3 Aning winipminyopura, aminyak zaitun mek lipmaminye, mek makau tonok bopmaminya ara, Yehu el kisok deice dikdongopnulyame. Winipminye talak ara, ayupu nyapnulyame. Allah Yahweh arye nyabuk ning ara, ani. ‘Aminyak mek dikmakina deice, Allah arye, Israel tam unyak ninye talibuka unamle ninye deiyoknye, Raja kipdeipkine,’ nyabuka wipdeipkile. Aning nirya akunum winipminyopura, adiparyuk bublan kukukapmince, asukum ara batakuka, pia minopce bikbik abuka bindopnulyame. Ara, ‘Amutuku nang arye, na opnikcak’ tenen, bikbik abuka bindopnulyame,” nyabuk.

4 Nabi Elisa birye, nyapmok ning winipnamok ati, el akamnye nabi bira, adiparyuk bikbik abuka, Gilead mutuku bukni, asik si ara, Ramot mutuku biyuk. 5 Akamnye bira, Ramot mutuku biyuk talak ara, Yehu ap, el yin talin nang, sik deiyok-deiyok nang ap nirya, bulubuka wekmekak, binuka epdayikce, yupu talibik. Anabinye birye, anang nirya eibukopura, ayupu nyabuk. “Naio, narye anti, yupu ton boyakine,” nyabuk. Nyabukura, Yehu birye tamubuka nyabuk, “Nun asukum ara, ninye weik tonun wekmaba anya arye, yatanye biti nyapnulam do?” nyabuka asipdeyuk. Asipdeyukura, akamnye nabi birye, “Kume, na nio antia,” nyabuk.

6 Nyabuka ati ara, Yehu birye, el kayapu asukumuk batakukce, el ap, anabi kamnye ap, sik neika ansinibuka, anyaik pum birik. Winiprik talak ara, akamnye birye, aminyak zaitun mek bobukabukce, Yehu el kisok deice dikdongobukce nyabuk. “Awinipmakin deice arye, Allah Yahweh arye, Israel tam unyak ninye talibuka, una deiyoknye kina ati, winida wipdeipkile. Sik Israel tam unyak ninye ara, Allah Yahweh el, ‘Na’ tenen, ninye, el mapu koprop unyake. Anda, aninye nirya talibuka unamlama ati, sik deiyoknye Raja ara, anuk unalame.

7 Aunamlama ati, Yehu anda, an deiyoknye Raja Ahab, elce deibukba, dadeipdanin yangalamik ninye, Ahab el aik ninye nirya ara, opmince kum daneipnamlame. Winipnamalama deice arye, na Allah arye, weik deiyok kil Izebel birye, na pil don nang omnuk ning ara, kwang daknamne. Ara, na mapu sik nabi-nabi nang ap, na yupu laka nyana deiyok nang ap, na yupu peteren nang ap ara, Izebel birye nyaibukba, yu nang arye olamik. Ati ikin ning weik, anye deiceuk deipne.

8 Tonda, ‘Ayala ninye mitik tonun opnun’ tenena meme. Raja Ahab, el aik ninye nirya ara, obukmince, sirya daknalame. Ara, ninye deiyoknye Raja Ahab ap, el mapu ap arye delinyak nang nirya ara, opminba dipnamake. Winipnamalama deice arye, na Allah Yahweh arye, Ahab el yala nang nirya, sik ninye du nang ap, mapu ap, wisi nang ap, kam nang ap, sik aik pil don nang ap, ‘Dengna dolona kumce, nun ikin pil dibibiba, sikce talye donamsiyak’ tenen, yo bok deice arye deklamikba, talye pil don nang ap, aning-aning nirya ara, opmince sirya dakminya deice arye, narye anang kum kipdeipnamne. 9 Na Allah Yahweh arye, Nebat el mi Yerobeam ap, el aik ninye ap nirya, obuka kum kipdeipse touk, wini talak ara, Ahab elce deiamuk mapu nirya, Yereobeam el aik ninye ap, tonda, Ahija el mi Beasa, el aik ninye ap nirya ara, narye kum kipdeipnamne. 10 Ninye deiyoknye Ahab, el kil Izebel bira diplyopura, ninye arye el nong bobinuka, kum weipnamake. Akil dipliba, Yizrel nyanyak mutuku bukni, awa tuku uamuk mutuku noutam ara, talye balamle kam arye, el nong ap, el ining ap dipnamake. Ati ara, Izebel bira, el nong kum weipnamake,” nyabuk. Akamnye nabi bira, Allah Yahweh arye nyapdeiamuk yupu, akunum sirya nyabukopura, ‘Anyasik nang arye opnicak’ tenen, adiparyuk anyaik batakukce, bai tam kutukuka yayukce, adiparyuk bikbik abuka biyuk.

