Nabi Elisa birye youwak kil ati, melibuk yupu
4
Tonok talak ara, youwak kil tonok arye, nabi el si Elisa, el dam biyukce nyabuk. “Naio, na domsinye bira, an amu tam ulamukce, an melin piluk pia dolamuk bukni, atalak ara, el akunum dibuk. Tonda na nio, anda akunum bikamlume. Na domnuknye bira, Allah el amu tam ulamukce, ‘Allah ati si erenamne’ tenen, Allah el pil talibuka, teleb ubuka dolamuk ning ara, an bikamlume. Bukni, na domnuknye, elce sik yuk nang ning ara, ‘Tia ati dopmanya ani, aminyan talak, aning nirya tamubuka arepnamkinja,’ nyabuka, dololamuk ning ara, tuba aubuke. Ati wini talak ara, aning deiyoknye birye yanuka, na mapu bitinye dopropnamnile. Winiplirye, sik amapu bitinye ati, pil arukliba, deken ning dolona kum diparyuk, sik neika elti, ikin pil donamdake. Ara, na akanye birye dolamuk ning pununa ap, dekna ap ara, talye pil donamdake,” nyabuka, akil arye, nabi Elisa biti, lak nyabuk.2 Ati ara, nabi Elisa birye, ayouwak kil ati nyabuk. “Se nongo, narye yate ning ton wiripkitinya deice arye, melipkitinye do?” nyabuka asipdeyuk. “Tonda, na nin, an aik pum ara, yate ninguk tuba aupmakil do?” nyabuka asipdeyuk. Asipdeyukura, ayouwak kil arye tamubuka nyabuk, “Kume, na aik ara, yuk ning yala-yala ton pia kum deipse. Aning nirya kum upmanil bukni, tonok ning ara, mitik mek makau ara, zaitun yo duk mek libuka deipman makau tonok, na aik ara, deipseba tuba aubuk,” nyabuk. 3 Nyabukura, Elisa birye, tamubuka nyabuk. “An kayapu dana-dana tam dabimince, mek makau ara, minyak mek ton, pia lina kum, talye louk wamlye mek makau ton, binuka morolbinulyame. Moropminba, talye louk wamlye mek, makau arepkikcopura, aning nirya bulupdeipnulyame.” Nabi Elisa birye, akil ati nyabuk.
4 “Aning nirya akunum winipminyopura, an ap, an mapu bitinye ap, anggun aik pum tam wekmunce, adiparyuk anyaik bisik bublan tirikdongopnamlulume. Winipmunyopura, an aik pum tam, tuba anggun mek makau, minyak zaitun libuka deiamlum ning dobuka, abulupdeipnamlum mek makau nirya ara, minyak zaitun dikdongpnamlume. Ara, ance deiamlum mek makau tonok ara, amakau arye, yuk makau pum tam dikdongopnulyame. Tonok-tonok bukni, akunum langdiplyopura, amek makau dobuka, yukak deipmince, yuk mek makau ton, dobuka dikdongopnulyame. Aning ara, pia wininamlyame.” Nabi Elisa birye, ayouwak kil ati nyabuk.
5 Nyabukopura, adiparyuk akil el aik pum tamubuka biyuk. Akil ap, el mapu bitinye ap nirya, sik aik akunum tamubuka biyikce, aik pum tam biyikopura, adiparyuk bisik bublan tirikdongobik. Winibikopura, adiparyuk mitik mek makau arye, minyak zaitun liamuk mek makau doprobuk. Dobukura, mitik mek makau, el mapu arye, arepmarik mek makau nirya, apum tamuk minyak zaitun dikdongopnin biyuk. Winibuka dikdongopnin banmoka ani, tonok-tonok bukni, amitik mek makau dikdongobukce, bobinuka yukak deibuk.
6 Amek makau yuk ning nirya, akunum langdinmoka ani, aning nirya akunum langdibukopura, ayouwak kil arye, makau tonok ton morobuk. Morobukba, el mapu tonoknye birye nyabuk. “Nongo, amek makau bulubuka deipmabu ning nirya ara, akunum sirya dakmaname. Tonok ton kum upmasile,” nyabuk. Ayupu nyabuk talak aryuk, el lin minop talak liamuk mek makau, aminyak zaitun mek ara, pia kum banmok. Amitik mek makau pum tam ara, tonap kum banmoke.
