3 Yosafat min kum binmok talak arye, Israel tam nang sik deiyoknye Ahab birye, el amu tam pil dolamik nang ati nyabuk. “Anggunda kel bikilulum do? Ramot Geleat mutuku ara, nun mutuku ati ara, Siria mutuku talibuk weiknye birye Ramot Geleat mutuku mince alubuka dopropsuk ning ara, yata deiyok ati, ‘Dauplye’ tenen, talye batakupu do? Teleb ning ara, nun mutuku nanguk amutuku tamubuka dopropnamabe,” nyabuka yupu nyapdeibuk.

4 Ura, aning akunum nyapdeipmoka ati ara, Yehuda tam weiknye Yosafat adiparyuk Ahab dam biyukopura, Israel tam weiknye Ahab birye asibuk. “Yosafat, anda na Ahab ap, nun neika Ramot Geleat mutuku ninye olbinunam do? ‘Winibuka olbinunam’ tenen, ati, na dam yanmalam do?” nyabuka asipdeyuk. Asibukba, Yosafat birye, Israel tam weiknye Ahab biti nyabuk. “Yo, dib nyapnilame. Nun bitinye, na yin nang ap, an yin nang ap, na kuda basam ap, an ning ap, na tam nang ap, an tam nang ap, nun nirya ara tonok ninye atonun tenenuna ati ara, neika binuyaba ati yanmane,” nyabuk. 5 Nyabukura, Yosafat birye ayupu ton Ahab biti nyabuk. “Teleb ning ara, minop nun ni koproba Allah el si Yahweh ton asipdenimirye. Yahweh arye, ‘Telebe ur,’ nyapsutopura, teleb uka,” nyabuk.

6 Nyabukopura, Israel mutuku taleamuknye Ahab birye, Allah el yupu nyalilamukba lak nyalamik nang, sik nabi-nabi nang yupa ara empat ratus nang nirya, ‘Buluplulume,’ nyapdeibukba, bulubuka yayikopura, asipdeyuk. “Ur teleb nyapnamanulum do, kum do? Narye Ramot Geleat mutuku unyak ninye olbinun do, kum do? Aning ati asipsine. Anggunce nyapnululume,” nyabuk. Nyabuka asibukba, sik nabi-nabi nang nirya, “Telebe ur olbinulyame. Ara, nun ni koproba Allah el si Yahweh, melipkilya deice arye, sik anang unyak mutuku ara, ance obuka sirya dakmince dopropnalame,” nyabik.

7 Nyabikba, Yosafat birye tonap, tamubuka nyabuk. “Allah arye, nyasulul yupu lak nyana deiyok nang, tonoknye ton nun dam auplibuk, asipdetibye do? Elce ‘Telebe,’ nyapsutopura, teleb uka. Yuk nang ton aunmaka babye, nabinye tonok arye ton, ‘Telebe,’ ur nyapsutopura, bitibye,” nyabuka Ahab biti nyabuk.

8 Nyabukura, Israel tam weiknye Ahab birye tamubuka nyabuk. “Tonoknye ton aupmale. Elce nun ni koproba Yahweh ati, asipdeturye nyapnamsutunye bira aunmale. Bukni, elce na dam ara, dipkoprob teleb winipnamkil ton, kum nyanulule. Elda malye yupu uk nyalinulule. Ati, anye ati ara yu unulule. Anabi el si ara, Mika aunmale. Anye bira na like. Ara, Yimal birye deibuknye aulule,” nyabuk. Ayupu nyabuka ati, Yosafat kekebukce, “Se na ka, aning atonun yupu nyana kume,” nyabuk. 9 Aning kekebukce, Ahab el amu tam pil dolamik nang tonoknye biti, “An adiparyuk Yimal birye deibuknye, nabi Mikha yukupminba, anggun neika yanamadurume,” nyapdeibukba, nyalbiyuk.

