Ahab birye, Nabot el anggur wa ubula doprobuk yupu
21
Samaria mutuku tam ninye deiyoknye Raja Ahab, el weik teleb aik dam, yuknye el si Nabot anggur wa wilamuk. Nabot bira Yisreel mutukunye binya arye, el anggur wa babye Yisreel mutuku kouamuk. Awa ara Raja Ahab el weik aik dam kouamuk. 2 Winyamukba, ninye deiyoknye Ahab birye Nabot biti, “An anggur wa ara, na ninye deiyoknye aik dam wipluma ati ara, na tenepmana ara, ance ‘Telebe,’ nyapnutum toura, narye awiplum tuku ara na kipdopnirye, ‘Malmalya wa wipnamne,’ tenenune. Winipnirye an wa tuku pununa ati ara, na anggur wa wipsiba, teleb ubuka palul ning nuknamkine. Akumopura, atuku dekna ulye touk, yo bok uk an moropminye touk weik arye arepnamakine,” nyabuka morobuk. 3 Nyabuk bukni, Nabot birye tamubuka ninye deiyoknye Ahab biti nyabuk. “Na anggur wa wipse mutuku ara, na apu yapu arye taleamik mutuku tuku ati ara, na deiyoknye an moropmanilam ning ara, telebe kum nyapnukine. Nun ni Allah el si Yahweh, el kanye babye, ‘Aning malye,’ tenelulule,” nyabuk.4 Ahab birye Nabot nyabuk yupu akunum kekebukce, ‘Yata ning ati anye bira kum yo nyapnil do?’ tenen, pia yu ubukba, adiparyuk tamubuka el aik biyuk. Abiyuk talak ara, pia yu kanye bobukce, pia din dina kumce, Yisreel mutukunye Nabot birye nyapmok ning atibuk tuba teninmok. Ara, ‘Na apu yapu arye taleamik tuku kum deknulyame, nyapmanil ning atia’ tenen, aninguk pia tenebuka, el mapmokak uk mabuka, urasin malye bobuka bukmok.
5 Winipmokba, adiparyuk el kil Isebel el akanye Ahab dam biyukce, “Anda yata ning ati urasin malye bobuka, din kum dinmalam do?” nyabuka asipdeyuk. 6 Asibukba, el akanye Ahab birye, “Kume nara Nabot birye malye yupu nyapmanilba winipmane,” nyabuk. “Ara narye elti, nyapse. “An anggur wa na aik dam wipluma ati, na deknamkin do? Akumopura, awa tuku na kipdopnirye, awa pununa ati, anggur wa wipsiba teleb ubuka palul ning punupnamkin do?” nyabuka asipman bukni, elce ton, ‘Kume na wa kum doptume,’ nyabuka, telebe kum nyapmanil deice arye, na malye kanye bopmane,” nyabuk.
7 Nyabukopura, el kil arye, “Anda Israel ninye sik ninye deiyoknye Raja ulyama ati ara, winina kume. Yata deiyok ati, malye kanye bobuka talye unmalam do? Adiparyuk teleb kanye bopmince, bukuka din diplyame. Ara, winipminba, an tuba tenenmalam ning ara, narye an patapmakil touk winipdeipnukine. Yisreel mutukunye Nabot, el anggur wa wibuk ning ara, dipkoprob narye dobuka an nuknamkine,” nyabuk.
8 Nyabukopura, Isebel adiparyuk el akanye Ahab, el si deice arye surat sekukabukce, ninye deiyok nang arye sekmaka tenen ati, lak len surat sekuka deice ara, lak kibuka Nabot ulamuk mutuku dopdeibuk. Dopdeibukce, pil deiyok yuk-yuk talibuka ulamik nang ap, wisi nang ap, amutuku ninye, “Aning winipnuyap,” nyabuka, yupu nyalamik nang ap nirya ati, sik dam sekuka arebuk.
9 Asurat sekukce nyabuk yupu ara, ani. “Anggunce nyapnululume. Amutuku noutam ara, nun nirya, din dina kum, urdem malamibirye, weik sum kipnamaba ati, tonokak bulubuka weknululume. Nyapmunyeba, sik amutuku ninye bulupmakirye, bukuka dinmakcak pia lakak, Nabot bira dobuka deipnamalume. Ara, weik nang bulamak sukumak buknamlule.
10 Winipmunyeura, el bukmalya urasin dam ara, malye nang bitinye ton melibuka el dam deipmunyeba buknamarake. Amalye nang bitinye arye, ‘Nabot opting’ tenen, tilila yupu deice, “Nabot, ance Allah si deice ap, amutuku ninye deiyoknye Ahab si deice ap, minop yupu nyaplumba, kekebupu ati ara, anda opnamakiyabe,” nyabuka, tilila yupu nyapnamarake.
