋga wók nzeñ.
Ané bé ngá tára ná bá téñ mebáma,
bé ŋga dzí.
2 Niané befariseo bé ngá yén dɔ,
éde bé ngá dzó ñí ná,
“Dággé ná,
béyága bwe bá bɔ é dzam atsiŋŋ dăá yébe ná bé bɔ é mos Sátará.”
3 Ve,
ñí a ngá dzó bɔ́ ná,
“Ye ná mínăá bé láŋ é dzam David a ngá bɔ,
éyɔŋ bábe é bot bá bé bɔ́ bé mbé bé ngá wók nzeñ.
4 Amvála a ngá ñíi é ndá Nzamá été,
bé ŋga dzí mífémm mí ne ya ntélán mam áyát,
é tɔɔ́ ná atsiŋŋ dăá yébe ná bé dzí,
fáve befára etámm;
éñe ya é bot bábe bɔ́ bé mbé?
5 Ngé ki ná,
ye mínăá bé láŋ nkɔɔ́ métsiŋŋ été ná é mos Sátará,
befára á templo été bá séñ,
ve bé lígi kaa bidzo?
6 Ve,
ma dzó mína ná éñí aa daŋ templo a ne ó vá.
7 Ve,
ngé míní yem é dzam dá yíli dí,
ná,
‘Ma kómo nyénánn engóngɔ́ɔ́,
se metúnŋa’,
ngé mínăá vé é bot bé ne kaa bidzo meku.
8 Amú ná é Mwán Mot a ne ndzwée ye é mos Sátará.”
Yesus aa séñ nkúkwann é mos Sátará
9 Niané a ngá kólo ó véa,
éde a ngá ñíi á sinagoga weba été.
10 Ané,
mot enziŋ a mbé ó véa a belé nkát enam.
Éde,
á mfá ye ná bé belé é dzam bá sɔ́mán ya dɔ Yesus,
ané bé ngá síli Yesus ná,
“Ye atsiŋŋ dá yébe ná bé séñ mot é mos Sátará?”
11 Ve,
ñí a ngá yalan ya bɔ́ ná,
“Mot mbé ye ébe mína a ne bɔ ná,
ngé a belé ntómá mbɔ́ɔ́,
ngé ntómá te ó kpéñ ñí ébéññ é mos Sátará,
ñí a lík wɔ́ kaa wɔ́ ábiñ ávea wɔ́?
12 Ye ná mot binam ñí aa daŋ fá ya eban álot ntómá?
Dzam te dɔ,
bá yian yébe ná bé bɔ mvéáñ é mos Sátará.”
13 Ané a ngá dzó mot te ná,
“Sámŋe énam dwe!”
Éde a ngá sám dɔ,
ané é ngá lígi ñí mvwaá ané édí evɔ́ɔ́.
14 Ve,
niané befariseo bé ngá kwíñ átán,
éde bé ngá bɔ eswaá,
á mfá ye ná bé ywíñ ñí.
15 Ve Yesus,
eé yem dɔ,
ané a ngá kólo ó véa,
abwiññ bot dá é ŋga bee ñí,
éde á ngá ke aa séñ bɔ́ bésesé.
16 Ané,
a ngá báma bɔ́ ná bé táa bɔ ná bé yem ñí;
17 á mfá ye ná é dzam nkúlu medzó Esaía a ngá kɔ́bɔ é dzálában,
ná,
18 “Dággán ná,
mbɔ biséññ wɔm,
éñe me tɔ́p yaá;
ndzindziŋŋ wɔm,
éñe nlém wɔm wá sán ya ñí.
Ma ye ñí vé Nsísim wɔm,
ané,
aa ye kat meyɔŋ mefé nkíkgán misaŋ.
19 Ăá ye dwaan ya bot,
ngé ki áyón;
mot enziŋ ăá ye ki wók é kíŋŋ deñ míseŋ.
20 Ăá ye búk ékoók é ne mfítán;
ngé ki ádzím nsiŋa wa kwíñ otsírá,
akekwíñ ané aa bɔ ná nkíkgán misaŋ ó ñɔŋ ndaŋán.
21 Meyɔŋ mefé má ye tɔbɔ ya mebúnn éyola deñ.”
Bá sɔ́mán Yesus
22 Ó mvús véa,
éñe bé ngá sɔ́ ya ñí ya mot a belé mbéa nsísim ó ñúu a tɔɔ́ fe ndzímm ya mvúk,
ané a ngá séñ ñí,
akekwíñ ná mvúk te ó ŋga kɔ́bɔ ya áyén.
23 Éde mikuna mí bot míse mí ngá voŋbe,
mií dzó ná,
“Ye ná se é Mwán David éñe ñí?”
24 Ve,
niané befariseo bé ngá wók dɔ,
ané bé ngá dzó ná,
“É mot ñí aa tsílán ya bembéa misísim fáve ya é nguu Beelzebú,
ndzwée bembéa misísim.”
25 Ve Yesus,
ñí eé yem átémŋa deba,
éde a ngá dzó bɔ́ ná,
“Édzwée ngɔ́mán ése ébyen dá kánan énzénzaŋ dá dzáŋ;
é kísoan áse,
ngé ki é ndá bot da da kánan ki énzénzaŋ,
dăá laŋan ayaáp.
26 Éde,
ngé Sátan aa tsílán ya Sátan émyen a ne nkapbann énzénzaŋ;
éde ná,
amvála avé édzwée ngɔ́mán deñ é ne laŋan ayaáp?
27 Éde,
ngé ma tsílán ya bembéa misísim ya é nguu Beelzebú,
béyága benan bá bá tsílán ya éñí nzá?
