Tonda, Allah ara pia dipkoprob tuba kam unamle. Tonda, an babye tuba kam unamlame. Ati, adeice arye, narye dib nyapkine. An ap, melibuka binaname,” nyabuk. Nyabukura, sik neika Betel mutuku koulukuka birik. 3 Betel mutuku birik talak ara, Allah el yupu lak nyan nang, sik nabi-nabi nang Betel mutuku ulamik nang ara, sikce ‘Elisa eipnuyap’ tenen, yanganmekba, bisikak epdayikce nyabik. “Arup ara, an kel do? Allah el si Yahweh arye, an ka Elia bobuka im deice bobinule,” nyabikura, elce tamubuka sikti, nyabuk, “Na kel bukni, anggunce ayupu kum nyapnunulume. Anggun tunim aplulume,” nyabuk.

4 Elia birye, Elisa biti nyabuk, “Nara Allah el si Yahweh^b arye, ‘Yeriko mutuku bilyame,’ nyapmanila ati, binune. Bukni, anda aulyame,” nyabuk. Nyabuk bukni, Elisa birye tamubuka nyabuk, “Anda tuba kam unmalame. Aning ara dib ulye touk, dib yupu nyapkine. Tonda Allah ara, pia kam ulinye. Aning ara dib ulye touk, dib yupu nyapkine. Ati ara, Allah el si deice arye, nyapkine. An batakuka na yukak kum binune. Na melipkineba, neika Yeriko mutuku binamaname,” nyabukura, sik neika birik.

5 Asum uk Yeriko mutuku dam birikura, Allah el yupu lak nyan nang, sik nabi-nabi nang unmekak birikba, anang arye, Elisa dam yayikce elti, nyabik. “An akunum kel bikmalam do? Atalak aryuk, an dam arye, Allah el si Yahweh arye, an deiyoknye Elia bobuka, im deice welepnamale,” nyabikura, Elisa birye, “Aning ara na kel bukni, anggunce ayupu kum nyapnamanulume. Anggun tunim aplulume,” nyabuk.

6 Nyabukura, atalak aryuk, Elia birye Elisa biti nyabuk. “Anda aulyame. Nara, Allah el si Yahweh arye, ‘Yordan mekin yanulyame,’ nyapmanila ati, binune,” nyabuk. Nyabukura, Elisa birye tamubuka nyabuk. “Anda tuba kam unmalame. Aning ara dib ulye touk, dib yupu nyapkine. Tonda Allah ara, pia kam ulinye. Aning ara dib ulye touk, dib yupu nyapkine. Ati ara, Allah el si deice arye, nyapkine. An batakuka na yukak kum binune. Na melipkineba, neika Yordan mekin binamaname,” nyabukura, sik neika birik.

7 Allah el yupu lak nyana deiyok nang sik yupa bitinye ara lima puluh nang, Yeriko mutuku arye, melibikura, sik neika biyik. Bukni, sikda mitik yukak arye, binuka tikuka dinmek. Sik dinmek talak ara, Elia ap, Elisa ap, sik bitinye Yordan mekin dam binuka tikrik. 8 Winiprik talak ara, Elia el deice tam ongamuk baju kwiribuka kitibukce, mek deice debuk. Winibukura, Yordan mek bokukabukce eitam kilon, utam kilon kibukopura, asukum noutamuk sik bitinye ara, mikmok tuku deice koubukaprikce birik.

9 Akunum mek koubuka otam birik talak ara, Elia birye Elisa biti, “Anda yata ning ton patanmakil ati melipnukin do?” nyabuk. “Allah arye, na dopropnilirye an dam arye, batakuka min kum bobinapnilye talak arye nyapnilyame,” nyabukura, Elisa birye “Allah arye, melipkiliba, an pil dominya deiyok ninguk arepnilyame. Apil dona deiyok ning bitinye kibuka arepnutume na nio. Winipnutumura, an pil dominye touk na babye, atonun pil donamne,” nyabuka Elisa birye Elia biti morobuk. 10 Nyabukura, Elia birye tamubuka nyabuk, “An moropmanilam ning ara, weik ikin ning moropmanilam bukni, Allah arye, na bobuka im deice bobinamnil talak, an asing koproba arye, eipniminyopura, an moropmalam ning ara aupnamkile. Bukni, an asing koproba arye, kum eipniminyopura, ance moropmanilam ning ara kum upnamkile,” nyabuk.

11 Sik tuba bisikak banmarikce ayupu nyapranin banmarik talak ara, talye karin arye, weik ning yayukba, eiprik. Ara, kuda basam kirikuka tuku deice balamle ning, kereta kuda basam nyalamak urasin atonun ning ap, tonda balye deice bukuka balamak ning kuda basam atonun ning ton kutukuk. Bukni, aning bitinye sik urasin ara, uku buk dilamle atonun winibukba, eiprik. Eiprik bukni, aning ara sik banmarik noutam yanganmok deice, sik yuk-yuk kiproprik. Winibukura, kumanya mikip weik ning yayukce, Elia ereprakuka im deice welebukba, Elisa eibuk. Winibuka ati ara, Elia birye Elisa batakuka im deice welebuk.