11 Akamnye bira, akunum bikbik abuka biyukopura, Yehu bira tamubuka, el kwitcapu sik Raja Yoram, el yin talen deiyok nang dam tamubuka biyukopura, sik awekmek nang bukni, tonoknye birye asipdeyuk. “Arup yanmarumnye bira, Luba talibuknye birye, yate yupu ton nyapmakil do? Yata deiyok ati, an dam yanuka nyapdeipmakil do? Anda teleb ulyam do, kum do?” nyabuka asipdeyuk. Nyabuka asipdeyukbuk, Yehu birye tamubuka nyabuk. “Kume, daupmalye. Anggunce akunum bikamlume. Ato lup nang ara, deiyok kum upmalibuk, talye-talye yupu uk nyanyake,” nyabuka, Yehu birye nyabuk.

12 Nyabukura, sik yuk yin deiyok nang arye nyabik. “Kume, nun kanye ara, ance yuk yupu ton kum nyapmasilamce, kwinisa dobuka, tenepce nyapmalame. Wini talak aryuk, dipkoprob ninguk nyapnusilame!” nyabik. Nyabikba, Yehu birye tamubuka nyabuk. “Kume, akamnye nabi birye, nati nyapmanue. Allah Yahweh arye, anti, ‘Israel ninye talipmince, sik ninye deiyoknye, Raja unamlam’ tenen, akunum wipdeipkile,’ nyabuka, laka nyapdeipmanue,” nyabuk. 13 Nyabukura, anang arye kekebikopura, adiparyuk Yehu el kwitcapu, sik ongopmek cang kain ara, el si juba kwiribuka, Yehu el dinmokak aik, atolonga dam anyuk deibuka batakik. Winibikopura, sik adiparyuk lelim nyan ning, yim domba basam, el kisok takce arye, kintinip deiamik ning ara, el si terompet, dobukabikce, pong anmekce, weik yupu deice arye, “Yehu elda, nun Israel tam ati, ninye deiyoknye Raja akunum kipmasile!” nyanmek.

14 Aning ara, ninye si Nimshi birye deiamuknye Yosafat, elce deiamuk mi Yehu, anye elce Israel tam taleamuka deiyoknye, Raja Yoram biti, ‘El yupu kum kekenamaba ati, elti, malye kipnamap’ tenen, Yehu deiyok kibukce, el ap, el kwitcapu ap arye, ‘Raja Yoram olbinamap’ nyabuka, yupu talibikce, pirilamik. Ura, atalak ara, Israel tam ninye deiyoknye, Raja Yoram bira, Yisreel mutuku bukni, mutuku si Ramot-Gilead mutuku ulamukce, el ap el yin talen nang ap, Siria mutuku ninye deiyoknye, Raja Hazael ap, el yin talen nang ara, mal oldalamik. Ara, Raja Hazael birye, ‘Raja Israel Yoram talilul ninye ara, obuka kum daneipnamne’ tenen, kaleklamikce piriplobik.

