Yehuda mutukunye birye, Allah el pil dolamuk ning ati, nyabuk yupu
13
Yerobeam bira, Allah arena ati, pala keil arye yangapdeiamik ning, mesba dam tikukce, ‘Siltong teleb ning uku dongopnirye, Allah Yahweh ati arepnune,’ tenenmok. Aning tenenmok talak ara, Yehuda mutuku noutam arye, dotalak winipnamne ning ati, Allah arye nyapdeipnaba, kekepnarye, ayupu laka nyananye, nabi ton ulamuk. Ulamuk anya arye, el anye biti, Allah arye, “Anda adiparyuk Betel mutuku bilyame,” nyabuk. Nyapdeibukba, anabi Betel mutuku biyuk talak ara, Yerobeam bira, mesba dam tikmokce, Allah ati aren ning, ‘Uku dongopnun,’ tenenmok. 2 Ati, Allah Yahweh arye, anabi el kanye talima noutam ara, dowininamuk ning ati, “Winibuka nyapnulyame,” nyaibukba, anabi kekebukce, minopce amesba dam yanuka nyabuk. Ara, “Se, anda amutuku mesba, amutuku mesba, Allah Yahweh arye anti, ayupu antinyapdeipkile. Aminyan talak ara, Raja Daud, el yala mapu arye, sal mi ton deipnamake. Ami si ara, ‘Yosia,’ nyapnamake. Se, amesba-amesbao, na Allah ati, dib kum tenenyak bukni, talye isa mutuku dongonye, si erebikirye, imam-imam nang don pil talibuka dokirye, isa mutuku dongonye, si erenyak nang ara, anye Yosia birye, anang oplirye, an deice arye, sik nong uku dongopnamle.Sik aimam ato nang ara, talye isa si erenyak aik arye, na Allah si erena ati, mesba deiamnik dam yakirye, ‘Nun ton amesba deiceak, siltong teleb ning, uku dongopnamabe’ tenen, yanganamake. Yosia birye, ayanamak nang ara, oplirye, sik nong ap, sik ninye yok ap boyanuka, an deiceak uku sekuka daplyopura, uku arye aning nirya diplirye, sirya daknamle.
3 Asum aryuk, anabinye arye, ‘Na yupu keken nang ara, pia dipkoprob tenepnamniak’ tenen, Allah mikip deice arye, bikilin ning ton arenamle. Ati, ayupu tonap, dukdongobuka nyabuk. “Amesba ara, ulupsaknamle. Winipliba, amesba deice atu uabuk ning ara, yamubuka tukwak saknamle. Anyapman touk, akunum winiplyopura, sik amutuku nang arye, ‘Ayupu ara, dipkoprob Allah arye nyapdeipmok yupu, yanuka nyapmasue’ tenen, bita biknamlume,” nyabuka, nabi arye nyabuk.
4 Anabi binuka ayupu nyabukba, Yorebeam kekebukce, tenebuk. ‘Kume, anye bira, pia malye yupu nyapmala deice arye, nun mesba akunum malye kipdeipmasile’ tenen, anyaik dam tikmek nang ati nyabuk. “El anabinye bira, malye yupu yanuka nyanmala ati, tomoplulume,” nyabuka, taruk dumu pukukba, adiparyuk Yorebeam taruk ara, biti kibukba, tamuka dopropmanto kum ubuk. 5 Winibuk talak aryuk, talye karin arye, mesba daksakukce, amesba deice uamuk atu ara, yamubuka tukwak sakuk. Ara, Allah arye, ‘Winipnamle,’ nyapdeiamukba, nabi arye kekebukce, yanuka nyapdeiamuka atonun winibuk.
6 Winibukopura, Raja Yorebeam birye, anabi biti nyabuk, “Se, na moropkine. Ance nati, an ni koproba, Allah Yahweh ati, moropnilyame. Moropniminba, Allah arye nati, bico tenepnilirye, na taruk biti kipmanil ning ara, kwetep deipnamanilame,” nyabuka morobuk. Nyabuka morobukba, nabi arye, el morobukto, Allah ati, “Naio, anye meliplyame,” nyabuka morobukba, adiparyuk Raja Yorebeam, el taruk dipmok ning ara, melibuka kwetebukba, teleb ubuk. 7 Winibukopura, sisinanye Raja Yerobeam birye, Allah yupu nyapdeipnaba, laka nyalinanye, nabi ati nyabuk, “Anda, na aik yaminyeba, na aik arye, dina neika dipnuname. Tonda, narye anti, dengna don ning ton arepnamakine,” nyabuk.