10 Anye birye Mikha dam binuka nyabukura, yayuk talak ara, sik ninye deiyok nang bitinye Ahab ap, Yosafat ap, ninye deiyok nang ongolamak baju, pia teleb ning ongobukapdikce, sik weik nang bulamak ning deice yuk-yuk bukmarik. Sik bukmarika ara, gandum nyalamak ning el duk dolona ati lalamikak, ara Samaria mutuku bana ati, bisik bublan dam binuka bukmarik. Bukmarikba, Allah el yupu lak nyan nang weik yanganmekce, sik deiyok nang bukmarikak, aminyan winipnamuk ning ati, yupu nyalilbanmek.

11 Atalak ara, Allah arye yupu nyapdeipnaba lak nyan nang, nabi-nabi aunmek bukni, tonok nabi Kenana el mi Zedekia birye sapi basam kisok tace dana-dana belelamle ning urasin atonun, kat ning arye kintinip deibuk Ahab bukmok dam boyayukce nyabuk. “Kume na deiyoknye, anda agat ning atonun ning arye bobimince, Siria mutuku ninye obuka sirya dakmince, sik unyak mutuku alapnalame. Ara, nun ni koproba Allah el si Yahweh arye, nyapdeipmalba akunum nyapkine. Aning ara, talye kum nyapkine. Nun ni koprop Allah el si Yahweh arye, nyapmal touk nyapkine,” nyabuk.

12 Ura, Zedekia birye nyabukba, sik awekmek nang, Allah el yupu lak nyan nang, nabi-nabi nang nirya arye, “Aning ara dib nyapmakile. Nun ni koprop, ance Ramot Geleat mutuku unyak ninye nirya olbimince, sirya daknamalame. Sik unyak mutuku babye alapnalame. Ara, talye kume, Allah el si Yahweh arye, mikip arepkilya deice arye winipnamalame,” nyanmek.

13 Nyanmek ning ara, sik anyaik wekmek ninye nirya arye kekenmek. Atalak ara, Allah el yupu lak nyananye Mikha biti, nyalbinmoknye birye, tonap Mikha biti nyabuk. “Naie, an kwit capu sik yuk nabi nang nirya ara, ato touk nyapmake. Sik nirya arye, ‘Ahab dipkoprob Ramot Geleat ninye obuka sirya daknalame,’ nyapmaka ati ara, ance ton ateleb yupu atonun binuka nyapnamalyame. Yuk yupu nyana kume. Ance aninguk nyapminba, sik weik deiyok nang sik kanye teleb upnamale. Yupu ance ton binuka nyapnulama ati nyapkine,” nyabuk.

14 Nyapdeibuk bukni, sik bitinye min kum yanaprik talak ara, Mikha birye el yupu bobinmoknye biti nyabuk. “Nara yuk ning ton kum nyapnune. Allah el si Yahweh ara, pia Kam Una Deiyoknye dipkoprob ulule. Ati, Yahweh elce nyapdeipnunil yupu uk, dipkoprob aninguk, binuka nyapnuna,” nyabuk.

15 Nabi Mikha akunum nyabukura, sik bitinye tamubuka Ahab bukmoka dam birikopura, Israel nang sik deiyoknye birye, asibuk. “Mikhao, yatato do? Na ap, Yosafat ap, nun bitinye arye Ramot Geleat mutuku olbinamanam ning ara, teleb nyapsiminba, olbinamanam do, kume nyapminba, bataknamanam do?” nyabuk. Nyabuk bukni, Mikha birye tamubuka nyabuk. “Olbana uka, na deiyoknye anti Allah arye, ‘Telebe dawiniplule,’ tenepmakila ati ara, ance Ramot Geleat mutuku nang opmince, sik unyak mutuku babye dopropnalame. Allah el si Yahweh arye, melipkilya deice arye sik anang obuka sirya daknalame,” nyabuk.

