3 Nyabukce, ayupu ton nyabuk. “Winipmince binuminye talak ara, el aren ning ati, roti yubukap ning telebroba ap, to teleb din roti el mitik tonun ap, mong mek mitik tonun tonap bobuka, Allah el yupu lak nyan pil dolinye dam bimince, arepnulyame. Winipminba, nun mi Ahia eluk dinmal ning ara, ‘Yata ning arye do?’ tenen, asipdenulyame. Winipminba elce, nun mi Ahia el uk dinmal ning, aminyan winipnamkila ati, lak nyapnamakilca,” Yerobeam birye, el kil biti nyabuk. 4 Ayupu nirya akunum nyabukopura, Yerobeam birye nyabuk touk, el kil adiparyuk ayupu kekebukopura, Silo mutuku Ahia dam biyuk. Ura, Ahia bira, akunum wisi danamuk ati ara, ninye yuk nang ton, pia moubuka eipna arye, kum biklamuk.

5 Ahia winilamuk bukni, akil min kum yanabuk talak ara, Allah el si Yahweh arye Ahia biti akunum yanuka nyabuk. “Yerobeam el kil an dam yalirye, el mi uk dinmal ning ati asipdenamakile. Ati, ance Yerobeam el kil ati ara, ‘Narye winibuka, winibuka, nyapnalyame’ nyapkin yupu uk nyapnalame,” nyabuk. “Tonda, akil ara an dam yalyopura, yuk nang yupu arye nyalamak atonun yanuka nyapnamakile. Ara, ‘Winipniba yuk nang arye nyapniyak, tenepnamnil’ tenen, yanganmala ati nyapkine.” Allah el si Yahweh arye, Ahia biti nyabuk.

6 Aning akunum lak nyabuk talak ara, Yerobeam el kil akunum Ahia aik bublan dam biyukopura, el akunum yanuka lelim tabukba, Ahia kekebukce, “Telebe na aik ur yalyame. Anda Yerobeam el kil yanmalama ara, na akunum bikmakine. Ati ara, ‘Yuk kil yanmale tenepnutue,’ tenena, kume. Yuk nang yupu arye, pilibuka na dam yanuka nyana kume. Nara, anti ikin yupu nyapnukine. Ati kekenilyame.” Ahia birye Yerobeam el kil ak nyabuk. 7 Nyabukce, ayupu ton nyabuk.

Aikin yupu nyapnukine. Ance Yerobeam biti ayupu lak nyalbinulyame. Allah el si Yahweh arye, sik Israel ninye pia kalikuka melilul Allah arye, anggunti nyapsuk yupu ara, ani. Na tenen nang, Israel ninye ati, ‘Sik deiyoknye kiplirye talipnamle’ tenen, narye anti Israel ninye noutam arye wipdeiamkise.

8 Israel ninye sik minop talak deiyok koulamik nang, Raja Daud el yala nang ara, Raja Daud el mapu silip aryuk talipnin balamik bukni, narye sikti, yanipdongobukapsirye, anti arepkise. Ara, ‘Israel nang sik deiyoknye kipnamle,’ tenepkise bukni, Israel ninye ap, sik mutuku ap, anti arepkise. Na amu tam ulamukce, na pil dolamuknye Daud birye, kanye teniltona kumce, el talima nati areamnukce, nati dib tenyamnukba, narye, ‘Aning ara wininalame, aning ara kum wininalyame,’ nyabuka nyalamse yupu uk talibuka, dukdongobuka pil dolamuk. Na kanye ara, Daud birye pia diksukum ubuka pil dolamnuka atonun kum ulyame.

9 Bukni anda, malye pia weik ulyame. Sik min talak pil dopra yangalamik nang nirya ara, malye winin ning mitik tonun winilamik bukni, anda pia weik tonap tabakuka malye weik winilalume. Ara, ance, talye ning si eren ning kintinibuka deiplume. Isa Mutuku Dongonye si erena ati, kat ning besi arye ninye urasin atonun kintinibuka deiplumce, aning siuk erelyame. Winilaluma deice arye, na yu weik upnile. Anggun balye tam akunum kipmanulumce, batakmanuluma ati ara, anggunce nati, ‘Allah ara nun like,’ tenenululume.