7 Winibuk ati, aminyan talak ayouwak kil arye, nabi Elisa dam binuka, elti, laka nyabukopura, Elisa birye nyabuk. “Aminyak mek ara, dopmince, yuk nang ati tamubuka dekmince, ayo bok dopropnamlama deice arye, an domkuknye tia ati dopromuk ning pununa ati, deknamlyame. Aning talinanye biti arepminyopura, ayo bok tuba aupnamle ning ara, dobuka an patan ning dekmince, an ap, an mapu bitinye ap, dinamlume. Ara, minyak zaitun deknamlam yo bok, weik eitam upnamlopura, adice arye, anggun patan ning dekuka, anggun unamlum talak dinalume,” nyabuk.
Elisa birye, wisi kil melibuk yupu
8 Tonok sum Elisada, Sunem mutuku biyuk. Biyukce, amutuku ulamuk bona utotoa talin kil arye, elti, nyabuk. “Din neika dipnamabe,” nyabuk. Ati ara, yata wiribuka talak do, amutuku tamubuka balamuk talak nirya ara, akil dam binukapna arye, sik din neika dipna arye, tuba balamuk. 9 Tonok sum biyukopura, akil arye, el akanye biti nyabuk, “Na kele ayanmalanye bira, Allah el pil donanye, pia diksukum ululnye, nun dam yangalulule.
10 Ati ara, nunce el mana ati, el manak ara, nun aik ara, lyu kibuka kat ning arye, dobupe ning deice tam, alip aik dobuka kintinipnimirye, el patapnamle ning, bangku do, meja do, weisa do, tonda el manak do, aning nirya ara, nunce kintinibuka anyaik pum tam deipnuname. Winipnimnyopura, el nun dam yanamle talak nirya ara, anyaikuk welebuka manamle,” nyabuk. Nyabuk touk, sik bitinye winiprikba, Elisa sik dam yangalamuk talak ara, anyaik welebuka malamuk.
11 Aminyan talak ara, sikce kintinipmarik aikuk, Elisa welebiyukce, binuka mabuk. 12 Akunum biyukopura, Elisa el melinanye Gehazi biti nyabuk. “Ance Sunem mutuku kil ati yukupnulyame,” nyabukura, binuka yukubukba, el melinanye ap, neika yarikura, akil Elisa urasin dam yanuka tikuk. 13 Winibukopura, Elisa birye, el melinanye Gehazi biti nyabuk. “Akil ati nyapnulyame. Nun melina ati ikin pil weik arye, akunum dolamsulume. Ati ara, wini talak ara, nunce anti, ton yata ning wiripkitinimnye do? Narye, an melina ati, ‘Amutuku ninye deiyoknye birye, melipnamkil’ tenen, el dam yupu nyaptinyeba, melinamkil do? Akumopura, narye, amutuku yin talin nang, ‘Sik deiyoknye melipnamkil’ tenen, nyapdeipnamkin do?” nyabuk. Bukni, akil arye, tamubuka nyabuk. “Kume, nara amutuku nang noutamak ununa. Amutuku nang ara na yala nang uka,” nyabukce biyuk.
14 Biyukopura, Elisa birye tamubuka, Gehazi biti nyapdeibuk. “Akil melina ati, yata ning wiriptinimnye do?” nyabuk. Nyabukba, Gehazi birye tamubuka, “Akil mi min kum deiamuk bukni, wini talak ara, el akanye bira, pia wisi akunum dayuka ati ara, mi kum deiptiringe,” nyabuk. 15 Nyabukopura, Elisa birye el melinanye biti, “Akil nyapmimba, na dam yanulule,” nyabukura, el melinanye birye yukubukba, akil ap yarikba, akil Elisa aik bublan dam yanuka tikuk.
16 Yanuka tikukba, Elisa birye, akil ati nyabuk. “Ayanuka tikmalam keting atonun, oketeng tamun deice ara, an mi bominya ara, sal mi deipmince iripnalame,” nyabukura, akil arye, tamubuka, Elisa biti nyabuk. “Kume na ni, anda Allah el pil dolyamnye binya arye, tilila yupu nyana kume. Talye yupu nyaltakna kume,” nyabuk. 17 Nyabuk bukni, sik daulamdika ani, Elisa anyamuk touk, akil akunum mi bomuka ani, oketeng tamun talak aryuk, sal mi deibuk.
