5 Binuka yo wenmek talak ara, kapak ya luksakuka mek dongobikba, “Se, nun kapak mek dople. Na deiyoknye, na nie, ara sik ya, nun tia boyanmapue,” nyabuka malye yupu nyabuk. 6 Allah el pil donanye Elisa birye, “Akapak ara dan sakmal do? Dan sukum mek dopmal do?” nyabuka asipdeyukura, “Asukum sakmale,” nyabuk. Nyabukura, Elisa birye mitik yo taruk dobuka akapak ya sakmokak dongobukba, mek pum sakmok kapak ya ara, tuba tamubuka weleyayukce mekwen deice yanuka bopkekuk. 7 Kapak ya mekwen deice yanuka laka kibukba, Elisa birye anye biti, “Doproplyame,” nyabukura, dobuk.

8 Aram mutuku taleamuknye, sik ninye deiyoknye Raja ap, el mapu yin talin nang ap, sik nirya Israel nang ona ati, binuka aik dopnameka ati, “Dan sukum binuka cang kain aik dopnamap do?” nyabuka, yupu talipmek. Yupu talipmeka ani, “Ura amutuku binuka cang kain aik dopnamabe,” nyabuk.

9 Nyabukura, Aram nang arye, anyaik dopnuyik bukni, Allah el pil donanye Elisa birye ayupu talipmek ning ara kel bikukce, Israel nang sik deiyoknye Raja biti, “Aram nang ara, ‘Doltakne tenda aik dopnamakak ara, asukum,’ tenepmaka ati ara, an bikmince, kalikdamince, sik Aram mutuku nang unamakak ara, bana kume. An mapu bobuka, yuk bisik binulyame,” nyabuka yupu nyapdeibukba, Israel ninye sik Raja kekebuk. 10 Atalak-atalak nirya ara, Elisa birye aning atonun nyalamuka ati ara, tuba-tuba Israel nang, sik ninye deiyoknye Raja pia moubuka kalikna ap, dina ap unmokba, el mapu ati “Moubuka kintinina uk unamalulume. Amutuku tuba dinamalume,” nyabuka yupu moupdeibuk. Winilamika ati ara, sik Aram mutuku nang arye, sik Israel nang ati kum opmanto ulamik.

11 Israel nang ara, bikna uk ulamikba, Aram nang sik deiyoknye yu weik ubukce el mapu, sik yin deiyok nang ati bulupdeibukce, “Anggun ton bikilulum do? Yatanye birye ton, Israel ninye sik melina ati, anggun tam akunum batakuka bindobukce, nun nyanmapye ning kekebuka Israel nang dam nyalbalul do?” nyabuka asibuk. 12 Nyabukura, sik awekmek deiyok nang noutam, tonoknye birye, “Kume na ni, aning ara nun an amu tam unyap nang arye, kume. Bukni, Elisa bira, Allah el yupu lak nyana deiyoknye ulula ati ara, aning nirya kel bikinanye birye, Israel mutuku aulirye, an duknubuka aik pum tam arye, nyapmaminye yupu babye, kekebuka sik Israel ninye deiyok nang dam nyalbalule,” nyabuk.

13 Aram mutuku Raja aning kekebukce, “Binuka dilbilulume. Tonda, ‘Elisa bira dan sukum unmal do?’ anggunce asilbilulume. Elisa unmalyak nyapsikiba kekepmunce, anggun eipmunyopura, na yanuka nyapnumunyeba, ninye aruknyopura, anye bira tongolbinamake,” nyabuk. Nyabukura, el yin nang arye, dilbinmeka ani, aminyan talak, yuk nang arye, “Kume Elisa bira Otam mutuku aunmale,” nyabikura, Aram mutuku nang arye, kekebik.

14 Nyabikba, Aram mutuku Raja birye, ‘Winiplulume,’ nyapdeibukopura, el yin nang weik arye, sik kuda basam kirikuka tuku deice balamik ning weik ap, sik kuda basam talibuka balamik yin nang ap, yuk yin nang ap, weik arye, kintinibice, lukunyan biyik. Biyikce, Elisa ulamuk mutuku ninye aik dana-dana nirya antanap dongobuka binuka warikik. 15 Binuka warikmek talak ara, Elisa el melinanye beren tam koprop arye, minop bukuka, buru tam biyukce dinmokba, sik yin nang ap, kuda basam ap, pia weik arye, anyaik bai tam nirya antanap dongobuka warikmekak eibuk. Anye birye tamubuka Elisa dam yayukce, “Se na nio, arup ara pia ikin weike upsile. Nun yata wiripnuyap do?” nyabuk.

