Syeba mutuku ninye deiyok kil, Raja Salomo dam Yerusalem mutuku yayuka ati, nyabuk yupu
10
Ninye arye, “Raja Salomo birye Allah el si Yahweh, el siuk erelule. Salomo ap, Allah el si Yahweha ap, teleb ubuka neika urudake,” nyalamikba, Syeba mutuku taleamuk kil arye tuba kekelamuka ati, el dam biyuk. Biyukce, ‘Dib ulul do, kum do?’ tenen, ‘Ikin yupu arye asipdenirye, winipdenamne,’ tenebukce, el dam binuka asipdeyuk. 2 Syeba mutuku ninye deiyok kil, Yerusalem mutuku binuyuk talak ara, dekna weik ning, kum nukmanto, pia weik arye libuka bobiyuk. El talibuka ulamuk ning bobiyuk ning ara, unta basam pia weik, tonda aunta basam deice arye dekna weik nintong teleb ning el si ara, rempah-rempah ap, urasin teleb ning kat keil ap, tonda dekna weik ning emas ap bobuka, Salomo dam biyuk. Biyukopura, akil el talima noutam arye tenilamuk ning nirya Salomo biti asipdeyukce, yupu talipmarik.3 Syeba mutuku deiyok kil arye, aning-aning nirya ati asibuk bukni, abinuka asibuk ning nirya ara, tonok ning babye walwal ton kum ubukba, aning nirya ara, Salomo birye ayupu nirya tenibuka lak nyabuk. 4 Winibuka ati ara, akil arye Salomo weik kele ulamukce, elti, ninye deiyoknye Raja un aik ap, anyaik dona ati weik mambul pil dolamuk ning ap, el asing arye eibuk.
5 Tonda Salomo el din ning delinmek ning ap, el amu tam weik pil dolamika deiyok nang ap, el dam sik lelebuka bukmek nang ap, anyaik pil dona ati melin nang ap, el melin nang, sik urasin pia teleb baju yangalilamik ning ap, Salomo el mek din makau kintinibuka boyangalamik nang ap, tonda Allah si erena ati, kam ning obuka uku dongolamik nang ap, Allah el si Yahweh, el si eren aik ap, aning-aning nirya eililamukce, ‘Se, aning ara dipkoprob pia mambule,’ tenebukce, weik kanye deibuka ilil kanye bobuk. Akil pia teleb kanye deibukce nyabuk.
6 “Se Raja Salomo, na mutuku ulamsirye kekelamsiba, ‘Raja Salomo birye winibuka-winibuka pil dolule. Tonda, elda pia weik kelnye ulule,’ nyabuka nyanyak ning ara, wini talak na asing arye, yanuka eipna arye kel bikne. Aning nyaninyak ning nirya ara, pia dipkoprob nyaninyake. 7 Minop talak ara, anyalamnik yupu nirya ara, dib kum teinyamse bukni, wini talak ara, na asing arye akunum yanuka eipne. Bukni, na kanye ara, dipkoprob an kel deice arye, teleb ubuka delilamlum ning ap, weik Isa Mutuku Dongonye winilul ning nirya ara, lak kum nyalamnike. Sikce, mitik anun uk lak nyalamnikba kekelamse bukni, wini talak ara na akunum yanuka eipmane. Aning nirya ara, pia mambul weike.
8 Aning ati, na kanye ara, an mapu silip nirya ara, kanye deibuka unyake tenepne. Ara, an amu tam weik pil dokirye, weik nang melikice nang ap, yuk talye nang bukni, an melikice nang ap nirya ara, an dam yakiba, an weik kel bikluma deice arye, yupu nyapminba kekenyake. Ati, na kanye ara, sik pia kanye deibuka unyake tenepne.
9 Ati ara, an ni koproba Allah, el si Yahweh ati, ‘Elda pia telebe,’ nyapne. Allah arye, kanye deiamkukce, anti ‘Israel ninye sik weik deiyoknye kipnamle’ tenen, wibuka deiamkukba, Israel ninye talilyame. Allah el si Yahweh arye, winibuka ara talye ati kume. Ara, Yahweh arye Israel ninye ati, bico tenelamukce, tuba tenelul deice arye, an wipdeikukba Israel ninye sik ninye deiyoknye Raja akunum ulyame. Wipdeipkukce, ‘Anye wininamle,’ tenyamkuka ara, ‘Israel ninye, sik melina ati, dipkoprob ninguk pil dopra, sik wininamak touk teleb ubuka yupu bokolina ati, teleb upnin banalame,’ tenepkukce, wipdeikuke.” Syeba mutuku deiyok kil arye, Raja Salomo biti nyabuk.
