2 Ura atalak ara, Aram mutuku yin talin nang arye, yuk mutuku nang olbalamik talak ara, Israel mutuku wel kil tonok tongobikce, bobuka sik mutuku tamubuka boyayikba, amutuku ulamuk. Akam kil ara, Naaman domuk kil, el pil melin kil ulamuk. 3 Awel kil arye, Naaman el domuk kil ati nyalamuk. “Nongo, na deiyoknye bukni, an akanye bira suse dilye ning ara, Samaria mutuku noutam ulinye, Allah el yupu lak nyana deiyoknye birye kweteptue. Anye el dam bobitingba, an akanye Naaman bira kwetepdeiptue, tenepne,” nyabuk.

4 Israel wel kil arye, Naaman el nong bol uk kwetena ati nyapmok ning ara, akunum kekebukce, el deiyoknye Raja Aram biti binuka nyabuk. 5 Binuka nyabukura, Aram mutuku taleamuk Raja birye, “Aning ara, telebe. El dam binulyame. Narye, Israel ninye sik deiyoknye sik Raja dam surat sekeipnamane,” nyabuk. Nyabukura, Naaman bira Elisa dam binuyuka ati, el arepnamuk dekna weik ning kintinibuk ning ara, tiga ratus empat puluh (340) kilo perak ap, tujuhpuluh (70) kilo emas ap, baju urasin teleb ning, 10 lembar ap, nirya bobiyuk.

6 Tonda, Aram mutuku taleamuk deiyoknye birye, sik Israel nang sik deiyoknye biti surat sekuk. Asurat noutam arye, nyabuk. “Asekman ning ara, an biknulyame. Na yin talin nang, sik deiyoknye Naaman, an dam dopdeipkine. Deiyok ara, ‘El barye suse dilye ning ara, kel bikmince kwetepnulam’ tenen, ati moropkine,” nyabuka sekuk. Sekuka arebukba, Naaman bira Israel mutuku weiknye dam bobinuka arebukba, eibuk.

7 Asekmok ning ara, Israel nang sik deiyoknye birye akunum yinibukopura, “Se, na ilil upnil. Nara Allah mikipnye atonunye ununa ati, asurat sekuka dopdeipmanil do? Nara Allah atonunye kum ati ara, dipmatunye ap, uk dinmatunye ap ara, pia kam kum bukeiptibye. ‘Anye Naaman el barye suse kwetepnamle,’ tenepmanilce, na dam dopdeipmanil ara, kum winiptinyopura, yu upliba olyanamnile, tenepne. Na kanye ara, elce tenepmanila ara, ‘Anye obuka sirya daknamne,’ tenepmanilce, yu kipdeipmanil, tenepne,” nyabuk. Nyabukce, ilil kanye bobukce, el ongolamuk baju yu asa arye, kwiliklobuk.

8 Winibukopura, yuk nang arye, “Israel nang sik deiyoknye imun kanye bobukce, el baju kwiliklobukba,” lak nyalbiyikopura, Allah el pil donanye Elisa birye kekebuk. Akunum kekebukce yupu nyapdeibukura, surat sekuka dopdeibuk. Elce sekuk ning ara, ani. “Yata ning ati an baju kwilikmalam do? Uk dilinye, na dam dopdeipminba, kwetepnyopura, anye birye, eibuka kel kipnamle. Ara, ‘Diba nun Israel nang unyap mutuku noutam ara, Allah el yupu lak nyana nabi deiyoknye, bira dipkoprob aulul’ tenen, kel kipnamle,” nyabuk.

9 Ati ara, Naaman adiparyuk kuda basam kirikuka tuku deice balamle ning, kereta kuda deice bukuka, bisik banmoka ani, Elisa aik bublan damuk yayuk. 10 Yayukce, dinmok bukni, Elisa birye el melinanye biti nyabuk. “Naaman dam bimince nyapnulyame, ‘Yordan mek uk tekbarye, binuka keknulyame. Winipminba,barye suse dikilye ning ara, lopdopnamkile. Winipliba, minop talak yum ulalum touk unalame. Elisa birye nyapdeipmakile,’ nyalbinulyame,” Elisa birye el melinanye biti nyabuk.

11 “Nyabukba, binuka lak nyabukura, Naaman aning kekebukce yu ubuk. ‘Kumde, na tenepmanua ara, Elisa bira na dam yaturye, barye suse dinilye ning ara, el taruk na nong deice deibuka el si erelye Allah, el si Yahweh deice arye, moropnutuba, adiparyuk kwetepnamnutue,’ tenepmanue,” nyabuka yu ubuk.

