2 Raja-Raja
Allah arye, yuk keting tamun noutam arye, Israel ninye melina ati, yuk ninye deiyok nang wipdeipnaba, pil dopra balamik yupu
Nabi Elia birye, ninye deiyoknye Raja Ahasia dibuk ning ati, laka nyalbiyuk yupu
1
Ninye deiyoknye Raja Ahab, Israel mutuku noutam talibuka ulamuknye, akunum dibukopura, sik Moab mutuku nang arye, ‘Israel tam ninye nirya opnamap’ tenen, Israel yala ninye ati, malye kibuka obikce, ton nang bobiyik. 2 Tonok sum ara, ninye deiyoknye, Ahab punyamuknye, Israel yala ninye talibuka ulamuka, sik deiyoknye Raja Ahasia bira, el mutuku koproba, Samaria mutuku noutam, el ulamuk aik, alip aik unmokbuk, anyaik amsuna yo lyuamuka arye, el amsuna yo daksakukce, eitam arye sakuk. Sakukce, el obuk dila ara, kanye imun weik ning kibuk. Winibuka ati, Raja Ahasia birye, ninye wibuka dopdeibukba, sik amutuku noutam arye, si erelamik isa, Bahal-Zebub, el si erelamik aik sukum ati, asilbiyik. Ara, Pilistin mutuku noutam bukni, Ekron mutuku noutam arye, Bahal isa si sibuka, si erelamik isa ati, “Se nun ninye deiyoknye Raja Ahasia bira, kam buknamle do, kum do?” nyabuka, asilbiyik.3 Sik anang arye, asilbiyik bukni, Allah Yahweh el im deice pil donanye malaikat dopdeibukba, elce nabi Elia, Tisbe mutukunye biti, el dam binuka nyabuk. Malaikat arye nyabuk yupu ara, ani.
Nabi Elia anda binulyame. Ara, Samaria mutuku arye, Ekron mutuku asilbinmak nang dam binulyame. Ara, ninye deiyoknye Raja Ahasia, elda Samaria mutuku talibuknye birye, wipdeipmalba, yanganmak nang ap, epdanamlume. Epdamunyopura, nyapnamlamle. “Sik Israel mutuku noutam ara, ‘Dipkoprop Allah ton kum ulul do? Allah kum ulule,’ tenemunye deice arye, Ekron mutuku ninye arye, si erenyak isa, el si Bahal-Zebub dam asilbilum do? Yata deiyok ati, aisa dam bilumce, ‘Nun deiyoknye Raja Ahasia dipnamle do, kum do?’ nyabuka, asilbinmalum do? 4 Talye isa ati asilbinmaluma ning ara, na Allah Yahweh arye, Raja Ahasia biti nyapne. Ninye deiyoknye, an Raja Ahasia bira, aisa arye kum kwetepnamkile. An amapmalamak arye, kum buknalame. Asukumuk, dipnalame, nyapkine. Anggun asilbinmalum nang arye, anggun deiyoknye, Raja Ahasia biti nyapnamlulume!” Allah Yahweh arye, nabi Elia biti nyapdeibuk. Anyapdeipmok yupu akunum nyapdeibukopura, Elia adiparyuk, ‘Ayupu laka nyalbinun’ tenen, biyuk.
