Elia, ‘Isebel birye opnilyak’ tenen, Horeb mutuku bikbik abuka, biyuk yupu
19
Ura, ninye deiyoknye Ahab birye el kil Isebel kekenmokak binuka nyabuk. “Isa Mutuku Dongonye si erelamikce isa yupu lak nyalilamik nang, sik malye nabi-nabi nang nirya ara, Elia birye nyapdeipmokba, ninye arye ya dobuka oplobik.” Tonda Karmel mutuku deice Elia birye wininmok ning nirya babye, lak nyabuk. 2 Akunum ayupu kekebukopura, Elia dam nyalbinuyik nang wipdeibukce, Elia biti nyapnuyik yupu, sik dam yupu nyapdeibuk. “Elia, ance isa si Bahala erelamik nabi-nabi nang opluma ati ara, aning winiplum touk, narye an babye opnamakine. Ara, aunman keting atonun bukni, ambusum aketing uk akunum uplyopura, akunum opnamakine. Aning kum winipyopura, na patapnil ning ara, ‘Na si erenun isa mer arye nati wenebuka kanye ikin ning arepnicak’ tenena ati Elia, anda, ‘Dipkoprop opnicak’ tenen, ilil asa unalame, nyapkine,” nyabuka, yupu nyapdeibukba, Elia dam lak nyalbiyik.3 Yupu nyapdeipmek ning ara Elia dam binuka nyabikba, kekebukce pia ilil ubukba, ‘Na opnilyak’ tenen, adiparyuk Elia ap, el melinanye ap, sik bitinye kwarabuka Yudea tam noutam bukni, Bersyeba mutuku birik. Bersyeba mutuku birikopura, Elia el pil donanye amutuku uk binuka batakukba, aunmok.
4 Bukni, Elia bira el tonok, bisik lukunyan tonok mabukce, tonok sum ton banmoka ani, mek kum mutuku, pia pata mutuku noutam biyuk. Akunum biyukopura, weik yo tonok tikamuka amu tam binuka bukmokce, lik weik ubukba, Allah ati moronmok. ‘Nara lik weik unulula ati, akunum diptinye,’ Na deipkirikdop nang diamik touk, na babye talinye ununa anya arye, adiparyuk diptinye. Na ikin weik unilye touk, tuba kum uptinye. Ati, teleb ning ara, Allah ‘Elce daopnutuba diptinye,’ teninmokce Allah ati moronmok.
5 Nyabuka moronmok ani, Elia wi pia weik ubukba, abukmokak uk mabuk. Mabuk talak ara, talye karin arye Allah el im deice pil donanye malaikat tonok yayukce, Elia talibukce Elia biti nyabuk. “An adiparyuk bukmince, din diplyame,” nyabukura, lengdar limne kekebuk. 6 Kekebukce, adiparyuk Elia lukdanuka bukukce dileyukce, el kisok deipmokak ara, roti bol uku arye dapmekba akunum opmok ning telebroba ap, mek kwepmok makau ap, ayanuka deipmokak eibuk. Eibukopura, adiparyuk dobuka dibukce, tuba tamubuka mabuk.
7 Winibuka amapmokba, Allah el si Yahweh, el im deice pil donanye, malaikat tonap, like bitinye ning tamubuka, Elia mapmokak uk yayuk. Ayayukce, tupto lengdar limne arye Elia kekebukba, “An bukmince din dipnulyame. Ara, dipminba boupkilyeura, weik pera mutuku binamalama ati ara, mikip kipnamakile,” nyabukura, lengdar limne arye kekebuk.
8 Kekebukce adiparyuk Elia lukdanuka bukuk. Winibukopura, roti bun ap, mek ap, adabuka deipmok ning dobuka dibuk. Akunum dibukura, boubuk deice arye, tuba tonap mikip kibukopura, pera mutuku bana ati bisik ara, lukunyan noutam empat puluh sum arye bisik mapnin balamuka ani, Horeb mutuku biyuk. Horeb mutuku ara, Allah el mince yanuka nyapdeiamukak biyuk. 9 Elia akunum Horeb mutuku biyukopura, keil deiya binuka mabuk.