12 Nyabukce ayupu ton dukdongobuka nyabuk. “Damasyik mutuku balamle mek ara, Abana mek ap, Parpar mek ap ara, pia teleb mek. Nun nirya kele, Israel mutuku ubuk mek ara, pia malye mek uka. Teleb ning ara, Damasyik mutuku mek uka. Ati na kanye ara, Damasyik mutuku balamle mek noutam mek keknyopura, na suse min kum lopnutu do?” Nyabukce, ‘Uk kum danamnilarya’ tenen, yu asa arye, anyaik batakuka yukak biyuke.

13 Yu ubukba, biyuk bukni, Naaman el melinanye birye el dam biyukce, “Nun ni, winipmanto Allah el yupu lak nyana deiyoknye Elisa birye, weik ikin pil atonun nyapkutuba, aning kum wininalam do? Kume weik ikin babye nyapmatuba, piripdetume. Ati ara, elce ‘Mek kekminba, an barye suse dikilye ning ara, kum danamkile,’ nyabuka kanam ninguk nyapmakila ati, akunuma, aning ara mek dakeklyame,” nyabuk.

14 Nyabukba, Naaman kekebukce, Yordan mekin Elisa nyapmok touk biyukce, tekbarye, deice arye, mek kekuk. Winibukura,barye suse dilamuk ning kum dayukce, bol teleb ubuk. El nong bol ara, mitik mapu nong bol atonun pia teleb ubuk.

15 Aning akunum winibukopura, el melin nang ap, sik nirya tamubuka Elisa dam yayik. Naaman bira Elisa dam tikukce nyabuk. “Atalak ara, na akunum kel bikmane. Mutuku-mutuku nirya ara, Allah yuknye ton kum ulule. Allah ara, Israel mutuku noutamakuk ulule. El tonoka. Ati ara, dekna weik ning narye anti, dekena kum bukni, talye arepnukine,” Naaman birye nyabuk.

16 Bukni, Elisa birye nyabuk. “Kume na ni Allah el si Yahweh ati el piluk donune. El dipkoprob kam ulye touk, dib yupu nyapkine. Aboyanmanilam dekna weik ning ara, tonok babye ton kum dopropnamne. Allah kamnye si deice arye, nyapkine,” nyabuk. Nyabukura, Naaman bira batakana kume, “Dopropnamalame,” nyabuka tuba-tuba nyanmok. Nyanmok bukni, Elisa birye, “Kume ni kwito, pia dipkoprob nyapmane. Kum dopropkitinye,” nyabuk.

17 Nyabukura, Naaman birye tamubuka nyabuk. “Nyaplamopura, nara an amu tam atonunye birye moropkine. Ance arepnutumba, amutuku tuku weik arye, palibuka lin ning dongopnirye, na keledai basam bitinye, sik balye deice deipniba, na mutuku bobinamne. Minop talak ara, yuk isa ati si erelamsirye, sik si erena ati kam ulamle ning obuka uku dongolamse bukni, winira aning nirya bataknamne. Wini talak arye, dipdongobuka, oyanamle talak noutam ara, Allah el si Yahweh, el tibuk, si erepnirye, aning nirya bobuka el si erena ati arenamne. Tonda, kam ulamle ning opnirye, el si erena ati, uku danamne. Isa Mutuku Dongonye si erenye ning ara, bataknirye wini talak ara, Allah el siuk erenamne,” nyabuk.

18 Nyabukopura, ayupu ton nyabuk. “Nara an melinanye atonun unune. Arup nyapmana ara, winipnamne bukni, Allah el si Yahweh arye, na malye wininamne ning tonok ning ati, ‘Namin kipnuturye, kum wenepnamnil’ tenen, moropne. Ara, dotalak ara na deiyoknye Raja Aram melipniba, Aram ninye isa si erenyak ning ati, el si Rimon, aisa si eren aik erelbinulye talak ara, na ap, melibuka binaname. Na deiyoknye birye, na taruk taliplirye, el si Rimon, aisa el si erena ati, kisok kanupdongoplye talak ara, na ap arye, kisok kanupdongopnanam ning ara, malye bukni, ‘Allah moropniminba, na malye unun ning namin kibuka kilipnuturye, lyepnamnil’ tenen, nyapkine,” Naaman birye Elisa biti nyabuk. 19 Nyabukura, Elisa birye, “Telebe ati ara, mangkau kanye bobuka dabinulyame,” nyabukura, Naaman adiparyuk biyuk.

