Allah el yupu lak nyananye Elia, Keriti mekin ulamuk talak ara, bai yo kan-kan ulamle maka arye, din ning boyangalamikba, dobuka dilamuka ati, nyabuk yupu
17
Ura, Allah el yupu lak nyana deiyoknye, nabi tonoknye el si ara, Elia ulamuk. Elda Tisbe mutuku anye ulamuk. Elda Tisbe mutuku ulamuka ani, el weik mutuku tam ulamukak ara Gilead mutuku nyalamik. Anye bira, atalak ninye deiyoknye Raja Ahab dam yanuka nyabuk. “Allah el si Yahweh, elda dipkoprob kam tuba ulirye, Israel ninye ati pia kalikuka melilule. Tonda, nara el amu tam unirye, el piluk donune. El Allah dipkoprob ulula ati, el deice arye nyapkine.Wini talak arye diprongobuka doyanamle talak nirya ara, keting tamun winilye deice arye, mok pia kum cenamle. Aketing tamun winilyeto deice arye, dou pia maplirye mok cena kum unamle. Narye nyapnye talak uk mok cepnamle. Narye kum nyapyopura, mok purye tonok babye, ton kum saknamle. Ati anda moupnalyame,” Elia birye Raja Ahab biti nyabuk.
2 Elia bira nyabuka bindobukba, aminyan talak ara Allah el si Yahweh arye, Elia biti yupu yanuka nyabuk. 3 “Wini talak ara, an amutuku batakuka keting yangan tam bimince, Keriti mekin dam, Yordan mek koubuka keting wekelbalamle mutuku, tam duknulbilyame. 4 Winipminyopura, amutuku ara mek aupmalyopura, dinalyame. Narye akunum nyapsa ati, an din ning ara talye buru tam maka arye boyanganam kulule,” Allah arye Elia biti nyabuk.
5 Nyabukura, Elia birye Allah nyabuk yupu kekebukce, Allah el si Yahweh nyapmok touk winibuk. Ara, Yordan mekin tam keting wekelbalamle mutuku binuka unmokba, Elia bira Keriti mek kup-kup ak, keting yangan tam binuka ulamuk. 6 Abinuka ulamuk talak ara beren tam babye, sintam babye nirya ara, maka arye kwaning ap, tup ning ap bobuka arelyanagalamukba, dipna arye awamuk mek ap dipra ulamuk.
Elia bira Sarfat mutuku ulamuk yuwak kil ati, nyabuk yupu
7 Elia bira Keriti mekin dam daulamuk bukni, like weik anun damapnin balamuk talak ara, mok cena kum ati ara, amutuku din mek nirya ara cebuka kel-kelap dobuk. 8 Winibukopura, Allah el si Yahweh arye Elia biti yanuka nyabuk. 9 “Wini talak ara, an adiparyuk Sidon mutuku noutam bukni, mutuku si Sarfat mutuku binuka unulyame. Ara, Sarfat mutuku biminyopura, yuwak kil tonok aunmala eipnalyame. Narye akunum nyapdeipmana ati, ayukwak kil tonok akunum kintinip deipmala ati ara, elce din ning arepnamakile.” Allah arye Elia biti nyabuk.
10 Ayupu akunum nyabukopura, Elia adiparyuk Sarfat mutuku biyuk. Biyukopura, amutuku antanap dongobuka domik keil poka bublan dam binuka tikmokce dinmokba, yuwak kil tonok yo kel-kela bulubuka delinmokbuk eibuk. Eibukopura, Elia birye ayukwak kil ati yukubukce, nyabuk. “Akilo, an mek mitik tonun makau pum tam mitik anun aupmalba depmalam ning ara, boyanuka arepnilyame,” nyabuk. 11 Nyabukura, ayuwak kil arye mek arepnuyuka ati, dolbinuyuk talak ara, Elia birye tonap, nyabuk. “Akilo, kwaning el si ara roti ton mitik tonun aupmalyopura, aning ap arelyanilyame,” nyabuk.
12 Ayupu nyabukopura, akil arye tamubuka nyabuk. “Naio ance el si erelyam Allah, el si Yahweh, elda pia kam koprop ululnye, el si deice arye dib yupu nyapkine. Dipkoprop na dam ara roti kwaning ton pia kum upmanile. Aning ara kum ati, roti deiyok ning el si tepung puproba mitik tonun mitikto makau pum bisik daupmal ning ap, tonda din tabakuka yun minyak mek mitik tonun ton aupmanile. Ati ara, ‘Aning tabakuka dapnaman’ tenen, wini talak ara yo kel-kela bulubuka delinmane. Tonda amitik anun upmanil ning nirya ara, dabuka deipniba, na mi ap na ap arye dibuka sirya daknimnyopura, na mi ap, na ap dipna atibuk kintinipnuname,” nyabuk.