18 Asal mi akunum nebuk talak ara, tonok sum el li gandum wa wiamikak, el mapu ap linmekak biyuk. 19 Ami el li koproba unmokak biyukce, talye karin arye, “Se na nie, na kisok ara, uk weik, dinmanile,” nyabuka, binuka engebukce, el li biti nyabuk. Winibukura, el li koproba kekebukce, el melinanye biti nyabuk. “Na mi bobuka, el lin dam bobilyame,” nyabuk. 20 Nyabukura, amelinanye birye, ami botamubukce, el lin dam bobinuka arebukba, asum ara el lin birye, dobuka iribukabukce, asum keting duk-dukan noutam kibukopura, aketing duk-duk arye, ami dibuk. 21 Dibukopura, el lin birye ami bobuka, Elisa Allah el pil donanye malamukak, alip aik binuka deibukce, anyaik bublan tirikdongobuka, el lin bira batakuka biyuk.
22 Winibuk ning ara, el akanye koproba ati, binuka nyabuk, “Ance tonoknye nyapminba, keledai basam yim ning tonok boyaceura, na bobuka Elisa dam bobinunile,” nyabuk. “Aning ara, tilila ati kume. Allah pil donanye Elisa dam pola binuna ati, nyapnyopura, na adiparyuk tamubuka yanuna atia,” nyabuk. 23 El akanye birye, ‘Deiyok ani,’ tenena kume ati, nyabuk. “Yata ning ati, ‘Arup ara, Elisa dam binun,’ tenepmalam do? Tonda, atalak ara, wala tikin talak kume. Tonda, arup ara, Allah el si erena ati, pil don sum kum upmale. ‘Aweik sum kum upmal do?’ tenena ati nyapkine,” nyabuk. Nyabukura, el kil arye, an walwal nyana kume. “Na talye binuna atia,” nyabuk.
24 Winibukopura, keledai basam balye deice welebuka bukukce, el bobinuyuknye biti nyabuk. “Nimalab asa arye, bana kume. Minop pola binunam bukni, narye nyapdeipmanyakuk binuka, baplopnulyame. Kum nyapyopura, talye bana uka,” nyabuk. 25 Akil adiparyuk, Allah el pil donanye Elisa Karmel mutuku unmokak binuyuk ati, bisik banmoka ani, Elisa dam yayuk. Atalak arye, mitik yukak tuba yanganmokba, Elisa akunum eipmokce, el pil donanye Gehazi biti nyabuk. “Na kweito dilyame, Sunem mutuku kil yanganmala ati ara, binuka asipdenulyame.
26 El yanganmal bisik noutam bikbik abuka bimince asiplyame, ‘Akilo, anda teleb ulyam do? An akanye koproba teleb ulul do? An deiplum mi ara, teleb ulul do?’ nyabuka asipdelyame,” nyabuk. Nyabukura, Gehazi adiparyuk binuka asibukba, akil arye, “Telebe aning-aning nirya teleb uka,” nyabuk.
27 Nyabukopura. Allah el pil donanye Elisa dam Karmel mutuku deice biyukce, Elisa yan dam binuka talipdongobuka, el si erena ati, kutam tuku dipdongobuka, binuka bukukce, el yan talibukba, Elisa el melinanye Gehazi birye, “Winina meme,” nyabuk. Nyabuk bukni, Elisa birye nyabuk. “Kume, na kweito akil ara, ‘Bataklyame,’ nyana kume. Na kanye ara, el talima noutam tenipmalba, kanye imun upmale. Bukni, awinipmal ning ara, Allah el si Yahweh arye, na dam ton kum nyapnuka ati, ‘Deiyok ara ani,’ kum tenepne,” nyabuk.
28 Nyabukura, Sunem mutuku kil arye, “Na deiyoknye nie, narye, ‘Sal mi ton deiptinye’ tenen, moryamkise do? Kume, naryuk kum moropkise bukni, ancuk, ‘Sal mi deipnalame,’ nyamnulum bukni, wini talak ara, narye anti, ‘Naie, kum winipmanto ning nyapniminyeba, weik patapmanilba, kum uplyopura, kanye imun upnamna arye,’ nyapkise. Nyapkise bukni, na mi akunum dipmale,” nyabuk.
