3 Yerobeam yayukopura, Israel ninye ulamik nang arye, Yerobeam biti yukubikba yayuk. Yayukopura, Yerobeam ap, Israel ninye ap, sik nirya ansinibukabikce, Rehabeam dam biyik. Biyikopura, sikce Rehabeam biti nyabik. 4 “An ni koprop Salomo birye nunti ikin ninguk delilamsuke. Ikin pil weik dilamsukba, ikin kanye weik bobuka ulamupu. Bukni, wini talak ara, ance kanam kipdeipsimince, kanye ikin usilye ning kum kipdeipsiminyopura, an nyapsiminye touk wininamabe,” nyabik. 5 Nyabik bukni, Rehabeam birye anang ati tamubuka nyabuk. “Wini talak ara tamubuka binmamunya ani, like winilye akunum mapmunyopura, osum ara tuba na dam yanamlume,” nyabuk. Nyabukba, aninye nirya bindobik.

6 Bindobikopura, Rehabeam birye elti, ‘Wininalyame,’ nyabuk yupu daralina ati melin nang asilena ati biyuk. Anang ara, wisi nang ati ara, min arye el li koproba Salomo ap, neika ulamikce nyalamik nang. Ati, Rehabeam birye anang sik dam nyalbiyuk. “Narye asipdesine. Anggunce nyapnululume. Nara arup yupu nyapmaniyak ninye ati, yata wiribuka yupu nyapnamne do?” nyabuka asipdeyuk. 7 Nyabukopura, awisi nang arye tamubuka nyabik. “Kume kao, an talima noutam ara, ‘Ninye noutamak melina atonunye kipnirye, anang melipnamne,’ tenepmince, aninye sik pataplye touk, sikti, ‘Telebe,’ nyanalyame. Nyapminyopura, aminyan talak nirya ara, anang arye, anti pia dipkoprob uk melinamkiyake. Sikce an amutuku tam ukirye an yupu kekebuka pia melinamkiyake,” nyabik.

8 Nyabik bukni, Rehabeam birye sik yupu kum kekebukce batakuk. Wisi nang arye nyabik yupu batakukopura, yuk nang, el amu tam ulamikce, el pil melibuka dolamik nang dam biyuk. Aning ara, talye wel nang ati asipdeyuk. Tonda awel nang ara, el Rehabeam ap, anang ap sik keting tamun ara neiktoto, mitik talak arye diprongobuka, anerye neika nepnin balamik anya arye, elce sik yupu uk kekebuk. 9 Awel nang ati asipdeyukce, “Arup sum moropmaniyak ninye ara, ‘An ni koproba arye, ikin ning nun nong deice delilamsuk bukni, ance aning dobuka kanam kipdeipsutum do?’ nyapnika ati, aninye ara, yata wiribuka nyapnamne do?” nyabuka asipdeyuk.

10 Asipdeyukura, awel nang arye, tamubuka nyabik. “Kume, anang arye, ‘An ni koprop ikin ning nun nong delilamsuk bukni, ance kanam kipdeipsilyame,’ nyabuka moropmakiyak ninye ati ara, sik dam nyapnulyame. ‘Kume, na ni koproba arye, taleamsuk talak ara kanam atonun ulamlum bukni, narye talipnamsin talak ara, pia ikin weik unamlume.’

11 Na ni koprop Daud taleamsuka ara, ‘Yu arye ikin ning nun nong deice delilamsuk,’ tenelamlum bukni, nara elce winilamuk atonun kume. Elce anggun deice delilamsuk ara, dipkoprob kanam uka. Narye anggun nong deice delinamsin ning ara, pia weik ikin unamsile. Tonda, na ni birye anggun wenena ati, talye tapu arye olamsuk bukni, nara, anggun wenena ati, tace ning dobukapnirye, anggun nong bol deice opnamsine. Anyapmasin touk aning nyapnulyame,” nyabik. Ara, wel nang arye, Rehabeam biti nyabik.

