Mfá bivévé
6
“Tɔbɔgán ya nkée ná míní táa bɔ é nzósoó wenan ébe ású bot ná ébɔ́ bé yén mína;
ngé néa,
mínăá ye ñɔŋ máán ébe Ésúá wenan ané á dzóp été.
2 Édɔ ná,
éyɔŋ wa vé biŋgóŋgɔ́ɔ́ bí bot bivévé,
o táa ke wa lɔ́ŋ metɔ́ŋ miseŋ ya miseŋ,
amvála ané bot meduk bá bɔ bésinagoga été ya miseŋ á mfá ye ná bot bé vé bɔ́ dúmá.
Ma dzó mína,
bébélá bé mbelé é máán meba.
3 Ve wa,
éyɔŋ wa wa vé biŋgóŋgɔ́ɔ́ bí bot bivévé,
é wéá meyéá we ó táa yem é dzam é wéá meyóm we wá bɔ,
4 á mfá ye ná bívévé bywe wa vé biŋgóŋgɔ́ɔ́ bí bot ó bɔ ásweññ;
éde Ésúá,
éñí aa yén édí é ne ásweññ,
aa ye wa vé meyáán.”
Mfá meyaglán
5 “Éde,
éyɔŋ mína yaglan míní táa bɔ ané bot meduk;
amú ná bá dziŋ bá yaglan bé téle betételé bésinagoga été ya á maagán bisala,
ná bot bé yén bɔ́.
Ma dzó mína bébélá ná bé ñɔŋ yaá é máán meba.
6 Ve wa,
éyɔŋ wa wa yaglan,
ñíigé édziná dwe été,
niané wa dzip mbéñ,
yaglánán ya Ésúá a ne ásweññ,
éde Ésúá,
éñí aa yén édí é ne ásweññ aa ye wa vé meyáán.
7 Ve,
éyɔŋ mína yaglan míní táa báále nzeze bifíá,
ané bot béye meyɔŋ mefé bá lópban,
amú ná bá tém ná ya ábwiññ nkɔ́bɔ deba édɔ bá ye bɔ́ wók ya dɔ.
8 Édɔ ná,
míní táa bɔ amvála ané ébɔ́;
amú ná Ésúá wenan aa yem é dzóm dá dzéŋ mína,
kaa ná míní dzaa ñí.
9 Éde mína,
yaglánán ámvála dí,
Á é Tará wea a ne á dzóp été,
éyola dwe é bɔɔ́ge ya eki.
10 Édzwée ngɔ́mán dwe é nzá.
Nkómánn we ó bɔɔ́ge á sí,
amvála ané ó ne á dzóp été.
11 Vá bía émuú,
bídzí byeá bíye kada mos.
12 Dzwiigé fe bía ya bívuzá byea,
ané bía bía dzwii fe é bot bá vus ya bía.
13 O táa bía téle mébóblé été.
Fáve ná korogé bía abé été.
[Amú ná wa o ne ya edzwée,
ya nguu,
ya dúmá,
akekwíñ kɔ́mm áse.
Amén.]”
14 “Amú ná ngé mína dzwii bot bívuzá bá bɔ mína,
Ésúá wenan a ne á dzóp été,
ñí aa ye fe mína dzwii.
15 Ve ngé mína bɔ kaa ádzwii bot,
Ésúá wenan ñí ăá ye ki mína dzwii bívuzá byenan.”
Mfá áki bidzí
16 “Éyɔŋ mína ki bidzí,
míní táa bɔ amvála ané bot méduk bá lére mesú eywiññ;
amú ná bá mana tsén mésú meba á mfá álére bot ná bá ki bidzí.
Ma dzó mína bébélá ná bé ñɔŋ yaá é máán meba mése.
17 Ve wa,
éyɔŋ wa ki bidzí,
wáagé mbwánn á nló,
o sop fe ású dwe,
18 á mfá ye ná o nza álére bot ná wa ki bidzí,
fáve Ésúá éñí a ne ásweññ;
éde Ésúá,
éñí aa yén ásweññ,
aa ye wa vé meyáán.”
