Déble aa bóble Yesus
4
Éde véa Mfúfúp Nsísim a ngá ke ya Yesus éyáŋŋ été ná déble á bóble ñí.
2 Niané a ngá mana tɔbɔ táŋ mos mewóm mé nii ya fe melú mewóm mé nii,
eé lot tám nkián bidzí,
ásúgánn á ŋga wók nzeñ.
3 Éde déble a ngá yit ñí bebeñ,
ané a ngá dzó ñí ná,
“Ngé o ne mwán Nzamá,
dzóge mékwá má ná mé veŋan mifémm.”
4 Ve,
ñí a ngá yalan ya ñí ná,
“É ntɔɔ́ ntsilann ná,
‘Se fáve mfémm etámm éwɔ,
mot aa ye niŋ ya wɔ́,
fáve ná ya éfíá ése da kwíñ ánu Nzamá.’ ”
5 Ané déble a ngá ke ya ñí á Mfúfúp Kísoan,
a kéñ ñí téle é vóm ó ngá daŋ ya oyaáp ó yóp á templo,
6 éde a ngá dzó ñí ná,
“Ngé o ne é Mwán Nzamá,
yóogé o ku ásí,
amú é ne ntsilann ná,
‘Aa ye mánan é baángel béñ mfá we,
bé baga wa ya é mó meba,
á mfá ye ná ábɔ dwe é nza kɔp akwá.’ ”
7 Éde,
Yesus a ngá dzó ñí ná,
“É ntɔɔ́ fe ntsilann ná,
‘Wăá ye bóble Ntí Nzamá we.’ ”
8 Éde,
déble a ngá bera ke ya ñí á nkoó ó tɔɔ́ ededea oyaáp ó yóp,
éde a ngá mana ñí lére bidzwée bí ngɔ́mán bíse bíye é sí ñí,
ya é dúmá deba,
9 ané a ngá dzó ñí ná,
“Ma ye wa kee ásesé ñí,
ngé ó kút mebɔ́ŋŋ ó sí ná wa kaŋ ma.”
10 Éde ó véa,
Yesus a ngá yalan ya ñí ná,
“Á Sátan,
kéŋ;
amú é ne ntsilann ná,
‘Wa ye kaŋ Ntí Nzamá we,
fáve éñe etámm wa ye kaŋ.’ ”
11 Ané déble a ngá lík ñí,
véa baángel bé ngá sɔ́,
bé ŋga belan ya ñí.
Yesus aa tára éséññ deñ á Galilea
12 Ve,
niané Yesus a ngá wók ná Juan a ntɔɔ́ á mbok,
ané a ngá búlán á Galilea;
13 eé lík Nasaret,
éde a ngá ke tɔbɔ á Kapernaúm kísoan ye á nsá máŋ,
mefóo mé sí Zabulón ya Neftalí,
14 á mfá ye ná é dzam nkúlu medzó Esaía a ngá dzó é dzálában,
ná,
15 “Á é sí Zabulón ya é sí Neftalí,
nzenn ye ó máŋ,
á Yordán áyát,
é Galilea meyɔŋ mefé.
16 Bot béye é sí é mbé é tɔɔ́ ó dzíbi ósí,
bé yén yaá bora eyéá;
ébá bé mbé bé tɔɔ́ é vóm ó ne áwú á mféŋŋ,
eyéá é feañ yaá ébe bɔ́.”
17 Atéé ye tám te édɔ Yesus a ngá tára ná a kat efíá Nzamá,
eé dzó ná,
“Dzobgán,
amú ná édzwée ngɔ́mán ye á dzóp é ntɔɔ́ bebeñ.”
Yesus aa lwée beyɔ́p kwaás bé nii
18 Éde,
eé wulu á nsá máŋ méye Galilea,
a ngá yén bɔbéñaŋ bé beáñ,
Simón,
éñí a mbé fe eyola ná Pedro bá mwanñaŋ Andrés,
béé du avwát ó máŋ,
amú bé mbé beyɔ́p kwaás.
19 Ané a ngá dzó bɔ́ ná,
“Beegán ma,
ma ye mína bɔ beyɔ́p bot.”
20 Etéññ te ébyen,
ané bé ngá lík mevwát,
bé bee ñí.
21 Éde niané a ngá kólo ó véa,
a yén bɔbéñaŋ bé beáñ befé,
Jakobo,
é mwán Zebedeo,
bá mwanñaŋ Juan,
á byéa été ya éséá weba Zebedeo,
béé kom mévwát meba.
Ané Yesus a ngá lwée bɔ́.
22 Etéññ te ébyen bé ngá lík byéa ya éséá weba,
bé bee ñí.
Yesus aa yágale nkuna bot
23 Éde Yesus a ngá boman Galilea áse,
eé yágale á besinagoga beba été,
eé kat fe mbamba fwéñ ya édzwée ngɔ́mán,
eé séñ akwann áse,
mitéñ míse bot bé mbé belé.
24 Ané éwógá deñ é ngá mana ñeŋ á Siria ngúrá,
éde bé ngá nzu ya ñí mikúkwann,
ná mí belé akwann ya midzuúk memvála ya memvála,
ébá bé belé mimbéa misísim,
ébá bá belé okúbégé,
ya mibóbók;
ané a ngá séñ bɔ́.
25 Ané abwiññ míkuna mí bot mí ngá bee ñí,
é mí míye á Galilea,
ye á Dekapolis,
ye á Yerusalen,
ye á Judea,
ye á Yordán áyát.