12 Ura, like winilye sum akunum ubukopura, ninye deiyoknye ‘Like winilye akunum uplyopura, na dam tamubuka yanamlulume,’ nyabuk touk, Yerobeam ap, el kwit capu nirya ap, tamubuka ninye deiyoknye Rehabeam dam biyik. 13 Biyikopura, Rehabeam birye yupu deice weik yu asa arye, anang ati mikip asa arye nyabuk. Ara, el li koproba min arye yupu meilyamik wisi nang ara, ‘Lamapdongobuka arye nyanamlyame,’ nyabik ning ara atonun kum bukni, Rehabeam birye weik yupu deice arye, talye-talye yupu binuka nyaplobuk. 14 Rehabeam birye nyabuk ara, el ap neika ulamik nang, sik wel nang arye nyapdeipmek ning atonun sik dam binuka nyabuk. “Na ni koproba arye, anggunti weik ikin pil dilamsukce talye tapu arye wenebuka olamsuk bukni, nara aning atonun kume, nara dipkoprob ikin pil dipsinirye, tatce ning kat ning arye obuka wenenamsine,” nyabuk.

15 Ati ara, Raja Rehabeam birye el dam yanuka morobik nang ati, kum kekebukce, malye yupu uk nyapdeibuk. Winibuk bukni, elce moubuka kum tenebuk bukni, dipkoprob awinibuk ning ara, ani. Ara, aning-aning nirya winibuk ning ara, talye ninye aryuk kume. Ara, Allah el si Yahweh arye, ‘Wininamle,’ tenyamnuk touk winibuk. Tonda Allah el si Yahweh arye, ninye tonok Silo mutuku ulamuknye, elda nabi Ahija biti Allah arye, ‘Wininamle,’ nyapdeibuk touk winibuk. Aning ara, Allah arye, Ahia biti nyapdeibukba, Ahia birye, Nebat el mi Yerobeam biti nyapdeiamuk ara, ‘Dipkoprop winipnamle’ tenen, winibuk. Ati ara, aning nirya ara, Allah el uka. Bukni, Rehobeam birye aning nirya ara moubuka kum tenebuk.

16 Israel ninye nirya arye dipdeyikce, ninye deiyoknye Rehabeam birye Israel nang sik yupu kekepmanto kum ubukopura, sikce adeiyoknye biti nyabik. “Rehabeam el yala nang ara, Daud yala nang uka. Ati ara, nunda yata ning winiptibya deice arye Daud el yala nang ap, teleb ubuka neika uptibye do? Nunda yata wiribuka winiptibya deice arye Isai el mi Daud, el yala nang ap, neika uptibye do? Sikce deibikba, dadeipdanin yangalamik nang nirya ara, nun ap, neika kum unamabe.

Ati ara, nun yuk Israel ninye, aning-aning nirya ara bindopnamabe! Rehabeam bira el yuk daunamle. El ap, el yala nang ap, ara Daud birye deibukba, dadeipdanin yangalamik yala nang nirya ara, sik bidamnye arye, sik tam nang ati kalikuka melilanamake. Nun yuk diamuk unamabe.” Nyabikopura, sik Israel ninye bukni, yuk anang-anang nirya arye, sik asik koproba tamubuka bindobikce, Daud el yala nanguk abatakdongobik.

17 Winibikopura, Rehobeam bira Israel yala ninye bukni, Yehuda yala nang ulamik mutuku, sik ulamikak uk tamubuka biyik. Tonda, Rehobeam bira tuba sik ninye deiyoknye Raja tikukce aninye uk talibuka ulamuk. 18 Aminyan talak ara, Rehabeam ninye deiyoknye Raja ulamuk talak ara, el amu tam ulamik nang, sik pil dina ati deiyoknye el si ara, Adoniram ulamuk. Rehobeam birye anye Adoniram ati, ‘Israel ninye ikin pil dinamle’ tenen, wipdeibukba, amutuku noutam biyukba, sik Israel nang nirya arye, ‘Rehabeam ap, el mapu silip ap ara, nun like,’ tenebikce, keil dobukabikce, anye Adoniram obikba dibuk. Dibukopura, Rehobeam aning eibukce, minop el kuda kirikuka tuku deice ban ning, el si ara kereta kuda, aning deice bukukabukce, bikbik abuka Yerusalem mutuku tamubuka biyuk.

19 Winilamika ati, asukum arye deiyok koubikce, atalak anerye abuku sekupe talak ara, sik Israel ninye ara, Daud el yala nang ati, ‘Nun like’ tenelamikce, ninye deiyok nang arye, nyalamik yupu pia kum kekenyake. Batakalongonyake. 20 Aunmek talak Israel ninye arye kekenmekba, “Yerobeam bira Mesir mutuku arye tamubuka yanmale,’ nyabikba kekebikopura, yukubikba yayuk. Yayukopura, Israel nang arye, ‘Yerobeam bira nun Raja unamsil’ tenen, erepdeibik.

