3 Ati ara, dipkoprob narye bikina ara an ap, an mapu silip nirya ap ara, wenebuka opsinirye kum daneipnamsine. Ara, minop talak ulamuknye el si Nebat birye deiamuknye, bira weik deiyoknye Yerobeam malye winilamukba, el ap, el mapu silip ap, nirya obuka sirya dakamse atonun, an ap, an mapu silip ap, opnamsine. 4 Winipnamna ati, yatanye do nirya, Baesa el yala nang dipnamak nang ara, el ulul mutuku noutam dibicopura, bai kam arye dipnamake. Tonda, el yala nang bai buru tam dipnamak nang ara, talye lakuka balamak maka arye dipnamake. Dibicopura, ninye arye kum weipnamake.

5 Ura, ninye deiyoknye Raja Baesa bira Israel ninye talibuka ulamuk talak noutam winilamuk ning nirya ap, pil dolamuk ning nirya ap ara, Israel ninye sik buku noutam sekdeibik. Abuku ara, sik ninye deiyok nang winilamik ning nirya sekuka deiamik buku ati nyapne. 6 Allah arye wenebuka Baesa obukba, akunum dibukopura, el nong dobuka Tirza mutuku binuka weibik. Ara, el apu yapu diplamikba weilamik mutuku uk binuka weibik. Winibikopura, el pununa ati, el mi Ela ninye deiyoknye kina ati, erepdeibikba, Israel ninye talibuka ulamuk.

7 Ura, Hanani el mi nabi Yehu el ulamuk talak Allah el si Yahweh arye Baesa ap, el mapu silip ap ati, wenebuka opnamuk yupu nyapdeibukba, Yehu birye ayupu nyalbiyuk. Allah arye Baesa biti wenebuka obuka deiyok ara, sik nirya arye Allah dinak malye ulamika ati, obuk. Malye ulamika ati, Allah el si Yahweh el talima uk dibukba, minopnye Yerobeam ap, el mapu silip ap malye winilamikba omuk touk, Baesa ap, el mapu silip babye malye winilamikba obuke.

8 Ura Yehuda tam ulamik ninye, sik ninye deiyoknye el si Asa, sikti, talibuka ulamuk bukni, keting tamun dua puluh enam (26) akunum ubukopura, Baesa el mi Ela birye, Israel ninye sik ninye deiyoknye, deiyok koubuka talibuk. Mutuku si Tirza mutuku ulamukce, Israel nang talibuk keting tamun bitinyeuk ulamuk bukni, tonoknye birye el obuk. 9 Baesa obuk ning ara, ani. Ara, tonok talak Baesa el amu tam pil dolamuka deiyoknye el si ara Zimri ulamukce, sik yin nang weik taleamukce, kuda basam kirikuka tuku deice balamuk ning ati deiyoknye ulamuk. Zimri birye, ‘Baesa obuka kum daneipnamab’ tenen, el kwit capu ap, yupu talipmek. Tonok talak ara, Ela Tirza mutuku biyukce, ninye si Arza el aik ulamukce, ninye kanye wangalamak mek dibukba, el kanye wangabuk. El ka Arza bira, Ela el ninye deiyoknye aik kalikina deiyoknye ulamuk.

10 Ela bira el kanye walwalabukba, Zimri birye anyaik binukabukce, Ela oplobuk. Obukopura, Ela el dolamuk pil dolpununa ati Zimri el uk ninye deiyoknye ulamuk. Ela oplobuk talak ara, Yehuda yala ninye taleamuknye el si Asa, keting tamun 27 deice arye taleamukba, aketing tamun noutamak arye obuk.

11 Zimri birye Elah punubukopura, adiparyuk Baesa ap, el mapu silip ap, el tam nang ap nirya ara, ‘Na ap kum unamap’ tenen, oplobuk. Anang nirya obukce, tonoknye babye kum batakuk. Ayala nang nirya obuka sirya dakuk. 12 Awinibuk ning ara, Allah el si Yahweh arye nabi Yehu biti, ‘Baesa el mapu silip nirya opnamne,’ nyapdeiamuk touk winibuk.

13 Allah arye anang wenebuka obuka deiyok ara, Baesa ap, el mi Ela ap, sikce talye-talye ning si erelamdika deice arye, Israel ninye malye ulilamdikba, sik babye malye winilamik. Malye weik winilamika ati, Israel ninye sik si erelamik Allah el si Yahweh arye, talima uk dilamukba, anang ati yu ubukba derebuk.

14 Ura, ninye deiyoknye Raja Ela bira Israel ninye talibuka ulamuk talak noutam winilamuk ning nirya ap, pil dolamuk ning nirya ap ara, Israel ninye sik buku noutam sekuka deibik. Abuku ara, sik ninye deiyok nang ulamik ning nirya sekuka deiamik buku ati nyapne.

