2 Sik Ahab birye deiamuk mapu nirya ara, anggunce kalekuka deibuka ululuma anya arye, Ahab elce ninye olan ning, ayala-yala nirya ara, kereta kuda ap, kuda basam ap, ninye on yin ap, cang parang ya ap, anggun dam aupmale. Tonda, weik cang keil deice deibuka doplumce, antanapdongobuka doplum poka ara, anggun asik weik dolamlumce, yu nang arye, talye yanuka kum wekmantoak ululume. Ati ara, asekuka deipman yupu dopropmunyopura, winipnamlume.

3 Asurat anggunce eipdumunyopura, Ahab birye deiamuk mapu weik aunyak bukni, anggun kan-kan arye, tonok pia telebnye ton wipdeipnamlume. Anggunce wipdeipmunyeba, pia teleb ulye mi ara, el li pununa ati, ninye deiyoknye, Raja kipdeipnamlume. Winipmunyopura, el melina ati, anggun pia pi dobuka melinamlume. Ara, sik ni Raja Ahab birye, pil dolamuk ning ap, el aik ninye daulamikce, ninye ap nirya, ‘Kum dakcak’ tenen, mikip arye moubuka kaliknamlume.

4 Nyabuk bukni, sik Samaria mutuku noutam ninye deiyok talibuka, ulamik nang nirya ara, ilil pia weik ubuk ati, sikce kum winipmanto ning tenebik. Utenebika ati, sikce nyabik, “Se, ninye deiyoknye Raja Yoram ap, Raja Ahab ap ara, el Yehu biti, pia kum bisipmanto kiamdike. Ati nunce babye, yate wiriptibya kuma! Yehu birye nyalye yupu, kum yaniptibye! 5 Ati ara, amutuku noutam, weik eitam ninye deiyok kibuka, taleamik nang ap, anyasik ati, yupu bokolina deiyok nang ap, Raja ulamuk aik kalekina deiyok nang ap, tonda amutuku ulamikce, Ahab elce deiamuk mapu, kaliklamik nang ap, sik nirya arye, ayupu sekuka, Yehu biti dopkwetebik. “Naio, nunda an amu tam talye pil melibuka don nang atonun unyabe. Yehu ance nunti, ‘Winiplulume,’ nyapmasilam touk, nunce aninguk winipnamabe,” nyabik. Bukni, nunce ninye deiyoknye Raja kina ati ara, tonoknye ton wibuka, kum erepdeipnamabe. Teleb ning ara, an bidamnye birye, ‘Aning telebe,’ tenepminye touk, aninguk winipnamlyame. Nunda talye kekenauk unamabe,” nyabik.

6 Aning nyabika ati ara, Yehu birye surat tonap sekuka, sik dam like bitinye ning dopdeibuk. Asurat noutam ara, ayupu nyabuk. “Anggunda, na tam kipnumunce, narye, ‘Aning ara, winipnamlume. Aning ara, pia kum wininamlume,’ nyapdeipman yupu ati, kekebuka dipkoprob winipnamlum ning ara, aninguk winipnamlume. Ara, Ahab birye deiamuk mapu nirya ara, onauk unamlume. Tonda, arup aunmab keting atonun, alukunyan ara, damapmamunya, bereklyopura, ambusum aketing atonun talak, sik Ahab birye deiamuk mapu nirya ara, sik kisok nirya seklopmunce, bobinuka, Yisreel mutuku uk boyanamnulume,” nyabuk. Ura, atalak ara, Ahab elce deiamuk mapu weik, tujuh puluh (70) nang ara, Samaria mutuku ninye deiyok kibuka ulamik nang arye kaliklamik. Ara, sik 70 mapu deiamik talak arye dipdongobuka, sik nemik keting tamun nirya, adeiyok nang aryuk, amapu nirya kaliklamikce, melilamik.

7 Bukni, sik amutuku noutam, ninye deiyok kibuka ulamik nang ap, mambul weik nang ap, tonda amapu kalekina deiyok nang ap, sik nirya arye, Yehu elce sekuka, deiamuk surat, like bitinye ning dobukabikce, eibikopura, akunuma, Yehu birye, “Aning winipnamlume,” nyapdeibuk yupu uk, aning nirya akunum winibikopura, sik tujuh puluh (70) mapu, Ahab birye deiamuk mapu obikce, sik kisok nirya ara, seklopkik. Winibikopura, akisok tujuh puluh (70) nirya, keranjang arye libukabikce, Yehu Yisreel mutuku ulamukak bobiyik.

