4 Ura, Moab mutuku taleamuk ninye deiyoknye, Raja Mesa bira, domba basam weinanye ulamuk. Ati ara, sik Israel yala ninye ulamik mutuku taleamuk Raja ati, tuku dekna ning ton arelamuk. Ara, pajak deklamuk ning ara, aketing tamun, aketing tamun nirya, domba basam mi, seratus ribu (100.000) ekor ap, tonda domba basam yim ara, seratus ribu (100.000) ekor nemne ning, sik potong dem wibuka, teleb ninguk arelamukba, el tam nang arye, Israel mutuku noutam boyangalamikce, arelamik.

5 Aning pia winilamuk bukni, Israel mutuku ninye deiyoknye, Raja Ahab akunum dibukopura, Moab mutuku taleamuknye, Raja Mesa birye, Israel tam talibuka ulamuknye, Raja Yoram biti, kanye delina kumce, mal pilamukce, el yupu ton kum kekelamuk. Atia ara, Raja Yoram yupu weik pia yanilamuk. 6 Ati ara, Israel tam ninye deiyoknye, Raja Yoram bira, minopce Samaria mutuku noutam ara batakuka, ‘Moab mutuku binun’ tenen, kintinipmok. Tonda winibukopura, ‘Raja el yin talin nang babye, neika binamap’ tenen, weik tonun arye kintinip deibukce, sik neika biyik.

7 Aning nirya, akunum winibukopura, ninye deiyoknye, Raja Yoram birye, laka nyan yupu ati, Yehuda mutuku taleamuk ninye deiyoknye, Raja Yosafat ati nyabuk. “Moab mutuku ninye deiyoknye birye, nati, ‘Anye el yupu ton kum kekenamne,’ tenelirye, na yupu yaniltanulule. Ati, anda na melipniminba, na ninye deiyoknye, Raja Moab olbinunam do, na yuk olbinun do?” nyabuk. Nyabukura, Yehuda mutuku ninye deiyoknye kibuka ulamuknye, Raja Yosafat birye, tamubuka nyabuk. “Na ap, na yin talin nang ap, an ap, an tam yin talen nang ap, neika uninto unyabe. Ati, nun neika mal oldalbana ati, bukuka ban ning, kuda basam ap, na yin talen nang ap nirya ara, aning atonun ulula ati, neika mal pibinuyabe. Yoram anti melipnamkiabe,” nyabuk.

8 Tonda, ayupu ton dukdongobuka nyabuk. “Amelipnamkiap ara, nun nirya binamap bisik ara, dan tam bisik binamap do? Tonda, dan tam bisik arye bibirye, Moab mutuku ninye olbinamap do?” nyabuka, Raja Yosafat birye asipdeyuk. Nyabukura, Raja Yoram birye, tamubuka nyabuk, “Nun adiparyuk mutuku, pata Edom tam kipdopnamabe. Amutuku noutam ara, ninye kumak ati, amutuku bisik arye, Moab mutuku ninye ati olbinamabe,” nyabuk.

9 Nyabukopura, adiparyuk Israel tam taleamuknye, Raja Yoram deiyok kibukce, el kwit Raja Yosafat bira, Yehuda tam taleamuknye ap, tonda Edom mutuku noutam taleamuk ninye deiyoknye, Raja Edom ap, adiparyuk ansinibuka biyik. Like tekbarye (7) sum deice arye, bisik balamik talak ara, weik pala mutuku ara, pata mutuku noutam balamik. Ara, ‘Yuk nang eipsikirye, laka nyapsikcak’ tenen, duknubuka balamik. Bukni, sik mek kwebuka liamik mek nirya ara, sirya diamik. Winibikba, sik yin talin nang ap, sik bona libuka, ban kuda basam nirya ara, mek pia kum dilamikce, mek weik patabukba, mambul kanye bobik.

10 Winibuka balamikce, Israel mutuku taleamuknye, Raja Yoram birye nyabuk. “Se, nun akunum dipmanto unmabe!” nyabuk. “Wini talak ara, yate wiriptibye do? Allah Yahweh arye, ‘Moab mutuku nang arye, awinilye Raja nang opnamak’ tenen, akunuma nun ninye deiyok nang winilye ati, asukum boyanmasila ara, Moab mutuku talibuk ninye deiyoknye Raja ap, el tam nang ap ati, akunum arepsiliba, sikce nunak opnamasiyake,” nyabuk.

