3 Pilistin ninye ulamik noutam daulamuka ani, aning nirya keting tamun tekbarye (7) deice akunum ubuka, sirya ubukopura, tamubuka Israel mutuku noutamuk yayuk. Tamubuka yayukopura, el mi ap, ansinibuka ninye deiyoknye Raja, el aik birikce, sik min arye batakamdik asik ap, sik mutuku tuku ap ara, “Tamubuka nunuk arepsilyame,” nyabuka morolbiyik. 4 Akil arye, amutuku deiyoknye, Raja ati morolbiyuk talak ara, Elisa el melimnanye, el si Gehazi, el ap amutuku taleamuka deiyoknye, Raja ap yupu talipmarik. Aninye deiyoknye Raja birye, Gehazi biti nyabuk. “Ni kwito, Allah el pil donanye, Elisa birye, ninye winipmanto kum ning winibukak, eibuka biklum ning ara, na dam ton nuknilyame,” nyabuka morobuk.

5 Nyabuka morobukba, Elisa el melimnanye, Gehazi birye, nukna akunum deiyok koubuk atalak ara, Sunem mutuku kil arye, ninye deiyoknye Raja dam ati, “Melipnilyame,” nyabuka morolyayuk. Gehazi bira, Elisa birye, akil el mi, dipmokba, tamubuka kam bukdeiamuk yupu nirya ati, deiyok koubuka nukunmok. Nukukopura, Gehazi birye nyabuk, “Naio, anda na ninye deiyoknye Raja, Elisa birye, tonok kil, el mi ara, pia dipkoprob kam bukdeibuk ning, akil ara atia. Tonda, Elisa birye, dipkoprob kam bukdeiamuk mi ara, ayan malnye bitia,” nyabuk.

6 Nyabukopura, ninye deiyoknye, Raja birye akil ati, “An mi winibuk ning ara, nuklyame,” nyabuk. Aning nirya akunum nukuka, sirya nyabukopura, Raja arye, el amu tam melinanye biti yukubuk. Yukubukba, yayukopura, Raja birye nyabuk. “Akil el taleamuk ning, kum dayuk ning nirya ara, el damnye tamubuka arepnulyame. Ara, el aik ap, el wa tuku ap, el taleamuk ning ap, el wa tuku deice palamuk ning dobuka deklamikba, yo bok weik dololamik touk, ayo bok atonun ton, bulubuka arepnulyame. Ara, yuk mutuku noutam, keting tamun tekbarye (7) deice arye ulamuk talak noutam arye, dopropmantu ning nirya ara, aning nirya akil biti, tamubuka arepnulyame,” nyabuk.

7 Tonok sum ara, Elisa Damasyik mutuku biyuk. Damasyik mutuku ara, Siria mutuku bukni, weik asik deiyok kiamuk. Akiamuk talak ara, ninye deiyoknye Raja Benhadad, elda uk dinmok. Auk dilamukba, el amsuna ak mapmok talak ara, Raja birye kekenmokba, “Allah el pil donanye Elisa bira, Damasyik mutuku yanuka unmale,” nyabikba kekebuk. 8 Kekebukopura, aninye deiyoknye birye, el kwit Hazael, el pil amu tam melinanye biti nyabuk. “Allah el pil donanye, Elisa biti, el deken ning ara, bobinuka arelbinulyame. Tonda, winipmince, elti, moropminba, el Allah Yahweh ati, ‘Raja eluk dilul ning ara, lopnamle do, kum do?’ nyabuka, asipdenamlule,” nyabuk. 9 ‘Elisa birye Allah ati, amambul weik yupu asipdenamsil’ tenen, Hazael birye, empat puluh (40) unta basam doprobuk. Ara, Damasyik mutuku noutam awamuk ning ap nirya ara, pia teleb-teleb ning ap, yuk ning nirya ap, aning deice arye deibuka, boyangana ati, Hazael birye dopdeibuk.

Winibukce, Elisa dam biyuk. Akunum biyukopura, Hazael birye nyabuk. “Naio, an amu tam ululnye bira, ninye deiyoknye Raja Benadad, Siria mutuku talibuknye birye, nati dopdeipmanila deiyok ara, ani. Ara narye anti, ‘Nun deiyoknye Raja Benhadad, el uk dilul ning ara, lopliba, kam upnamle do? Kum do?’ nyabuka asipdenamne. Nyabuka, ‘Asipdenamle’ tenen, elce nati wipdeipmanila ati, an nabi Elisa biti, asipdekine,” nyabuk.

