2 Winibuka ulamik talak ara, Israel tam ulamik ninye taleamuknye Raja Ahab bira, anyasik, weik kota Samaria noutam ulamuk. Aunmoka anya arye, Raja Benhadad bira, el mapu ton wipdeibukce, ‘Aning nyalbilulume,’ nyabuka, yupu deibukba, anang arye, ayupu bobiyikce, Israel tam taleamuknye Raja Ahab, el dam nyalbiyik. Sikce nyalbiyik yupu ara ani.

3 “Raja Benhadad bira, an Raja Ahab biti, nyapkile. ‘Ance talibuka ulyam ning nirya ara, naryuk alabuka dopropnamne. Ara, ance taliminye, dekna weik ning, perak ap, emas ap, tonda an doplum kilapu nirya ap, ance deialum mapu, pia teleb unyak mapu nirya ap ara, narye alubuka dopropnamne. Tonok ning babye kum bataknamlyame. Aning nirya arepniminya uka. Nun deiyoknye Raja Benhadad, elce anyapmakil ning ara, akunuma,’ nyapkile,” nyabuka, el dam laka nyalbiyik.

4 Lake nyapkiabe, nyabikopura, Raja Ahab birye tamubuka, ayupu bobinuka nyalbinmek nang, sikti, nyapdeibuk, “Yo, telebe. Anggun deiyoknye Raja Benhadad ati, nyaplulume. Wini talak ara, anda na deiyoknye atonun winipmanilama ati, an nyapmanilam ning nirya, narye talibuka unye ning ara, arepnamakine. Nyapdeipmakile, nyaplulume,” nyabukba, kekebikce, anang arye, ayupu tamubuka nyalbiyik. 5 Ayupu nyapdeipmok ati nyalbinmek nang ara, daunmeka ani, aminyan talak tamubuka, Raja Ahab el dam yayik. Ara, Raja Benhadad elce yuk yupu ton nyapdeibukba, tamubuka nyalbiyik.

“Nun deiyoknye Raja Benhadad, elce anti ayupu ton nyapkile. ‘Narye anti, ‘Ance taliminye dekna weik kat ning, perak ap, emas ap, tonda an doplum kilapu nirya ap, ance deiamlum mapu, pia teleb unyak mapu nirya ap ara, narye alubuka dopropnamne ati, aning nirya ara, adiparyuk arepnunilyame. Bukni, aninguk kume.

6 Ambusum ara, aketing atonun akunum uplyopura, narye na amu tam unyak deiyok-deiyok nang ton dopdeipniba, an dam Samaria mutuku noutam yakirye, an ulyam asik dam ap, an taliminye ninye nirya, sik unyak asik nirya ap ara, yanuka ulubuka batakikirye, ‘Aning ara, nun mambul weik ning ani,’ tenelulum ning nirya ara, na tam deiyok nang arye, alubuka dopropnamake. Ambusum ara, nun ayanuka nyapmakiyap keting atonun, keting deiceuk yanamabe,’ nyapdeipmakile,” nyabik.

7 Ayupu nyabik ati, Raja Ahab birye kekebukopura, Israel tam ulamik ninye ati, talibuka ulamik ninye deiyok nang nirya ati, yukubukba yayikopura, ayupu nyabuk.

“Anggunda, kekeplulume. Raja Benhadad, elce nun Israel tam unyap ninye nirya ati, ‘Malye kipdeipnamne,’ tenepmasil ning ara, anggunce ton biknulume. Ara, anye elce nati, ‘Aning ara, kum bataknamnilyame. Arenauk upnamnelyame,’ nyabuka, moropmanuk ning ara ani. ‘An taliminye dekna weik ning, perak ap, emas ap, tonda an doplum kilapu nirya ap, ance deialum mapu teleb nang nirya ap ara, arenauk upnamnelyame,’ nyabuka, moropnuk ning ara, kum bataktinye. Narye tamubuka, ‘Yo, aning nirya arepnamakine,’ nyapmase.” Raja Ahab birye, el amu tam ninye deiyok nang nirya ati, nyabuk.