16 Nyabukura, Elisa bira Allah el yupu lak nyana deiyoknye birye, el melinanye biti nyabuk. “An ilil una kume. Anggunda ninye weik tenepmalum bukni, na dipkoprob nyapkine. Anda min kum eipmanto unmalam bukni, nun dam ara ninye pia weik arye, aunmake. Sik Aram mutuku nang ara, ninye mitik anun uka. Nun ap, neika unmap nang ara, pia weik,” nyabuk.

17 Nyabukopura, Elisa birye Allah ati morobuk. “Na ni Allah, an si Yahweh. Ance anye el asing perekeipminba, ance kintinipmasilam ning ara eipnule,” nyabuka morobuk. Morobukopura, Allah kekebukce, amelinanye asing lapdeibukura, amutuku deice bukni, anoutam ara, dana-dana tam unmek nang nirya, kuda basam weik ap, kuda basam kirikuka tuku deice balamle ning el dirina ara, uku buk atonun dinmok ning ap, aning nirya pia weik wininmok ning eibuk.

18 Winipmokba, sik Aram nang arye, ‘Elisa tomopnuyap’ tenen, el dam yangayik talak ara, Elisa birye Allah el si Yahweh ati morobuk. “Anang ara, ance asing kun ning arepnulyame,” nyabuka Allah morobukba, Allah kekebukce, Elisa moropmok touk, sik anang nirya asing kun ning arebukba, eipmanto kum ubik. 19 Sik Aram mutuku yin nang ara, eipmanto kum unmeka ati, Elisa birye nyabuk, “Anggun tenepmalum mutuku ara, amutuku kuma. Tonda anggun tenepmalum bisik ara, abisik kum binululume. Ati ara, na melipsinirye, anggun enmalumnye dam bobinusine,” nyabuk. Nyabukce, atalak arye, Samaria mutuku uk bobiyuk.

20 Anang akunum Samaria mutuku bobinuka deibukce Allah ati morobuk. “Na ni Allah, an si Yahweh, winira anang asing lapdeipminba, eipnuyake,” nyabuka, Allah morobukba, sik asing akunum lapdeibukura, anang arye, eibuka bikik. ‘Se, nunda Samaria mutuku noutam akunum yanmabe,’ tenebikce, bikikce malye yupu nyabik. 21 Ura Samaria mutuku ara, Israel ninye sik ninye deiyoknye ulamukak ati ara, sik Aram nang akunum eibikce bikikura, Israel nang Raja, sik deiyoknye birye, Elisa biti nyabuk, “Naie, anang ara parapkabuka nirya obuka sirya daknun do?” nyabuka asibuk.

22 Asibukba, Elisa birye, “Kume na ni, ninye opdanamace talak ara, sik yin nang arye, sik parang ya ap, mal ap, arye, mal olan nang akunum tomobicopura, talye parapkabuka kum olanyake. An kele, aning ara malye tenenyabe. Ati ara, anang ara anggunce mek ap, din ning asukum kintinibuka arepmunyeba, dibicopura, ance nyapdeipminba, sikce tamubuka sik deiyoknye damuk binuyake,” nyabuk.

23 Nyabuk touk, Israel ninye sik Raja birye nyapdeipmokba, sik Aram nang ati din ning weik kintinip deibikce kwalya yupmeka boyanuka arebik. Winibikura, dibikce, Raja Israel birye, ‘Dabilulume,’ nyabukba, anang tamubuka sik deiyoknye damuk biyik. Winipmeka ati ara, atalak arye, deiyok koubuka yuk talak ati, sik Aram nang tuba Israel nang noutamak kum olyangalamik. Talye tunim abuka ulamik.

24 Winipmek bukni, aminyan talak ara, Aram mutuku deiyoknye Raja el si ara Benhadad, anye birye el yin talin nang nirya bulupdeibukopura, Israel ninye sik Raja ulamukak, Samaria mutuku binuka warikil biyik. Sikce amutuku dana-dana tam nirya antanap dongopmeka ati ara, sik Samaria mutuku nang arye, buru tam binmanto kum unmek.

25 Samaria mutuku binuka warikinmek talak ara, pia ilil weik ulamik ati, amutuku imun kanye weik bolamik. Winilamuk talak ara, din pia weik patalamuk. Winilamukba, keledai basam opneura, kalibuka dekna ati ara, abasam kisok tonok ara, dekna weik ning el si uang perak 1 kilo deice arye, deklamik. Tonda yalma maka deibup dekna ati ara, uang perak setengah kilo kintinibuka arelamik. Ara, yalma maka deibup, tonok kilo doprobikce, noutam arye, bokuka dumbarye, deibikopura, setengah kilo uang perak deice arye, deklamik. Ati ara, aning-aning nirya ara, kum danamuka ati ara, awamuk ning aning-aning nirya ara, pia dekna weik arye, deklamik. Ati imun kanye weik bolamik.