11 Nyabuk bukni, Yehuda mutuku ninye taleamuknye, Raja Yosafat birye asipdeyuk. “Amutuku noutam, nun neika banmap nang noutam ara, Allah Yahweh arye nyapliba, el yupu laka nyanye, nabi ton banmal do? Nunce, anye biti asipdenyabe. Ara, el anabinye birye, Allah ati asipdetuba, Allah arye, nunti, ‘Winipnamlume,’ nyabuka laka nyapsutue. Ati, nabinye ton aulul do?” nyabuka asipdeyuk. Asibukopura, ninye bin tonok, Raja Yoram Israel talibuka ulamuk noutam, ulamuk yin talena deiyoknye tonok arye, tamubuka nyabuk. “Kume, amutuku noutam ara, ninye si Safat, el mi Elisa bira, nun neika banyaba atia! Minop talak ara, anye nabi Elia biti, pia melilamuk. Anye tonok Elisa aulule,” nyabuk.

12 Nyabuk ati, Raja Yosafat birye nyabuk. “Diba! Allah Yahweh arye, anye biti yupu nyapdeipliba, anye birye, nunti yupu laka nyapsutue. Anye Elisa, el deice arye, yupu nyana telebe,” nyabuk. Nyabukura, sik ninye deiyok nang, Raja winilye nang ara, ‘Elisa birye, yate yupu nyapnamasil do?’ tenen, el damuk, Edom mutuku biyik.

13 “Biyikura, Elisa birye, sik anang winilye ati, wenebukce nyabuk. “Anggunda, na dam, ‘Yata deiyok ati melipsutue’ tenen, morolyanmanulum do? Anggun ni yapu ap, anggun nin yapu ap arye, talilamik nabi-nabi nang, sikda Allah ati diba kum tenenyak nang, sik damuk asilbinamlume!” nyabuka, Elisa birye, Israel ninye deiyoknye, Raja Yoram biti nyabuk. Nyabukbuk, Raja Yoram birye, tamubuk nyabuk. “Se, aning ara, nyana pia meme. Deiyok ara, Allah Yahweh arye, akunum tenyamuk touk, nun winilye nang nirya ara, Moab mutuku dam akunum boyanmasile. Bukni, nun kanye imun upsil ning ara, wini talak ara, Allah Yahweh arye, ‘Moab mutuku talibuknye, Raja Moab birye, ayanmangu Israel tam winilye Raja nang ap, sik yin talen nang ara, opnamle,’ akunum tenepmasile, nyabuk.

14 Elisa birye tamubuka nyabuk, “Allah Yahweh ara, aning-aning eitam ulirye, el pia mikip weik ulule. Elda, im deice ukirye, yin talen malaikat^a nirya ara talilule. Nara, el piluk donune. Allah Yahweh elda dipkoprob kam ulula anya arye, na dipkoprob nyapsine. Narye anggun winilye Raja nang ati, ‘Dawaplye, pia kum melipnamsine. Anggun ap, na ap, yupu kum taleptibye,’ nyabuka, adiparyuk talye bataksitinye. Bukni, na kwit Yehuda mutuku taleamuknye, Raja Yosafat biti, ‘Elda pia teleb, weiknye,’ tenenune. Anye biti, ‘Telebe,’ tenelamsinye binya arye, el si erebuka kina ati ara, na kwitcapu, anggunce nyanmalum yupu nirya ara kekenmasine.

15 Ati ara, wini talak ara, mot nyan ning, el si kecapi, musik weik kel bikuknye boyanululume. Boyamunyeba, anye el mot nyan ning, kecapi nyanamal talak ara, Allah Yahweh arye nyapnutue,” nyabuk. Nyabukura, mot nyan ning, el si kecapi, boyanuka deibikba, aning onmok talak ara, Allah Yahweh, el mikip weik arebukba, Elisa el kanye pum tam wekukce, mikip kibuk. 16 Allah el mikip, Elisa el kanye pum tam wekuka, langdibuk deice arye, atalak ara, Elisa birye nyabuk. “Allah Yahweh, elce nyapdeipsil yupu ara, ani. Amutuku ara, dana-dana tam weik mutuku aubuk bukni, anoutam weik pala lyu mutuku noutam nirya ara, min anyapce pia mek kum mutuku ulamuk bukni, wini talak ara, minopce weik mekwen deiplirye, langdipnamale.