12 Atalak ara, Elisa aning nirya eibukce, ngalukuka malye nyabuk. “Se, na ni, na nio. Israel nang, sik kuda basam deice balamak nang ap, kuda arye, kirikuka tuku deice balamle ning ara akunum eipne,” nyabuk. Ara, Elisa ap, tikmarikce Elia tunimabukura, Elisa birye anye tonap kum eibuk. Kum eibuka ati ara, kanye imun pia weik ubukba, Elisa birye el ongolamuk baju kwilikuka bitinye kibuk.

13 Winibukce, el li koproba Elia ongolamuk baju batakuka biyuk ning ara, doprobukce, tamubuka Yordan mek kup-kup yanuka tikuk. 14 Ayanuka tikuk talak ara, Elia ongolamuk bukni, batakmuk baju bopmuka arye, amek deice yanuka debukce nyabuk. “Allah el si Yahweh arye, Elia pia melilamukba si erelamuk Allah ara dan do?” nyabuka, abaju mek deice debukba, Yordan mek bokukabukce eitam kilon, utam kilon kibukopura, anoutam ara mikmok tuku deice yanibuka biyuk. Winibuka deice arye, Elisa adiparyuk mek koubuka atam yayuk.

15 Yeriko mutuku dam arye, yanmek nang, Allah el yupu lak nyana deiyok nang arye, tuba Elisa biti dinmekce, nyabik. “Se, Elia weik pil dolamuka deiyok ning ara, wini talak Elisa deice aupmale. Tuba unamle,” nyabik ning ara, el dam yanmekce, el si erena ati, el dam yanuka kutam tuku dib dongobuka morobik. 16 “An kekepsimince biklyame. Na nio, nunda an amu tam pil don nang atonun unyabe. Sik mikip-mikip nang ara lima puluh nang aunmake. Ati ara, anang ati yupu nyapminba, an ni koproba Elia biti elbinune. Nun walwal bukni, winipmanto ara, Allah el si Yahweh, el Dib Kanye arye, Elia bobuka biyuk mutuku deice do,ura, yuk lyu mutuku do, dabinuka batakmalula. Ati ara, elbinuyake,” nyabuka, Elisa biti nyabik. Nyabik bukni, Elisa birye, “Kume, elbana ati, yupu kum nyapnulume,” nyabuk.

17 Nyabuk bukni, sikda, “Kume elbitinge,” nyabuka, tuba-tuba yanuka nyanmek. Nyanmeka ati, Elisa mitik tonun alye ubukba, “Yo, dauplye, elbana telebe,” nyabukura, sikce yupu talipmeka ani, yuk nang lima puluh nang ton wipdeibikura, like winilye deice arye, bai mutuku ulamikce elamik bukni, Elia ton pia kum eibik. 18 Sik anang elamika ani, batakuka, Elisa dam Yeriko mutuku uk tamubuka yayikura, Elisa birye, sik anang ati nyabuk. “Akunuma, na yata nyamsise do? ‘Elia biti elbana kume,’ nyamsisa atia,” nyabuk.

19 Yeriko mutuku ulamik ninye arye, Elisa biti nyabik. “Nun ni, nun deiyoknye ulayame. Amutuku urasin dipdelyame. Nun mutuku ara, pia teleb bukni, amutuku ara, mek pu ara, pia malye ati ara, nun koulamap ning nong kum ulule. Tonda winiryuk mapu ara, pia weik dibinyake,” nyabik. 20 Nyabikba, Elisa kekebukce, sikti, nyabuk. “Winiryuk mek makau dobuka, garam abisik dongobuka, na dam boyalulume,” nyabuk. Anyabuk touk, winibuka el dam boyayik.

21 Boyayikura, amek makau dobuka, sik mek dilamik puak bobiyukce, abopmok garam binuka yamuplobukce nyabuk. “Allah el si Yahweh arye, anggunti nyasulule. ‘Amek ara, teleb kipdeipsine. Ati ara, atalak arye, diprongobuka, doyanamle talak noutam nirya ara, amek dipmunce, tonap malye mek din deice arye, kum dipnamlume. Tonda anggun wa tuku ara teleb upliba, anggun koulumlum ning nong upmale.’ Allah arye, nyapsile,” nyabuk. 22 Winibukura, adiparyuk amek teleb ubuk. Ati ara, amek ara wini talak babye tuba pia teleb ulule. Ara, Elia birye, ‘Wininamle,’ nyabuk touk dipkoprob teleb ubukba, tuba teleb mek ulule.

23 Elisa birye amutuku batakuka, bobinmoka tamubuka Betel mutuku yanamoka ati, bisik yanganmokba, amutuku mapu eibikce, “Dilou, dilou yanmale. Dawelebinulyame,” nyabuka nalilmikce akutunmek. 24 Nalinmek bukni, Elisa tamubukabukce, amapu dipdeyukce, amapu ati, ‘Yata deiyok ati nalinmaniyak do? Allah arye, anang wenebuka opnamle,’ tenebukce, Allah el si Yahweh, el si deice arye, malye yupu nyabuka ngalukuk. Winibuka ati ara, adiparyuk buru tam weik yu ning, el si ara beruang basam bitinye, yo noutamak tam arye, kutukuka yarikce, amapu empat puluh nang nirya yanuka obukaprikce sirya dakmanto kiprikopura, amapu 42 dipmanto unmek.

25 Atalak babye, Elisa bisik noutam yanganmoka, Karmel mutuku yayuk. Winibukopura, tamubuka Samaria mutuku biyuk.