8 Nyabukba, nabi arye tamubuka, Yerobeam biti nyabuk, “Kume, na deiyoknye Rajao, an talibuka winilyam ning ton, wibuka arepnamanutuma babye, aning ara, dipkoprob kum doproptinye. Tonda, na ni Raja an aik yaniba, din ap, mek ap, neika kum diptininye. 9 Ara, talye ati kum nyapkine. Deiyok ara, Allah arye nati, ‘Anda amutuku unamalam talak ara, din ap, mek ap dobuka, kum dinamlyame,’ nyapdeipmanile. Tonda, ‘Tamubuka yanganuminye talak ara, binmaminye bisik deice arye, tamubuka kum yanamlyame. Yuk bisik leibuka yanamlyame,’ nyapmanile,” nyabuk. 10 Anabi arye, ayupu nirya akunum nyabukopura, el anyapce tamubuka yanmok bisik batakuka, yuk bisik arye, leibuka biyuk.
Betel mutuku noutam ara, wisi danamuk nabi tonok ulamuk yupu
11 Atalak babye, Betel mutuku noutam ara, nabi tonok ton, pia wisi danamuknye ulamuk ati, anabi el mapu arye, Allah el nyabuk yupu laka lena ati nabinye, Yehuda mutuku noutam bukni, Betel mutuku yanmokce, asum unmokba, eipmok ning nirya ap, nabi arye ninye deiyoknye Raja ati, nyapmok yupu kekepmok ning nirya ap ara, sik ni koproba dam binuka, nukikba kekebuk.
12 Ayupu kekebukopura, anabi wisinye arye, el mapu ati tamubuka asibuk. “Yehuda mutukunye, Allah el yupu laka nyananye, nabi tamubuka, el mutuku binuyuk talak ara, dan tam bisik biyuk do?” nyabuka asipdeyuk. Asipdeyukura, el mapu arye, sik ni koproba dobuka, eimek bisik dam binuka, “Betel mutuku yanmok nabi biyuk bisik ara, abisik biyuke,” nyabuka, kapdeibikce, laka nyabik. 13 Nyabikba, anang sik ni birye, el mapu ati, “Na binuna ati, anggun adiparyuk kuda basam bukuka bana ati, kintinip deipnumba, bukuka binune,” nyabuk. Nyabukura, el mapu arye kintinip deibikba, akuda balye deice bukuka, abanmok bisik aminyan dobolbiyuk.
14 Yehuda mutuku noutam ulamuk bukni, Betel mutuku yanuka, yupu nyapmok nabi banmok bisik ara, nabi wisinye, aminyan dobolbanmokce, banmoka ani, Betel mutuku yanmok nabi ara, weik yo tikamuka amu tam, uamukak binuka, bukabuk buk epdayik. Epdayikopura, awisi nabi arye, Yehuda mutuku ulamuk buk, Betel mutuku yanuka, mambul weik yupu nyapmok nabi ati, “Anda Allah arye nyapdeipliba, el yupu laka nyana deiyoknye, nabi ulyam do?” nyabuka asipdeyuk. Asipdeyukura, “Diba nara, Yehuda mutuku noutam unun nabi ara, abukman atia,” nyabuk. 15 Ati ara, Betel mutuku ulamuk nabi wisinye birye nyabuk. “Anda yaminba, na aik, an ap neika din dipnunam ati, na ap neika binuname,” nyabuk.
16 Nyabukba, Yehuda mutuku ulamuk nabi arye, tamubuka nyabuk. “Kume, an ap din neika kum diptinimnye. Ara, ance nati, ‘Nun neika din dipnuname,’ nyabuka, yukupmanilam ning ara, kum kekepnukine. Deiyok ara, Allah arye, ‘Aning ara, kum winipnamlyame,’ nyapdeipnuka ati, amutuku noutam arye, din dina ap, mek ap, pia kum diptinye. 17 Ara talye kum nyapkine. Allah Yahweh arye, nati, ‘An amutuku bimince, tia talak ati, daunmaminye talak ara, din dina ap, mek ap ara, pia kum dinamlyame,’ nyapmanile. Tonda, ‘Amutuku banuminye talak binmaminye bisikuk, aminyan tamubuka yangan talak babye, abisikuk kum yanamlyame,’ nyapmanile,” Yehuda mutuku ulamuk nabi arye nyabuk.