Akúmm ye á dzóp été
19 “Míní táa kóán ntam wenan é sí ñí é vóm sígbém ya míngéle byá ywíñ ntuk,
ya é vóm midzídzíp myá túgán mí ŋga dzíp;
20 fáve ná,
kɔ́gán ntam á dzóp été,
é vóm sígbém ngé ki míngéle byăá ywíñ ntuk ya é vóm midzídzíp myăá túgán ngé ki ádzíp;
21 amú ná é vóm ntam we ó ne,
vóm te fe nlém we wá wá ye bɔ.”
Láma ye ó ñúu
22 “Dzís édɔ é ne láma ye ó ñúu;
éde ná,
ngé é dzís dwe é ne mvéáñ,
é ñúu dwe áse da ye belé eyéá.
23 Ve ngé é dzís dwe é ne ekúkwát,
é ñúu dwe áse da ye tɔbɔ ó dzíbi ósí.
Édɔ ná,
ngé éyéá é ne ébe wa dá é ne dzíbi,
nzá amvála abwiññ dzíbi te dá ye bɔ!”
Nzá aa dzwée nlém?
24 “Mot enziŋ a sés séan ya bemása bé beáñ;
amú ná aa ye víni mbɔ́ɔ́,
á ŋga dziŋ éñí mbɔ́ɔ́,
ngé ki ná aa ye bánbe ya mbɔ́ɔ́,
á ŋga byana éñí mbɔ́ɔ́.
Bé sés séan ya Nzamá ya fe akúmm eyɔŋ déá.”
Nzamá aa kálá é bwán béñ
25 “Akála te édɔ ma dzó mína ná milém mí táa mína ku ábum á mfá bíniŋ byenan,
ná dzé mína ye dzí,
ngé ki ná,
dzé mína ye ñú;
ngé ki mfá é ñúu denan ná dzé mína ye bwát.
Nde eniŋ dăá daŋ ya eban ya bidzí,
ngé ki ná,
ñúu dá dăá daŋ bitóp?
26 Dággán anwann ye á dzóp,
édɔ kaa ábeñ,
kaa ki áyoo,
ngé ki ákóán bidzí besitúa,
ve Ésúá wenan a ne á dzóp été ñí a vé dɔ bidzí.
Nde se mína mína daŋ ya eban?
27 Nzá ki ye ébe mína,
ná éfáŋ ñí kpoo nlém ábum,
a ne kɔgle éniŋ dzeñ áwola déá áyóp?
28 Éde á mfá bitóp,
amú dzé milém myá ku mína ábum?
Dággán amvála ané mesamm méye méfúp má vém,
măá bɔ eséññ,
măá vyás ki;
29 ve,
ma ma dzó mína ná atwaa Salomon ya é dúmá deñ áse eé ndzí bwát amvála ané samm fɔ́ɔ́ ye été.
30 Éde,
ngé Nzamá a bwára bilwá bíye méfúp amvála te,
ébí bí ne émuú,
ookírí bé wea byɔ á ndúán.
Á mína é bot míní belé mbwínánn avítsaŋ,
nde ăá ye daŋ bíra bɔ ébe mína?
31 Édɔ ná,
milém mí táa mína ku ábum,
míníí dzó ná,
‘Dzé bía ye dzí?’,
ngé ki ná,
‘dzé bía ye ñú?’,
ngé ki ná,
‘dzé bía ye bwát?’
32 Amú ná bot béye meyɔŋ mefé bá vuŋ ná bá dzéŋ mam méte mése,
ve Ésúá wenan a ne á dzóp été ñí aa yem ná mína yi mam méte mése.
33 Ve táragán dzéŋ édzwée ngɔ́mán Nzamá ya é nzósoó weñ,
véa é mam mése má bá ye mína mɔ kɔgle.
34 Éde,
milém mí táa mína ku ábum akála ookírí.
Amú ná ookírí wá ye sɔ́ ya é mam wá kpoo milém ábum.
Kada mos ó mbelé mítéé myeñ.”