Allah el si Yahweh arye, Elia dam yanuka, nyabuk yupu
Horeb mutuku unmok talak ara, Allah el si Yahweh adiparyuk yayukce, Elia biti ayupu nyabuk. “Anda yata deiyok ati amutuku yanuka unmalam do?” nyabuka asibuk. 10 Asibukba, Elia birye tamubuka Allah ati nyabuk. “Na ni Allah an si Yahweh ulyame. Anda mikip weiknye umince, aning-aning nirya deice tam ulyame. Nara, asum-asum nirya an nyapdeamlum yupu uk talibuka unirye, pia pi dobuka an pil ati mikip aryuk donune. Bukni, an mapu Israel ninye ara, ance, ‘Aning wininamlume, winipmunyopura, narye kalikuka melinamsine,’ nyapdeipsulum yupu akunum yaniplobikce, malye winin ninguk wininyake.
Tonda, sikce an si erena ati, kam ning obuka, telebe nyabuka, arelyangalamkikce, pala keil lelebuka yangapdeiamik ning ara, akunum daklomike. Tonda an yupu nyapdeipminba lak nyanyak nang, nabi-nabi nang nirya ara, yayikce bobuka akunum obuka sirya dakik. Winipnin yangalamika ani, wini talak ara na tonok unune. Bukni, sikce natibuk ‘Opnamap’ tenen, kalikininyake,” nyabuk.
11 Nyabukura, Allah el si Yahweh arye Elia biti tamubuka nyabuk. “An keil deiya aunmalamak arye kisipdaka na yanuka tiknun damak, amutuku dupak ayalyame. Nara Allah, na si Yahweh, narye an dam yanapnya ani, kisibuka binuna atia,” nyabuk. Nyabukura, Allah unmok dam ara, kumanya mikip weik balamleto ubuka biyukba, amutuku-amutuku yo pamuka nirya weik arye lulukdayuk. Tonda, amutuku weik keil nirya ara, teleb bukabukce, aning sakuk bukni, atalak ara Yahweh el nong ton akumanya noutamak kum ubukba, Elia kum eibuk. Weik kumanya dopdandobukopura, weik mutuku lulukna ton dobuk. Winibuk talak babye, Allah el si Yahweh, el nong ton lak kum kipmokba, Elia ton kum eibuk.
12 Mutuku lulukna akunum dobukopura, weik uku buk ton kutukuk. Uku kutukuk bukni, auku buk kutukukak ara ton, Allah lak yanuka tikukba kum eibuk. Weik uku buk akunum dibukce tunimabuk talak ara, Elia kekebuk bukni, mitik anun arye, mur-mur nyalamak yupu ton nyabukba, Elia kekebuk. 13 Elia anyabuk yupu akunum kekebukopura, el ongolamuk cang baju kwiribuka, asok deice siknipdongobuk. Akunum siknipdongobukopura, akeil deiya unmokak arye kubuka, akeil dupak binuka tikukba, ninye yupu atonun arye nyabukba kekebuk. Ara, “Elia anda yata deiyok ati, amutuku yanmalam do?” nyabuk.
14 Nyabukura, Elia birye tamubuka nyabuk, “Na ni Allah an si Yahweh ulyame. Anda mikip weiknye ulyama ati ara, aning-aning nirya deice tam ulyame. Nara, asum-asum nirya an nyalilyam yupu uk talibuka unirye, pia pi dobuka, an pil ati mikip aryuk donune. Bukni, an mapu Israel ninye ara, ance, ‘Aning wininamlume, aning winipmunyopura, narye kalikuka melinamsine,’ nyabuka nyalin yupu nyapdeiamsulum ning ara akunum yaniplobikce, malye winin ninguk wininyake.
Tonda, sikce an si erena ati, kam ning obuka, an arin ning arelyanganyak pala keil yangabuka lelepdeiamik ara, akunum uluplobik. Tonda, an yupu nyapdeipminba lak nyanyak nang, nabi-nabi nang nirya ara, akunum obuka sirya dakik. Winipnin yangalamika ani, wini talak ara na tonok unune. Bukni, sikce natibuk, ‘Opnamap’ tenen, kalikininyake,” nyabuk.