15 Sik anang nirya, mal oldalamik talak aryuk, Raja Yoram bira, mal arye opmekba, el nong dila weik ubuka ati, elda Yisreel mutuku kwetena ati binuka ulamuk. Ati ara, Yehu birye, el kwitcapu neika ulamik nang ati nyabuk. “Anggunce nati, ‘Elda nun ninye deiyoknye Raja tiknamle,’ tenepnimunyopura, ninye bin tonok babye, Gilead mutuku bukni, asik si, Ramot mutuku noutam arye, amutuku batakuka, yukak kum binamnyake. ‘Sik bikcak’ tenen, anggunce amutuku kalikinamlume. Tonda, ‘Amutuku nang arye biknamak’ tenen, sikce Yisreel mutuku nang unyakak, laka nyalbinalume,” nyabuk.

16 Ayupu nirya, akunum sirya nyabukopura, Yehu adiparyuk mal olban dam bukuka ban ning, kereta kuda basam deice bukabukce, ‘Raja Yoram eipnamne’ tenen, Yisreel mutuku biyuk. Atalak ara, ninye deiyoknye Raja Yoram bira, el dila nirya ara, teleb kibuka min kum niamuk. Ikin tuba umoka anya arye, el amsuna deice mapmok touk unmok. Atalak ara, Yehuda tam nirya taleamuk ninye deiyoknye, Raja Ahasia babye, el kwit Yoram, eluk dilamukak dilbinmok talak arye, amutuku uk unmok. 17 Atalak ara, Yisreel mutuku weik asik dolamikce, cang weik poka antanapdongobuka domika, donga tam kaliklamik nang arye dinmekbuk, Yehu ap, el tam nang ap, yanganmeka eibik. Eibikopura, akalikmek nang arye, Raja Yoram biti nyabik, “Yin talen nang ninye yupa tonok ton, outam arye atam yanganmake!” nyabik. Nyabikura, ninye deiyoknye Raja Yoram birye, tamubuka nyabuk, “Ninye bin tonok, ton nyapmunyeba, kuda basam deice bukukaplirye, bikbik abuka ayanganmak nang, eldana ati binulule. Bilirye asipnamlule. ‘Anggunda, teleb kanye bobuka yanganmalum do? Nun olana ati yanganmalum do?’ nyabuka asipnamlule,” nyabuka, Raja Yoram birye nyabuk.

18 ‘Winipnulyame,’ nyabuka ati, ayin nye tonok biyukce, kuda basam deice bukuka, Yehu dam binuka asipdeyuk. Ayin nye biyukopura, Yehu biti nyabuk, “Na deiyoknye Raja, an Yehu yanganmalam ning ara, kanye teleb bobuka yanganmalam do? Yu asa yangan malam do? Na deiyoknye, el bikna ati yanmane,” nyabuk. Nyabukura, Yehu birye tamubuka nyabuk, “Anda teleb kanye bona ap, teleb ubuka neika una ap ara, anda kum bikluma ati, an ap, na ap, neika yupu kum nyapdatinimnye. Ati ara, anda na aminyan tam yaminba, neika binuyabe,” Yehu birye nyabuk. Sik epdadik talak ara, Yezreel mutuku asik kaliklamuk yin talinanye bira, dinmoka ani, Raja Yoram birye wipdeiamuk yin nye ap, ayupu tonok ap, nirya yanganmeka ani yayik. Bukni, yupu asilbinmoknye bira, el yuk tamubuka kum yayuk. Kum yayuka ati, kalikinanye birye, Raja Yoram biti, weik yupu arye nyabuk. “Naio, ance bokdeipmamunye bira, tamubuka kum yanganmale,” nyabuk.

19 Nyapmokbuk, min yuma binmoknye, tamubuka kum yayukopura, Raja Yoram birye tuba tonap, yuknye like bitinye, kuda basam deice dopdeibuk. Dopdeibuk yin nye birye, Yehu biti asipdeyuk. “Na deiyoknye Raja birye, asipmakil ning ara, an Yehu yanganmalama ara, kanye teleb bobuka yanganmalam do? Yu asa yanganmalam do? Na deiyoknye el bikna ati yanmane,” nyabuk. Nyabukura, Yehu birye min nyapmok touk, tonap tamubuka nyabuk, “Anda teleb kanye bona ap, teleb ubuka neika una ara, anda kum biklume anya arye, an ap, na ap, neika yupu kum nyapdatinimnye. Na aminyan tam yaminba, binuyabe,” nyabuk.