8 Nyabuk buk, sik ninye deiyok nang nirya arye, tamubuka nyabik. “Nai Rajao, ance, ‘Yo, aning ara arepnamakine,’ nyapmamu ninguk, akunum nyapmalum bukni, anye elce tonap, ‘Aning ton tabakuka arepnutue’ tenen, moropmakil ning ara, tonap kekena kume. Adiparyuk kekebuka, bataknulyame,” nyabik.

9 Nyabika ati ara, Raja Ahab birye, Raja Benhadad elce dopdeipmok ati yanmek nangak, nyabuk. “Anggun tamubuka bimunce, anggun Raja ati, nyablulume. ‘Min talak ara, ance yupu nyapdeipnulumba, anang arye, na dam yanuka nyapmanung talak ara, narye anti arepnamkine. Aning ara, ‘Yo arepnamkine,’ nyapdeiamkise. Bukni, atalak arye, ‘Aning arepnamnilyame. Anggun asik nirya wekibirye, anggun mambul ning ap, dekna weik ning ap nirya ara, alubuka dopropnamabe,’ nyabuka, moropmanilama ning ara, aning kum arepkitenye. Ayupu nyapmakile, nyablulume,” Raja Ahab birye nyabukba, sik ayanmek nang nirya ara, kekebikce, tamubuka biyik. Benmeka ani, ananguk tamubuka, sik Raja Benhadad dam yayikce, nyabik.

10 Anang arye, Raja Benhadad dam binuka, laka nyabikopura, elce tamubuka nyabuk.

“Narye nyapdeipniba, na yin talen nang, pia weik dopdeipniba, Ahab an talibuka ulyam mutuku, Samaria mutuku noutam asik donyak nirya ara, ulubuka atu kiplopnamake. Winibikiba, adaklobice, anyasik kum daneibikiba, anyasik oldem arye, atu butbuta weleplye ning ara, sik ayin talen nang taruk deice yaliba, mitik tonun aryuk bobuka binamake.

Aning nyapmana ara, pia dipkoprob winipnamnarya. Aning kum winipyopura, ‘Na si erenun isa wenebuka opnikcak’ tenen, anggunti nyapne. ‘Sik isa mer nirya ara, na winipnamne ning moubuka dinmanilibuk, ‘Winipnamne,’ nyapdeipne yupu, dipkoprob kum winiplyopura, anggunce adiparyuk oplopnamnulume,’ nyabuka moropsine,” Raja Benhadad birye, nyabuk. Nyabukba, el yupu dobuka, nyalbana nang kekebikce, Raja Ahab dam binuka laka nyabik.

11 Ayupu laka nyabik ati, Israel tam taleamuk Raja Ahab birye, sik anang ati nyabuk. “Anggun tamubuka bimunce, anggun Raja Benhadad biti, binuka nyaplulume. Yin talin nang kanye tenina teleb nang arye, utenenyake. ‘Mal min kum olalbinmace talak ara, ‘Nunda mikip weik nang ati, ninye nirya opnamabe,’ kum nyabuka erepdating bukni, sik mal pin nang ap, olanmaca ani, sirya akunum opdakiba, sikce sik mal pinangak nirya obuka, sirya dakica ati, ‘Nunda mikip weik nang unyabe,’ nyabuka, sikmamun ati, erelanyake,” Raja Ahab birye, nyabuk.

