7
Anyabukba, Elisa birye, aRajanye biti nyabuk. “Allah el si Yahweh arye, nyapkil yupu ara, wini talak nyapnukine. Ara ani, nun Samaria mutuku noutam ara, ambusum ara aunmab keting noutam atonun ara, din ning roti kwaning deiyok ning, el si gandum teiklamaka teleb ning ara, 7.3 liter kwebikirye, el dekna ara, uang perak mitik tonun aryuk 11 gram arye, deknamake. Aning atonun, yuk din yala ning ara, el si jelai, 15 liter kwepnamak ning ara, el dekna ara, uang perak mitik anun aryuk 11 gram arye, deknamake. Minop arye, dekna weik arye, dekenyak bukni, ambusum arye, deiyok koubuka, yo bok mitik tonun aryuk deknamabe. Ara, nun Samaria mutuku noutam arye winipnamabe, nyapne,” nyabuk. 2 Nyabukba, ninye deiyoknye Raja Israel, el melinanye birye, Allah el pil donanye Elisa biti tamubuka nyabuk. “Winipnamasile nyaplam bukni, ara pia tilila nyaplame, aning kum winiptue. Allah el si Yahweh, im deice arye, aning-aning nirya arepsutua babye, an nyapmalam ning ara, kum winipmanto,” nyabuk. Nyabuk bukni, Elisa birye tamubuka nyabuk. “Dipkoprop an asing arye, eipnmalame. Bukni adin ara, an ton tonok babye, ton kum dipnamalame,” nyabuk.Allah arye, aning-aning nirya, sik Israel nang ati, arebuk yupu
3 Atalak ara, barye suse taleamuk nang dumbarye anyaik antanap dongobuka domik poka bublan dam wekmekce, sik anang uk, tonoknye birye tonye biti, “Yata ning ati nunda asukumuk balamipya ani, dipnamap do?” nyalanmek. 4 “Ati ara, ‘Ninye unyak sukumuk binuyabe,’ nyaptibye bukni, sik babye din patalule. Ati bipya babye, abinuka dipna uka. Tonda asukumuk ubibya babye, dipna uka. Ati ara, nun wini talak ara, Aram yin talin nang tia cang kain aik dobuka yanuka unyak sukumuk binuyabe. Talye binuka bukmabibuk, tongopsica babye teleb uka. Winibibyeba, sik bataknusiyak do? Opnusiyak do? Winipnamsiyaka babye, anyuka” nyapdayik.
5 Sik anang ara, keting otam weknuyuk talakuk, Aram nang tia aik, cang kain doltakne tenda aik dobuka ulamikak biyikura, adiparyuk aik kum biyik. Aik damuk binuka wekuka dinmekba, awinipmek talak ara, ninye tonok babye, aik pum ton kum unmek. 6 Ninye kum unmeka deiyok ara, ani. Allah el si Yahweh arye, Aram nang ati, kanye walwal ning arepmok deice arye, weik lelim kekebikce, ilil weik ubuk.
Ara, Allah arye, arebuk lelim ara, kuda kereta balamle touk lelim ap, kuda basam baceba, lelim lelamle atonun ning ap, tonda yin talin nang weik arye, lelim nyalamak touk nyabukba, kekebik. Sik aning lelim kekebikce, sik anang mamun asipdayikce nyabik. “Kume aning ara, Israel nang sik ninye deiyoknye Raja birye, yuk mutuku nang, sik Het mutuku talinanye ap, Mesir mutuku talinanye ap ati, nun ona ati yupu deipmalba, anang akunum olyasiyake,” nyapdayikba, ilil weik ubuk.
7 Nyapdayikce ilil weik ubukba, sik alukunyan ara, adiparyuk kwarabuka biyik. Winibika ati, sik ulamik tia aik ap, kuda ap, keledai basam ap, ‘Nun opsicak’ tenen, aning nirya batakuka bindobik. 8 Aram mutuku nang ara, akunum bindopmeka ati ara, sik barye, suse taleamuk nang ara, Aram nang ulamik tia cang kain aik dam ara, tonokak binuka wekmekbuk, sik dilamik ning nirya ara, batakuka binmekce, pia tonok ning babye, ton kum bopmeka ati, tuba aupmokba, din ning ap, mek ap, binuka dibik. Dibikopura, dekna weik ning el si emas ap, perak ap, tonda baju deiamika nirya dobukabikce, yukak binuka duknupdeibik. Aning winibikce tamubuka ton aik ara, binuka wekikce, aning nirya dobuka, bai tam binuka duknupmek atonun winibik.