20 Sik epdarik talak ara, Yezreel mutuku asik domikak, kaliklamuk yin talinanye birye dinmokce, el deiyoknye Raja Yoram biti, weik yupu arye nyabuk. “Naio, ance bitinye ning dopdeipmamu nang ap, ayanganmak nang dam binmaua ara, epdanmak bukni, ance bokdeipmomnye bira, tamubuka kum yanganmale,” nyabuk. Bukni, na kanye ara, weik ayanganmak ninye ara, Nimshi birye deiamuk mi, Yehu birye, sik deiyok kibuka yanganmal tenepmane. Aning ara, talye kum nyapkine. El anye birye, kereta kuda bukuka yanganmal ning ara, pia minop yanganmala anya arye, motona taleamne nang balamak atonun unmale. Ati, na kanye ara, Yehu el bukmalce yanganmal tenepmane,” nyabuk.

21 Nyabukopura, ninye deiyoknye Raja Yoram birye, ayupu nirya akunum kekebukopura, nyabuk. “Na bukuka tuku deice bana ati, kereta kuda ara, minopce kintinipnunilyame.” Nyabukopura, adiparyuk kereta kuda basam, el bana ati kintinibuka, doprobukce, elda Raja Israel ninye, sik deiyoknye Yoram ap, el kwit Yehuda mutuku ninye, sik deiyoknye Raja Ahasia ap, ‘Yehu epdanamanam’ tenen, sik kereta basam ara, yuk-yuk bobirik. Bobirikce, Yehu ap epdanmeka ara, ani. Ara, ninye si Nabot birye, Yisreel mutuku noutam, min talak anyapce, elce wiamuk wa win dam epdayik.

22 Epdarikopura, Raja Yoram birye, Yehu biti asipdeyuk, “Anda, ‘Teleb ubuka neika unamap’ tenen, kanye teleb bobuka yanganmalam do, kum do?” Nyabukura, Yehu birye tamubuka nyabuk, “Nara, yata deiyok ati, amutuku noutam arye, na kanye teleb arye yatinye do? Deiyok ara, amutuku noutam dana-dana tam nirya, Yoram an nin koproba, Izebel birye deiyok kiamukba, amutuku noutam unyak ninye arye, asing keten nang arye don pil ap, talye ning isa si eren pil don nang ap, tuba talibuka donyaka anya arye, nara yata wiribuka, teleb kanye deibuka yatinye do? Kume, aning ara, kum winipmanto,” nyabuk.

23 Nyabukopura, Raja Yoram kekebukce, ‘Se, aning ara, ikin ning lenmale,’ tenebukce, el bukuka bisik bana ati, el si kereta kuda tamubukce, bikbik abuka banmokce, weik ngalukunmokce, yupu nyanmok. “Raja Ahasia, anda kekepnilyame! Anye Yehu birye nati, talye tilila yupu minibuka nyapmanile. Anye birye, ‘Raja Yoram opnirye, malye kipnamne,’ tenepmalce, yanganmala atia,” nyabuka, weik yupu arye, Raja Ahasia biti nyabukce, bikbik abuka banmok. 24 Winibuka bikbik abuka banmok bukni, Yehu adiparyuk, el cang yin bopmuk mal kum-kum ara, yin tapu deice deibuka dinikukce, mikip weik tonun arye lipdobuk. Winibukopura, Yehu birye dobuk mal ara, banmoka ani, Raja Yoram el mulaja yok dam, balye tam binuka bikuk. Winibuka bisik abukba kulubukce, Yoram el talima noutamuk binuka bikuk. El talima noutam binuka bikuk anya arye, Yoram adiparyuk, el bulamuk ning, kereta kuda deice bukmoka ara, adiparyuk daksakuka dibuk.