5 Nabi Elia birye, ayupu akunum nyabukopura, Raja Ahasia birye, awipdeipmok nang nirya ara, tamubuka sik ninye deiyoknye, Raja damuk biyik. Tamubuka biyikura, Raja arye sikti, asipdeyuk. “Anggunda, yata deiyok ati minopce tamubuka, na dam yalum do?” nyabuka asipdeyuk. 6 Nyabuka asipdeyukura, awipdeipmok nang arye nyabik. “Ninye bin tonok ton, nun bisik banmapu noutam ton epdanmapu. Epdaburye, anye elce nyapmasue. ‘Kume anggunda, adiparyuk tamuplulume. Tamupmunce, anggun deiyoknye biti nyalbinululume. Ara, Allah Yahweh arye nyapmasue. ‘Anggun deiyoknye, Raja Ahasia dam nyalbinalum yupu ara, ani. Ara, anggun Israel mutuku noutam ara, Allah ton ulul do, kum do? ‘Allah kum ulule,’ tenepmalum ati, asilbinmalum do? Ekron mutuku ninye arye, si erenyakisa si Bahal-Zebub dam, anggun binmalumce, ‘Nun deiyoknye Raja kam unamle do, kum do?’ nyabuka, morona ati, Ekron mutuku banmaluma ara, yata deiyok ati do? Talye isa ati morolbanmalum ning ara, na Allah arye nyapsine. Anggun deiyoknye, Raja Ahasia, el uk dilul ning ara, pia kum kwetepnamne. Elda amapmalak arye, kum buknamle. Kam kum unamle. Raja Ahasia elda amapmal sukum arye dipnamle!” nyabuka, sik anang arye, Raja Ahasia biti laka nyabik.
7 Nyabikba, Raja Ahasia birye, minopce awipdeipmok nang ati asipdeyuk, “Bisik noutam arye epdanmalumnye bira, el urasin ara, yatato upmo do? Tonda, anggun tenipmaluma ara, elda yata tonye upmo do?” nyabuka, Raja Ahasia birye asipdeyuk. 8 Nyabuka asipdeyukura, awipdeipmokba, bisik noutam arye, nabi Elia epdanmek nang arye, tamubuka nyabik, “Anye el baju ap, el deiyatinga ap, deipmo ning nirya ara, bai tam kam ulamle ning, el bola kobukabukce, el baju wibuka, ongobuknye birye nyapmasue,” nyabik. Nyabikba, Raja Ahasia birye nyabuk, “Se, na kele, anye bira, nabi Elia ulule. Elda Tisbe mutukunye birye nyapmasue!” nyabuka, Raja Ahasia birye nyabuk.
9 Raja Ahasia birye nyabukopura, ilil tenena kumce, ‘Anye Elia tomopnun’ tenen, yin talena deiyoknye tonok ap, el amu tam yin telin nang lima puluh (50) nang ton, wipdeibukba, binuka Elia dam biyik. Ilil tenena kumnye ap, el yin talen nang ap, Elia tonok mutuku deice binuka bukmokak biyikce, ayin talena deiyoknye birye, Elia eibuk. Eibukopura, nyabuk. “Se, anda Allah pil donanye, nabi ulyamnye bira, nun mutuku ninye deiyoknye, Raja Ahasia birye anti, ‘Wini talak aryuk, na yin talin nang ap bimunce, na dam akoulukuka yalule!” nyapdeipmakile,” nyabuk. 10 Nyabuk bukni, Elia birye, ayin talena deiyoknye biti, tamubuka nyabuk, “Diba, nara, Allah el pil donanye nabi unune. Aning biknamluma ati ara, an ap, an mapu ap nirya ara, wini talak uku buk im deice arye kouluklirye, anggun nirya dibuka sirya daknusile,” nyabuk. Elia birye nyapbuk touk, atalak aryuk uku buk ara, im deice arye koulukukce, ayin talena deiyoknye ap, el mapu lima puluh (50) yin talen nang nirya ara, uku buk arye dibuka sirya dakuk.
11 Winibukba, bikik bukni, aminyan talak ara, Raja Ahasia birye, yuk yin talena deiyoknye ap, el mapu lima puluh (50) yin talen nang ap, ton wipdeibuk. Wipdeibukba, Elia dam biyikce nyabik, “Se, anda Allah el pil donanye nabi, nun weik deiyoknye Raja Ahasia birye, ‘Wini talak aryuk minopce na dam yalule,’ nyapkile. Mikip asa arye nyabik. 12 Nyabikopura, nabi Elia birye, ayin talena deiyoknye biti, tamubuka nyabuk, “Nara, dipkoprob Allah el pil donanye nabi unune. Ati an ap, an mapu ap nirya ara, aning biknamluma ati ara, wini talak uku buk, im deice arye kouluklirye, anggun nirya dibuka sirya daknamasile,” nyabuk. Elia birye nyabuk touk, atalak aryuk, Allah arye uku buk dopkwetebukba, uku im deice arye sakukce, ayin talena deiyoknye ap, el mapu lima puluh (50) yin talen nang nirya ara, uku buk arye dibuka, sirya dakuk.