16 Nyabuk bukni, Ahab Israel nang sik deiyoknye birye tamubuka Mikha biti nyabuk. “Dipkoprop Allah el si Yahweh, el si deice arye pia dipkoprob ninguk nyapnamnilyame. Yata wiribuka talak nirya ara, narye anti, ‘Dib yupu uk nyapnamnilyame,’ nyabuka aning akunum nyapkise do? Talye ninguk kum nyapnamnilyame,” nyabuk. 17 Nyabukaura, nabi Mikha birye tamubuka nyabuk. “Na dinmasiba Israel yin nang ara, domba basam wein nang kum ati, ulamikirye, talye-talye yuk-yuk mutuku balamak atonun wininmekba, eipse. Ara, nun ni koproba Allah el si Yahweh arye nyapnuke. ‘Wini talak ara, Israel nang sik weik deiyoknye kum unmala ati ara, sik talye kanye bobuka, sik mutuku tamubuka yuk-yuk binamake,’ Yahweh arye nyapdeipnuke,” Mikha birye nyabuk.

18 Ahab ayupu akunum kekebukopura, Yosafat biti nyabuk. “Atia, na akunum nyapmakune. Mikha biryopura, pia asum-asum nirya, elce na dam ara teleb yupu ton kum nyanulule. Malye yupu uk nyanulula ati ara, wini talak babye malye yupu uk nyapnile,” nyabuk. 19 Ayupu nyabukura, Mikha birye tamubuka nyabuk. “Dipkoprop nyapmakine. Ati ara, Allah el si Yahweh arye, nyapmakil yupu kekepnulyame. Aning-aning nirya talilulnye Yahweh, el bunak bukmokba, el pil don nang yin talin malaikat wekuka el kwanim tam ap, el sirik tam ap, tikmokak bukmokba, eipse,” nyabuk.

20 Aning eipsiba, Yahweh arye ayupu nyabuk. “Yatanye birye yupu nyapdeipmalba, Ahab birye ‘Ramot Geleat mutuku nang olbinaman’ tenen, banmalaba, anang arye elti, opnamak do?” nyabuk. Nyabukura, abulupmek yin talin malaikat nang arye, bin ton yuk, bin ton yuk, “Aning winipnuyap do? Aning winipnuyap do?” nyabuka, yupu yuk-yuk nyanmek.

21 Nyanmekba, malaikat tonoknye lak kibuka, Allah el si Yahweh dam yanuka tikukce nyabuk. “Narye Ahab el talima namin kilina ati, ‘Winipnamalyame,’ nyalbinamne. Winipyopura, na nyapnamne touk winipnamle,” nyabuk.

22 Nyabukura, Yahweh arye amalaikat ati asibuk. “Yata wiripminya deice arye, el talima tamopnamle do?” nyabuk. Nyabukba, amalaikat arye nyabuk. “Aning ara, narye Ahab dam yupu nyalinamak nang nabi-nabi nang ati, sik talima noutam tilila yupu binuka nyapniba, kekebikirye, atilila yupu uk Ahab biti binuka nyalinamake,” nyabuk.

Amalaikat arye nyabukba, Allah el si Yahweh arye tamubuka, aisa ati nyabuk. “Aning binuka nyapdeipminba, anabi nang arye Ahab biti atilila yupu nyabicopura, dipkoprob kekebuka Ahab talima tamupnamle. Ati, adiparyuk winipnalame,” nyabuka Allah arye, aisa ati nyabuk. Mikha birye nyabuk. Ura, aning eibuk ning nirya ara, Mikha birye Ahab biti nyabuk.

23 Mikha birye ayupu nyabukopura, ayupu ton dukdongobuka nyabuk. “Ayupu nyanmek ning nirya eipsirye kekepsa ati, sik nabi-nabi nang nirya arye, yanuka nyapnamkiyak yupu ara, tilila yupu aryuk nyapnukinyake. Ara, talye ati kume. Allah arye nyapdeibukba, el malaikat arye, tilila yupu bobuka sik nabi-nabi nang dam nyapdeibukba, sik anang arye an dam yanuka tilila yupu nyapmake. Ara Allah arye, tenepmal touk unmake. Ati ara, na deiyoknye, anda dipkoprob weik kanye imun ning dopropnalame. Yahweh arye, akunum tenepmakil touk winipnamkile,” Mikha birye Ahab biti nyabuk.

