Mfá nkíkgán misaŋ
7
“Kaa kíkgán nsaŋ,
bá bé nza mína kík nsaŋ.
2 Amú ná ámvála mína kík misaŋ,
amvála te fe bá bá ye mína kík misaŋ.
Ya fe ná,
abímm mína vak ya dɔ,
édɔ bá bá ye fe mína vak.
3 Édɔ ná,
amú dzé wa dága é ndúŋŋ e ne mwanñɔŋ á dzís,
kaa fe ábem mís nkwaá ó ne é dzís dwe wámyen?
4 Ngé ki ná o ne dzó mwanñɔŋ á yá ná,
‘Líkge ná me vea wa ndúŋŋ á dzís,’
éyɔŋ nkwaá wá ó ne wa á dzís?
5 Á mot ya méduk!
Táragé vea nkwaá ó ne wa á dzís,
véa éñe wa ye yem yén ná o vea é ndúŋŋ e ne mwanñɔŋ dzís.
6 Míní táa kee bemvú é dzóm é ne eki,
ngé ki áwea bengwiññ mekwá mé perla menan,
bé nza mɔ tsibi áyóp,
véa bé veŋan,
bé ŋga ñap mína.”
Ákut mbéñ
7 “Dzaagán,
véa bá ye mína vé;
dzéŋŋán,
véa mína ye yén;
kutgán mbéñ,
véa bá bá ye fe mína kúu.
8 Amú ná éñí áse á dzaa,
aa ñɔŋ;
éñí aa dzéŋ aa yén;
éñí aa kut mbéñ,
bá bá ye fe ñí wɔ́ kúu.
9 Mot mbé ki ye ébe mína a ne bɔ ná ngé é mwán weñ aa dzaa ñí mfémm,
ye ñí aa ye ñí kee akwá?
10 Ngé ki ná a dzaa ñí kwaás,
ye ñí aa ye ñí kee ñó?
11 Édɔ ná,
ngé mína míní tɔɔ́ bembéa bé bot,
mína yem vé é bwán benan mbamba dás,
ntéññ avé Ésúá wenan a ne á dzóp été,
aa ye vé é bot bá dzaa ñí é mam mé ne mvéáñ!
12 Édɔ ná,
é mam mése míní ne kómo ná bot bé bɔ mína,
amvála te fe mína bɔgán bɔ́,
amú ná néa éñe nkɔɔ́ métsiŋŋ ó ne ya Bekúlu medzó.”
Ofanfán mbéñ
13 “Ñíigán á mbéñ ó ne ofanfán;
amú mbéñ ye é nzenn byá ke ya bot á ntsamann bí ne ndam,
é bot bá ñíi été bé ne abwiññ;
14 nzá ofanfán mbéñ ya oloás nzenn byá ke ya bot éniŋ,
éde é bot bá koan ya byɔ bé ne avítsaŋ.”
Bibumá byá lére bɔ́
15 “Tɔbɔgán nkée ya minéneá bekúlu medzó,
ébɔ́ bá nzu ébe mína bé baga bikop mítómá,
ve mfá été bé ne bibyó bibibiñ.
16 Mína ye bɔ́ yem ya bíbumá byeba.
Ye bá fwát ebumá ye á ndzík vino míséé,
ngé ki ebumá igera á nlɔ́ŋŋ?
17 Néa,
elé ése é ne mvéáñ dá wúm bembamba bibumá,
elé é ne abé dá dá wúm bíbumá bí ne abé.
18 Elé é ne mvéáñ é sés wúm bíbumá bí ne abé,
elé é ne abé dá dé sés ki wúm bíbumá bí ne mvéáñ.
19 Élé ése é ne kaa áwúm bembamba bibumá,
bá kík dɔ,
bé wea dɔ á ndúán été.
20 Édɔ ná,
mína ye bɔ́ yem ya bibumá byeba.”
Ámvála bá ñíi á dzóp
21 “Se é mot áse aa dzó ma ná,
‘Á Ntí,
á Ntí,’
éñe aa ye ñíi édzwée ngɔ́mán ye á dzóp,
fáve ná éñí aa bɔ nkómánn é Tará a ne á dzóp été.
22 Mos te,
abwiññ bot dá ye ma dzó ná,
‘Á Ntí á Ntí,
nde bĭí ngá kúlu medzó ya éyola dwe,
ya éyola dwe fe bí ngá vea bembéa misísim,
ya éyola dwe bí ngá bɔ abwiññ biyágán bí mam?’
23 Ané,
ma ye bɔ́ kpéá ású ná,
‘Măá yem mína amvála enziŋ;
á betsam metsiŋŋ,
kólogán ma ó mís!’ ”
É ndá e ne nlóŋán ákwá áyóp
24 “Édɔ ná,
é mot áse aa wók bífíá byam bí,
a kéñ ya byɔ míbɔann,
bá ye fonan ya ñí ya mot enziŋ,
mfefák mot ó ngá lóŋ é ndá dzeñ ákwá áyóp.
25 Ané mveŋ e ngá nɔ́ŋ,
éde ndemm a ngá dzéñ,
ané bivúŋ bí ngá bɔ bíí yimi ndá te;
ve ndá te deé ndzí ku,
amú ná mbókga weñ ó mbé nlóŋán ákwá áyóp.
26 É mot áse ñí a wók bífíá byam bí,
ve éñe kaa áke ya byɔ míbɔann,
aa ye fonan ya mot enziŋ a tɔɔ́ akút,
éñí a ngá lóŋ é ndá dzeñ á nséléga été.
27 Ané mveŋ e ngá nɔ́ŋ,
ndemm á ŋga dzéñ,
ané bivúŋ bí ngá bɔ bíí yimi ndá te;
véa,
e ngá ku,
éde é ngá mana tsam ásesé!”