Winibikopura, Israel nang arye anang-anang nirya, anang arye, Yerobeam biti el yupu kekebuka ulamik bukni, Yehuda yala ninye ara, sikda kume. Sik Yehuda yala nang, ayala tonok babye, ‘Pia kume, Daud birye deibukba dadeipdanin balamik ninye ara, el yala nang ati, nun deiyok nang unamake. Yuk yala nang arye kume,’ tenelamikce, ayala nang atibuk, sik amu tam bukuka, sik yupu kekelamik. Ati ara, Yehuda yala nang aryuk, Rehabeam biti, ‘Nun Raja atia,’ tenelamikce ulamik.

21 Winilamika ati, Rehabeam bira Yerusalem mutuku tamubuka biyuk talak ara, elce yukubukba, sik Yehuda yala nang nirya ap, sik Benyamin yala nang ap, bulupdeibuk. Sik ayala bitinye yayik nang ara, ninye weik 180 ribu yin bon nang bulubuka yayik. Bulubuka yayika deiyok ara, ani. Ara, Israel ninye yuk anang-anang nirya ati, ‘Obuka kum daneipnamab’ tenen, bulubuka yayik.

Tonda, ‘Anang nirya obuka sirya dakibirye, Raja Salomo birye deibuk mi, nun ni koproba Rehabeam bira, elcuk nun deiyoknye, Raja kipsilirye, amutuku nirya elcuk talipnamsil’ tenen, Yehuda yala nang ap, Benyamin yala nang ap bulubuka yayikce, sik Israel nang bukni, yala yuk-yuk nang olbana ati kintinibik.

22 Sik Yehuda yala nang ap, Benyamin yala nang ap arye, ‘Israel nang bukni, yuk yala nang nirya obuka kum daneipnamab,’ tenebikce kintinibik bukni, Allah el si Yahweh arye, tonoknye el si Semaya biti yupu nyalyayuk. Semaya bira, Allah el yupu lak nyananye ulamuk. 23 Allah el si Yahweh arye, Semaya biti nyabuk. “Salomo el mi Rehabeam, bira Yehuda yala nang sik deiyoknye biti yupu nyanalyame. Ara, el tibuk kume, Rehabeam ap, sik Yehuda yala nang nirya ap, Benyamin yala nang nirya ap, tonda, sik yuk nang nirya ap ati, nyapnalyame.

24 ‘Kekepnalume. Allah el si Yahweh arye nyapsile. Anggun nirya ara tonok weik yala atonun ninye ululum. Ati ara, anggun yala nang noutamak daunyak nang, Israel nang ap, sik deiyoknye Yerobeam ap ati, kum olbinamlume. Anggun Yehuda nang ap, Benyamin yala nang ap, anggun asik koproba tamubuka bindoplulume. Awinipnamle ning nirya ara, na Allah uka. Na si Yahweh unune. Na deice aryuk Rehabeam saknamle. Elda Raja tuba kum unamle,’ Allah arye nyapsile.” Allah arye Semaya biti nyapdeibukba, Semaya birye Yehuda yala nang ap, Benyamin yala nang ap ati lak nyabuk. Nyabuka ati ara, anang nirya Allah el si Yahweh arye, ‘Anggun asik koproba tamubuka bilulume,’ nyabukba kekebikce biyik.

25 Aning nirya akunum winibukopura, Yerobeam elda ninye deiyoknye akunum kibuk talak ara, adiparyuk Efraim yala nang talibuka ulamik tam, Sikem mutuku binuka ulamuk. Ara, ‘Ninye arye olyanamnyaka’ tenen, aning-aning nirya memebuka deibukba, mikip weik kibuk. Winibukce, tia talak ati amutuku ulamuka ani, anerye yuk mutuku ton el si ara Peniel mutuku biyukce, amutuku ton mikip kina ati kintinibuk. 26 Akunum winibukopura, Yerobeam el kanye pum tam arye tenenmok. ‘Israel tam ninye, ayala-yala unyak ninye nirya ara, ‘Daud el yala nang arye talinamsiyake. Winibicopura, atam nirya ara, ayala nang aryuk nun ninye deiyok nang kibuka talinamsiyake,’ tenebikirye, Daud yala nang tam kipropnamake. Yerobeam birye tenelamuk.