8 Akeranjang nirya, Yisreel mutuku yanuka deibikopura, Yehu tam nang arye, aning eibikce, Yehu biti binuka laka nyabik. “Naio, Ahab birye deiamuk mapu, sik kisok sekukabakce, keranjang pum libuka deipmak ning ara, akunum aupmale,” nyabuka, laka nyabikba, Yehu kekebukce nyabuk. “Ura akunuma, Ahab birye deiamuk mapu, sik sekik kisok nirya ara, boyanuka olbitinye kibuka bokmunce, anyasik wekelbana ati, weik bisik bublan dam kintinip deipnamlume. Asukumuk deibuka, mapmaya bereklopura, yuk yupu ton nyapnamasine,” nyabuk. 9 Mapmeka beren tam talak ara, Yehu birye, anyasik bisik bublan dam yanuka tikilyayuk. Tikilyayukopura, sik ayanmekce, bulubuka wekmek ninye nirya ati nyabuk. “Ninye deiyoknye Raja Yoram bira, narye, ‘Winipnune,’ tenepsi touk, deiyok kibuka opse. Aning ara, anggun nirya arye, malye kum uplume. Bukni, Raja Ahab birye deiamuk mapu nirya, sik kisok dakuka, asukum deipmak nang nirya ara, narye kum opmane.

10 Bukni, aning dipkoprob nyapsine. Anggun akekenmalum ninye nirya arye biknulume. Ara, Allah Yahweh arye deiamuknye, ninye deiyoknye Raja Ahab biti, min talak nabi Elia deice arye, ‘Winipnamle,’ nyabuka, laka nyapdeiamuk yupu ton, min kum kum danmanto ulule. Allah Yahweh arye nyapdeiamuk yupu, dipkoprob nong akunum winipmala atia. Allah Yahweh arye, nabi Elia deice arye, ‘Aminyan talak Ahab biti ara, weik arye wenepnirye, el tam nang nirya, kum kipdeipnamnarya,’ nyapdeiamuk ning ara, talye kum nyamuk. Winyamuk ning nirya ara, Allah Yahweh arye aning nirya ati, nong akunum upmala atia.” Yehu birye nyabuk.

11 Aning nirya akunum winibukopura, Yehu birye nyaibukba, el yin talen nang arye, Yisreel mutuku ulamik nang, ara Ahab el yuk mapu ap nirya, elce deiamnaba, deipdanin balamik nang ap, nirya obik. Tonda, Ahab el pil melibuka dolamikce, el tam deiyok kibuka ulamik nang ap, el kwit capu koproba ap, el pil dolamik nang, sik Siria mutuku imam-imam nang ap nirya ara, tonoknye babye, ton kum batakuk. Anang nirya obuka sirya dakikba, Raja Ahab el mapu ap, el yala nang ap nirya, sirya dakuka obikce, kum daneibik.

12 Yehu Yisreel mutuku arye batakuka, outam Samaria mutuku binmok talak, bisik banmokak noutamak ara, mutuku si ara, Bet-Eket nyalamik. Sik Ibrani yupu deice ara, ‘Domba basam wein nang un mutuku’ tenen ati, asi nyalamik mutuku biyuk. 13 Yehu arye, amutuku biyuk talak ara, Raja Ahasia bira, Yehuda mutuku noutam Raja kibuka taleamuknye, el yala nang ton epdayik. Winibukce, Yehu birye asipdeyuk, “Anggunda, yate nang arye deiamsikbuk ululum do?” nyabuka asipdeyuk. Sik anang arye, tamubuka nyabik, “Nun aunyab ninye nirya ara, Raja Ahasia el yala ninye unyabe. Ati, nunda Yisreel mutuku noutam ulirye, ninye deiyok kil, Ratu Izebel birye deiamuk mapu ap, Raja Ahasia birye deiamuk mapu ap ati, ninye bun berekelbanmabe. Tonda, Raja Ahab el mapu ap, el kil Izebel ap ara, ‘Epdanamab’ tenen, banmaba atia,” nyabik.

14 Nyabik ati, Yehu kekebukce, el melin nang ati, nyabuk. “Sik aninye nirya ara, kam kipman tomoplulume!” nyabuk. Nyabukura, sik anang arye, ‘Ahab tam nangak binamap’ tenen, bisik banmek nang nirya tomobik. Tomobikopura, adiparyuk Bet-Eket mutuku noutam binuka obik. Sik obika ara, amutuku nang arye, ‘Mek kwebuka dipnamap’ tenen, tuku pum lukamikba, tuku pum arye mek yangalamukce, mekwen delilamuk sukum binuka obik. Aobik ninye nirya ara, ninye pia weik, empat puluh dua (42) nang obik. Sik anang nirya ara, tonoknye babye, ton kum batakike. Anirya obuka, sirya dakik.