17 Anggunce dinmamunyebuk, weik mok piridipna dobuka, kumanya yalirye, mok kum yanamale. Bukni, amutuku noutam nirya ara, weik mek kwen ton deipnamalarya. Mek kwen pia weik tonun langdiplirye, amutuku lyu deipnamle. Winipnamle talak ara, anggun ap, anggunce weilulum ning ap, anggun bona libuka bobasin basam ap, anggun aik ninye ap anirya ara, anggun mek pia weik tonun arye, dipmunyeba boupnamsile,” Elisa birye nyabuk.

18 Ura, Elisa birye yupu tonap nyabuk. ‘Bukni, ton amutuku lu noutam ara, weik mek kwen deiplirye, akunum langdiplyopura, ‘Se, aning ara, pia winipmanto kum ninge,’ kum tenenamlume. Aning ara, Allah Yahweh elda, aning ara, dipkoprob an ap aryuk winipnamle. Amekwen deipnamsila ara, kanam aryuk arenamsile. Aning ara, talye ati kum nyapsine. Allah Yahweh arye, anggun melina ati, pia mambul piluk donamsile. Ara, elce mikip arepsiliba, sik Moab mutuku yin talen nang nirya ara, adiparyuk opnamlume,” nyabuk. 19 Tonda, anggunce Moab mutuku noutam ukirye, weik cang keil poka deibuka dobik ning ara, amutuku unyak ninye ap, weik asik aruma, pia teleb ubuka domikce ning nirya ara, pia uluplopmunce, kum kipdeipnamlume. Tonda, amutuku noutam falirye, yo duk moulamle yo yala-yala nirya ara, webuka sirya daknamlume. Atonun, amutuku noutam dilama mek pu dilamle ning nirya babye, adiparyuk kaknupdongopnamlume. Tonda, sik wa wibuka kounyak ning ara, pia teleb kibuka, paplirye bongolul ning nirya ara, pia teleb wa tuku noutam falula anya arye, awa tuku nirya babye, keil dobuka donokmunyeba, adiparyuk awa tuku malye kipdeipnamlume.” Allah Yahweh arye, ayupu nirya laka nyaibukba, nabi Elisa birye, ayupu kekebukce, laka nyabuk.

20 Ayupu nyapdeipmok touk, sik nirya mapmeka berekukopura, ambusum beren tam berekuk talak ara, Allah arena ati, kam ning opnarye, uku dongolamik ketinguk, atamuk, mutuku si Edom tam arye, mek pu dolamle ning, deiyok kibuka balamukce, weik mek minop yanganmokba, amutuku lu noutam nirya, mek kwen weik deibukba, langdibuk.

21 Atalak ara, yuk nang arye, “Ninye deiyok nang, sik winilye Raja ap, sik yin talen nang ap yakirye, Moab mutuku ninye ati, akunum opnamake,” nyabikba, Moab mutuku noutam ulamik ninye nirya, akunum kekebikopura, amutuku ninye nirya, wisi nang babye, kam nang babye, parang ya arye, oldan ning ati opdanmanto nang nirya, sik adiparyuk, sik parang ya ap, sik yin ap dobuka, bonauk ubik. Winibikopura, ‘Nun mutuku oldan ninye yanuka, opsikcak’ tenen ati, ‘Nun mutuku kaliknamap’ tenen, aninye nirya bulubuka, Moab yala ninye mutuku wilipa dam ap, Israel yala ninye mutuku wilipa dam sukumak binuka, wekikce kalik.