9 Winibikopura, tonye birye, el kwit capu nang ati nyabuk. “Kume, na kwit capu, nun awininmaba ara, teleb kume. Aning-aning nirya aupmala ara, pia telebe. Nun mutuku nangak ton, nyaptibiba kekeptingopura, teleb uptibye bukni, nuncuk aning nirya dobuka, duknupmap ning ara, malye tenepne. Nunda urdemuk bukmabe bukni, bereklyopura, nun wenena ati, ikin ning nun dopropnamabe. Ati ara, nun ninye deiyoknye damuk nyalbinuyabe,” nyabuk. Nyabukura, sik nirya arye, ‘Telebe,’ tenebik.
10 Utenebika ati, sik barye susu dilamuk nang tamubuka, ninye deiyoknye ulamuk, aik dana-dana tam domik keil poka bublan dam kalikne nang ati, “Nunda Aram nang tia cang kain aik dobuka unyak mutuku binmap bukni, ninye tonok babye anyaik kum unmake. Tonda ninye yupu babye, ton kum kekepmabe. Abatakmak ning ara, kuda ap, keledai basam ap, kirikmakak uk tuba aunmake. Tonda aik dobik ning aupmale,” nyabuka sik bisik bublan dam kaliklamik nang damak binuka nyabik. 11 Nyabikba, adiparyuk sik poka dam kaliklamik nang weik arye, yupu nyabikba, yuk nang kekebikce, amutuku deiyoknye, Raja Israel el dam binuka nyabikba, kekebuk.
‘Telepe,’ 12 Alukunyan ara, uku weik ati ara, ninye deiyoknye bira mapmoka bukukce, el amu tam pil dona deiyok nang ati nyabuk. “Sik Aram nang unyak ning ara na kele ati, sik tenepmak ning ara, nyapnusine. Nun din ning patasilye ning ara, ikin weik ati ara, sik Aram tam nang ara, sik kel ati, ‘Bai tam bindobak do?’ tenebuka, duknubuka dilamsiake. Winipmasiki bukni, nun ton anyaik dam batakuka buru tam bibyopura, sik batakmangu din ning lilbana ati bibyopura, anang arye, nun tongopnamsiyake. Sik Aram nang arye, ‘Samaria unyak ninye tongopnamabe. Tomobuka tapu koubipyopura, sik ninye anyaik-anyaik nirya wekuka obibirye sirya daknamabe’ tenen, warikuka duknupmasiyakce wininmasiake,” nyabuk. 13 Nyabukopura, el yin talina deiyoknye tonok arye, “Ati ara, ance nyapdeipminba, ninye arye, kuda basam tuba anyaik dam unyak noutamak arye, pamubarye ton aulye ning dopdeibikiba, sik Aram nang unmangu ak dilbinuyake. Nun nirya ara, atonun unyaba ara ikin weik unyabe. Din patapsukba, dibinyaba ati ara, sik anang babye, Aram nang arye, obicopura, dipna uk unamake. Nun babye dipnamapca,” nyabuka deiyoknye biti nyabuk.
14 Nyabukura, Raja birye kekebukce, sikce kereta kuda basam bitinye ap, aning kirikuka bobinamrika ati kuda basam bitinye ap, dobuka kintinip deibikba, ninye deiyoknye birye aning talibuka bobanurik nang ati nyabuk. “Anggunda Aram nang ulamikak ei dilbinamarume. Dilbirumunce, anang wininmangu ning ara eiprumunce, lak nyalyanamsurume,” nyabukce, anang ati wipdeibukba, birik.
15 Awipdeibuk nang ara, adiparyuk birik. Sik Aram mutuku nang binmek bisikuk, sik dilbinmarik nang ton tabakuka dobolbanmarika, Yordan mekin birikce, sik Aram nang binmek bisik dipderika ara, sik Aram nang bobanmek ning ap, baju kwilikdoba ap, talye wangaplopra banmek ningak eiprik. Ara, sik Aram nang ilil weik ubukba, moubuka tenena kumce, kanye walwal ubuka ati, bisik bikbik abuka banmek talak arye, talye wangapmek ning ara, eiprik. Aning nirya winibukba eiprikce, nyapmokba, dilbinmarik nang tamubuka yarikce, sik deiyoknye dam lak nyalbirik. “Aning ton winipmaka ak, eipmaname,” nyaprik.