20 Bisik banmoka ani, bisik noutam bayukopura, atalak ara, Elisa el melinanye Gehazi bira, ‘Yata deiyok ati Elisa bira, Aram mutukunye birye boyanmo ning ara, batakuka bil do? El kanam arye binmala adano. Teleb ning ara, na deiyoknye Elisa birye, Naaman boyanmo ning weik arye, dopropmatue. Ati ara, aning ara, naryuk doproptinye,’ tenebuk. Dipkoprop Allah kam ulye touk, na dib yupu nyapne. Aminyan bikbik abuka dobolbinirye, ‘Naaman bobanmal ning ara, doyanamne,’ tenebukce biyuk.

21 Utenebuka deice Gehazi adiparyuk aminyan banmoka ani, Naaman dam biyuk talak ara, Naaman adiparyuk eibukce, el kuda basam kirikuka tuku deice balamik ning deice tikmoka ara, koulukukce, Gehazi el dam yayukura, “Anda yata ning ati yalam do? Anggunda teleb ululum do? Yuk ning ati yalam do?” nyabuka asibuk. 22 Gehazi birye binuka nyabuk. “Kume nunda teleb anya arye, yuk ning ati kum yanman bukni, na pil donuna deiyoknye Elisa birye, ‘Elbinune,’ nyabuka ‘Moropnulyame,’ nyapmanil ati yanmane.

Ara, Allah el yupu lak nyana deiyok nang, wel nang bitinye, winiryuk Efraim mutuku dam arye, nun dam yarikiba, sik arena ati na ni koprop arye, ‘Binuka moropmince yanulyame,’ nyapmanila ati, yanuka nyapnukine. Ara, dekna weik ning el si uang perak tiga puluh empat kilo (34) ap, urasin teleb baju bitinye, pia teleb ning ap, sik ayanmarik nang ati, arepnutumba, anang ati binuka arepnamane,” nyabuk.

23 Gehazi birye Naaman biti nyabukba, Naaman birye, “Telebe anyapmanilam touk dolona teleb uka,” nyabuk. Nyabukopura, dekna weik ning uang perak, yuk-yuk bukni, 34 kilo dokuka bitinye kibuka libukba, aning nirya ara, 68 kilo ubuk. Atonun ara, baju pia teleb ning bitinye libuk. Aning-aning lin ning pum tam arye, dongobukce, kitibuka lipdongobukce, el melin nang bitinye wipdeibukce anang ati arebukba, aning nirya minopce menekuka bobanmarikbuk, Gehazi aminyan tam binmok. Sik nirya bisik banmek.

24 Bisik banmeka ani, Karmel mutuku dam yayikopura, Gehazi birye, Naaman el melin nang bitinye wipdeipmok nang bobanmarik ning dobukabukce, el aik pum tam binuka deibukce aik pum tam dongobuk. Aik pum dongobukce, adiparyuk Gehazi birye, ‘Anggun dabirume,’ nyabukura, sik tamubuka birik. 25 Birikopura, Gehazi tamubuka Elisa unmokak binuka, el urasin dam binuka tikuk. Winibukura, Elisa birye, “Ni kwito, anda dan tam binmalam do?” nyabuka asibuk. Asibukba, Gehazi birye, “Kume na nio, nara an amu tam pil donunye binye, na ton kum binmanue. Asukumuk unmana,” nyabuka tilila yupu arye nyabuk.

26 Nyabuk bukni, Elisa birye tamubuka Gehazi biti, “Anda na akunum kel bikmakine. Naaman dam binmomba, el kuda basan arye, kirikuka balamle ning deice tikmoa koulukuka, an dam yanmoba, yupu sisikinmarum talak ara, na kanye ap, neika binmaruma ati, na akunum eibuka kel bikmakine. Atalak ance el Naaman biti dekna weik ning, perak ap, baju teleb ning ap, moropmomba arepmakila ara, malye weik upmamue. Allah el mikip deice aryuk anye Naaman kwetebuka ati ara, nunce aning-aning kum doproptibye. Allah el mikip deice aryuk Naaman kwetepmoka ati ara, atalak ara nunce anggur wa ap, zaitun yo duk kounak ap, sapi basam ap, domba basam ap, kambing basam ap, tonda, melin nang ap, melin kilapu ap ara, aning-aning nirya ara, morobuka kum doproptibye. Aning winipmaluma ati ara, pia malye weik upmalame.

27 Ati, an wenena ati ara, Naaman taleamuk barye suse ara, an ap, ance deipminyeba, dadeipdanin binamak nang nirya ara, sik nong deice abarye, suse pia aupnamsile,” Elisa birye nyabuk. Nyabukura, Gehazi koulukuka bayuk talak ara, adiparyuk barye suse ara, pia lep-lep alamle ning ara, el nong deice palibukba biyuk.