12 Raja Ahab birye, nyapmok yupu ara, anang arye, Raja Benhadad tam laka nyalbiyikura, Benhadad ap, el kayapu nang, sik yuk mutuku Raja-Raja nang ap, sik neika tenda bola domik aik wekmekce, kanye wangalamak, yu mek dinmek talak arye kekebik. Yupu nyalban nang arye, ayupu laka nyabikba, kekebikopura, Raja Benhadad kekebukce, yu weik ubuk ati, elce sik abulubuka wekmek yin talen nang, sik yupa yuk-yuk ati, deiyok kibuka ulamik nang ati, nyabuk. “Se, akunuma. Anggun adiparyuk Samaria mutuku warikil bana ati, kintiniplulume! Adiparyuk, mal pibinuyabe,” nyabukba, sik anang nirya, adiparyuk kintinibik.

13 Raja Benhadad, el yin talen nang kintinilamik talak ara, aminyan winipnamne ning ati, Allah el yupu nyapdeipnaba, laka nyananye, nabi tonok, atalak aryuk, Raja Ahab dam biyukce nyabuk. “Allah Yahweh arye, anti nyapdeipkile.

“Ance dipdelyame. An ona ati, yin talin nang weik, akunum kintinip deipmak ning ara, eipmalam do? ‘Anye opnamabe’ tenen, kintinipmak bukni, arup ara, na Allah arye, an deice mikip arepkiniba, ayin talin nang nirya obuka, sirya daknulame. Anang nirya dobuka, an amu tam deipnirye, mikip weik arepkiniba, ance sik nirya opmince, malye kipnamalam deice arye, ‘Allah Yahweh dipkoprob ulul’ tenen, ance biknamanilame,” nyapkile. Anabi arye, Ahab biti ayupu nyabuk.

14 Nyabuk ati, Ahab birye tamubuka asipdeyuk. “Allah arye, yate wiriplyeba, nunce ayin talin nang nirya optibye do? Tonda, ninye olalbana ati ara, yatanye birye, min yuma menekuka olbinamal do? Nun tam nang arye do? Sikce do?” nyabuka, Ahab birye, anabi ati asipdeyuk. Asipdeyukura, anabi arye nyabuk. “Allah elce nyapdeipmakila ara, ‘Min yuma menekuka bana ati ara, an amu tam, yuk-yuk mutuku talinyakce, sik yin talena deiyok nang ap, sik amu tam yin nang ap arye, menekuka mal olbinunyake,’ nyapdeipmakile,” anabi arye nyabuk. Nyabukura, Ahab birye, tonap tamubuka asipdeyuk. “Amal olalbinamak talak ara, yatanye birye deiyok kiplirye, mal olalbinamak do? Nunce minop olbinuyap do?” nyabuka asipdeyuk. Asipdeyuk ati, anabi arye tamubuka nyabuk, “Na deiyoknye Raja ancuk, deiyok kipmince, min yuma menekuka an mal olan nang ati, olbinamalame,” nyabuk.

15 Anabi arye ayupu nyabuk ati, Ahab birye kekebukopura, Raja Ahab birye, el amu tam, yuk-yuk mutuku yin talena deiyok nang ati, “Akaren aryuk melipnamnuluma ati, kintiniplulume,” nyabukura, sikda el amu tam ulamikce, amutuku noutam bukni, mutuku-mutuku yuk-yuk taleamik yin talen nang, yupa weik tonun arye, dua ratus tiga puluh dua (232) deiyok nang kintinibik. Kintinibik talak aryuk, Ahab birye, Israel tam yin talen nang ton, yupa weik tujuh ribu (7,000) nang kintinip deibuk.

16 Ura, asum aryuk bukni, keting noutam arye, Raja Benhadad ap, el ap neik kanye bobuka, tonokak bulubuka, el dam wekmek nang, sik yuk-yuk mutuku Raja-Raja nang, tiga puluh dua (32) nang ap, sik nirya ara, sik tenda domik aik pum tam arye, yu kanye wangalamak mek, tuba dinmeka deice arye, kanye walwal upmok ati, moubuka tenina pia kumce, talye kanye bobuka unmek.