24 Mikha birye ayupu nyabukopura, Kenan birye deibuknye, nabi Zedekia birye ayupu kekebukce adiparyuk tikuka, nabi Mikha katum yanuka bokuk. Winibukabukce, “Allah el si Yahweh arye, dopdeibuk malaikat ara, na dam yanuka nyapdeipmokce, na deice arye ubuka, an dam bana ati, dan bisik binmokce nyapkuk do?” nyabuka asipdeyuk. 25 Winibukba, Mikha birye Zedekia biti nyabuk. “Anda ‘Malaikat arye dib yupu nyapmanue,’ tenepmalam bukni, tilila yupu nyan malaikat arye, yanuka nyapmakue. Ati, an nyapdeipmakil ning ara, dib upnamakil do? Aning ara otam winipnamal ning arye kel biknamalame. Otalak ara, an ilil upkilyeba, urdem aik noutam duknupnalam sum arye kel biknalamca,” Mikha birye nyabuk.

26 Nyabukura, aning ninye deiyoknye Ahab kekebukce, el mapu ati, “Adiparyuk Mikha tomobuka ninye si Amon dam bobilulume. Ara, anyasik nirya talibuka yupu nyana deiyoknye Amon ap, tonda nara amutuku weik deiyoknye na mi Yoas ap, sik dam bobilulume,” nyabukura, tomobik. 27 Ayupu nyabukce, ayupu ton dukdongobuka nyabuk. “Sik anang dam bobimunyeba, wenen aik akunum dongopdicopura, teleb din ning aning-aning nirya kum arenamake. El ti ara, talye roti ap, mek ap, aninguk arenamake.

Mitik-mitik uk arelamdiki bukni, nara Ramot Geleat mutuku binuka amutuku nang ati opnirye, teleb aryuk tamubuka yanyopura, anye bataknamne. Ati ara, na Raja Ahab birye akunum nyapdeipne. Ati anggunce, Amon ap, Yoas ap, sik dam nyalbinamlulume,” nyapdeibukba, ‘Mikha bobinuka nyalbinuyap’ tenen, kintinibik.

28 Nabi Mikha tomobik talak ara, yupu tonok ton Ahab biti nyabuk. “Na deiyoknye an kum opkikirirye batakikiba teleb arye tamubuka yaminyopura, anggun nirya arye biknamlulume. Ara, ‘Allah el si Yahweh arye, Mikha dam nyapdeiamuka kume,’ tenepnamnilame. Bukni, kum tamubuka yaminyopura, ‘Se, dipkoprob Allah aryuk nyapdeiamnuke’ tenen, biknamnilyame. Ati, ayupu nyapman ning ara, anggun akekenmalum nang nirya moubuka tenepmunce dinauk unamlume. Na nyapman yupu ara dib winipnamle atia,” Mikha birye nyabuk.

29 Ahab Israel tam nang sik deiyoknye ap, Yosafat Yehuda tam nang sik deiyoknye ap, adiparyuk sik bitinye Ramot Geleat mutuku ulamik nang olbirik. 30 Olbinurikba, Ahab birye Yosafat biti nyabuk. “Kume nara yin talin nang koprop atonun ubuka, ninye olbinuna ati ara, ninye deiyok nang ongolamak ning pia teleb ongon aling ara kum ongopnune. Bukni, Yosafat, anda ninye deiyok nang ongolamak ning teleb baju ongopnulyame,” nyabuk. Akunum nyabuka ati, Israel ninye sik deiyoknye Raja Ahab bira, ‘Yuk nang arye, kum biknamniyak’ tenen, yin nang koprop ongolamak baju uk ongobuka, ninye olbiyuk.