15 Nyabukura, Allah el si Yahweh arye, Elia biti nyabuk. “Wini talak ara, an yanmamu bisikuk tamubuka binamalyame. An adiparyuk tamubuka mek kum mutuku, weik pata mutuku, el si ara Damasyik mutuku binulyame. Omutuku biminyopura, Siriab mutuku ninye deiyoknye kina ati, ninye si Asael wipdeipmince, lakina ati, tilil mek el kisok deice dikeipnulyame,” Allah arye nyapdeibuk. 16 Nyabukce ayupu ton nyabuk, “Aning atonun, ninye si Nimsi, el mi Yehu biti ara, Israel ninye sik deiyoknye kina ati, anye wipdeipnulyame. El babye lakina ati, tilil ulamle mek, el kisok deice dikeipnulyame.
Tonda atalak aryuk, Abel-Mehola mutukunye, el si Safat, el mi Elisa bira, na yupu nyapdeipniba, lak nyalbananye, ‘Nabi upnamle’ tenen, wipdeipnulyame. Ara, an taliplum pil pununa ati nyapkine,” nyabuk. 17 “Winipminba, sik adeiyok nang arye ninye malye wininamak nang onamake. Ara, Asael birye kum oplyopura, buru tam sakuka bice nang ara, Yehu birye onamle. Atonun, Yehu kum opliba buru tam sakuka bice nang ara, Elisa birye onamle. Ati sik anang wipdeipnulyame,” nyabuk.
18 “Malye wininyak nang weik arye onamak bukni, na Allah arye, Israel ninye yupa ara tujuh ribu nang, ‘Na’ tenen, nang ati, moubuka deipnamne. Anang ara dipkoprob kum opnamake. Anang ara talye nang kume nyapne. Aninye ara na nyapse yupu kekebuka nimalye arye ukirye, isa si Bahal ati el si kum erenyake. Tonda Bahal el si erena ati, kutam tuku dib dongobuka kum bunyake. Sikce el urasin atonun memepdeibik ning ara, sik ton kum mutulamik. Ati ara, narye sikti, lyepnamne. Sikda Bahal isa si kum erenyak ninye ati nyapne,” Allah arye nyabuk.
Allah arye Elisa biti, wipdeibuk yupu
19 Allah arye Elia biti, “Ninye deiyok kipnamak nang wibuka delilbinulyame,” nyabukura, Elia birye, adiparyuk biyuk. Biyukopura, ninye si Sapat, el mi Elisa eibuk. Atalak ara, anye el si Elisa, el sapi basam dua puluh empat nirya, bukni bitinye-bitinye kibuka, wa win dam binuka deipmokce, ikin tace yo sapi dana-danatikrikba, adeice krikdongopmokce, kilibuka banmekce, yo tace krikmok ning arye tuku palipnin banmok. Wininmokce palinmek wa winmekce, Elisa bira, sirik tam tikmok. Winipmok talak ara, Elia el dam yayukce eibuk. Eibukopura, el ongolamuk cang ongon aling ara, kwiribukabukce, Elisa el nong deice binuka kalupdeibukce, adiparyuk biyuk.
20 Winibukura, Elisa wa winmoka ani, sapi nirya abatakuka, Elia dam aminyan bikbik abuka dobolbiyukce nyabuk. “Se na ni, na moropkin ning ara, na nin bak, sik dam binuka, kipnirye ‘Daulamlulume,’ nyabuka yanirye, an melipnamkine,” nyabuka morobuk. Nyabukura, Elia birye “Yo, tamubuka an mutuku bilyame. Na yata wiripmakina ati, an nyaplam ning ara, kum winiptum do? Malye ning kume. Anyaplam ning ara, teleb uka,” nyabuk.
21 Nyabukura, Elisa tamubuka wa winmokak yayukce, sapi basam bitinye yanuka obuk. Sapi basan arye kirikuka banmek yo tace ning, tuku palin ning nirya ara, el si ara pajak sapi, adiparyuk ayo toubuka uku dongobukce, sapi obuka kwalibuk. Akunum kwalipmoka obukopura, kalibuka el tam ninye ap, el lin, el kilmu ap, sik nirya bukuka neika dibik. Aning dibikopura, Elisa adiparyuk amutuku batakuka Elia el melinanye kina ati bine nyabuk.