16 Samaria mutuku ulamik ninye nirya, ayupu kekebikce adiparyuk Aram yin talin nang talye bataka binmek ning aning-aning nirya binuka doprikce, dekna weik ning doprik. Winibika ati ara, atalak arye, deiyok koubuka, Allah el si Yahweh arye, ‘Wininamlume,’ nyabuk touk winibik. Ara, din ning el si gandum teiklamak ning teleb ning ara, 7.3 liter kwebuka deiamik ning ara, el dekna ara, uang perak mitik tonun ara 11 gram arye, dekik. Aning atonun, yuk din yala ning ara, el si jelai, 15 liter kwelamak ning ara, el dekna ara uang perak mitik tonun aryuk 11 gram arye, dekmek. Aning minop dekna weik arye, dekik bukni, arup arye, deiyok koubuka mitik tonun aryuk dekik. Aning nirya ara, Allah el si Yahweh arye, “Ambusum winipnamsile,” nyapdeibuk touk, dekik.
17 “Ura atalak ara, Samaria mutuku ulamuk weik deiyoknye, Israel nang sik Raja bira, el amu tam pil melilamuknye biti, anyaik dana-dana aknapdongamik cang poka bublan dam kalikinamlulume,” nyabuka akunum wipdeibuka ati ara, anye birye poka bublan dam kaliklamuk. Kaliklamuk bukni, amutuku ninye nirya arye, ‘Aram mutuku nang arye, batakmek ning nun ton dolbinuyabe’ tenen, bikbik abuka buru banmek talak ara, akalikinanye tiklim darap yanibikba, adiparyuk dibuk.
Anye dibuk ning ara, Raja arye Elisa aik yayuk talak, Elisa birye Raja el melinanye biti nyabuk touk winibuk. Ara, “Anda ambusum amutuku din ning ara, uang mitik tonun aryuk deknamak bukni, an asing arye, eipnamalam bukni, ance kum dipnamalame,” nyabuk. Aning ara, Allah el pil dolamuknye Elisa birye, nyapdeipmok touk akunum yanibikba anye dibuka ati, adin ning mitik tonun aryuk kum dibuk.
18 Aning atonun, Allah el pil donanye nabi Elisa birye, Samaria mutuku ninye deiyoknye biti nyapmok touk akunum winibik. Ara, “Ambusum ara, awinipmaba atonun keting dudukan ara, Samaria mutuku weik keil poka bublan dam, ninye arye, din ning deknamak bukni, yo bok mitik tonun aryuk deknamake. Din ning el si gandum teikmakce ning teleb ning ara, 7.3 liter kwepmakce ning ara, el dekna ara, uang perak mitik tonun aryuk 11 gram deice arye, deknamake. Aning atonun, yuk din ning deiyok ning ara, el si jelai, 15 liter kwepmakce ning ara, el dekna ara, uang perak mitik tonun aryuk 11 gram deice arye, deknamake. Minop ara, dekna weik arye, deklamupu bukni, ambusum arye, deiyok koubuka mitik tonun aryuk deknamabe,” nyapmok touk winibik.
19 Tonda, atalak ara, Samaria mutuku taleamuk ninye deiyoknye, el amu tam melinanye birye Allah el pil donanye Elisa biti nyanmoka ara ani, “Winipnamasile, nyaplam bukni, aning kum winiptue. Allah el si Yahweh im deice arye, aning-aning nirya arepsutua babye, an anyapmalam ning ara, kum winipmanto,” nyapmok. Nyapmokba, Elisa birye tamubuka anye biti nyabuk. “Dipkoprop an asing koproba arye, eipnamalame. Bukni, adin ara, an ton tonok babye ton kum dipnamalame,” nyapmok touk winibuk. 20 Ara, amutuku ulamik nang arye, ‘Aram mutuku ninye batakmek ning dopropnamabe’ tenen, bikbik abuka banmek talak ara, anye el nong deice yanibikba adiparyuk dibuk. Ati ara, Elisa birye ‘Winipnamle,’ nyapmok touk winibuk.