27 Tonda aninye winibikirye, Allah el si Yahweh, el si eren asik Yerusalem mutuku arelbanamake. Ara, Yerusalem bikirye, sik malye winipmace ning namin kina ati, kam ning obuka, Allah arebikirye uku dongolbanamake. Wininamaka ara, Yerusalem mutuku uk bobanamaka ati ara, winibikce deice arye, sik ni Raja Rehabeam biti, ‘Nun ni,’ nyabuka el tam kipropnamake. Rehabeam bira, Yehuda yala nang, sik ninye deiyoknye Raja ulule. El ulyak uk melibuka binuka si erebikcopura, aninye arye, na yanuka opnamniyake,’ Yerobeam birye utenelamuk.

28 Winibuka aning nirya teninmoka ani, tenibukopura, yuk nang ap, yupu talipmeka ani, ‘Aning ara winiptinye,’ akunum tenebukce ninye deiyoknye birye, dekna weik kat ning emas doprobukce, sapi urasin atonun puturubuka bitinye kintinip deibuk. Winibukopura, elce amutuku ulamik Israel ninye ati nyabuk. “Anggunda Yerusalem mutuku uk baluluma ara ikin arye, balalum do? Wini talak ara, Israel ninye anggun dipdelulume. Israel ninye anggunti Mesir mutuku noutam arye, lyepsukce boyangalamsuk allah ara, sapi basam urasin atonun ara aupmale,” nyabuk.

29 Yerobeam birye nyabuka aning akunum winibukopura, tonok sapi basam mi urasin atonun kintinip deibuk ning ara, Betel mutuku deibuk. Ton yuk ning ara Dan yala nang ulamik mutuku deibuk. 30 Winibukopura, amutuku ninye arye, aning si erena ati Betel mutuku ap, Dan mutuku ap, binamikce aning si erelamik. Dan mutuku ara yukak bukni, amutuku babye binuka aning si erelamik. Aninye aning winilamika deice arye, sik nirya weik arye, malye ulamik.

31 Yerobeam birye Allah el si erena ati si eren aik yuk-yuk dopnin balamuk. Aning ara, Allah arye, “Winina meme,” nyalamuk buk, malye weik winilamuk.^a Winilamukce, imam-imam nang nirya anyaka pil dona ati ereldelilamuk. Elce, ‘Anang imam nang pil donamak’ tenen, wipdeiamuk nang ara, Lewi yala nang kum bukni, ‘Dauplye’ tenebukce, yuk yala-yala noutam arye anang wipdeibuk. Winibuka ara pia malye winibuk.

32 Yerobeam birye aning winina ati lo akunum kintinibukce, sik Yehuda yala ninye ulamik mutuku arye, wala yupa ara nakub barye noutam bukni, weik sum tanggal lima belas (15) sum deice kwalina yubuka winilamik ning atonun, el kanye aryuk, ‘Pinbarye (8) wala noutam, atanggal lima belas deice arye kwalina yupnamabe,’ nyapdeibukce, kam ning obukabukce, pala keil lelebuka yangeiamika deice uku dabuk. Yerobeam birye akam ning obuka Isa Mutuku Dongonye biti arebuk ning ara, Betel mutuku uk binuka asapi urasin atonun ning si erena ati arebukce uku dabuk. Tonda, Betel mutuku bukni, mutuku dup Allah si erena ati el kanye aryuk aik dobuk ning ara, ‘Imam nang arye pil donamak’ tenen, talye imam-imam nang wibuka erepdeibukba pil dolamik Aning ara, malye weik winibuk.

33 Awinibuk ning ara, Yerobeam el kanye aryuk, wala delapan kipne talak, asum tanggal lima belas (15) kipne talak ara, asapi basam urasin atonun ning si erena ati, Betel mutuku kam ning obuka uku dongobuk. Aning uku dongobukak ara, pala keil taplakuka yangeiamik deice deibuk. Aning ati ara, elcuk tenepna arye, ‘Awala, atanggal deice arye, weik kwalina yubuka Isa Mutuku Dongonye si erenamabe,’ tenebuka balamukce, pala keil lelebuka yangeiamik deice arye arelbalamuk. Aning winibuka nirya ara, pia weik malye ubuk.