10 Nyabukopura, Syeba mutuku deiyok kil arye Salomo biti, dekna weik ning boyanmok ning arebuk. Elce arebuk ning ara, dekna weik ning el si emas ara, el ikin ara empat ribu kilogram ap, tonda urasin pia teleb ning dekna weik keil el si ara batu permata ap, ton ning ara nintong pia teleb ning el si rempah-rempah weik ap arebuk. Anintong teleb ning rempah-rempah ap, tonda, ‘Din nintong nyapnamle’ tenen, tabakuka delilamak ning ap, boyayuk ning ara, pia kum nukmanto weike. Yuk talak nirya ara, yuk nang arye Salomo biti, aning weik tonun ton kum arelamik. Aning nirya ara, Syeba mutuku deiyok kil arye, Salomo biti arebuk.
11 Tonda Raja Hiram birye nyapdeibukba, el laut mekwen deice balamak ning, el si ara kapal laut libukabikce, dekna weik ning el si ara emas, pia teleb ning ara, Ofir mutuku arye boyana libikba, akapal deice boyayik. Tonda pia urasin teleb yo, el si ara kayu cendana ap, tonda dekna weik urasin teleb keil ton weik arye boyayik. 12 Boyayikopura, Raja Salomo birye urasin teleb yo cendana doprobukce, Allah el si Yahweh, el si eren aik pum tam bukni, weik ayukumna yo atonun ning deibuk. Tonda, el un aik pum tam ton deibuk.
Tonda, ayo cakukabikce, teleb bung-bung nyan ning el si kecapi ap, gambus ap, kintinip deibik. Atalak aurasin teleb yo ara pia weik, kum nukmanto boyayik. Atalak anerye, anoutam talak ap, wini talak ap babye, ayo weik arye, boyayik atonun ning ton mince kum boyangalamik. Pia weik ning ara, atalak uka.
13 Tonda, Raja Salomo el bidamnye arye tenebuk ning ton, el dekna weik ning delilamukak arye dobuka, Syeba mutuku deiyok kil ati talye arebuk. Tonda, Syeba mutuku deiyok kil, el bidamnye arye tenelamukce Salomo biti moryamuk ning ara, Raja Salomo birye akil arebuk. Aning nirya akunum arebukba, akil arye akunum doprobukopura, el ap, el neika yayik nang nirya ap, tuba tamubuka sik mutuku biyik.
Raja Salomo bona utotoa weik talinanye biti, nyabuk yupu
14 Raja Salomo biti, arelyangalamik dekna weik ning ara, pia weike. Keting tamun tonok deice arye, dekna weik ning, urasin teleb ning, el si ara emas ikin ara, nukmanto kum, dua puluh lima ribu kilo nyalamak touk, el dam boyanuka, arelyangalamikba dololamuk. 15 Tonda, yuk nang arye arelamik ning ara, nukuka kum nyapmabe. Ara, sik bona dekna aik deiyok nang ap, sik Arab mutuku deiyok nang ap, sik pala tam talibuka Gubenur ulamik nang ap, anang-anang nirya boyangalamikce, Salomo biti arelamik ning ara, kum nukik bukni, adekna weik ning ara, pia weik arelamik.
16 Salomo birye weik tempayan, emas kat keil urasin teleb ning atonun arye dobuka, dua ratus perisai memebuk. Tonda, kat keil urasin teleb ning emas ikin ara, tujuh kilogram atonun memebuka deibuk. 17 Kat keil urasin teleb ning emas tempaan deice arye, yupa ara tiga ratus prisai memebuk, tonda prisai mitik ning ara, tiga minggu deice arye, memebuka winibukopura, Salomo birye aning nirya bobuka Libanon mutuku bai buru asik binuka kum deibuk.
18 Salomo birye el bun amsunak ara, gaja basam si ap, kat keil emas urasin teleb ning ap, taplakuka memebuka deibuk. 19 Abun amsuna moromna ara, cang weik nakub barye kibukce abun amsuna dongo tam ara, sapi basam ato ning deibuk. 20 Tonda cang bun amsuna ara nakub barye kintinip deibuk deice tam dana-dana ara, kus ato ning el si ara, singa atonun ning obarye (12) memebuka deibukop,ura, weik nang bulamak ning atonun winibuka ara, yuk mutuku ninye deiyok nang babye, kum winilamik ning winibuk.
21 Salomo el mek din makau ap, tonda Libanon mutuku bai buru asik dopdeiamuk ning nirya ara, kat keil urasin teleb ning, el si emas arye memebuka deiamuk, tonda dekna weik bukni, el si perak ara, aning dobuka anyasik ning ati kum memamuk. Ara, urdem ati kume. Raja Salomo birye ninye deiyoknye kiamuk talak ara, dekna weik ning, el si ara perak, amutuku kili sal arye, ‘Agat ara mambul weik kume,’ tenelamika ati, emas ninguk dobuka memelamuk.