29 Ati ara, Elisa birye Gehazi biti nyabuk. “An deice ongopmalam baju deiatinga koupdongopmince, adeipmo mi dam bikbik abuka binulyame. Tonda, na talinun kama bobilyame. Minop binulama ati ara, bisik banamalam talak ara, ninye ton epdamunyopura, ‘Telebe,’ nyana kume. Tonda yuk nang arye anti, ‘Telebe,’ nyapkice babye, tamubuka telebe nyabuka yupu sisikina kume. Winipmaminya ani, adeipmal mi dam minop bimince, na kama bopmaminya, ami el asok deice deipnamalyame,” nyapdeibuk.
30 Nyabuk bukni, ami el lin birye, “Kume na nio, an ap, Allah el si Yahweh ap, dipkoprob kam urudum touk, narye dib yupu nyapkine. Allah el si deice arye, nyapkine. Nara, an batakuka yuk kum binamne. An damuk unamane. Na babye yuk kum binamane,” nyabukura, Elisa bukukabukce, sik neika bisik birik. 31 Sik bisik banmarik talak ara, minop Elisa el melinanye Gehazi bira, minop adipmok mi dam binmokce, Elisa bolamuk kama dobuka, ami el asok deice deipmok bukni, ami kam kum bukmokce, yupu ton kum nyabuk. Winibukura, Gehazi birye ayanmok bisikuk tamubuka, Elisa bisik yanganmokakuk yayukce, “Ami ara, kum bukmale,” nyabuk.
32 Nyabukopura, Elisa anyaik koproba biyukce, ami dipdeyukura, akunum dipmok touk, tuba aupmok, min kum kam bukuk. 33 Winibuka ati ara, Elisa alip aik bublan tirirkdongobukce, el ap, ami ap, uk unmarikce, Allah el si Yahweh ati morobuk. 34 Morobukce, adipmok mi, el nong deice mapmokce, ami el si bama damak, Elisa el si bama deibuk. Aning atonun, ami el taruk deice ara, el taruk deibuk.
Atonun ton, ami el asing dam ara, el asing deibuk. Elisa el nong ara, adipmok mi atonun kiklibukopura, Allah morobukba, ami el nong ara, tuba tonap, buppu piripdongobuk. 35 Winibukopura, Elisa anyaik pum, uk unmokce obinuka ayanuka kinmoka ani, tuba tonap, ami el nong deice mapmokce, dinmok bukni, adipmok mi ara, like tekbarye talak kibukopura, isin panabukce asing labuk.
36 Winibukopura, Elisa birye, el melinanye Gehazi biti yukubuk. Yukubukura, yayukba, nyabuk. “Sunem mutuku kil ati, nyapminba, na dam yalule,” nyapdeibukba, nyalbiyuk. Nyabukba, akil adiparyuk Elisa dam yayukura, Elisa birye, “An mi doproplyame,” nyabukura, doprobuk. 37 Ara, akil akunum anyaik pum biyukce, Elisa el si erena ap, telebe nyana ap ati, el yanuka tikmokak biyukce, kanupdongobuka weik arye, binuka “Telebe,” nyabukce, ami bobuka anyaik buru tam bobiyukce, el aikuk tamubuka biyuk.
Nabi Elisa birye, ninye winipmanto kum ning, deiyok bitinye, winibuk yupu
38 Tonok talak ara, Israel yala ninye, sik ulamik mutuku noutam nirya ara, din li ton ubuk. Winibukba, Elisa tamubuka, Gilgal mutuku uk biyuk. Biyukce, nabi nang yupa tonok binuka peterenmok talak ara, el melimnanye tonok ati, “Talina dana-dana din yuna, makau el si panci, weik ning dolbilyame,” nyabuk. Ara, sik awekmek nabi-nabi nang, sik din ning, tuku deice koulamak ning ap, kenkena ap yuna ati, “Weik panci doyanuka kintinipnamlyame,” nyabuk.