15 Yehuda yalanye ninye deiyoknye el si Asa, Yehuda yala ninye taleamuka ani, keting tamun 27 tahun akunum ubuk talak ara, Zimri bira, Israel ninye talibuka Tirza mutuku unmok bukni, nakub barye sum ubukopura, atalak aryuk Israel ninye sik yin talin nang nirya mutuku si Gibeton mutuku dam unmek. Gibeton mutuku ara, Pilistin yala nang ulamik mutuku. 16 Yuk nang arye, ‘Baesa yala nang nirya Zimri birye nyapdeipmalba opmake,’ nyabikba, sik Israel yin talin nang arye kekebik. Kekebikopura, asum aryuk sik yin talin nang nirya arye, yuknye el si Omri, ara sik yin talin nang sik deiyok talibuka ulamuknye binyuk, ‘Nun Israel ninye talipnamsil’ tenen, weik deiyoknye kipdeibik.

17 Winibuka ereibikopura, Omri ap, Israel yin talin nang nirya ap arye, Gibeton mutuku talibukabikce, ‘Zimri bira nun kum telipnamsile’ tenen, Zimri unmokak, Tirza mutuku warikil biyik. 18 Warikil biyikba, Zimri eibukce, ‘Se, na unye mutuku nirya warikuka olyanmasiyake,’ tenebukce, ilil ubukba, el ninye deiyoknye aik pum tam biyukce, ‘Anyaik nirya uku dipnul’ tenen, elcuk uku dongobuk. Uku dongobukba, anyaik pum tam ara, yuk nang kum binmantoak wekuk. Winibuk talak ara, anyaik nirya uku dinmokce, el nong babye, uku dibukba dibuk.

19 Zimri dibuka deiyok ara, ani. Ara, Allah dinak malye-malye weik winilamuka atia. Tonda, minop pia malye winilamuknye Yerobeam birye malye weik winilamuk touk, el Zimri babye, malye weik winilamukba, adeice arye sik Israel ninye babye, malye winilamik. Ati ara, el babye, dibuk.

20 Ura, ninye deiyoknye Raja Zimri, Israel ninye talibuka ulamuk talak noutam winilamuk ning nirya ap, el min kum tikamuk talak ninye deiyoknye Ela obuk ning ap ara, Israel ninye sik buku noutam sekuka deibik. Abuku ara, sik ninye deiyok nang winilamik ning nirya sekuka deiamik buku ati nyapne.

21 Ura, atalak aryuk Israel ninye bokdeibik. Bokdobikce, ton tam nang ara, Ginat el mi Tibni ‘Nun ninye deiyoknye Raja tiknamsile,’ tenebik. Bukni, ton nang ara, ‘Kume, nun ninye deiyoknye Omri binyuk melipnamabe,’ tenebik. 22 Utenebikce, Omri tam kibik ninye mikip weik ubukce, Tibni tam ninye mikip kum mitang ubukba, Tibni dibuk. Akunum dibukopura, Omri binyuk ninye deiyoknye Raja tikuk.

23 Yehuda yala ninye deiyoknye el si Asa, Yehuda yala ninye taleamuka ani, keting tamun 31 akunum ubuk talak ara, Omri birye, ‘Israel ninye talipnun’ tenen, deiyok koubuka tikukce keting tamun 12 deice arye taleamuk. Aketing tamun 12 noutamak ara, keting tamun 6 deice arye, Tirza mutuku noutam ulamukce Israel ninye taleamuk. 24 Atalak ara, Omri birye tonok mutuku kon dekuk. Amutuku kon dekna ara, dekna weik ning el si ara, perak uang deice arye, el ikin ara 70 kilo arebukba ninye si Semer dobuk. Amutuku kon mince taleamuknye si ara Semer. Omri amutuku kon 70 kilo perak arebukba, Semer dobuk. Omri birye amutuku deice aik weik dobukce, amutuku si ara, Samaria nyabuka sisibuk. Ara, ‘Amutuku taleamuknye el si teninamap’ tenen, Samaria nyabuka, sisibuk.

25 Omri elda Allah dinak asum-asum nirya pia malyeuk winilamuk. El ninye deiyoknye min kum tikamuk talak upnin yangalamika deiyok nang babye, mitik malye winilamik bukni, el Omri bira pia malye weik winilamuk. 26 Tonda, Nebat el mi Yerobeam birye malye weik winilamuk touk, Omri babye, malye winilamuk. Elce malye weik winilamuka deice arye, sik Israel ninye babye, malye weik winilamikce, Isa Mutuku Dongonye si erebuka talye-talye uk winilamik. Winilamika ati ara, Allah el si Yahweh elilamukce yu weik ulamuk.

27 Ura, ninye deiyoknye Raja Omri, Israel ninye talibuka ulamuk talak noutam winilamuk ning nirya ap, el pil dolamuk ning ap ara, Israel ninye sik buku noutam sekuka deibik. Abuku ara, sik ninye deiyok nang winilamik ning nirya sekuka deiamik buku ati nyapne. 28 Aminyan talak, Omri el apu yapu diamik touk, el babye, dibuk. Dibukopura, el nong bobuka Samaria mutuku noutam weibik. El dibukba, el yok pununa ati, el mi Ahab binyuk ninye deiyoknye tikeibik.