26 Atalak bukni, tonok sum ton Israel nang sik deiyoknye, amutuku antanap dongobuka domik cang keil poka deice banmokba, kil tonok arye, morobuk. “Se, na nio, anda na Raja ulyama ati ara, na melipnilyame,” nyabuka morobuk. 27 Morobukopura, Israel nang sik deiyoknye birye, tamubuka nyabuk. “Melipmantonye bira Allah el si Yahweh aryuk melipkutue. Elce kum melipkilyopura, nara ilil upnutue deice arye, melipkitinye do? Gandum dokikirye din ning kiptuba bulubuka arepkitinye do? Anggur duk teikikirye, purubiceura, mek kiptuba kwebuka arepkitinye do? Aning-aning pia kum ati, yata winiptinye do?” nyabuk.

28 Nyabukce, ayupu ton asipdeyuk. “Anda yata ning patanmakil do?” nyabuka asibuk. Asibukura, akil arye, tamubuka nyabuk, “Kume na nio, yuk kil tonok arye, nyapnuke. ‘An mi ara na arepniminba, arup ara nun neika ami obuka dipnamaname. Winipnimirye, ambusum ara, na mi ton obuka dipnamaname,’ nyabuka, akil arye, nyanmanile. 29 Nyapnukba, na mi obuka dipmanumu bukni, ton sum ara narye, ‘Winida an mi obuka dipnuname,’ nyapsiba el mi ara, dobuka duknupmoe,” nyabuk. Akil arye, nyabukura, Israel mutuku ninye deiyoknye Raja birye kekebuk.

30 Ayupu ninye deiyoknye kekebukopura, pia ilil kanye bobukce, bico ubukba, el ongolamuk baju kwiribuka kwiliklobukce, acang keil poka deice banmok talak ara, el tam nang arye, eipmek. Eipmeka ati ara, elda Raja bukni, el kwilikmal baju amu tam ongopmo ning ara, ninye dibikiba, engelamak talak ati, malye baju ongolamak ningak ongopmoka ara, aninye nirya arye, eibikce, ‘Se, aning ara, mambule,’ tenebik.

31 Raja malye kanye bobukce, aninye deiyoknye yu weik ubukba ayupu nyabuk. “Na mutuku ninye pia kanye imun unyaka ati ara, arup aryuk narye nyapdeipniba, Sapat el mi Elisa biti opnyopura, el kisok ngang daksaknamle. Aning kum winipyopura, na patapnil ning ara, Allah arye, nara weik wenepnamnile. Deiyok ara, Allah arye, adin patan talak areamsuk bukni, Elisa bira, Allah el yupu lak nyana deiyoknye ulul bukni, ‘Allah arye, nun din patana ara, kum daneipnamsil’ tenen, min kum moropsuke. Ati Elisa opnamnarya,” nyabuk.

32 Atalak ara, Elisa el aik uk ulamukba, wisi-wisi nang Israel deiyok nang ton bulubuka el aik yupu talipmek. Winipmekba, Elisa el ona ati Raja birye, tonoknye ton wipdeibukba, el aik dam kalikil yayuk bukni, amutuku min kum yanmok talak ara, Elisa birye nyabuk. “Anggun akunum bikmalum do? Weik deiyoknye Raja bira ninye talye onanye ulula anya arye, na ona ati, ‘El minop obikirye, el kisok seknuyak’ tenen, ninye dopdeipmalba, yanganmak nang ara, anggun ton kum eipmalum do?” nyabuka, Elisa birye awisi-wisi deiyok nang ati laka nyabuk.

Nyabukce ayupu ton nyabuk. “Ati ara, anggunce moubuka bikmunyeura, na ona ati yanmalinye anyaik ‘Yanuka weknun’ tenen, bublan dam yalyopura, anggunce bublan kukulina kume, mikip asa arye, talipnamlume. Tonda, na kanye ara, ayanamalanye bukni, el aminyan tam ara, el weik deiyoknye pola yanamalarya. El yanamal lelim akunum kekepne,” nyabuk.

33 Elisa birye, ayupu tuba nyanmok talak ara, Israel deiyoknye birye dopdeipmoknye Elisa dam yayuk. Tonda aRaja babye yayuk.^a Israel nang sik ninye deiyok Raja birye nyabuk. “Na kanye ara, din kum dayukba din patana ati, weik kanye imun usulul ning ara, Allah el si Yahweh arye, ikin ning arepsukba, pia ikin usulule. Ati ara, akunuma, yata deiyok ning ati, ‘Allah el si Yahweh arye, melibuka lyepnamsil do?’ tenen, tuba dinauk unamne do?” nyabuk.