22 Ara, Salomo el Tarsis mekwen deice kapal ap, Hiram mutuku deiyoknye mekwen deice kapal ap, keting tamun winilye noutam bukni, like tonok kat keil urasin teleb ning el si ara emas ap, tonda kat ning urasin teleb ning bukni, mitang ning ap, tonda gaja basam atonun ning ap, bai tam ulamlanye el si kira ap, merak maka ap, bobuka yangalamuk. 23 Raja Salomo bira yuk mutuku ninye deiyok nang kilamik atonye kuma. Yuk mutuku ton ninye deiyok nang, Raja nang ulamik bukni, sik bona utoto talinanye ap, weik kel ap kilamik ning ara, mitik weikto. Bukni, Salomo elda pia dipkoprob weik kel bikna ap, pia weik bona utotoa talinanye ulamuk.
24 Mutuku-mutuku nirya ulamik ninye arye, ‘Salomo epdatibirye, Allah arye nyapdeibukba kel bikamuk ning ap, Salomo talima noutam ubuk ning ap ara, elce nyapsutuba, kel biknamap’ tenen, yangalamik. 25 ‘Aning kel kiptibye’ tenen, ati yangalamik talak ara, elti, arin ning ati, yuk-yuk bobuka yangalamik ning ara, ani. Urasin teleb ning bukni, dekna weik ning el si ara emas ap, perak ap, tonda cang baju teleb ning ap, mal ap, yin ap, parang ap, tonda, yin talin nang arye, talinyak ning yuk yala nirya ap, tonda nintong teleb ning el si ara rempah-rempah ap, ‘Din ningto nyapnamle’ tenen, likuka delilamik ning aning-aning nirya ap, kuda basam ap, keledai basam ap, aketing tamun nirya boyangalamikce, Raja Salomo biti arelamik. Ati ara, Salomo bira pia weik bona utoto talinanye ulamuk.
26 Raja Salomo birye, tuku deice ban ning ati, el si kereta kuda ara, weik tonun arye tonap kintinibuk. Aning libuka bobana ati, kuda basam weik tonun arye, ton kintinibuk. Aning deice bukuka, ninye olalbana ati, yin talen nang ara, weik ton kintinibuk. Ninye olalbana ati, kereta kuda perang ara, yupa weik, seribu empat ratus (1,400) ton kintinip deibuk. Aning libuka bobana ati, kuda basam kintinibuk ara, yupa weik, dua belas ribu (12,000) kintinip deibuk. Aning nirya, noutam arye bokukabukce, ton ning ara, el ulamukak, Yerusalem asik noutam deibuk. Ton tam ning ara bokuka, yuk-yuk mutuku noutam, otam asik dam ton deibuk.
27 Tonda, Raja Salomo birye, pia teleb ubuka, pil dolamuka deice arye, amutuku nirya talibuka ulamuk talak ara, Yerusalem mutuku noutam ara, dekna weik ning, el si perak bobinuka delilamukak ara, yupa pia weik awamuka anya arye, talye keil sirika, weik mutuku nirya ulamle atonun ubuka, pia weik uamuk. Tonda, Libanon mutuku palamuk cemara yo ara, dekna weik yo uamuk bukni, Yerusalem mutuku noutam ara, ayo ton pia weik uamuka ati, talye palamuk ara yo ara, weik ulamle atonun uamuk.
28 Tonda Raja Salomo bira, el pil dolamuka deice arye, el kuda basam pia weik tonun arye, dekukabukce, Yerusalem mutuku tamubuka boyangalamukba, pia weik uamuk. Ton ning ara, Kilikia mutuku, tonda el si Mesir mutuku balamikce, kuda basam tamubuka boyangalamik. Ton ning ara, Kue mutuku, tonda el si Silisia mutuku binamikce, kuda basam ton tamubuka boyangalamik. Akuda basam nirya ara, yo bok tabakana kumce, sik amutuku-amutuku ninye arye, deklamik touk ubuka, ayo bok deice aryuk, deklamikce, boyangalamik.
29 Atalak ara, tapu kirikdongobuka, tuku deice deibuka bobinarye, kuda lipdongopniba ban ning, el si kereta kuda, ninye olbana ati ara, Mesir mutuku arye boyangalamik. Tonok kereta perang, el dekna ara, dekna weik ning, el si perak yupa weik, enam ratus (600) deice arye deklamik. Tonda, tonok kuda basam teleb ning, el dekna ara, yupa weik seratus lima puluh (150) uang perak deice arye deklamik.
Tonda, Salomo el bona dekna deiyok kibuka, pil don nang aryuk, akereta ap, akuda basam ap nirya ara, tamubuka yuk mutuku taleamika, deiyok nang ati, deklamik. Ara, Het yala ninye talibuka, ulamik ninye deiyok nang, sik dam dekelbalamik. Tonda, Siria mutuku, tonda el si Aram mutuku, ninye deiyok kibuka taleamik nang, sik dam dekelbalamik.