15 Yehu birye amutuku batakuka, bisik banmok. Abanmok talak bisik noutam ara, tonoknye ton, ninye si Rekhab, elce deiamuk mi Yonadab birye, ‘Yehu dilbinamne,’ tenebukce, abisik noutamuk banmokbuk, bisik noutam arye epdarik. Winipdikopura, Yehu birye Yonadab biti, “Telebe,” nyabukce, ayupu ton nyabuk. “Nunda neik kanye tonok bopnanam do, kum do? Narye anti, ‘Anye ap teleb ubuka neika unamne, pia kum bataknamne,’ tenepkinye touk, an babye nati, atonun tenepnamnilam do, kum do?” nyabukura, Yonadab birye, tamubuka Yehu biti nyabuk. “Diba, ance tenepmalam touk, na babye atenepman ati, nun bitinye neik kanye tonok bonyame,” nyabuk.

Nyabuk ati, Yehu birye, “Ati ara, nun taruk talepdanuname,” nyabukba, Yonadab birye, el taruk Yehu arebuk talak ara, sik taruk talipdarik. Tonda, Yehu birye Yonadab biti yukubukce, Yonadab elce, Yehu el kereta kuda welebukce, sik neika birik. 16 Ura, Yehu birye nyabuk. “Yonadab anda, na melipnimince diminbuk, na Allah Yahweh ati, na kanye pia deipnirye, winipnun ning eipnulame,” nyabuk. Nyabukce, Yehu birye Yonadab bobuka, el kereta pum bukuka, sik neika Samaria mutuku birik.

17 Bisik banmarika ani, aminyan talak, Samaria mutuku akunum birikopura, Yehu bira minop talak ton, Raja kiamukcuk diamuknye, el si ara Ahab, elce deiamukba, dadeipdanin, balamik nang arye deiamik mapu, Ahab tam nang nirya obuk. Tonoknye babye, ton pia kum batakuk. Aning winibuk ning nirya ara, Allah Yahweh arye, akunum nyapdeibukba, nabi Elia kekebukce, elce, ‘Winipnamlume,’ nyapdeiamuk touk, winibuk.

18 Yehu birye, Samaria mutuku noutam ulamik ninye nirya ara, “Bulupnamlume,” nyabukba, bulubuka weikikopura, nyabuk. “Raja Ahab elda, Bahal isa si erena ati ara, mitik tonun, kanye deibuka erelamuk. Bukni, nara, isa si erena ara, pia kanye weik tonun deibuka, si erenamne. 19 Ati ara, Bahal isa, el si erenyak nabi nang ap, talye daunyak ninye bukni, Bahal isa, el si erenyak nang ap, Bahal si erena ati, el imam-imam nang ap nirya ara, adiparyuk bulubuka weknunyake. Tonoknye babye ton, kum bataknamlulume. Na Yehu birye, Bahal isa si eren ning, pia asukum obuka, uku dongopnamne. Aning ara, anggunce eipnamlume. Awinipnamanak kum yanamlanye bira, ikin ning, el nong deice deibuka opniba, dipnamle. Bukni, Yehu birye ayupu nyabuka nirya ara, tilila ati nyabuk. Dipkoprop ara, el kanye pum tam tenebuk ning ara, ‘Aisa Bahal, si erenyak ninye nirya ara, opnirye kum daneipnamne,’ tenebukcuk, ayupu ara, talye ati nyabuk.

20 Winibukopura, Yehu birye, “Ura, Bahal isa, el si erenyaba anya arye, ‘Aning ara, wininamlume. Aning ara, pia kum wininamlume,’ nyan ning arebuk. Ara, tonok weik sum arye, Bahal el si neika erenamaba, ati kintinip deipnamlulume! Winipmunyeba, ninye nirya arye, ‘Asum ara ani’ tenen, kintinilinamake,” nyabuk. Yehu birye nyapdeibuk touk, winibik. 21 Tonda, Yehu birye yupu nyaibukba, el melin nang arye, sik Israel yala ninye ulamik mutuku nirya ati, ‘Asum arye yanamlume. Atalak ara, Bahal isa si erena ati, anggun nirya bulubuka yamunce, el si erenamabe,” nyalbiyik. Nyabika ati, atalak ara bin tonok babye, pia batakna kume. Bahal isa si erelamik ninye nirya ara, yanmekce, Bahal isa si erena ati, wekelamik sukum ara, Bahal isa si eren aik urasin dam arye dipdongobuka, bai tam nirya, ninye weik lipmekce langdipmek. 22 Tonda, Yehu birye nyabukba, aweken sukum ongona ati, “Baju wipnamlume,” nyapdeibukba, baju wina deiyoknye birye wibuk. Akunum wibukura, Yehu birye anye biti, “Winipnulyame,” nyapdeibuk touk, baju wina deiyoknye birye, Bahal isa si erena ati kekelyanganmek nang nirya ati, abaju arebukba, sik nirya arye, abaju uk ongobukabikce, Bahal si eren aik wekmek.