17 Atalak aryuk, Raja Ahab ap, el yin talen nang ap, el amu tam yuk-yuk mutuku yin talen nang ap, kota Samaria mutuku tam arye panabuka, ninye yupa yuk-yuk bokukabikce, ton yupa menekuka banmeka ani, ton yupa ara, sik donga tam aminyan banmeka ani, sik oldan nang tam banmek. Min yuma menekuka banmek yupa ara, banmeka ani, Raja Benhadad elce el tam yin talena winiryuk nang ati, “Anggunda ninye makameil binamlume,” nyapdeibuk ati, el tenda aik bai tam kalekmek. Akalekmek nang arye, sik oldan nang, Samaria tam arye olyanganmekak, bisik noutam eibikce, sik anang arye, sik deiyoknye Raja Benhadad dam biyikce, “Nun unmap tam ara, dinge tonok ton, Samaria mutuku arye asukum olyanganmasiake,” nyabik.

18 Ayupu kekebukce, Benhadad elce nyabuk, “Nun mal olan nang yanganmaka ara, adiparyuk ona meme. Ayin talen nang dam bimunce, ona kumce, mikip arye tomopnululume. Nun ona ati, yanganmaka babye, teleb ning ara, nun ap, sik ap, epdanuka yupu talibibyeba, ‘Teleb ubuka neika unamap’ tenen, yanganmak do? ‘Adibaryuk opdanuyap’ tenen, yanganmak do? ‘Aning do? Aning do?’ tenen, yupu neika talibipya deice arye, biknuyabe. Ati, adiparyuk anang ara, ona kumce, kam kipmanuk tomopnululume,” nyabuk.

19 Raja Benhadad nyabuk bukni, Raja Ahab birye wipdeiamuk kam nang, yin talen nang ara, weik asik, kota Samaria mutuku arye banmek. Banmek ati, sik aminyan tam, Israel yin talen nang melibuka banmek. Sik ayin talin nang nirya arye, ‘Raja Benhadad ap, el tam nang nirya ap ara, adiparyuk mikip arye opnuyap’ tenen, yu kanye bobuka banmek. 20 Aning ara, sik Israel tam yin talen nang banmek tam, sik mal olan nang ara, Raja Benhadad tam nang, otam arye yanganmek nang ara, adiparyuk mikip arye talibuka oplopnin banmek. Winipnin banmekba, sik Siria^a tam yin talen nang nirya ara, aning eibikce, ‘Se nun nirya opsikirye, sirya daknamsiyak’ tenen, ilil weik ubukba, bai sakuka, bikbik abuka banmek. Winipnin banmek ati, Israel yin talen nang, aminyan dobolbamekce, opnin banauk unmek. Wininmek bukni, Siria mutuku ninye deiyoknye, Raja Benhadad, elda kum obik. Elda, adiparyuk kutukuka bindobuk. Ara, el adiparyuk kuda basam balye deice bukuka biyukba, el tam yin talin nang ap, mitik tonun arye, sik kuda basam balye deice bukuka bindobik. Raja Benhadad ap, melibikce, kuda basam deice bukuka, bikbik abuka banmek nang ara, ninye olalbana ati, kereta kuda talena deiyok nang ulamik.

21 Benhadad ap, el melin nang mitik tonun arye tonap, sakuka bindobik bukni, atalak Raja Ahab babye, mal olanmek damuk binmokce, el ap melibuka banmek yin talin nang arye, sik Siria tam mal olalbana ati boban ning, kereta perang ap, kuda basam ap nirya ara, adiparyuk obuka, sirya dakik. Tonda, asum aryuk, Siria mutuku yin talen nang, pia weik tonun arye obukabikce, sirya dakik.