25-26 Aning winibukopura, Yehu birye, el amu tam yin talen nang, sik deiyoknye tonok, el si Bidkar biti nyabuk, “Anda Yoram el nong ara, Nabot birye, wa tuku dekamukce, taleamuk mutuku, wa windamuk dopkwetepnulyame,” nyabuk. Nyabukopura, ayupu ton nyabuk. “Anda tuba biklum do? Nun neika kuda basam deice welepnumurye, Yoram el li Raja Ahab ap, neika beipu talak ara, nun ni Allah Yahweh arye, anye Raja Yoram biti, ayupu nyabuk. Atalak ara, Allah Yahweh arye Ahab biti, aminyan winipnamuk ning ati nyabuk. “Na Allah Yahweh arye akunum bikse. Ara, ambusum ance Nabot ap, el mapu ap nirya ara, ance akunum opmomak na eipmakune. Ati aminyan talak wenepnamkin arya. Awa windam arye, ikin ning deipnamkine,” nyabuk. Allah arye, anye biti nyapdeibuka ati, wini talak ara, nong akunum upmale. Ati ara, Allah Yahweh arye nyapdeiamuk touk, ance Raja Yoram el nong dobuka, Nabot birye dekamuk wa tuku noutamuk, donoknulyame,” nyabuk. Nyabukura, Yehu el melimnanye Bidkar birye, Yehu nyapdeipmok touk winibuk.

27 Atalak ara, Yudea tam taleamuknye, Raja Ahasia birye dinmokbuk, aning winibukak, eibuka bikuk. Awinibuk ning eibukce, adiparyuk el kereta dam wekelbinukabukce, bikbik abuka, Bet-Hagan mutuku tam biyuk. Biyuk bukni, Yehu birye ninye deiyoknye, Raja Ahasia biti, pia dobolyanganmokce, el melin yin talin nang ati nyabuk, “Ninye deiyoknye Raja Ahasia babye, mal bisik aplulume,” nyabuk. Ati Yehu, el yin talen nang arye, Raja Ahasia bira, sik donmek mal arye obik. El obika ara, urup tam arye, mutuku si Gur mutuku welebanak arye, amutuku si ara, Ibleam dam obik. Ura, Ibleam mutuku dam arye, mal dobikba, mal binuka bikuk bukni, adiparyuk kum dibuk. Kum dibuka anya arye, Raja Ahasia el kereta pum tam arye, bikbik abuka mutuku si, Megido mutuku dam biyuk. Amutuku biyukopura, asukum binuka dibuk. 28 Megido mutuku binuka dibukopura, Ahasia el melin nang arye, el nong dipmoka, Yerusalem mutuku bobiyik. Boyayikopura, Raja Daud ulamuk mutuku noutam, anyasik weik kota Yerusalem mutuku noutamuk binuka el nong weibik. Ara, ninye deiyoknye Raja Ahasia, el apu yapu weilamik sukumuk, el nong ton boyanuka, asukumuk weikik.

29 Minop talak ara, Raja Ahasia Yehuda mutuku talibuka, ninye deiyoknye Raja kina ati, deiyok kiamukce, tikamuk talak ara, Ahab el mi Raja Yoram, Israel yala ninye ulamik mutuku noutam taleamukce, pil dolamuka ani, keting tamun weik, sebelas (11) tahun akunum ubukura, anoutam arye, Ahasia birye Raja kibukabukce, Yehuda mutuku noutam taleamukce ulamuk.