13 Winibuk bukni, tonok sum tonap, aning atonun, ninye deiyoknye Raja Ahasia birye, yuk yin talena deiyoknye ap, el mapu lima puluh yin talen nang ap, wipdeibuk. Ayin talena deiyoknye bira, mutuku konak welebanmoka ani, Elia el bukmokak biyukopura, ayin talena deiyoknye, el kutam tuku dipdongobukce, ‘Nabi Elia birye, nati bico tenepnutue’ tenen, binuka nimalyap arye morobuk. Ayin talena deiyoknye birye nyabuk, “Diba, na kanye arye tenipne. Ance nunti, namin kipsimince, kum opnusilame. Nun nirya ara, an amu tam pil dona melin nanguk unyabe. Nabi Elia, an Allah, el pil dominye nabi ulyame! Na ap, na mapu ap, nun nirya ati, bico tenepsimince, kum opnamasilame na nio.
14 Na kele na nio, arup sum like bitinye, weik yin talena deiyok nang bitinye ap, sik mapu yin talen nang seratus (100) nang nirya ara, uku buk im deice arye, akunum dopkwetebuka, opmoa anya arye, na dipkoprob nabi Elia anti moropmakine. Nun ti pia bico tenepsilyame. Nun ona ara, kume na nio,” nyabuka, nimalyap arye, binuka morobuk.
15 Nyabukopura, Allah Yahweh el pil donanye, malaikat arye, Elia biti nyabuk, “An ilil una kume! Anyapmakin touk kekebuka, amutuku kon arye, mangkau asa koulukmince, Raja Ahasia dam binulyame.” Nyabukopura, Elia adiparyuk koulukukba, ayin talena deiyoknye, like winilinye yanmoknye ap, neika ansinibuka, ninye deiyoknye, Raja Ahasia dam birik.
16 Ansinibuka birikopura, nabi Elia birye, Raja Ahasia biti nyabuk. “Allah Yahweh arye anti nyapkile, ‘Anda ninye winipnulyame, nyan yupu laka nyana ati, nyapminba, isa si Bahal-Zebub Ekron mutuku isa si sibuka moron ati, wipdeipminba, banyak nang ara, yata deiyok ati nyalyam do? Israel mutuku noutam ara, sik melinanye Allah ton, kum ulula ati, talye isa ati asilbinamik do? Ance nyaplumba, anang ara, Ekron mutuku isa ati morolbinmik ning ati, anuk dikulul ning ara, pia kum kwetnamkile. Anuk dinmakilba, amapmalamak arye kum buknalame. Asukumuk dipnalame!” nabi Elia birye nyabuk.
17 Nyabukopura, ninye deiyoknye, Raja Ahasia bira, Allah Yahweh arye, nabi Elia biti nyapdeipmokba, aning laka nyabuk touk, Ahasia bira adiparyuk dibuk. Ati ara, Raja Ahasia elce deiamuk mapu koprop, ton pia kume. Ati Ahasia, el kwit koproba, Yoram bira Raja punubuka tikuk. Aning winibuk keting tamun ara, keting tamun bitinye deice arye, Yosafat el mi Yehoram birye, Yehuda mutuku noutam nirya ati, ninye deiyoknye kiamuk. 18 Ninye deiyoknye, Raja Ahasia elce talibuka, ulamuk talak arye, yuk yupu nyalamuk ning nirya ap, elce pil dolamuk ning ap ara, sik amutuku nang arye, sekuka delilamik buku noutam sekik. Abukua el si ara, ‘Israel yala ninye nirya ati talibuka ninye deiyok nang arye, min talak ulamik ning’ nyabik.