22 Atalak ara, winibik bukni, aminyan ara, Allah yupu nyapdeipnaba laka nyananye, nabinye bira, Raja Ahab dam yayukce, nyabuk. “Teleb ning ara, wini talak an asukum arye batakuka bimince, tamubuka mikip kina ap, tonda ninye olalbana ning ati nirya ara, kintinipnamlyame. Tonda, an ap, an tam nang ap arye, ‘Winipnamab, winipnamap’ tenen, binuka yupu lipsisikmunce, kintinip deipnamlume, Deiyok ara, ance, ‘E, Siria tam nang ara, akunum opmane,’ tenena kume. Siria mutuku taleamuk ninye deiyoknye arye, tamubuka olyanganamkilarya. El ap, an oldan nang ap, tuba tamubuka, olyanamkiyaka ati, kintinip deipnamlume nyapkine,” nyabuk.

23 Min yuma talak, Raja Ahab ap, el yin talin nang ap arye, Raja Benhadad ap, el yin nang ap ara, akunum obukuka malye kiamika ati, daulamika ani, aminyan talak ara, Benhadad el yin talen nang, yupa yuk-yuk ati, deiyok kibuka, taleamik nang yayikce, nyabik. “Naio, nun kanye ara, ani. Israel tam ninye ara, sikce si erenyak ning ara, mutuku dam unyake. Mutuku dupak uamuk ning, si erenyaka anya arye, sikda mutuku kon tam arye yanmangurye, sik si erenyak ning mikip deice arye, nunti yanuka opmasiyak bukni, ‘Lyu mutuku tam arye opdatibye toura, nunce kanam aryuk, sik nirya ati, obuka kum daneipnamtibye,’ tenepmabe. 24 Bukni, aminyan talak, Israel tam ninye olbinamap talak ara, nun deiyoknye Raja, ance tiga puluh dua (32) Raja nirya ara, batakmince, an yin nang yupa yuk-yuk ati, deiyok nang kipdeipluma deiyok nanguk, wipdeipnusilyame. Ara, ‘Sik Raja-Raja nang, sik punubuka, yin talena deiyok nanguk, wipdeipnusilyam’ tenen, moropkiyabe.

25 Winipminyopura, nun ni Raja ance, min talak an mapu weik tonun arye, wipdeiplum touk, tonap winipnamsilyame. Tonda, kuda basam ap, tuku deice bobana ati, kuda basam arye, libuka bobana ning, kereta perang ap, yin talen nang ap, tonda, aninye olalbana ning ati nirya ara, weik tonun arye kintinip deipmalumba, sik anang banmekba, Israel tam nang arye omik nang, yupa weik awamuk touk, tonap aning atonun, ubuka wipmince, kintinipnusilyame. Winipminya deice arye, atalak nunda lyu tam arye kibuka bibirye, sik Israel ninye nirya ara, dipkoprob binuka obibirye, malye kipnamabe,” nyabik. Nyabikba, sik deiyoknye Raja Benhadad, elce anyapmaniyak ning ara, ‘Telebe,’ tenebukce, el yin nang yupa yuk-yuk ati, deiyok kibuka ulamik nang arye, nyabik touk winibuk.

26 Dabinuka ulamika ani, keting tamun tonok ubukopura, ninye oldan talak kibuk ati, Raja Benhadad, elce, el yin talen nang dopdeibukba, ‘Israel tam ninye olbinamap’ tenen, Israel ninye, Afek mutuku asik dobuka ulamikak, Warikil bana ati biyik. 27 Winibik talak ara, Israel tam ulamik ninye, sik yin talen nang babye, ‘Opdanuyab’ tenen, bulubukabikce, kintinibik. Tonda, sik oldan talak patapnamuk ning ap, aning dobuka, boyanganamik nang ap, sik dinamik ning nirya ap ara, kintinip deibik. Akunum kintinip deibikopura, Israel tam ninye, sik yin talen nang nirya ara, ‘Raja Benhadad ap, el tam nang ap ara, olbinamap’ tenen bisik banmek.