30 Ura, Yehu akunum Yisreel dam biyukopura, sisin kil ulamik kil, el si Izebel birye, awinipmuk ning nirya akunum kekebukce, ‘Anye kanye deipnamnil’ tenen, el potong ap, urasin ap, el asing dibunya teleb una ati, ‘Na urasin nirya teleb upnamnil’ tenen, kilapu arye, sik urasin deice liklamak ning, el urasin deice likuk. Aning nirya winipmokce, ninye deiyoknye ulamuk aik bukni, alip tam aik jendela bisik arye, bukuka dinmok. 31 Winibuka, dinmokbuk, Yehu bira adiparyuk yanganmoka ani, weik nang Raja nang ulamik aik, pia teleb weik aik, bisik bublan dam wekelongoyuk talak ara, Izebel birye nyabuk, “Se, an ayanganmalama ara, an teleb kanye bobuka tenepmalamce, ‘Teleb ubuka neika uptibye’ tenen, yanganmalam do? Deiyok ara, na kanye ara, anda ninye tonok, el si Zimri,^a el deiyoknye oplobuk atonun ulyame, tenepkine!” nyabuk.

32 Izebel birye nyabukba, Yehu bira, el kisok erebuka, anyaik jendela eitam dipdeyukce, Izebel eibukce nyabuk. “Amutuku noutam ara, yatanye birye na tam kiplirye, melipnunil do?” nyabuk. Nyabukura, anyaik wekmek nang, bitinyeto, winilyeto, aik pum unmek nang arye, ajendela bisik arye, Yehu eibik. Aeipmek nang ara, ninye deiyoknye, el aik pum pil don nang ulamik. 33 Yehu birye, anang anyaik pum unmekbuk, eibukopura, nyabuk. “Izebel bira, adiparyuk dobukapmunce, eitam arye, tuku tam dopkweteplulume nyabuk!” Nyabukura, Izebel dobuka, tuku tam dopkwetebik. Winibikba, Izebel el nong tuku deice sakuk talak ara, el ining ara, weik serik-serik abukopura, anyaik bai tam abilinga dam ap, Yehu el kuda basam deice ap nirya dubuk. Tonda, Izebel el deilyu sakmok ning ara, Yehu el kuda balye deice bukmoka arye, akuda basam arye, el dipmoka yanibuk.

34 Winibukopura, Yehu bira, ninye deiyoknye aik pum wekukce, din ap, mek ap dinmok. Adinmok talak ara, Yehu birye, anyaik dam pil melibuka dolamik nang ati nyabuk, “Akil Izebel bira, pia malye weik winilamuk ati, Allah arye akunum subuke. Bukni, el akil ara, ninye deiyoknye Raja, elce deiamuk kilmu ati, el dipmala ara, bobimunce, tuku luklulume,” nyabuk. 35 Yehu birye, “Winipnamlume,” nyapdeibuk bukni, anyaik noutam melibuka, pil dona ati pegawai nang nirya arye, akil el dipmoka nong boyanuka, weina ati, bolbiyik talak ara, sikce Izebel el dipmoka nirya, asukum kum upmokak ati, kum eibik. Izebel el kisok ap, el yan yok ap, taruk yok ap, upmoka ak eibik.

36 Aning winibukak eibikce, tamubuka Yehu bukmoka dam, yanuka laka nyabik. Nyabikura, elce nyabuk. “Kume aning ara, Allah Yahweh arye, el pil donanye, Tisbe mutuku nang arye deiamiknye, nabi Elia deice arye, akunum nyapdeiamuk touk, akunum winipmale. Aning ara, awinipmal atia,” nyabuk. Ara, Allah Yahweh arye, aminyan winipnamuk ning nyapdeiamuk ning ara, ani.

‘Yisreel mutuku noutam unyak kam arye, weik sisin kil, el si Izebel, el nong dipmalya ara, dipnamake. 37 Tonda, Izebel el dipmoka mitik tonun aupmok ning ara, Yisreel mutuku noutam ninye arye, wa wibuka kounyak ning, el teleb ubuka pana ati, anyasik batakuka, bai tam donokonamakak, dana-dana tam donokmakiba, yuk nang arye, ‘Isebel el dipmala ara, dan do?’ tenen, epnamak bukni, ninye bin tonok babye, kum eipnamake. Sikce, ‘E, ara Izebel el wein dam ara, ani’ tenen, kum bikinamake,’ Allah Yahweh arye, akil ati nyapdeiamuk touk, akunum upmale,” Yehu birye nyabuk.