31 Winibuk talak ara, Siria tam ninye taleamuk deiyoknye birye, el yin deiyok kibuka yin nang nirya taleamik nang sik yupa ara, tiga puluh dua nang ulamik. Tonda, sik anang ara ninye olbinun talak ara, kuda basam kirikuka tuku deice balamik ning, el si kereta kuda nirya kintinibuka taleamikce balamik. Winyamika ati, sik ninye deiyoknye birye sikti, mambul yupu nyapdeibuk. Ara, anggun olbinumunye talak ara, weik nang babye, amu tam nang babye, yuk-yuk nang ati kum tenepnamlume. Sikda, ‘Israel tam nang talilula deiyoknye, Raja Ahab binyuk dobolbinuka opnamalulume,’ nyapdeibuk.

32 Nyabuka akunum nyapdeibukopura, sik yin deiyok nang ap, sik mapu yin nang ap, sik neika adiparyuk biyik. Winibikce Yosafat eibikce, elti, ara, ‘E atia. Weik nang ongolamak baju, pia teleb baju ongopmalanye bira, Israel ninye sik weik deiyoknye aunmale,’ tenebik. Winibuka tenebika ati ara, ‘Eluk opnuyap’ tenen, el unmokak biyikce, binuka warikik. Winibikba, Yosafat birye, “Nara Israel ninye sik weik deiyoknye kuma,” nyabuka ngalukuk. 33 Ngalukuk ning ara, sik abinuka warikmek yin talin nang babye, ayin nang sik weik deiyok nang babye, adiparyuk kekebikce, ara ‘Diba elda Israel ninye sik deiyoknye kuma, ati ara elda kum olbinuyabe’ tenen, batakikce elda dobolbana batakik.

34 Yosafat batikik bukni, Siria mutuku yin talinanye tonok arye, ‘Israel tam nang, sik deiyoknye Ahab ani,’ tenena kumce, talye mangkau kanye bobuka, ‘Ahab bira abanmala,’ tenena kumce, mal talye doplopmokba, adiparyuk Ahab banmokak uk poulbiyukce, Ahab bira, ninye olanuce talak ongolamak kat baju ongopmokce, banmok bukni, lo upmokak binuka marabuk. Ara, mitik lo upmok noutam marabuk. Winibukba, el keledai kirikuka tuku deice banmok ning bukmokak arye, el melinanye ak nyabuk. “Se, na akunum marapniyake. Ati ara, amutuku oldanmaka ati ara, amutuku batakuka, yuk talye tam binuname,” nyabuk.

35 Nyabuk bukni, min buru tam sakuka kum bitiringe. Pia mal oldanmeka dam binmarika ati, anoutam nirya ara, tuba Siria tam nang unmek sukumuk unmarik. Asukumuk unmarika ani, pia mal ara marapmekba, dila upmokak ara, ining banmok. Aining banmokce, keledai kirikuka tuku deice balamak ning bukmokak ara, ining arye mekwen deipmok. Winipmoka ati ara, el nong ara, adiparyuk asum inipnuyuk talak ara, Ahab dibuk. 36 Israel tam nang, sik deiyoknye akunum dibukopura, asing tam aryuk, el mapu Israel yin nang nirya ak nyapdayik. “Adiparyuk bai tam sakuka, nun asik koprop unyabakuk, yuk-yuk bindopnamabe. Nun mutuku kopropauk tamubuka, yuk-yuk bindopnamabe,” nyabuka, yupu nyapdayik.

37 Ati ara, sik deiyoknye Ahab bira, akunum opmekba dibuk ati, ‘El nong ara, Samaria mutuku weipnamabe,’ tenebikce, anang arye el nong bobuka, Samaria mutuku tamubuka bobinuka weibik. 38 Ahab opmekba, bukmok kuda basam kereta deice, el ining sakmokce dupmok ning ara, Samaria mutuku mitik mekwen dam arye, mek ilikik. Wininmek mekwen ara, yo bok arepna arye talye-talye yolamik kilapu kekenmekce mek ilikik. Tonda kereta keledai deice dupmok ining ara, mek likinmekba, tuku deice sakanmok ning ara, talye kam arye ton mutubuka dibik. Aning ara, Allah el si Yahweh arye, nyapdeiamuk touk winibik.