22 Winibik bukni, alukunyan mapmeka, beren tam berekukopura, keting purubukce, aweik mekwen bol deice ara, ining bi atonun lak ubuk. Winibuka ati ara, sik Moab yala ninye eibikce, utenebik. ‘Se, amek kwen noutam ara, ining upmale,’ tenebik. 23 Awinipmuk ning ara, sik Moab yala ninye nirya ara, akunum eibikopura, ngalukikce, nyabik. “Se, ara ninye ining atia,” nyabik. “Diba, ara sik ninye deiyok winilye Raja nang, sik yin talin nang arye, sik yuk Raja yin talen nang ati, olanmanguba, ininguk banmau arye, amek noutamuk tuba aupmal atia! Ati nunda bibirye, sik dipmakba batakmak bona ap, sik taruk arye, bopmongo ning ap nirya ara, ubula binuka dopropnuyabe,” nyabik.

24 Utenebikce, sik Moab yala ninye ara, sik Israel yala ninye arye, aik dobuka ulamik mutuku dam yayikce, anyasik wekelyayikbuk, sik Israel yala ninye, sik yin talen nang biyikce, Moab yala ninye ayanganmeka nirya, opyakikba, tamubuka biyik. Tonda, Israel yala ninye, sik yin talin nang ara, pia tuba Moab yala ninye ati, dobolbanauk unmea ani, Moab nang ilil ubukba, bikbik abuka, bisik banmeka ani, sik mutuku tamubuka biyik bukni, sik Israel yin talen nang arye, tuba dobolbanauk unmekce, opnin banmeka ani, anyasik-anyasik nirya ara, ulubuka sirya dakik.

25 Tonda, sik Moab ninye ulamik asik nirya ara, sik Israel yala nang ap, Yehuda yala nang ap arye, Moab mutuku noutam nirya ulubuka daklobik. Wininmek talak aryuk, sik wa wibuka kouamikba, pia teleb arye palamukce, bok teleb uamuk wa nirya ara, keil arye donoknin banmekce, abisikuk banmek. Winipnin banmekba, awa windam nirya ara, keil aryuk langdibukce, ilipdongobukba, awa windam dila pia lak ton kum ubuk. Sik Israel nang babye, mek pu panalamuk ning nirya ara, keil ap, tuku ap arye, apum bisik nirya lipdongamuk.

Tonda, amutuku noutam tikamukce, yo duk moulamuk yo nirya babye, weltakanauk ubik. Amutuku-amutuku nirya atonun, winibuka winipnin balamikba, sirya ara, tuba aubuk mutuku tonok ara, mutuku si, Kir-Hareset mutuku uk, Moab mutuku koproba ton aubuk. Bukni, Israel ninye babye, amutuku noutam poka domikak arye warikmekce, keil donmeka ara, ninye pia weik tonun arye onmek.

26 Aning nirya, akunum winibikopura, ninye deiyoknye, Raja Moab birye, dipdeyukce, el tam yin talin nang nirya, weik obikce malye kibik ati, elda pia Imun kanye bobuk. Raja Moab bira, imun kanye bobukce, el yin nang yupa pia weik, tujuh ratus (700) nang, yin talibuka mal olana kel, pia weik nang, dem bobukce, Raja Edom ulamuk mutuku damak, “Asukumuk ninye obibirye, ‘Abisikuk bindoptibirye, lyepdatibye,’ tenebuke, abisik bindeyikbuk, sik olana nang kalikmek ati, abisik kum binmanto ubuk ati batakik.

27 Ati ara, ninye deiyoknye, Raja Moab birye, min yuma deiamuk mi ati, ‘Na pununa ati Moab mutuku ninye deiyoknye, Raja kipnamle,’ tenyamuk miuk doprobuk. Ami doprobukopura, Raja Moab birye, ‘Na mi opnirye, Allah ati arepnyopura, na mal pinang olyanganina kumce bataknitinge,’ tenebukce, mutuku si Kir-hareset mutuku, antanap dongobuka denyamik poka keil deice arye, ami obukabukce, uku dongobuk. Ara, el mutuku isa ati arebuk. Winilamuka ati ara, sik Israel ninye nirya ara, ‘Se, aning ara, pia malye weik ati, aning ara kum winipmanamtue’ tenen, pia ilil weik ulamuk. Winilamuka ati, sik adiparyuk batakikce, amutuku arye tamubuka, sik mutuku Israel tamuk bendobik.