Atalak aryuk, sik Siria mutuku yin talen nang yanganmekce, ‘Asukumuk opdanuyabe,’ tenebik lyu mutuku biyikce, sik domik tenda aik binuka dobik. Tonda, sik Israel tam nang ara, bisik banmeka ani, Siria tam nang bulubuka, wekmeka dam yayikopura, dipdeyik. Atalak ara, utenebik, ‘Se, sik Siria mutuku ninye, sik yin talen nang ara, kum nukmanto, pia weik bulupmeka anya arye, sikcuk amutuku lyu nirya ara, langdipmake. Bukni, nun Israel ninye ara, nun ding ara, mitik tonunuk, bulubuka yanganmaba anya arye, nunda kambing basam yupa bitinyeuk yangalamle atonun, ubuka kintinip deipmabe. Ati ‘Se, nunda yate wiriptibye do?’ tenebikce, ilil kanye bobuka, ilil weik unmok.

28 Winibuka tenenmek talak ara, Allah el yupu nyapdeipnaba, laka nyananye, nabi tonok arye, Raja Ahab dam yanuka nyabuk. “Allah Yahweh arye, anti nyapdeipmakil yupu ara ani. ‘Sik Siria mutuku ninye ara, na Allah ati ara, ‘Dawaplye, Israel ninye si erenyak Allah ara, mutuku dam tamuk talibuka. Lyu tam ara, kum talibuk. Ati, el mikip deice arye, sikce kum malye kipsitinge,’ nyabik. Nyapmanika ati, sik Siria mutuku yin talen nang ara, pia weik ayanuka wekmak bukni, Israel ninye anggun deice, na mikip weik arepsiniba, sik amutuku yin nang nirya obuka, sirya daknamlume. Winipmunce, Ahab an ap, an taliplum ninye ap, anggun nirya arye, na Allah Yahweh mikip pia weik unilye ning ara, an mapu ap, an ap, biknamanulume,” nyabuk.

29 Ura, nyabuk ati, sikda tekbarye sum nirya ara, Israel yin nang ap, Siria mutuku yin nang ap nirya ara, sik yuk-yuk doltakne tenda aik dobuka, ulamika noutamuk ulamikce, dinauk ulamikce, kalikilanauk ulamik. Winilamik bukni, like teksum ara, mal oldana deiyok koubik. Adeiyok koubuka, oldanmeka ani, tonok sum ara, Israel yin talen nang arye, Siria mutuku yin nang ara, pia weik seratus ribu (100,000) nang obik. 30 Winibik bukni, ton batakik yin talen nang ara, adiparyuk bikbik abuka, ‘Apek mutuku asik domikak uamuk aik noutam, wekelbibirye dungnupnamap’ tenen, otam bikbik abuka banmek. Bukni, amutuku noutam asik dobuka ulamikce, anyaik dana-dana nirya, weik cang keil poka dobuka, antanapdongamik ning ara, talye karin arye daksakukce, Raja Benhadad, el yin nang dua puluh tujuh ribu (27,000) nang ton, siknibukba dibik. Winibuk bukni, sik deiyoknye, Raja Benhadad bira, asukum arye batakukce, tonok aik pum noutam koprop, wekukce binuka dungnubuk.

31 Raja Benhadad ap, el yin talen nang, sik yupa yuk-yuk ati, deiyok kibuka ulamik nang, mitik tonun tuba kam unmekce, sik Raja ati nyabik. “Yuk mutuku nang ara, nyapsik. ‘Sik Israel mutuku deiyok kibuka talinyak nang nirya ati ara, ninye yuk nang ati, bico tenenyak nang unyake,’ nyapsikba, kekebupe. Ati ara, nun deiyoknye ance, ‘Telebe,’ nyapsutumopura, nun adiparyuk malye kain karung ongobukaptibirye, basam turya atonun tapu ton, nun kisok deice kirikdongobuka ongobibyopura, Israel tam ninye, sik deiyoknye dam bitibiba, elce utenepnamsile. Ara, ‘Sik anang malye baju ongobuka, pitin kipmakce, na dam yanmaka ara, na amu tamukiba, talipnamna atia,’ tenepsutue. Tonda, winiptibya deice arye, nun deiyoknye, an babye kum opkutue, kum danya,” nyabuka bina morobik.

