Nkatann efíá á nkoó.
5
Éyɔŋ Yesus a ngá yén mikuna mí bot míte,
éde a ngá bét nkoó,
a tɔbɔ ósí.
Mvɔmm
3 “Mvɔmm ya biŋgóŋgɔ́ɔ́ bí bot á nsísim été,
ébɔ́ fá bé ne ya édzwée ngɔ́mán ye á dzóp.
4 Mvɔmm ya é bot bé tɔɔ́ ya meyep,
bá ye fá bɔ́ vwála milém.
5 Mvɔmm ya é bot bé ne nsilann ósí,
bá ye fá ñɔŋ sí ané tsígá.
6 Mvɔmm ya é bot bá wók nzeñ ya evéé á mfá nzósoó,
bá ye fá dzéñ.
7 Mvɔmm ya é bot bá yén é bot bevɔ́ɔ́ engóngɔ́ɔ́,
bá ye fá bɔ́ yén engóngɔ́ɔ́.
8 Mvɔmm ya é bot bé belé milém mifúbánn,
bá ye fá yén Nzamá.
9 Mvɔmm ya é bot bá dzéŋ mvwaá,
bá ye fá bɔ́ lwée ná é bwán Nzamá.
10 Mvɔmm ya é bot bá dzéŋ ásí akála nzósoó,
ébɔ́ fá bé ne ya édzwée ngɔ́mán ye á dzóp.”
11 “Mvɔmm ya mína,
éyɔŋ bé ne mína tea,
ye ádzéŋ mína ásí,
ye ákɔ́bɔ ya mína ámvála abé áse é ne bɔ,
ékúkwát été ya ákála dam.”
12 “Vaggán,
sánŋán fe,
amú é máán menan á dzóp été mé ne menén;
amú ná néa fe bé ngá dzéŋ bekúlu medzó bé ngá tára mína tébe ósú ásí.”
Nkuú ya eyéá ye éniŋ
13 “Mína míní ne nkuú ye é sí ñí;
ve ngé nkuú ó dzímle dak,
dzé dá ye wɔ́ bera vé dak?
Ó sés fe ya eban,
fáve ná bá wea wɔ́ ó féñ,
bot bá bé ŋga tsibi wɔ́ ya mebɔ.
14 Mína míní ne eyéá ye éniŋ;
é kísoan é ne nlóŋán á nkoó áyóp é sés sɔbɔ.
15 Băá bwaa ki láma ná bá nii ñí éwála ásí,
fáve ná bá téle ñí ó yóp,
á ŋga vé é bot bése bé ne á ndá eyéá.
16 Néa éñe éyéá denan é feañŋe á bot été,
á mfá ye ná bé yén é mbamba mibɔann myenan,
bé ŋga vé Ésúá wenan a ne á dzóp été dúmá.”
Yesus aa yágale á mfá memvéná
17 “Míní táa tém ná me sɔ́ yaá tsam nkɔɔ́ métsiŋŋ ngé ki Bekúlu medzó.
Meé ndzí nzu tsam,
fáve ná me sɔ́ yaá mfá ádzálá.
18 Amú ma dzó mína bébélá ná akekwíñ ané sí ya dzóp byá ye lot,
atwaa ékaŋŋ dá daŋ ya avítsaŋ ngé ki ndúŋŋ ékaŋŋ ye métsiŋŋ dăá ye dzímle,
akekwíñ ané mése má mana dzálában.
19 Éde,
é mot áse aa tsam é mvéná da daŋ ya avítsaŋ mémvéná má,
aa yágale fe mɔ bot néa;
bá ye ñí lwée ná kaa eban édzwée ngɔ́mán ye á dzóp;
ve é mot áse aa dzálá mɔ,
ayágalé fe mɔ,
mot te éñe bá ye lwée ná ñá mot édzwée ngɔ́mán ye á dzóp.
20 Amú ma dzó mína ná,
ngé é nzósoó wenan ăá lot éñí beyágale métsiŋŋ ya befariseo,
mínăá ye ñíi édzwée ngɔ́mán ye á dzóp tám enziŋ.”
Yesus aa yágale á mfá meyéá
21 “Mínaá wók ná bé ngá dzó é bot ókuá ná,
‘O táa ywíñ,
amú é mot áse aa ywíñ mot bá ye ñí kík misaŋ.’
22 Ve,
ma ma dzó mína ná é mot áse aa yéá ya mwanñaŋ bá ye ñí kík misaŋ.
É mot áse aa dzó mwanñaŋ ná,
‘Táa ndzímán’,
aa ye bɔ ntotɔ́mm ébe ású ékóánn bá kík medzó.
É mot aa dzó mwanñaŋ ná,
‘Táa okúkút mot’,
aa ye ke ébéññ ndúán.
23 Édɔ ná,
ngé wa nzu ya bívévé bywe áltar,
véa o síman ná mwanñɔŋ a belé dzam ya wa,
24 líkge bívévé bywe áltar ósú ó véa,
éyɔŋ te o kéñ tára mana ákom mína mwanñɔŋ;
véa o sɔ́ vé bívévé bywe.