29 Ura Yehuda tam nirya talibuka ninye deiyoknye, Raja Asa ulamukce, Yehuda tam nirya keting tamun yupa weik taleamuk ani, keting tamun 38 akunum ubukopura, ninye si Omri el mi el si ara Ahab birye, Israel tam ninye talina ati, ‘Ninye deiyoknye Raja kipnamle’ tenen, erepdeibik. El Ahab ulamuk mutuku ara, Samaria mutuku bukni, Israel yala ninye taleamuk talak ara, keting tamun 22 deice arye sik Rajanye ulamuk. 30 Minop talak ulamik nang Isa Mutuku Dongonye si erelamikce, malye winina ara mitik anun winilamik bukni, Omri el mi Ahab elda, Isa Mutuku Dongonye siuk erelamukce, malye winin ning ara, pia weik arye malye winilamukba, Allah el si Yahweh arye, ‘Anye bira dipkoprob pia malye weiknye. Minop talak, yuk deiyok nang Yehuda tam taleamikce, malye winilamik ning ara, mitik tonun,’ tenelamuk.

31 Raja Ahab birye, Nebat el mi Yerobean ninye deiyoknye ulamuk talak, malye weik arye winilamuk atonun Yerobeam babye, winilamuk bukni, ‘Amalye winilamuk ning ara, mambul kume. Aning ara talye ning uka,’ tenelamuk. Winilamuk bukni, aninguk kume. Tonda, weik malye ning tabakuka winilamuk ning ara, yuk mutuku ninye deiyoknye el si ara Etbal, anye sik Sidon mutuku ninye taleamuknye, el kilmu el si ara Isebel, Ahab akil dobukce, akil Isa Mutuku Dongonye si Bahal^a erelamuk ning ara, el babye, aisa siuk Bahal erelamukce, el amu tam ulamukce el pil dolamuk.

32 Winilamuka ati ara, Samaria mutuku noutam arye, sik Isa Mutuku Dongonye si Bahal erena ati, Isa Mutuku Dongonye si eren aik dobukce, anyaik noutam ara, Isa Mutuku Dongonye si erena ati, ‘Kam ning opnirye, uku dongonamap’ tenen, pala keil lelebuka yangebukce moubuka dobuk.

33 Winibukopura, isa kil, el si Asyera, aisa si erena ati, cang yo arye moubukabukce, ikdeibuk. Winibukura, aisa kil el si ara, Asyera nyabuka el si erelamik. Ura, sik minop talak Israel ninye taleamikce, ulamik ninye deiyok nang, Raja nang nirya arye, Allah el si Yahweh ati, si yanilamikba, Allah arye yu ulamuk ning ara, weik ulamuk bukni, anye Ahab bira, malye-malye weik winilamukba, Allah el kanye ara, ‘Anye pia malye weiknye akunuma, yuk nang ara mitik anun uka,’ tenelamukce yu weik ulamuk. Raja Ahab bira winibuka ati, Israel ninye pia kalikuka melilamuk Allah ara, el Ahab biti yu pia weik ulamuk.

34 Ura, Omri el mi Ahab bira, ninye deiyok kibuka, Raja tikamukce, Israel tam ulamik ninye ati, talibuka ulamuk talak ara, Betel mutukunye tonok, el si Hiel ulamuk. Hiel birye, Yeriko mutuku asik tuba tamubuka lipsisikuka dobuk. Ara, minop talak ara, Yeriko mutuku uluplobukce, sirya dakik ning, tamubuka lipsisikuka dobuk. Bukni, minop talak Allah Yahweh arye, ninye si Nun, el mi Yosua deice arye, “Winipniba, Yeriko mutuku uluplobikirye, sirya kum daneipnamake. Tonda, aning winipnamle talak babye, Hiel el mapu bitinye ara, ‘Dortalak winipnamuk ning ati, laka nyapdeiamuk touk winibuk. Ayupu nyapdeiamuk touk, Hiel el mapu bitinye dipdik. Hiel el mi minopce deibuknye, dunye bira, el si Abiram dibuk ara, ‘Yeriko mutuku asik dopnamne’ tenen, weik keil poka amu tam min yuma, deiyok koun keil fondasi deiamukbuk, daklobuk talak arye dibuk. Tonda, Hiel el mapu ara, kelenye el si Sebub, amutuku asik dana-dana tam, antanapdongobuka domik keil poka bukni, anyaik bisik wekelbana ati, cang weik bublan, el si pintu gerbang, ‘Dopnirye, dipnamne’ tenen, apil dolamuka ani, akunum winipnin bayukce, bublan memenmokbuk dibuk.