18 Nyabukopura, Betel mutuku ulamuk nabi, wisinye birye tamubuka, Yehuda mutuku ulamuk nabi ati, tilila yupu nyabuka ara, “Na babye nabi unune. An uminye touk, na babye unune. Allah el im deice pil donanye, Malaikat arye, na dam yanuka, nyapdeipmanilce, ‘Anye bira bobinuka, an aik boyanulyame,’ nyapmanile. Ati ara, anda na aik din neika dipnuname,” nyabuka, tenepce, tilila yupu deice nyabuk. 19 Nyabukopura, Yehuda mutuku noutam ulamuknye, Allah pil don nabi ara, melibukba, Betel mutuku ulamuk nabi, wisinye ap, el aik birikce, el anye ap, binuka din dilbirik.
20 Anyaik binuka, sik anang din neika dinmarik talak ara, Allah Yahweh arye, Betel mutuku ulamuk nabi, wisinye biti, talye karin arye, yupu yanuka nyaibukba, anabi el kanye talima noutam arye kekebuk. 21 Nyapdeibukba, awisi nabi elce, Yehuda mutuku noutam arye, el aik winiryuk yanmokce, din dinmok nabi ati nyabuk. “Se, anda kekepnilyame. Allah Yahweh arye, anti nyapdeipmakil yupu ara, ani. An ni Allah Yahweh arye, nyapdeipmakuk yupu ara, kum kekepmalamce, el nyapdeipmakuk yupu yanipmalama deice arye, el yupu kum kekepmalamce mandipmalame.
22 Awinipmalama deice, ance mek ap, din ap akunum dipmalame. Ara, Allah arye anti, ‘Aning ara, winina kume,’ nyabuka akunum nyapdeipmakuk bukni, aning akunum winipmalama arye, an wenena ati, adiparyuk opkiliba, dipnamlam ja. Tonda, dipminyopura, an yala ninye dibikiba weinyakak, an nong bobinuka, kum weipnamkiyake,” nyabuk.
23 Sik din akunum diprikopura, Betel mutuku ulamuk wisinye nabi birye, Yehuda mutuku ulamuknye, Allah el nyapdeiamuk yupu, laka nyananye nabi biti, bisik binamoka ati, el mining keledai basam balye deice, bun ning dobuka, el keledai balye deice dobuka deibukce, Yehuda mutuku nabinye biti, arebukba, bisik banmok. 24 Winibukba, Allah el pil donanye, Yehuda mutuku ulamuk nabinye bira, adiparyuk bisik banmoka ani, bisik noutam bayuk talak ara, kus atonun ning, el si singa, weik yu ning ara, el duknupmoka ani, yayukce, anabi obukba dibuk. Dibukura, el nong ara, sakuka bisik balamik noutamuk paulbiyukce, asukum wirikmok bukni, el anabi bukuka banmok keledai basam babye, el anye dipmoka damuk tikmok. Tonda, kus atonun ning, singa yu weik ning babye, mining dam anyuk tikmok.
25 Dipmok ani, aminyan talak abisik banmek ninye arye, adipmok nabinye ap, el dam tikmok singa ap, eibikopura, sik adiparyuk Betel mutuku asik dobuka, ulamik ninye ati, awinipmukba eipmek ning nirya binuka, laka nyalbiyik. Ara, wisi nabinye ulamuk mutuku, Betel mutuku binuka, laka nyabik. 26 Nyabikba, Betel mutuku ulamuk wisi nabi arye, ayupu kekebukopura, elce nyabuk, “Dipkoprop, Allah el pil dona ati, Yehuda mutuku ulamuk nabinye, Allah Yahweh arye nyapdeipmok yupu kum kekepmaua ati, Allah arye, kus ato ning, singa yu weik ning dopdeipmalba, bisik noutam arye, yanuka opmale. Ara, Allah Yahweh arye, ‘Winipnamne,’ nyapdeipmok atonun, akunum winipmale,” nyabuk.