25 Komŋe avóó avóó ya é mot a ne wá á ngamm áyát,
ntéññ mína ñí mína ngén mína wulu ó nzenn,
a nza bɔ ná é mot a ne wa á ngamm áyát á ke wa sɔ́mán ébe nkík misaŋ,
nkík misaŋ ñí a ébe awasíli,
véa bé fet wa á mbok.
26 Ma dzó wa bébélá ná wăá ye kólo ó wéñ,
kaa ná o yáán é furá da súgan.”
Medzíán
27 “Míní ngá wók ná bé ngá dzó ná,
‘O táa bɔ medzíán’.
28 Ve ma ma dzó mína ná é mot áse a dága miningá ya mís méye ná aa kómo ñí dziŋ,
á dzíi yaá éyá miningá á nlém été.
29 Édɔ ná,
ngé é dzís meyóm dwe dá bɔ wa ná o ku á nsémm,
veagé dɔ,
o wea dɔ ó féñ;
amú ná é ne wa mvéáñ ná asúk ñúu avɔ́ɔ́ é dzímle,
ye ná é ñúu dwe ngúrá bé wea dɔ ébéññ ndúán.
30 Ngé é wéá meyóm we,
wá wá bɔ ki wa ná o ku á nsémm,
kíkge wɔ́,
ó wea wɔ́ ó féñ;
amú ná é ne wa mvéáñ ná asúk ñúu avɔ́ɔ́ é dzímle,
ye ná é ñúu dwe ngúrá eé ke ébéññ ndúán.”
Mvas
31 “Bé ngá dzó fe ná,
‘É mot áse aa vé ngéá mvas,
á keegé ñí kálara mvas’.
32 Ve ma ma dzó mína ná é mot áse aa vé é miningá weñ mvas,
ngé é sés akála nsémm eveák,
a bɔ ñí ná a ke aa bɔ medzíán.
Édɔ ná,
é mot áse ñí aa lúk é miningá a vas yaá álúk aa bɔ medzíán.”
Nkanann sɔŋ
33 “Míní ngá bera fe wók béé dzó é bot ókuá ná,
‘O táa kan sɔŋ mineá été;
fáve ná dzálágé Ntí méngaá mwe.’
34 Ve ma ma dzó mína ná míní táa kan sɔŋ amvála enziŋ;
ngé dzóp,
amú ná édɔ e ne étɔɔ́ édzwée Nzamá;
35 ngé ki sí,
amú ná édɔ e ne étéle mebɔ deñ;
ngé ki Yerusalen,
amú ná éñe a ne é kísoan Bora Kéza.
36 O táa ki kan sɔŋ nló we,
amú o sés bɔ ná atwaa nkɔ́ esií mbɔ́ɔ́ ye ésií dwe ó bɔ mfúm ngé ki nsút.
37 Ve nkɔ́bɔ wenan ó bɔɔ́ge;
ma yébe,
ma yébe;
ngé ki ná,
móamó,
móamó.
Édɔ ná é dzam dá lot véa,
dá sɔ́ ébe mbéa dzam.”
Ákunŋa
38 “Mína ngá wók béé dzó ná,
‘Dzís dá táŋ dzís,
asoŋŋ dá dá táŋ asoŋŋ.’
39 Ve ma ma dzó mína ná,
míní táa ñím mbéa mot;
fáve ná,
é mot áse aa bími wa ámáŋŋ meyóm,
léregé ñí ámáŋŋ avɔ́ɔ́.
40 É mot aa ke wa sɔ́mán á mfá áñɔŋ wa elíŋŋá,
keegé fe ñí ekót.
41 Ngé mot aa tsíni wa ya nguu ná o ke mína ñí táŋ okaŋŋ ovɔ́ɔ́,
kéŋ ya ñí táŋ akaŋŋ á beáñ.
42 É mot aa dzaa wa,
vá ñí;
ngé mot aa kómo wa koo dzóm,
o táa ñí ñím.”
Ádziŋ midzíndzíŋŋ
43 “Míní ngá wók béé dzó ná,
‘Dziŋŋe é mot mbɔ́ɔ́,
o víni é mot áse aa síŋ wa.’
44 Ve ma ma dzó mína ná,
Dziŋŋán é bot bá síŋ mína,
[váán ébá bá víni mína abwará],
yaglánán fe á mfá é bot bá dzéŋ mína ásí.
45 Néa éñe mína ye bɔ é bwán Ésúá wenan a ne á dzóp été;
éñe fá a bɔ ná nlódzóp ó féñ mfá bembéa bé bot ya fe bembamba bé bot,
a ñɔŋ fe mveŋ mfá benzósoó bé bot ya fe bikúkwát bí bot.
46 Amú ná ngé mína dziŋ é bot bá bá dziŋ mína,
nzá máán mína ye ñɔŋ?
Nde beñɔŋ mfóŋsí bá băá bɔ dɔ?
47 Éde ngé mína bérán ki fáve ya bɔbéñɔŋ,
nzá dzam mína lot ya dɔ é bot bevɔ́ɔ́?
Nde bot béye meyɔŋ mefé bá băá bɔ dɔ?
48 Édɔ ná,
bɔgán benzósoó amvála ané Ésúá wenan a ne á dzóp été a ne nzósoó.”