39 Ahab birye Israel ninye taleamuk talak noutam winilamuk ning nirya ara, yuk nang arye sik Israel ninye deiyok nang ati, si sekne buku deice akunum sekik. Ara, el pil dolamuk ning ap, el weik deiyoknye aik domuk ning ap, anyaik noutam weik basam el si gaja, yang belelamle si dobuka puturubikce, anyaik abilinga deibik ning ap, tonda ‘Yu nang arye yanuka opnamsiyak talak nun asik dam kum yanamsiyak’ tenen, weik cang poka anyasik dam dobuka antanapdongamik ning ap, aning-aning nirya abuku noutam akunum sekik. 40 Ahab akunum dibukba, el apu yape wilamikak weibik. Weibikura, el pununa ati ara, el mi Ahasia birye Israel ninye sik deiyoknye kibuk.

41 Israel ninye, sik ninye deiyoknye Ahab birye, sik tam taleamuk ani, keting tamun dumbarye akunum ubuk talak ara, Asa el mi Yosafat birye, Yehuda tam ninye sik deiyoknye deiyok koubuka talibuk. 42 Yosafat el upnin balamuk talak ara, tiga puluh lima tahun akunum ubukopura, deiyok kibuka Yehuda mutuku tam talibukce, el ulamuk mutuku ara, Yerusalem mutuku ulamuk. Yerusalem mutuku ulamukce, Yehuda mutuku tam ninye sik weik deiyoknye kiamukce, keting tamun dua puluh lima tahun deice arye aninye talibuka ulamuk. Yosafat, el lin si ara, Asoba. Akil ara, el li koproba si ara Sili ulamuk.

43 Yosafat ulamuk talak nirya ara, el babye el li koproba Asa winilamuk touk winilamuk. Ara, el li koproba arye winilamuk touk, Allah el si Yahweh arye, ‘Aning teleb,’ tenyamukce nyapdeiamuk ning ara, aninguk talibuka ulamuk. Malye ning pia ton kum winilamuk. Bukni, sik Yehuda tam ninye arye, mutuku deice binuka kam ning obuka, Allah ati arelbalamik ning nirya ara tuba awamuk.^a Aning ara, Yosafat birye, kum uluplomuk anya arye, aninye tuba mutuku deice binuka kam ning obuka arelbalamikce, Allah el si erena ati, nintong teleb ning uku dongolamikce morolamik. 44 Yosafat birye, Yehuda tam taleamuk talak noutam ara, Israel ninye ap, sik deiyoknye Ahab ap ara, kum olalamik. Sik yupu neika sisiklamrika anya arye, atalak ara Yehuda tam nang ap, Israel tam nang ap, talye mangkau arye, teleb ubuka neika ulamik.

45 Yosafat birye Yudea tam taleamuk talak noutam winilamuk ning nirya ara, weik buku noutam akunum sekuka deiamik. Ara, sik Yudea tam ninye deiyok nang, Raja nang kibuka talipnin yangalamik nang nirya ati, weik nukna buku noutam sekuka deiamika atonun, Yosafat birye winilamuk ning ap, el yin talin nang ap, el ap, yuk mutuku nang ati mal olalamik ning ap, tonda Yosafat birye yuk weik pil dolamuk ning ap, aning-aning nirya ara, Yehuda tam ninye deiyok nang arye winilamik ning, weik buku noutamakuk seklamik ning, aupmale.