13 Nyabuk bukni, Elia birye tamubuka akil ati nyabuk. “Akilo, anda yata ati ilil upmakilba teniltona uk unmalam do? Ilil una ara kume. Ance nyapmanilam touk binuka winipnalam bukni, minop ning ara, narye moropmakin touk an upmakil ning ara mitik anun bukni, anoutam arye dopmince, roti mitik anun dabuka, na dam boyanulyame. Winipminyopura, aminyan ara an ap, an mi ap ati, yuk ning ton dabuka boyanulyame.
14 Anyapmakin yupu ara, talye ati kum nyapmakine. Deiyok ara, ani, Israel ninye pia talibuka melilul Allah, el si Yahweh arye nyapkuke. Roti dana deiyok ning, tepung makau pum bisik mitik tonun aubuk ning ara, pia min kume kum danamle. Tonda, minyak mek makau pum bisik mitik anun aupmakil ning babye, min kume kum danamkile. Tuba weik arye awamakilibuk, aminyan talak Allah el si Yahweh arye mok arepliba, amutuku nirya mok ceplirye teleb unamle. Mok min kum cemlye talak ara, atepung ap, aminyak mek ap ara, min kume kum danamkile,” Elia birye ayouwak kil ati nyabuk.
15 Nyabukopura, akil kekebuka biyukce, Elia nyapmok touk winibuk. Winilamuk talak ara, el ap el mi ap, sik dam ulamik nang ap, Elia ap ati, sik din ning min kume kum dayuk. Winibuk talak ara, ouku pia weikto arye deibuka dilamik. 16 Allah el si Yahweh arye ‘Wininamle,’ nyapdeibuk touk, ayouwak kil deiamuk tepung ap, minyak mek ap ara, min kume, kum danalamuk. Awamuk ninguk uamukba, pia dabuka dilamik.
17 Atalak noutamakuk winibuka damabuka ulamika ani, anyaik taleamuk kil el mi ton uk talibukce, pia bukam weik nakina talipmoka ani, ouku ton mana kum buk, minopce dibuk. 18 Winibukopura, ayouwak kil arye Elia biti nyabuk, “Anda Allah el pil dolyamnye binya arye, ance nati yata tenepmanilamce, malye kipmanilam do? Tonda ance na malye unye ning ati, ‘Tuba tonap, moubuka tenepnutue’ tenen, na dam yanmalam do? Tonda, na mi ona ati, yanmalam do? Yata deiyok ati yanmalamba na mi dipmanil do?” nyabuka malye yupu nyanmok.
19 Nyabuka engenmokopura, Elia birye tamubuka nyabuk. “Adipmal mi dopmince na arepnilyame,” nyabuk. Ami dobuka arebukopura, Elia birye ami dobukabukce, alip aik el Elia malamukak binuka mapdeibuk. 20 Mapdeibukopura, Elia yupu mikip arye Allah el si Yahweh ati morobukce nyabuk. “Se, na ni Allah, anda Yahweh ulyame. Ance ayouwak kil ati yu ning deipmalamce el mi dipmalba, kanye ikin upmal do? Akil arye, na din arepmanil bukni, ance el mi opmalama ara na ilil upnile, na nio,” nyabuka morobuk.
21 Nyabukopura, Elia bira atalak uk like winilye sum arye, ami mapdeipmok deice ak, iribuka mabukce, yupu weik arye Allah el si Yahweh ati morobuk. “Na ni Allah, anda Yahweh ulyame. Ance ami el dib kanye dopropmalamak arye, el nong pum tam isin tamubuka dongopminba, tamubuka kam buknule,” nyabuka morobuk.
22 Elia birye Allah ati nyabuka morobukba Allah el si Yahweh kekebukce, ami el isin tamubuka arebukba, adiparyuk ami tamubuka kam bukuk. 23 Winibukopura, Elia ami alip aik arye bokolukuka yayukce, el lin biti, tuba tamubuka arebuk. Arebukce nyabuk, “Akilo ami ara dipmo bukni, wini talak ara tuba tamubuka kam bukle,” nyabuk.
24 Nyabukura, akil arye tamubuka Elia biti nyabuk, “Wini talak ara narye kel bikina arye, diba tenepkine. Na ni anda Allah el pil donanye dipkoprob ulyame. Allah el si Yahweh arye, yupu nyapdeipmakilba, ance yupu nyapdeipmanila atonun, dipkoprob akunum winipmala ati, ance nyapminye yupu ara dib yupu uk ulule,” nyabuk.