10 Nyabukopura, Elisa birye tamubuka nyabuk. “Anda tamubuka, an deiyoknye Raja Benhadad biti, ayupu laka nyalbilyame. Ara, ‘Yo, an uk dikulul ning ara, lopkiliba tonak tamubuka, telebuk unamlame. Kam unamlame,” nyabuka, laka nyalbilyame. Bukni, anti ara nyapne. “Dipkoprop Allah Yahweh arye, nyapdeipnuk ning ara, ani. ‘Raja Benhadad, elda dipkoprob akunum dipnamle,’ nyapnuke,” Elisa birye, Hazael biti nyabuk. 11 Nyabukopura, adiparyuk, Elisa pia tuba, Hazael el urasin damuk dinmok. Dinmokba, Hazael ilil pia weik ubuk. Winibukba, Allah el pil donanye, Elisa bira, talye karin arye engenmok.

12 Elisa engenmokba, Hazael birye asipdeyuk. “Naio, yata deiyok ning ati, na deiyoknye anda engenmalam do?” nyabuka, Hazael birye asipdeyuk. Nyabukba, Elisa birye, tamubuka nyabuk, “Deiyok ara, ance winipnamlam ning ara, na akunum kele. Ara, aminyan talak, Israel yala ninye unyak mutuku noutam nirya ara, ance yu ning, sik dam deipnamlame. An Hazael birye, Israel ninye unyak mutuku noutam ara, ‘Nun oldan nang arye, wekuka opsikcak’ tenen, weik keil deibuka, cang poka wibuka, aknapdongobuka domik asik babye, uluplopnamlame. Ara, anyasik-anyasik nirya dobikba, mikip ubuk poka nirya ara, ance uluplopmince, anyasik nirya uku dongopnamlame. Tonda, ance amutuku noutam unyak kam nang nirya ara, parang ya arye opnamlame. Winipmince, Israel mutuku kilapu, sik winiryuk dibikiba, moum tuba dilamikce mapu nirya babye, obuka atu kipnamlame. Tonda, amutuku kilapu, sik mi winiryuk bomikce kilapu babye, sik mun pum tam nirya ara, tiriplopminba, dipnamake,” nyabuk.

13 Elisa birye nyapdeibukopura, Hazael birye tamubuka nyabuk, “Bukni nara, pia mambulnye kume. Nara, yata deiyok ati, kanye imun weik pil nirya doptinye do?” nyabukba, Elisa birye tamubuka nyabuk. Aning ara, talye ati kum nyapkine. Deiyok ara, Allah Yahweh arye, akunum nati nyapdeipmanil ning ara, anda ninye deiyoknye, Raja kibuka tikmince, Siria^a mutuku nirya talipnamlame. Allah arye nyapdeipmanile,” Elisa birye, Hazael biti nyabuk.

14 Nyabukba, Hazael birye kekebukopura, elda akunum adiparyuk tamubuka, ninye deiyoknye, Raja Benhadad, el aik dam biyuk. Biyukba, Raja arye asipdeyuk, “Elisa birye nyapmal yupu ara, yata yupu nyapdeipmakil do?” nyabuka asipdeyuk. Asipdeyukura, Hazael birye, “Kume na nio, elce nyapdeipmanil yupu ara, ani. Na deiyoknye Raja Benhadad, el uk ara lopliba, tamubuka teleb upnamle, nyapdeipmanile,” Hazael birye nyabuk. 15 Nyabuk bukni, sik mapmarika, berekukopura, ambusumto arye, Hazael birye amsuna tokon ning, el si selimut tonok doprobuk. Doprobukopura, amsuna tokon ning, selimut bobukabukce, mek pum tam dongobuk. Dongobukce, Hazael birye amsuna dobuka, el Raja asok deice lelipdongobuk. Ara, ‘Raja el isin dolona kum ati, el urasin deice lelipdongopniba, elda nimalyap arye dipnamle,’ tenebuk. Winipnyopura, Hazael bira ninye deiyoknye, Siria mutuku noutam deiyoknye, Benhadad pununa ati tikukce, Siria mutuku nirya taleamuk.