10 Winipmanuluma ati ara, na yu ning anggun deice deipnirye, anggun wenena ati an ap, ance deipminba, dadeipdanin binamak nang nirya ara, obuka sirya daknamne. Winipnirye, Yerobeam an mapu nirya kum danamkile. An yala nang nirya, talye kanye bobuka unyak nang babye, noutamak talye daunyak nang babye obuka sirya daknamne. Israel ninye noutam ara an yala nang ton kum unamake. Anggun nirya ara, ‘Pia malye ning ninye nong deice palipsilyak’ tenen, korokuka bataklamaka atonun, tonda uku dongolamak atonun, an yala nang nirya bataknirye, obuka sirya daknamne.

11 Yerobeam an yala nang ton weik asik noutam dadibikcopura, kam arye dipnamake. Tonda wa win dam arye dibikcopura, talye buru maka arye dipnamake. Ati moubuka tenipnulyame. Na anggun ni koprop Allah, na si Yahweh arye akunum nyapsine. Allah arye nyapdeipkile. Ahia birye Yerobeam el kil ati nyabuk. 12 Ahia birye, Yerobeam el kil biti nyabukce, ayupu ton dukdongobuka nyabuk. “Wini talak, anda tamubuka banmaminya ani, an aik bublan dam ‘Binuka weknun’ tenen, yanilbaminyopura, an mi adiparyuk dipnamale.

13 Diplyopura, Israel ninye nirya arye, malye yupu nyabuka engebikirye, tuku luknamake. Weik sisin nang weilamak atonun ubuka, weipnamake. Yerobeam yala nang yuk nang nirya ara, dipnamak bukni, tuku kum luknamake. Bai kam ap, bai buru maka ap arye dinamake. Aning ara talye ati kume. Ara, Yerobeam elce deibukba dadeipdanin balamik ninye nirya kum bukni, ami koprop ara, Allah el si Yahweh arye ami el winilul ning dipdeyukura, teleb ubuka ati ara, elti, kanye deibuka dopropnamle. Allah arye, Israel ninye ati pia kalikuka melilule.

14 Israel nang pia melilul Allah el si Yahweh arye, Israel ninye sik deiyoknye birye winiryuk ning ati, wipdeiplyopura, Yerobeam birye deibukba dadeipdanin banyak nang nirya ara, kum danapdeipnamne. Anyapmakin ning nirya wininamle talak akunum upmale. Ance, ‘Se arup aryuk do?’ nyapniminba narye, ‘Dipkoprop asum akunuma ani,’ nyapkine.” Ahia birye Yerobeam kil ati nyabuk.

15 Nyabukce, ayupu ton nyabuk. “Allah el si Yahweh arye, Israel ninye ati wenen ning sik deice deiplyopura, mekwen amu tam ulul ning nirya ara, lu tamulamla atonun, Israel ninye babye wininamake. Tonda Allah arye, Israel ninye sik apu yapu punun nang ati, ‘Teleb mutuku talinamake’ tenen, areamuk mutuku ara, tamubuka dopropnamle. Akunum tamubuka doproplyopura, ninye arye talye palamle ning kwinibuka donoklamak touk, Israel ninye nirya dobuka Efrat mek koubuka otam donoknamle. Yuk mutuku yu nang arye sirya obuka dakikirye, bobuka yuk mutuku bobinamake. Winipnamla deiyok ara, ani. Israel ninye arye, Isa Mutuku Dongonye si Asyera si erena ati, cang yo ikukabice, aning si erelamik. Asyera Isa Mutuku Dongonye sisibuka, si erelamika ati, Allah el si Yahweh arye, yu ning sik deice deipnamle.

16 Tonda Yerobeam birye Allah si yanilamuk atonun, Israel ninye nirya babye el winilamuk ning eibuka kel biklamikce, sik babye atonun pia malyeuk winilamik ati, Allah arye Israel ninye ara akunum bataknamle. Bataklyopura, yuk mutuku nang arye yanuka obuka kum daneibikirye, Israel ninye dobuka yuk mutuku noutam bobinamake,” Ahia birye Yerobeam kil ati nyabuk.

17 Ahia birye ayupu nirya akunum nyapdeibukopura, Yerobeam el kil Ahia dam batakuka tamubuka el mutuku Tirza mutuku biyuk. Banmoka ani, sik aik bublan dam binuka yanilbayukopura, sik mi Abia atalak aryuk dibuk. 18 Akunum dibukopura, Israel ninye nirya arye, ami ati engenmeka ani, el nong weibik. Ara, Allah el si Yahweh arye, el yupu lak nyananye Ahia, Allah el amu tam pil dolamuknye biti, ‘Winipnamake,’ nyamuk touk ami dibukba, sik amutuku nang arye el nong weibik.