32 Nyabuka morobikba, sik deiyoknye birye, “Yo, aning ara telebe,” nyabukopura, sik anang nirya ‘Winitibye,’ nyapmek touk, malye kain sarong kain ap, tapu ngang dam koupdongobukabikce, Raja Ahab dam biyikce, binuka nyabik. “Nun Raja Benhadad bira, nun deiyoknye, an amu tam ulirye, an nyapminye yupu kekenamkile. Ati ara, ance el ona kume,” nyabuka morobik. Nyabuka morobikba, Raja Ahab birye, tamubuka nyabuk, “Na kwit bira, tuba kam unmal do?” nyabuka asipdeyuk.

33 Nyabuka asipdeyuk ati, Benhadad el yin nang, yupa yuk-yuk ati, deiyok kibuka ulamik nang arye, ayupu kekebikce utenebik, ‘Kume, Ahab birye, teleb yupu nyapnamsila ati, aning ara asipmasila ara, bikilina atonun upsile. Elda teleb tenepnamsile,’ tenebik. Anang ara, asukumuk wekmekce, Ahab el yupu nyapnamok ning ati, kekenauk unmek. Wininmek bukni, Ahab birye, sik ayanuka wekmek nang ati, “Benhadad, elda na kwit kam unmal do?” nyabuka asibukba, sik anang arye tamubuka nyabik. “Diba, elda an kwit ulule,” nyabik. Nyabikura, Ahab birye, tamubuka nyabuk. “Ati, na kwit Benhadad, yukupmunyeba, na dam yalule,” nyabuk. Nyabuk ati, yukubikba, yayukura, Raja Ahab birye, Raja Benhadad biti nyabuk.” Anda na kereta perang deice welebuka buklyame,” nyabuka yukubuk.

34 Nyabukopura, Benhadad birye nyabuk, “Ni kwito, na ni birye, an ni koproba, talibuka ulamuk asik ara, dalubuka dopromuk ning nirya ara, narye tamubuka, an bidamnye arepnamkine. Tonda, ance nun mutuku weik asik, el si kota Damasyik mutuku ara, an dekna deiyok ning boyamince, deipminyopura, na tam ninye arye deknamake. Aning atonun, nun bona ara, an tam ninye arye, yanuka dekikirye, tamubuka sik mutuku bobinamake. Ara, min talak ara, na ni birye, Samaria mutuku dekna deiyokak kiamuk touk, winipnalame,” nyabuk.

Nyabuk ati, Ahab birye nyabuk, “Ance ayupu nyapmanilam deice arye, akunum nyalin yupu nyapnamanilama anya arye, narye an kum opnamakine. Aning ara kum bukni, batakiniba, an asik mangkau arye binulyame. Nyabukce, Raja Ahab birye, “Winipnamlyame, aning ton kum winipnamlyame. Nun bitinye ara winipnamname,” nyalin yupu deice arye, ayupu nyapdeibukba, Raja Benhadad ton, aning atonun nyalin yupu nyapdeibuka deice arye, nyabukopura, Ahab birye, Benhadad kum obukce, batakukba, el asik biyuk.

35 Ura, sik nirya winibuka daulamika ani, aminyan talak ara, sik nabi nanguk, anoutam arye tonoknye birye, el kwit yuk nabinye biti, “Obuka dila dem dopnulyame,” nyabuk. Nyabuk ati, el kwit tonok nabinye birye, “Kume, na kum opnamakine,” nyabuk. 36 Minopce, ‘Opnunilyame,’ nyabuka yupu, nyabuk nabi arye, el yupu kum kekebuk nabi ati ara, “Anda malye upmalame. Allah arye nyapdeipmakil yupu ara, kum kekeplamce, bataklama anya arye, an asukum arye tamubuka, binulam talak ara, bisik noutam arye, kus atonun ning, el si singa, weik ning arye opnukile, kum bataknukile,” nyabuk.