23 Wekenmekopura, Yehu ap, Rekhab el mi Yonadab ap, Bahal isa si erena ati kintinip deiamik aik birik. Wekelbirikce, Yehu birye anyaik pum tam unmek ninye nirya ati nyabuk, “Ura amapo, moubuka dipdandemunce, awekmalumak ara, isa Bahal el si eren nanguk asukum unamlume. Anggunuk anyaik wekenamlume. Tonda asukum ara, Allah Yahweh el si eren nang ton, pia kum weknamake. Isa Bahal el si erelulum nanguk, anyaik wekelban telebe,” nyabuk. 24 Nyabuka ati ara, Bahal isa si erelamik nang arye, ‘Ura, nun ni Bahal ati, domba yala aton ning nirya, obibirye, el si erebuka kina ati, uku dongopnamabe. Tonda, el si erebuka kina ati, teleb ning ton talye arenamab’ tenen, kintinip deibik.

Ura, Bahal si eren nang, anyaik noutam min kum wekmek talak ara, Yehu birye, el yin talen nang, ‘Anyaik arye batakuka, anang ara, bai sakuka bikcak’ tenen, ‘Ayin nang arye, anyaik kalikinamak’ tenen, delapan puluh (80) kalekin nang dobuka, anyaik bai tam dana-dana nirya warikmek. Winibukce, Yehu birye nyabuk. “Anggun nirya kekeplulume! Anggunce batakmunyeba, anyaik noutam arye, isa Bahal si erenyak nang ara, bai sakuka bindobikcopura, sik pununa ati, narye tamubuka, anggun akalikmalum yin nanguk opnamsine. Ati, moubuka kaliknamlume,” nyabuk.

25 Nyapdeibukba, akunum kintinibikura, Yehu birye, anyaik binuka, minopce domba ato ning ton, obuka uku dongobukopura, elda tamubuka, bai tam yayukce, el yin talen nang ap, el amu tam pil dona kalikin nang ati nyabuk, “Winida, anggunce anyaik wekmunce, Bahal isa si erenyak ninye nirya ara, oplulume. Tonoknye babye ton, kum bataknamlulume, nirya opnamlulume!” nyabuk. Nyabuka ati, sik yin nang ap, el pil dona deiyok nang ap, sik kalekin nang ap, yu weik cang parang ya bobukce, anyaik wekelbinuka, asukum noutamuk, sik Bahal si erenmek nang nirya, obuka kume kiribik. Nirya obikopura, Yehu el yin nang arye, sik aopmek ninye, sik dipmek nang nirya ara, dobuka anyaik pum arye, bai tam donokik.

26 Winibikopura, Yehu el melin nang arye, isa Bahal el si eren aik pum tam bukni, pia noutam uamuk aik wekukabikce, Bahal si erena ati, cang weik kat ning, patung ara, bobinuka, bai tam bobiyikce, cobuka uku dabik.

27 Bahal si erelamik ning, el si patung ap, Bahal si erena ati domik aik ap nirya ara, Yehu el yin talin nang ap, el melibuka kalekin nang ap arye, ulubuka daklobikce, kum daneibik. Winibikopura, Bahal isa si erelamik sukum ara, deibar dam kiplobik. Awinibik karin dipdongobuka, wini talak babye, anyaik uamukak ara, ninye arye deibar morobikce banyake. Awinibik deice arye, asukum ara, pia malye mutuku kibuk.