19 Yerobeam el taleamuk ning ap, tonda ninye olamuk ning ap, nirya ara minop talak arye Israel ninye sik talina deiyok nang nyabuka, Buku si ara, Raja-Raja nyabuka sekeibik. 20 Yerobeam bira keting tamun yupa weik dua puluh dua tahun deice ulamukce Israel ninye taleamuk. Winipnin balamuka ani, sirya talak ara, el li yapu diplamik touk el babye dibuk. Dibukopura, el pununa ati el mi koprop uk Nadab, ninye deiyoknye tikuk.

21 Ura, Israel tam taleamuknye, Yerobeam el mi Nadab, eitam mutuku taleamuk talak ara, Salomo el mi Rehabeam, utam Yehuda mutuku noutam nirya, ninye deiyoknye Raja tikukce, taleamuk. Winibuka deiyok koubuka, Yehuda tam taleamuk talak ara, el Rehabeam bira, keting tamun, empat puluh satu (41) tahun ubuk. Rehabeam elce taleamuk keting tamun nirya ara, tujuhbelas (17) tahun deice arye, Yerusalem mutuku noutam ulamukce, amutuku taleamuk. Ara, yuk Israel tam noutam ara, yuk yala Israel ninye arye, weik asik ton dolamikba, aulamuk bukni, Yerusalem mutuku uk, kintinibuka dolamikba, Allah Yahweh arye, “Amutuku noutamuk na unamne. Na si erena ati, amutuku noutamuk dopnamniake. Amutuku ara, na tenyamse mutuku ati wipne,” nyapdeiamuk. Ura, Rehabeam el lin bira, Amon yala kil, el si ara, Naama ulamuk.

22 Raja Rehabeam birye, Yehuda tam taleamuk talak noutam ara, sik Israel yala ninye ara, malye winin ning weik winibuka balamike. Ara, Allah Yahweh arye, ‘Aning ara, pia malye ninge,’ tenelamuk ning ara, sik Yehuda tam, utam ulamik ninye nirya arye, aninguk talibuka winilamik. Sik amutuku ninye arye, aning winilamika deice arye, Allah ati, pia yu kilalilamik. Amalye ning winilamik ninye ara, sik apu yapu nang arye, ton malye ning ton winilamik bukni, aning ara, mitik tonun malye ninguk winilamik. Bukni, Rehabeam birye, Yehuda tam taleamuk talak ara, elce taleamuk ninye ara, pia malye ning weik winipra balamikba, Allah arye sikti, yu kanye bolamuke.

23 Sikce malye winilamik ning ara, weik bukni, ton ning ara, sik mutuku dup, mutuku dubak ara, talye isa si erena ati, mem aik dolamik. Tonda, amutuku dubak ara, ‘Isa si erenamap’ tenen, weik yo tikamna amu tam nirya ara, weik cang yo webuka deipne sukum ara, “Asukum ara, memak,” nyabuka, yo ton iklamikce, isa si erelamike. Aning ato ning ton, bikilina ning ati, si ara tugu ap, patung-patung isa ner el si Dewi Asyera ati, el si erelamik aik ton, memepdeibikce, si erelamik deice arye, pia malye weik winilamik.

24 Aning ara, malye weik winilamik bukni, ton tabakuka, malye weik winilamik ning ara, ani. Ara, isa si erena ati, memebuka deiamika dam nirya ara, sik Yehuda yala kilapu ap, ninye ap, weik tonun arye bobuka, anyaik dam deiamikba, talye yolalamike. Ara, ‘Isa siuk erenamap’ tenen, amem aik yangalamik ninye arye, akilapu ap, aninye ap, neika malamikce, yolalamike. Ati ara, ninye babye, kilapu babye, asukum pil dolamik ninye ara, pia malye ninguk winilalamik.