Nyabuk ati, anye bira bisik banmok talak ara, dipkoprob anabi ati, el kwit birye, “Singa kus arye opnukile,” nyapmok touk, el tamubuka, bisik noutam banmok talak ara, singa arye oplobuk. 37 Winibukopura, anabi nang eibikopura, daunmeka ani, ayupu nyapmok nabi bira, adiparyuk yuknye dam biyukce, “Ance na opnilyame,” nyabukba, adiparyuk pibuka mikip asa oplobuk. El anye oplobukba, anabinye el nong deice ara, dila sakukce, ining banmok.

38 Aning akunum winibukopura, adila upmok nabi, el asing deice ara, kain sarung arye koupdongobukce, ninye weik balamik bisik dam bukmok. El asing deice, kain arye koupdongopmok ning deiyok ara, ‘Yuk nang arye, na asing kum eipnitingce, kum biknamniyak’ tenen, winibuk. Winibukopura, anye bira, Israel nang, sik deiyoknye Raja Ahab binamok bisik, damuk binuka bukmokce, dinmok. 39 Winibuka abukmoka ani, Raja Ahab bayukopura, anabi arye, Ahab binyak, yupu mikip arye nyabuk, “Nai Raja, nara mal olan dam binmanuba, olanmabu ani, anoutam arye tonok yin talinanye, elce nun mal olan nang tonok tomobuka, na dam boyanuka deibukce, ‘Anda, anye bindoplyak’ tenen, moubuka kaliknamlyame. Moubuka kum kalikmaminye ak, anye bilyopura, anda kum bataknamkine, opnamkine. Akumopura, an wenena ati, dekna weik ning, el si perak uanguk, el ikin ara, tiga puluh empat (34) kilogram arepnamnilyame,’ nyapmanue,” nyapnuk.

40 “Nyapmanuba, narye anye kalikmanu bukni, yuk pil dadonurye, mangkau kanye bopmanu talak arye, na kalikmanunye, adiparyuk bai sakuka, bikbik abuka binmaue,” nyabuk. Bisikak bukmok nabi arye, ayupu nyabukopura, Raja Ahab birye tamubuka, anye biti nyabuk. “Anabi damnye birye, ikin ning, an nong deice deipdanmalame. Ati ara, an deiceuk ikin yakiliba, dolonamlame. Deiyok ara, an deiceuk upkile,” nyabuk. 41 Nyabukopura, anabi ara, kain sarong arye, el asing deice koupdongopmok ning ara lobuka, batakukba, Raja Ahab birye, ‘Kume, anye bira, nabi arye nyanmanua’ tenen, bikeibuk.

42 Bikeibuk ati, atalak ara, anabi arye, Raja Ahab biti nyabuk, “Allah Yahweh arye, nyapdeipmakil ning ara ani. ‘Narye anti, Raja Benhadad bira opnalame,’ nyapdeipmakunun nye bira, kum opmomce, batakmumba, urdem mangkau kanye bobuka binmaue. Awinipmalam ati, anye el pununa ati ara, an dipnamalame. Tonda, an olan ninye, sik deiyoknye, Raja ona kumce, batakmalama deice arye, an tam nang ara, nirya dipnamake. Ara, Raja Benhadad, el tam ninye opmatumba, dipmating bukni, ance na nyapdeipkise yupu yaniplumce, Siria mutuku taleamuka deiyoknye, kum opmalama anya arye, wini talak ara, anye el tam ninye pununa ati, an tam ninye dadipnamakca,” nyabuka, nabinye birye, Raja Ahab biti nyabuk.

43 Nyabukopura, Israel tam ulamik ninye taleamuknye Raja bira, yu ubukba, talima pum tam, yu deice aryuk tamubuka, el weik asik dolamikak, kota Samaria mutuku tamubuka biyuk.