27 Nyabukopura, awisi nabinye birye, el mapu ati nyabuk, “Na keledai basam balye deice bukuka bana ati, dobuka deipnumunba, adice bukuka dilbinune,” nyabukba, dobuka deibikba, el keledai basam balye deice bukuka biyuk. 28 El bisik banmoka ani, Yehuda mutuku ulamuk nabi dipmoka dam biyukce, bisik balamik noutam sakuka, poulbinmokce, asukum poupmokak, biyukce eibuk. Tonda, Yehuda mutuku ulamuk nabi, el bukuka banmok keledai basam babye, asukum tikmokba eibuk. Tonda, asukumuk kus atonun ning, singa yu weik ning babye, adamuk tikmokba eibuk. Bukni, asinga arye adipmok nabi babye, tonda el bukuka banmok keledai basam babye, obuka kum dipmoke. Tuba urdem mining dam tikmok.
29 Winipmoka ani, el awisi nabi, Betel mutuku ulamuknye birye, Yehuda mutuku ulamuk bukni, asukum dipmok nabi, el nong binuka bobukabukce, Yehuda mutuku ulamuk nabi bobinmok keledai basam, el balye deice deibukce, tamubuka Betel mutuku boyayuk. Boyayukura, adipmok nabi ati deiamikce, engelamika ani, Betel mutuku noutam weibik.
30 Yehuda mutuku ulamuk nabi dipmoknye, el nong ara, Betel mutuku ulamuk wisi nabi arye bobukabukce, el tam ninye weilamikakuk binuka weibuk. Weibukopura, el nabi wisinye ap, el mapu ap, sik nirya arye, adipmok nabi ati engelamik. Engelamik talak ara, anabi wisinye birye nyalamuk. “Se, anda na kwit koproba atonun, na kanye deipkisenye ulalum bukni, akunum dipmalame,” nyabuka engelamuk.
31 Winilamika ani, aminyan talak ara, anabi wisinye birye, el mapu koprop ati nyabuk, “Na dipnyopura, Allah el pil don nabinye, asukum weipmapnye, el win damuk yanuka, weipnamnulume. Ara, anabi el nong ap, yok ap weipmaluma dana tam, na nong ap, na yok ap ara, asukum yanuka, weipnamnulume,” nyabuk. 32 Nyabukopura, anabi wisinye birye, ayupu ton dukdongobuka nyabuk. “Aning ara, talye kum nyapsine. Na mapu, anggun kanye mouplulume. Allah Yahweh arye, Yehuda tam ulamuk nabi ati, ‘Betel mutuku wenena ati, winipnamne,’ nyapdeibuk yupu, dipkoprob anyapdeiamok touk upnamlarya. Ara, nun Betel mutuku noutam kintinip deiamik mesba ap, tonda Samaria mutuku noutam nirya ara, talye isa mutuku dongonye si erena ati, domikak ap ara, ‘Sik wenena ati, uluplopnirye, kum daneipnamne,’ nyapdeiamuk yupu nirya ara, Allah elce nyapdeiamuk touk, dipkoprob winipnamlarya,” nyabuk.
Yerobeam birye, malye ulamuk ning batakna kumce, talye el tenepne touk, malye winilamuk ning ati, nyabuk yupu
33 Aning-aning nirya, akunum winibuk bukni, ninye deiyoknye, Raja Yerobeam birye, malye winilamuk ning ara, kum batakukce, aninguk pia talibuka ulamuk. Ara, Allah el si erena ati, memebuka deiamukak pil dona ati ara, Yerobeam birye, anyaik noutam pil dona ati, imam nang nirya ara, Lewi yala ninye kan-kan arye kum bukni, elce talye yuk yala ninye ton wililamukba, imam nang dolamik pil babye, sik talye ton, pil dolamik. Tonda, yatanye do nirya, ‘Na ton, talye isa mutuku dongonye si erena ati, isa mutuku dongonye arena ati dolamikak ara, na ton pil doptinye,’ tenelamik ninye nirya ara, Raja Yerobeam birye, ‘Yo, telebe, anye babye, imam pil doptue,’ tenelamukce, ato nang wililamukba, apil dolamik.
34 Winilamuk ning ara, pia weik malye ning winilamuk ati, aning menenga ara, Allah arye, el Yerobeam ap, Yerobeam birye deibukba, dadeipdanin balamik ninye ap, el yala ninye nirya ara, deipdanin balamikba, ayala ninye nirya ara, akunum dibikce, amutuku noutam ara, kum dayuk. Sikda, amutuku ton ninye deiyok kina ati, Raja kibuka, amutuku tuba tonap, pia kum talilamik.