Adeice arye, Yehuda yala ninye nirya ara, pia malye tenena babye, iluk talibuka dolamik. Adolamik pil ara, Israel ninye, Kanaan mutuku min kum wekelyangalamik talak ara, min talak sik amutuku talibuka, ulamik ninye arye, apia malye ning weik talibuka winilamik. Ati, Israel ninye, amutuku binuyik talak, Allah arye Kanaan mutuku ulamik ninye yakuka donokuk. Deiyok ara, anang sikce, apil dolamik. Bukni, Rehabeam birye, Raja ulamuk talak ara, pia malye ninguk, Israel ninye bukni, Yehuda mutuku ulamik ninye babye, aninguk winipra balamike. Sikce Allah ati, diba kum tenelamik ninye, sik Kanaan tam ulamik ninye ara, aulamik touk, Rehabeam birye, amutuku taleamuk talak noutam arye, sik Israel ninye bukni, Yehuda tam ulamik ninye arye, aning atouk malye weik winilamik.

25 Rehabeam bira, keting tamun pamubarye deice arye, ninye deiyoknye kibuka, Yehuda tam mutuku nirya taleamuk. Winyamuk talak ara, keting tamun pamubarye, akunum kibukura, Mesir mutuku taleamuknye, Raja Sisak birye, Mesir mutuku arye yanuka, ‘Yerusalem mutuku ninye obuka, sirya daknamne’ tenen, Yerusalem ninye ati, mal pi yayuke. 26 Mesir mutuku taleamuk ninye deiyoknye, Raja Sisak birye, Yerusalem asik nirya olyanmokce, malye kibukura, Allah Yahweh el si eren aik noutam, deiamik mambul dekna weik ning, weik tonun arye, dalubuka doprobuk. Ara, konop-konop bona ap, uang ap, Raja Rehabeam birye, el aik pum tam deiamuk teleb ning ap, tonda min arye, Raja Salomo birye, ‘Ninye olan talak, mal donmakibuk opnicak’ tenelamikce, kaliklamik ning, el si perisai, emas deice arye memepdeiamuk ning nirya ap ara, Raja Mesir Sisak birye, yandalubuka doprobuk.

27 Raja Salomo emas arye memepdeiamuk kalikna ning, perisai nirya ara, Raja Sisak birye, dalubuka doprobuka ati, aminyan talak ninye deiyoknye, Raja Rehabeam birye, aning pununa ati, kat teleb ning, el si perunggu arye, winiryuk perisai ton memepdeibuk. Winibukopura, elce ninye deiyoknye, el aik dam bisik bublan dam kaliklamik yin talen nang ding ara, sik deiyok kiamik nang ati, aperisai ning nirya ara, ‘Anang aryuk kalikinamak’ tenen, arebuk. 28 Ninye deiyoknye Raja Rehabeam bira, Allah Yahweh, el si eren aik damuk tupa-tupa balamuke. Winipne talak ara, Raja aik bublan dam kalekin ati, yin talen nang, sik deiyok nang nirya ara, ‘Mal arye opsikcak’ tenen, akintinibuka deibukce, arelamuk ninye nong kalikna ning, perisai nirya ara, dololamik. Winipmana ani, anyaik batakuka, sik aik koproba, tamubuka bin talak ara, sikce aning dobuka, el delinakuk tamubuka, delilbalamik.

29 Ura, Raja Rehabeam birye, Yehuda mutuku nirya, talilamuk talak noutam winilamuknye ap, yuk pil dolamuk ning nirya ap ara, yuk buku noutam arye sekamik. Ara, Yehuda mutuku ninye deiyok kibuka talilamik nang, sik Raja nang arye, winilamik ning nirya, sekelilamik buku noutamuk sekeiamik. Abuku si ara, ‘Sejarah Raja-Raja Yehuda,’ nyanyake. 30 Rehabeam elda eitam iknapye tam, (arah selatan), Yehuda mutuku ninye deiyoknye, Raja kibuka ulamuk talak ara, Israel tam nirya, ninye deiyok kibuka, taleamuknye Raja Yerobeam ap, olalamdike. Sik ap, sikce talilamdik ninye ap, olanauk ulamik. 31 Winilamika ani, Raja Rehabeam akunum dibuk. Dibukopura, el nong dobuka, ‘Daud aik arum,’ nyalamik sukum ara, Yerusalem asik noutam bukni, ninye deiyok nang Raja-Raja dipnaba, tuku luklamik mutuku uk, Rehabeam ton lukik. Rehabeam el mi Abiam birye, el li koproba Rehabeam punubukce, ninye deiyoknye Raja kibuk. El lin si ara Naama. Akil ara, Amon mutuku kil ulamuk.