39 Nyabukura, anabi-nabi nanguk bukni, bin tonok ton wa win dam biyukce, ‘Aken-kena dipnuyap,’ tenebukopura, lipmanto ning ati elbiyuk. Winibukce, talye kouamikiba, bai tam palamle ning, labu duk mouamuka eibuk. Eibukopura, adiparyuk amouamukba, eklamuk ning nirya ara, dakuka boyayuk. Aboyayuk ning ara, adiparyuk mitik tonun katikuka, ayun weik ning ara, makau pum dongobik. Aning babye, sik anabi-nabi nang ara, bikna kum ati, ‘Alabu duk ara, ninye dibikcopura, adiparyuk diptinge. Aning ara, ninye opmanto ning aulule’ tenen, kum bikamik. Tonda, ato labu duk ara, sik pia ton kum dilamika ati, ton pia kum bikamik.
40 Ura, sik kwit tonoknye birye, alabu duk ap, tuku deice koulamak ning ap, amakau pum akunum obukopura, elce sik anabi-nabi nang dina ati, bokuka arebuk. Bukni, sik anabi-nabi nang, adin ning ara, mitik tonun aryuk akunum dipdeyikopura, adiparyuk weik yupu arye ngalukuka, Elisa biti nyabik. “Se na nio, anda Allah el piluk dolyamnye, adin ning nun kwit birye yupmasil ning ara, ninye ona ati, yu ning ton aupmala atia,” nyabik. Nyabuka, sik anang ara, “Kume aning ara, kum dipnuyabe,” nyabik.
41 Winibikba, Elisa birye anang ati nyabuk. “Ati, anggunce, gandum duk teikuka delinyak ning, el si tepung, mitikto arye dodopmunce, boyanamlume,” nyabuk. Atepung dobukabikce, Elisa biti arebikura, Elisa birye atepung mitikto arye, amakau pum tam dabuka deibuk. Aning winibukopura, Elisa birye nyabuk. “Wini talak, adapmalum ning ara, tonap boknamalulume. Bokdopmunce, anggun nirya ara, aning talye mangkau dina telebe,” nyabuk. Nyabuk arye, amakau pum tam yupmek din nirya ara, teleb ubukba, ninye opnaba diplamak ning ara, kum dayuk. Sik nirya arye dinmek bukni, tonoknye babye, nakina talebuka, kum dibik.
42 Tonok talak ara, ninye tonok ton, mutuku si Bahal-Salisa arye, Allah el pil donanye, nabi Elisa dam yayuk. Ara, anye birye Elisa biti, gandum winiryuk teikmok ning ap, atonun roti kwaning dua puluh ton yanuka arebuk. Aroti ara, aketing tamun deice arye, winye yukuka lipmok ning arye, agandum winiryuk ning memepmek ning ap, bobinuka aroti dapdeibukce, Elisa biti arelyayuk. Winibukopura, Elisa birye, el melinanya biti, sik nabi-nabi nang ati nyabuk, “Aroti bokuka abukmak nabi-nabi nang ati, arepmunba sik dipnuyake,” nyabuk.
43 Nyabukopura, nabi Elisa el milinanye birye nyabuk. “Kume na nio, yata wiribuka deice arye, nabi-nabi nang weik, seratus (100) nang nirya ati, aroti kwaning mitikto dem arepnyopura, anirya kikliman kum diptinge. ‘Aning ara, dipkoprob suktalepnamne,’ tenepmane,” nyabuk. Nyabuk bukni, nabi Elisa birye tamubuka nyabuk. “Bokra banmaminbuk, sik nirya dipnuyake,” nyabuk. Ara, talye ati kum nyapkine. Deiyok ara, Allah Yahweh arye, akunum nyapmasile. ‘Aninguk arepminba, sik abukmak nabi-nabi nang nirya arye, doprobikirye, dipnamake. Aning dinmaca ani, akunum bouplyopura, nirya kum dipnamake, ton bataknamake,” nyabuk.
44 Elisa birye nyabuk ati ara, el melinanye birye, sik nabi-nabi nang ati arebukba, anang arye, amutuku ninye pia weik, seratus (100) nang din bokuka arebikba, amutuku ninye arye, din nirya dibik. Aning nirya akunum dibik bukni, Allah Yahweh arye, nyapdeiamuk touk, sirya ara, mitik tonun ton, tuba batakik.