16 Yosafat el mi Yehoram bira, Yehuda mutuku noutam ninye deiyoknye Raja tikuk. Elce deiyok kibuka tikuk talak ara, Ahab el mi Yoram ninye deiyoknye, Raja ulamukce, Israel tam taleamukce, yupu nyalamuk. Yoram birye, Israel tam taleamuka ani, keting tamun pamubarye deice arye, Yehoram birye deiyok kibuka, Yehuda tam taleamuk. 17 Yehoram ara, Raja kibuka, Israel tam talena ati, deiyok kibuk talak ara, el nene ara, akunum wisi dayuk keting tamun yupa ara, keting tamun tiga puluh dua (32) tahun kibuk. Raja tikuk talak arye dipdongobuka, otalak keting tamun nirya ara, delapan tahun deice arye, Yerusalem mutuku noutam taleamukce, yupu nyalamuk.

18 Talyamuk bukni, ninye deiyoknye Yehoram bira, Raja Yehuda mutuku taleamuk talak noutam nirya ara, pia malye weik ulamuk. Ara, minop talak Israel tam taleamuk Raja Ahab ap, tonda yuk Israel mutuku ninye deiyok nang Raja-Raja ap arye, pia malye ninguk talibuka ulamik touk, Yehoram babye, pia malye ninguk weik winilamuk. Yehoram birye winilamuk ning deiyok ara, Raja Ahab el kilmu domukce, Allah Yahweh el kanye ara, ‘Aning pia malye,’ tenelamuk ninguk, talibuka pia malye-malye weik winilamuk.

19 Bukni, Allah Yahweh arye, ‘Yehuda tam unyak ninye nirya ara, wenepnirye nirya kum opniba, kum kum danaknamyake,’ tenebuk. Adeiyok ara, minop talak, Allah arye, el kanye delilamukce, el pil donanye Raja Daud biti, nyapdeibuk. “Ance deipminye mapu ap, sikce dibikiba, dadeipdanin, bakirye, unamak nang noutam arye, ninye ton wipdeipniba, Israel tam talinamake. Ara, Israel tam noutam unyak ninye talipnamaka ati, an mapu silip arye, ninye deiyok nang Raja kibikirye, ninye talebuka pia unamake,” nyalin yupu deice arye nyapdeiamuk. Tonda, Allah arye, “Sik Daud yala ninye bukni, anoutam arye tikinamak Raja-Raja nang ara, weik weisa dirina weik ulamle touk, pia ati unamake,” nyabuk.

20 Yehuda tam taleamuknye, Raja Yehoram ninye deiyoknye Raja kiamukce, ulamuk talak ara, Edom mutuku nang arye, ‘Kume, nunda Raja Yehuda birye nyalamle yupu ara, kum kekenamabe. El amu tamuk kum unamabe. Aning winina kumce, el yupu yanilongolamik. Winilamikopura, ‘Anye erepdeibibiba, elcuk nun weiknye Raja ulirye, talipnamsil’ tenen, sik kanye aryuk, sik amutuku arye, ninye deiyoknye ton wipdeibikba, elcuk aninye talibuka ulamuk.

21 Ati ara, ninye deiyoknye, Yehuda mutuku deiyoknye, Raja Yehoram birye, ninye mal olalbana ati, bisik bukuka ban ning, el si kereta kuda, aning nirya kintinip deibukce bukuka, Edom mutuku noutam bukni, asik si Zair mutuku, mal olalbiyik. Zair mutuku bukuka biyikopura, Edom tam yin talen nang arye, ‘Yehoram el yin talen nang obuka, sirya daknuyab’ tenen, anang unmikak, yanuka warekik. Winibik bukni, alukunyan noutamuk, ninye deiyoknye Raja Yehoram ap, el yin talen nang, sik deiyok-deiyok nang ap nirya, ninye olalbana talak bisik ban ning, kereta kuda deice bukukabikce, Edom mutuku arye olyanmek yin talin nang arye, warekuka antanap dongopmikbuk, pakuka wekikce, Edom tam yin talen nang ati olbiyik. Winibik talak ara, Raja Yehoram, el yin talen nang ati, ‘Kum olbinamap’ tenen, adiparyuk batakukabikce, bikbik abuka, sik mutuku yuk-yuk bikbik abuka, tamubuka biyik.