Winipmamunya ani, Nabot bira anggun nirya dinmamunyak arye bobuka, buru tam bobimunyopura, keil bubukapmunce, binuka donokuka opmunyeba, Nabot bira dipnamale,” nyabuka Isebel birye sekeibuk. Asurat sekuka dopdeibukba, Nabot ulamuk mutuku deiyok nang nirya eibik.
11 Isebel surat sekeipmok touk, el Nabot ulamuk mutuku yuk-yuk talibuka, pil dolamika deiyok nang ap, yuk weik deiyok nang “Unamabe,” nyabuka, yupu nyalamik nang ap nirya arye, Isebel nyapdeipmoka atonun winibik. 12 Ara, sik anang nirya arye, Yisreel mutuku ninye ati, “Din dina kum, din urdem unamalulume,” nyapdeipmekba, din dina kum, talye unmekce, tonokak uk bulubuka wekmek. Asukumuk Nabot bira dobuka aninye dinmekak uk, weik nang bulamikak yanuka deipmek.
13 Nabot yanuka deipmekak ara, malye un nang bitinye ton dobuka, el bukmoka urasin dam yanuka deipmek. Tilila yupu nyana ati deipmeknye birye, “Nabot bira, el bidamnye arye Allah si deice ap, nun mutuku ninye deiyoknye Raja si deice arye, malye yupu nyapmoba kekepmaupe. Ati opnamabe,” nyanmarik. Nyanmarika ani, batakrikura, Nabot adeipmekak arye dobuka, buru tam bobiyikce, keil bopmeka arye el nong deice binuka donokuka obikba dibuk. 14 Nabot akunum obikopura, Isebel biti, “Anye Nabot bira, keil bopmapua arye, binuka donokuka opmaba akunum dipmale,” nyabuka yupu nyabik.
15 Ayupu Isebel akunum kekebukopura, el akanye Ahab biti, “Nabot bira akunum dipmale,” nyabuk. “Ati ara, wini talak an adiparyuk bukuka bimince, Yisreel mutukunye Nabot, el anggur wa an aik dam wiamuk ning ara, anti ‘Yo bok kum deknamnilame,’ nyalamkuk ning ara, bimince dekna kum talye doproplyame. Anye Nabot bira, akunum opmakba dipmale,” nyabuk. 16 Nyabukura, kekebukce, adiparyuk Ahab biyukce, Nabot anggur wa wiamuk ning ara, ‘Dopropnirye na kipnun’ tenen, Yisreel mutuku biyuk.
17 Winibuka ati ara, Allah el si Yahweh arye el yupu lak nyananye Elia, Tisbe mutukunye biti nyapdeibuk. 18 Allah el si Yahweh arye Elia biti nyabuk yupu ara ani. Wini talak ara an adiparyuk Samaria mutuku ulirye, Israel ninye talilulnye Ahab bira, el dam binuka epdanamrume. Ahab birye, ‘Nabot anggur wa wiamuk ning ara na kipdopnaman’ tenen, Nabot wa dam yanuka unmala ati ara, el dam binulyame. 19 Akunum biminyopura, Ahab biti nyapnulyame. “Allah el si Yahweh arye anti nyapmakile. Ahab anti ara, Nabot opmalam diparyuk, el anggur wa wiamuk ning ara, an kipropnmalama ara, malye winipmalamba, kum eipmakin do?” An Elia birye Ahab biti aning nyapdeiplyame.
Nyapminyopura, ayupu ton nyaplyame. “Ahab bira, Allah el si Yahweh arye nyapmakile, ‘Anggunce Nabot opmalumba, el ining banmoa ara, talye kam arye yanuka dipmaue. Asukum aryuk, Ahab an babye ara opkikiba, talye kam yakirye an ining babye dipnamkiyake. Allah arye nyapmakile,’ binuka lak nyaplyame.” Ara, Allah el si Yahweh arye, Elia biti nyabuka ayupu nyapdeibukba, bobuka Ahab dam nyalbiyuk.
20 Elia adiparyuk Ahab unmokak Nabot wa win dam bayuk bukni, Ahab minop arye eipmokce, nyabuk. “Anda na oldananye atonun tenekunune. Anda na like. Bukni, nati enmanilam ning ara, akunum eipmanilame,” nyabuk. Nyabuk bukni, Elia biryopura, “Dipkoprop enmakina ani akunum eipkine. Ance apia malye ning winiminyeba, Allah el si Yahweh arye, ‘Aning ara na like, aning ara pia malye,’ tenepmakile. Amalye ning winipmalam ning ati, Allah el si Yahweh arye, ‘Ahab dam bimince, narye el wenena ati winipnamne ning ara, lak nyalbinulyame,’ nyapdeipmakila ati, nyapkine,” nyabuk. 21 Nyabukce ayupu ton dukdongobuka nyabuk. “Allah el si Yahweh arye, an Ahab biti nyapmakile. Pia malye ning winipmalama ati, narye weik kanye ikin un ning an deice deipnamkine. Ara, ance deiamlumba dadeipdanin yangalamik ani, aunyak nang nirya, an yala nang bukni, Israel mutuku noutam unyak nang nirya ara, obuka sirya daknamne. Ara, sik kanye aryuk teleb pil donyak nang babye obuka sirya daknamne. Tonda, yuk nang arye yo bok deice dekikirye, ikin pil deibikiba, talye piluk donyak nang babye obuka sirya daknamne. Aning-aning nirya, oplopnirye, pia kum daneipnamne. Ara, ance deiplumba, dadeipdanin yangalamik ani, aunyak nang babye, an tam nang nirya ara, obuka sirya daknamne,” nyabuk.