46 Yosafat birye winilamuk ning ton aupmale. Ara, el li koproba Asa bira teleb ubuka winilamuk bukni, tonok malye ning ton kum uluplomuka anya arye, Yosafat birye el li koproba ati punubuk talak ara, amalye ning tuba winilamuk. Ara, ton nang ara isa si erelamika anya arye, isa si eren aik pum tam ulamik malye nang ton, Asa birye anang obuka sirya kum dakamuk. Anang ara, sal bukni, yuk nang aryuk yo bok arepna arye talye-talye yolamik. Awinilamik ning ara pia malye weik bukni, Yosafat el li koproba arye, Raja Asa ulamuk talak aning min kum winipdeiamuk. Ati, Yosafat birye el li koproba ati punubuk talak ara, sik amalye winibuka yolalamik nang nirya kum daneiamuk. Winyamukba, Yehuda mutuku noutam ton kum ulamik. 47 Atalak ara, Edom mutuku noutam ulamik ninye ara, sik ninye deiyoknye ton kum taleamuk. Winyamukba, ninye deiyoknye el amu tam pil donanye birye, tia talak ara sik yupu bokolina deiyoknye kibukce, Edom mutuku taleamuk bukni, dipkoprob ara Raja kum ulamuk.

48 Tonda, Yosafat birye nyapdeiamukba, el pil don nang arye weik laut mekwen deice balamuk ning, el si kapal laut ton memelamik. Akapal-kapal weik memelamikce, bona libuka Ofir mutuku bikirye, ‘Dekna weik ning, kat ning el si emas, dopropnamaka’ tenen, kintinibuka memepdeiamik bukni, dipkoprob Ofir mutuku kum binamik. Deiyok ara, Yosafat birye malye ubuka ati ara, Allah arye nyapdeibukopura, mutuku si Esion Geber mutuku ara, ninye arye akapal laut nirya ulubuka batakik. Ati, akapal nirya ara, laut mekwen deice dipkoprob kum binamik.

49 Atalak ara, Ahab el mi Ahasia birye Yosafat biti nyabuk. “Ance ‘Telebe,’ nyapniminyeba, na mapu dopdeipniba, an mapu ap, neika an mekwen deice kapal laut aryuk neika binamake,” nyabuka morobuk. Nyabuk bukni, Yosafat birye ‘Na like,’ tenebukce, “Yo,” kum nyabukura, neika kum balamik. 50 Ura, sik daulamika ani, Yosafat dibuk. Dibukba, el apu yapu weilamikak uk, tonda el apu koproba minop talak ninye deiyoknye, Raja Daud domukce ulamuk mutuku noutamakuk, Yosafat babye ton weibik. Yosafat akunum dibukopura, el pununa ati ara, el mi Yoram birye Yehuda mutuku ninye sik deiyoknye kina ati, Raja Yehuda tam kibuk.

51 Yosafat birye Yehuda mutuku tam ninye taleamuka ani, keting tamun tujuh belas (17) tahun akunum ubukopura, atahun noutam ara, Ahab el mi Ahasia birye atalak uk Israel yala nang ulamik mutuku tam talibuka, ninye deiyoknye kina ati Raja Israel kibuk. Winibukce, Samaria mutuku ulamukce Israel tam taleamuk. Ahasia birye, keting tamun bitinye deice arye, Israel ninye taleamuk.

52 Ahasia birye, Israel mutuku tam taleamuk bukni, Allah el si Yahweh arye, ‘Wininamlyame,’ nyapdeiamuk ning ara, kum taleamukce, Allah arye, ‘Aning ara malye,’ tenyamuk ninguk, pia weik arye winilamuk. Ara, Ahasia el li koproba ap, el lin ap, tonda Nebat el mi Yorebeam ap, pia malye winilamrik ninguk, Ahasia babye amalye piluk talibuka malye weik ulamuk. Anye Yorebeam bira malye weik winilamuk touk, anang nirya arye, malye weik ulamik bukni, Israel ninye arye aning nirya eibuka bikamikce, sik babye malye weik ulamik.

53 Ahasia birye isa si, Bahal siuk talibuka erelamukce, aning atibuk winilamuk. Aning ara, el li koproba Ahab babye winilamuk deice arye, Israel ninye nirya weik malye ulamik. Aning atonun Ahasia babye winilamuk. Ati ara, Israel ninye kalikuka melilamuk Allah, el si Yahweh arye, Ahab biti yu weik uamuk touk, Ahasia babye malye weik ulamuk ning ara, Allah el si Yahweh arye, elti, yu weik tenelamuk.