22 Aning winibika ati ara, atalak arye dipdongobuka, wini talak nirya ara, sik Edom mutuku unyak nang arye, ‘Yehuda tam talilamaka deiyok nang, sik amu tam pia kum unamabe. Sikce nyanyak yupu babye, pia kum kekenamabe. Nun yuk unamabe,’ tenenyakce, Yehuda tam deiyok nang batakikirye, sik yuk ninye deiyok nang talibuka unyake. Wini talak babye, asik si Libna mutuku nang, sik babye, ‘Raja Yehuda nyalul yupu nirya ara, nunda kekena kumce, yaninauk unamabe,’ tenelamik touk, wini talak babye, tuba atonun tenenyake. 23 Ninye deiyoknye Raja Yehoram, elce talibuka ulamuk talak arye, yuk yupu nyalamuk ning ap, tonda elce pil dolamuk ning nirya ap, sik amutuku nang arye, sekuka delilamik buku noutam sekik. Abuku^b el si ara, ‘Yehuda tam ulamika ati, taleamika deiyok nang arye, min talak winilamik ning,’ nyabik.

24 Ninye deiyoknye, Raja Yehoram akunum dibukopura, ninye arye dobuka, Daud mutuku noutam ninye deiyok nang dipnaba, weilamik mutuku uk weilbiyik. Ara, Yehoram el apu yapu nang dipnabuk, sik tam nang arye, sik nong dobuka, weilamik mutuku uk weilbiyik. Akunum weibikopura, Yehoram el mi Ahasia birye, el li pununa ati, Yehuda mutuku ninye deiyoknye Raja una ati, punubuka tikukce, yupu nyalamuk.

25 Yehoram el mi Ahasia birye, Yehuda mutuku tam, ninye deiyok Raja kibuk. Atalak aryuk, Ahab el mi Yoram ninye deiyoknye, Raja kibukce, Israel mutuku nirya talibuka ulamuk keting tamun, dua belas tahun (12) deice arye taleamuk. 26 Ahasia el nena ara, keting tamun dua puluh dua tahun (22) akunum kibuk talak arye, ninye deiyoknye Raja kiamukce, Israel tam taleamuk. Winibukce, weik asik si, Yerusalem mutuku tam ulamuk keting tamun, tonok deice arye taleamuk. Ahasia el lin si ara, Atalye. Atalye bira, ninye deiyoknye, Raja Ahab birye deiamuknye, el si ton Omri. Tonda, Omri birye deiamuk kilmu, Atalye ulamuk. Omri bira, min talak arye, Raja Israel ton kiamuk.

27 Ura, Raja Ahasia babye, minop talak ninye deiyoknye, Raja Ahab ap, el aik ninye ap arye, pia malye ning taleamikce, malye-malye weik ulamik touk, Ahasia el babye atonun, malye weik winilamuk. Ara, Allah Yahweh el kanye ara, ‘Aning ara, pia malye ning,’ tenelamuk ning ara, Raja Ahasia birye taleamukce, pia malye-malye weik winilamuk. Tonda minop talak, Israel tam ninye taleamuk Raja Ahab ap, tonda Ahab el aik ninye ap arye, pia malye ning talibuka winilamik touk, Ahasia babye, pia malye weik winilamuk. Ahasia birye winilamuk ning deiyok ara, Raja Ahab birye deibukba, dadeipdanin yangalamik nang arye, deiamik kilmu domuka ati, atam nang arye, malye ulamik touk, el babye malye ulamuk.

28 Ninye deiyoknye Raja Ahasia, min kum diamuk talak ara, el ap, Raja Ahab el mi Raja Yoram, Israel tam taleamuknye ap, neika ansinibukapdikce, sik Siria^c tam ulamik ninye, sik ninye deiyoknye, ‘Raja Hazael biti mal olbinanam’ tenen, birik. Mal olalbana ati, birik mutuku si ara, Ramot-Gilead mutuku mal olalbiyik. Ura, mal olanmikbuk, Siria tam nang arye, Raja Yoram bak mal bisikabikba, dila pia weik ubuk. 29 Winibukopura, adiparyuk Raja Yoram bira, Siria mutuku nang arye opmekba, el dila upmok ning, el kwetena ati ara, Ramot-Gilead mutuku batakuka tamubukce, Yisreel mutuku biyuk. Ara, ‘Yisreel mutuku binuka, na dila nipnamnil’ tenen, nakilamuk. Tonda, anakilamuk talak ara, Raja Ahasia birye, ‘Raja Yoram bira, el mal olan nang arye obikba, yok dila weik ubuka ara, akunum lobuk do?’ tenen ati, Yisreel mutuku arye, dilbiyukba epdadik.