22 “Tonda Ahab, an mapu nirya ara, minop talak Nebat el mi, Yorebeam, Israel ninye deiyoknye malye weik ulamukba, wenebuka omse touk winipnamkine.a Aning atonun, tonda minop talak Ahia el mi Basea birye Israel taleamuk talak pia malye ulamukba, el ap, el mapu ap, wenebuka omse touk winipnamkine.b Atonun, an Ahab babye, winipnamkine. Winipnamkina deiyok ara, talye kume. Ahab ance malye weik uminya deice arye, na mapu Israel ninye, sikda ance pia malye winilalum ning ara elilamkika ati, sik babye aning atonun malye winilamik. Deiyok ara antia. Ati, na weik yu upmanilyeba, wenebuka opnamkine. Allah arye, nyapdeipmakilba nyalyanmakine,” Elia birye Ahab biti nyabuk.
23 Nyabukce ayupu ton nyabuk. “Tonda an kil Isebel biti ara, Allah el si Yahweh ara, ‘Isebel bira Yisreel mutuku weik cang keil poka wiamik dam arye, akil opminyeura, el nong ara, Yisreel mutuku noutam unyak kam arye dipnamake,’ nyapdeipmanile. 24 Aning nirya ara, yata ninye do nirya, Ahab an tam ninye nirya ara, ninye asik, weik asik noutam dibikcopura, kam arye sik nong dipnamake. Tonda yuk buru tam binuka dipnamak nang ara, talye buru tam maka arye sik nong dipnamake. Ninye arye teleb ubuka, tuku palibuka kum weipnamake. Allah el si Yahweh arye nyapmakile,” Elia birye Ahab biti nyabuk.
25 Ura, minop talak arye dib dongobuka, anoutam talak ap, wini talak ap nirya, malye pia weik ulamuknye bira Ahab ulamuk. Bukni, yuk nang ara mitik malye winilamik. Allah arye, ‘Anye winilamuk ning ara na pia like,’ tenelul ning bukni, aninguk Ahab birye winilamuka ati nyapmabe. Tonda, Abab el kil Isebel birye, ‘Winipnulyame, aning winipnulyame,’ nyalamuka deice arye, el yupu kekelamukce, pia malye weik ulamuk. 26 Ahab bira malye pia weik winilamukce, isa si erelamuk ning ara, sik Amori yala ninye isa si erelamik touk winilamuk. Sik Amori yala ninye ara, Allah el si Yahweh arye, Israel ninye Mesir mutuku arye bobuka, Kanaan mutuku tam boyangalamuk talak ara, sik Amori yala ninye ati binuka kum yakamik.
27 Ura, Elia birye, Raja Ahab biti, Allah arye nyapdeipmok yupu laka nyanmok talak ara, anang nirya kekenmekbuk, Elia birye akunum nyapdeibukopura, Ahab kekebukce el baju ongopmok ning kwiribuka batakukce, pia malye baju dobuka, el nong deice kalupdayuk. Winibuka deiyok ara, ‘Na akunum malye upse,’ tenen, ilil kanye bobuka lak kibuk. Winibukce, malye kanye bobuka, din dina kumce, din bulung uk unmok. Tonda asum arye deiyok koubuka, bisik banmok talak babye ara, malye baju aryuk ongopdongobuka, ‘Nara dipkoprob pia malye ulamsinye’ tenen, ilil unmokba, bouku sukubukba unmok.
28 Pia winibuka unmok bukni, aminyan talak ara, Allah el si Yahweh eibukce, Tisbe mutukunye, el yupu lak nyananye nabi Elia dam yanuka nyabuk. 29 “Elia anda Ahab wininmal ning ara, akunum eipmalam do? Na dam ara, Ahab birye ‘Nara pia malye ulamsinye’ tenen, talima erena kumce, ilil kanye bobuka, na amu tam unmalce, talima mitanguk unmale. Wininmala ati ara, narye elti, ‘Wenebuka weik ikin ning deipnamne,’ tenepmase ning ara, adiparyuk kum arepnamne. Ara, el kam tuba ulamle talak kum bukni, elce dipnamle mi arye Israel ninye talipnamle talak noutam ara, Ahab malye weik winilamuk ati, weik ikin ning el mi ap, el yala nang arye deipnamak ninye nirya ara, sik nong deice arye, ikin ning weik delinamne,” Allah arye Elia biti nyabuk.