Édɔ ná,
ébɔ́ bá ye bɔ békík misaŋ benan.
28 Ve,
ngé ma tsílán ya bembéa misísim ya é nguu Nsísim Nzamá,
dá yíli ná édzwée ngɔ́mán Nzamá é sian yaá ébe mína.
29 Éde,
nzá amvála mot a ne ñíi é ndá ngunguú mot,
á ŋga twáa fe ñí byém,
ngé kaa ná á tára ñí áká?
Véa,
á ntɔɔ́ ñí twáa byém á ndá.
30 Éñí bía ñí bí sés ngamm,
a ne ma á ngamm áyát;
éñí ñí ăá kóán ki bía ñí,
aa myean.
31 Amvála te édɔ,
ma dzó mína ná,
bá ye dzwii bot nsémm óse ya nkɔ́bɔ abyann óse;
ve,
é mot aa kɔ́bɔ Nsísim nkɔ́bɔ abyann,
băá ye ñí dzwii.
32 Éde,
é mot áse ya éfíá deñ a tɔɔ́ é Mwán Mot á ngamm áyát,
bá ye ñí dzwii;
ve éñí ya éfíá deñ a tɔɔ́ Mfúfúp Nsísim á ngamm áyát,
băá ye ñí dzwii,
ané é tám ñí,
ané éñí é nkún sɔ́.”
Bá yem elé ya ébumá deñ
33 “Ngé elé é ne mvéáñ;
véa,
ébumá deñ dá ye bɔ mvéáñ;
ngé elé é ne ki abé;
véa,
ébumá deñ dá dá ye fe bɔ abé;
amú ná bá yem elé ya ebumá.
34 Áyɔŋ beféñ!
Míní tɔɔ́ mbéa bé bot,
míní ne kɔ́bɔ mbamba bé mam á yá?
Amú ná é dzam dá dzéñ mot á nlém,
édɔ anu dá kɔ́bɔ.
35 Éde mbamba mot aa vea ntam ó ne mvéáñ ébe mbamba nlém weñ été;
mbéa mot ñí aa vea é dzam é ne abé ébe mbéa nlém weñ été.
36 Ve,
ma dzó mína ná,
mos ye á nkíkgán misaŋ,
bá ye síli bot bése eyalann ébe é nzeze efíá ése aa kwíñ bɔ́ ánu.
37 Amú ná bá ye wa yén nzósoó akála bífíá bywe,
bá ye fe wa vé meku akála bífíá bywe.”
Bá dzaa Yesus mendem
38 Véa,
befariseo benziŋ bábe beyágale métsiŋŋ benziŋ bé ngá yalan ya ñí ná,
“Á Nyágale,
bía kómo yén ndem enziŋ á mfá we.”
39 Ve,
ñí a ngá dzó bɔ́ ná,
“Mbéa myee bot ya bebɔ medzíán bá dzaa ndem!
Éde,
băá ye bɔ́ lére ndem enziŋ fé;
fáve é ndem Jonás nkúlu medzó.
40 Amú ná amvála ané Jonás a ngá tɔbɔ ábum bora kwaás été táŋ melú mé léa ya fe mos mí léa,
amvála te fe é Mwán Mot ñí aa ye tɔbɔ á nlém sí été táŋ melú mé léa ya fe mos mí léa.
41 Éde,
bot béye á Nínive bá ye tébe bábe myee bot wí á nkíkgán misaŋ,
bá ye wɔ́ vé meku,
amú ná bot béye á Nínive bá dzoban ya é nkatann fwéñ Jonás;
ve,
yénŋán ná éñí aa daŋ Jonás ñí a ne ó vá.
42 Ya fe,
kéza miningá ye á Sabá aa ye tébe á nkíkgán misaŋ bábe bot béye myee bot wí,
aa ye wɔ́ vé meku;
amú ná a ngá sɔ́ ó susuga sí,
ná aa nzu wók é kén Salomón,
ve yénŋán ná éñí aa daŋ Salomón ñí a ne ó vá.”
Nsísim mvin wá búlán
43 “Niané nsísim mvin wá kólo mot ó ñúu,
wá ke wá wulu mévóm mé ne mikót,
weé dzéŋ awaabé,
ve kaa ákoan ya dɔ.
44 Véa,
wá dzó ná,
‘Ma ye búlán é ndá dzam me ngá kólo.’
Éde,
niané wá sian ó koan ya dɔ mvwéñánn ya nkomann,
ve ó koan ya dɔ ekpékpéññ.
45 Véa,
wá ke ñɔŋ mísísim mifé zaŋgbéá ná myá daŋ éwí te ya abé,
misísim míte mí ñíi,
mí tɔbɔ fe ó véa;
éde étɔɔ́ mot te,
dá ye súgan bɔ abé álot ómvús.
Éñe fe dá dá ye bɔ néa ya myee bot wí.”
46 Ákoan ná a ngén aa kɔ́bɔ ya nkuna bot,
véa ñiá ya bɔbéñaŋ,
bá bé mbé bé téle átán ná bá kómo kɔ́bɔ ya ñí.
47 Éde mot enziŋ a ngá dzó ñí ná,
“Ñuá ya bɔbéñɔŋ bé téle átán,
ná bá kómo kɔ́bɔ ya wa.”
48 Ve,
eé yalan ya é mot a ngá kat ñí dɔ,
ané a ngá dzó ná,
“Nzá a ne naná,
benzá ki bé ne bɔbédzaŋ?”
49 Éde a ngá lére wéá ébe béyága beñ,
ané a ngá dzó ná,