28 Yehu birye, aning nirya winibuka deice arye, sik Israel yala ninye arye, min talak isa Bahal, el si erelamik ning nirya ara, ulubuka kum daneibuk. Tonok ning babye, ton kum winibuke. 29 Bukni, Yehu birye, sapi basam mi urasin atonun puturubuka, deiamik patung ara, kum daklobuke. Aning ara, mutuku si Betel ap, Dan mutuku ap tupa uamuk. Aisa patung ara, min talak tonoknye el si Nebat, elce deiamuk mi Yerobeam birye, deiyok koubuka, malye ulamuk deice arye, Israel ninye ati, malye kililamukba, sikce abasam mi urasin atonun patung puturupdeibikce, ‘Nun ni ani,’ tenen, apatung eibuka, isa si erelamik. Yehu birye amalye ning nirya ara, uluplopnamtu bukni, aning kum winibuk.

30 Aning tonok kum winiplum bukni, Allah Yahweh arye, Yehu biti nyabuk. “Anda akunum winiplume. Ara, na dam winiplum ning ara, eipkince, ‘Pia telebe,’ tenepkine. Deiyok ara, Yehu ance Raja Ahab, el aik ninye nirya ara, narye tenyamse touk, akunum oplumce, sirya daklumopura, el ap, el yala nang ap nirya, akunum kum danmake. Ati ara, ance deipminba, dadeipdanin banamak nang, an mapu koprop ara, Israel tam ninye ati, ninye deiyok nang Raja kibikirye, unamake. Winibikirye, ninye deiyok nang Raja kina ati, pia teleb bulamak ning, tahkta deice bukikirye, Israel ninye talinamake. Winipnin balamikca ani, ance deipminba, dadeipdanin, banamak mapu ara, sik ninye dika dumbarye nang arye, deipnamak nang arye, Raja kibuka talinamake,” nyabuk.

31 Allah arye Yehu biti, “Aning winipnamle,” nyamuk bukni, Yehu elda, tuba malye ning weik winipnin balamuk. Ara, Allah Yahweh arye, “Aning ara, wininamlume. Aning ara, pia kum wininamlume,” nyapdeiamuk ning ara, pia moubuka kum taleamukce, aning nirya kum dobolbalamuk. Minop talak ulamuknye, Raja Yerobeam birye, deiyok koubukce, malye weik upnin balamuka deice arye, Israel tam ninye malye kipdeibuk. Winibuka anya arye, sik Israel yala ninye arye, el malye ulamik ning elilamikce, ‘E, nun deiyoknye Raja malye ulul touk, aninguk talibuka unamabe,’ tenelamikce, malye weik winilamik. Amalye ning ara, Yehu babye atonun malye winilamuk. Aning malye un ning ara, Yehu bira kum batakamuka anya arye, adice arye malye tuba winilamuk.

32 Atalak noutam ara, Allah Yahweh arye deiyok koubuka, Israel ninye, sik ulamik mutuku noutam ara, mitik kipdeipnin balamuk. Allah arye lo arebukba, Siria mutuku taleamuka deiyoknye, Raja Hazael, elce Israel mutuku ninye ton, obuka sirya dakukce, sik tuku ton alubuka doprobuk. 33 Raja Hazael birye doprobuk mutuku ara, ani. Tonok ning ara, Yordan mek koubuka, otam keting yangan tam arye dipdongobuka, Gilead mutuku ap, Gad yala ninye ulamik mutuku ap, Ruben yala ninye ulamik mutuku ap, Manasye yala ninye ulamik mutuku ap nirya ara, alubuka doprobuk. Ton ning ara, asik si Aroer mutuku dam arye dikdongobuka, iknapye tam Arnon mek dobuka balamuk, anoutam nirya babye, atuku ton alubuka doprobuk. Aning ara, Israel ninye, sik mutuku ara, Gilead tam bukni, Basan mutuku babye tabakuka dopromuk.

34 Ninye deiyoknye, Raja Yehu, elce talibuka ulamuk talak arye, yuk yupu nyalamuk ning ap nirya, elce pil dolamuk ning ara, sik amutuku nang arye, sekuka delilamik buku noutam sekik. Abuku^a el si ara, ‘Israel yala ninye sikce talibuka ninye deiyok nang, Raja-Raja arye, min talak winilamik ning,’ nyabuka, sekik ning ara, ‘Sejarah Raja-Raja Israel,’ nang ulamik ning nyabuka sekeibik.

35 Yehu keting tamun weik daulamuka ani, akunum dibukopura, el weina ati, Samaria mutuku uk binuka weibik. Akunum dibukba, tuku lukikopura, el pununa ati ara, el mi Yoahas bira, Israel mutuku noutam ninye deiyok Raja kipdeibikba, Israel tam taleamukce, Raja kiamuk. 36 Yehu elda, Israel mutuku noutam taleamukce, Raja ulamuk keting tamun ara, dua puluh delapan (28) tahun deice arye Raja kiamuk.