Nkatann mbamba fwéñ Juan Ndubot
3
Melú méte,
Juan Ndubot a ngá nzu a kat mbamba fwéñ éyáŋŋ été á Judea,
2 eé dzó ná,
“Dzobgán,
akála ná édzwée ngɔ́mán ye á dzóp é ntɔɔ́ bebeñ,”
3 amú ná é mot ñí éñe nkúlu medzó Esaía a ngá dzó ya ñí ná,
“Kíŋŋ mot da yón éyáŋŋ été,
‘Komŋán é nzenn Ntí,
sóŋán ménzenn meñ tételé’ ”.
4 Juan te émyen a mbé a baga etóp ekop kamelio ya kaná ekop tsít ángérgá;
bídzí byeñ byá bí mbé bitandá ya ywíñ ye áfan.
5 Éde,
bot béye á Yerusalen,
Judea áse ya ábeŋŋ sí é ngá boman Yordán áse,
bé ngá nzu ébe éñe,
6 á ŋga du bɔ́ óswíñ Yordán,
béé mem mísémm myeba.
7 Ve,
éyɔŋ a ngá yén abwiññ bot béye á nsámá befariseo ya besaduseo,
béé nzu ná bá duuban,
ané a ngá dzó bɔ́ ná,
“Á ayɔŋ beféñ!
Nzá a ngá lére mína ná míní túp méyéá mé nkún sian?
8 Édɔ ná,
wúmŋán bibumá byá yian ya ndzobán.
9 Kaa átém á milém myenan été ná,
‘Bí belé Abraam ané tará’;
amú ma dzó mína ná,
Nzamá a ne veŋan mekwá má é bwán Abraam.
10 Ya fe ná ovón wá ó mbóo fe ó tsín bilé;
éde ná,
élé ése dá bɔ kaa áwúm mbamba ebumá bá ye dɔ kík,
bé wea dɔ á ndúán été.
11 Bébélá ma ma du mína ya mendzímm,
mfá ndzobán,
ve é mot a nzu ma á mvús a ne nguu á lot ma,
éñí me sés nguu ye ábaga ñí mengop.
Aa ye mína du ya Mfúfúp Nsísim ya ndúán.
12 A belé ekyeñ mí sɔŋ ó mó meñ,
aa ye sigle ábana trigo,
eé ñɔŋ misɔ́ mí trigo eé nii myɔ é sitúa deñ;
ve aa ye dzígi mbíán ya é ndúán e ne kaa ádzím.”
Yesus aa duuban
13 Ané Yesus a ngá sian á Yordán é vóm Juan a mbé,
eé sɔ́ á Galilea,
á mfá ye ná Juan á du ñí.
14 Ve Juan a ngá kam ya ñí ya dɔ,
eé dzó ná,
“Ma me ne é mot aa yian nzu ébe wa ná o du ñí.
Ye wa wa víán nzu ébe ma?”
15 Ve Yesus a ngá yalan ya ñí ná,
“Yébegé dɔ áwola dí;
amú dá yian ná bí dzálá nzósoó áse amvála te.”
Ané Juan a ngá yébe ñí dɔ.
16 Éde niané Yesus a ngá mana duuban,
etéññ te ébyen,
eé kólo méndzímm été,
véa,
dzóp é ngá yɔ́ŋbe,
ané Yesus a ngá yén Nsísim Nzamá,
weé sigi amvála ané obeŋŋ ó sɔ́ berebe ébe éñe.
17 Éde ó véa,
bé ngá wók kíŋŋ á dzóp été,
deé dzó ná,
“Ndzindziŋŋ Mwán wɔm éwɔ wi,
éñí aa vé ma mesán á nlém.”