3 “Salomo ance nati morolamnulum ning ara, akunum kekepkisirye, melinamkine. Ati ance na si eren aik dopnulum ning ara, ‘Pia telebak unamle’ tenen, narye akunum teleb kipdeipnamkine. Ara, anyaik pum ara, na si akunum sekse ati, na si asukum tuba pia aupnamle. Tonda anyaik ap, anyaik unamak ninye ap ara, pia dinamne. Tonda, na talima noutam ara, anyaik pia teninamne. Aning ara pia kum bataknamne. 4 Salomo an babye, an ni koproba Daud birye, duknuna kumce, kanye diksukumuk ulamukce, na nyapne yupu uk kekebuka ulamuka atonun wininamlyame. Tonda, narye, ‘Aning ara wininamlyame, aning ara kum wininamlyame,’ nyapse ning ara, aninguk moubuka talipmince, unamlyame.

5 Winipminyopura, narye melipkiniba, ance Israel ninye talipmince, sik ninye deiyoknye, Raja pia unamlame. An dipminyopura, an yala nanguk Israel ninye talibuka ninye deiyok nang, Raja nang unamake. Ara, an ni koproba Daud biti, ‘An yala nanguk Israel ninye talinamake. Ara, ance deipminba, dadeipdanin banamak nang, Israel ninye sik deiyok nang, pia kipnin banamake,’ nyapdeiamse touk wininamsine. Ara, narye ‘Wininamlume,’ nyapdeiamsise yupu winipminyopura, aning winipnamkine,” Allah arye Salomo biti nyabuk.

6 Nyabukce ayupu ton dukdongobuka nyabuk.

Bukni, an ap, ance deipminba dadeipdanin banamak ninye nirya ara, nati bataknikirye, isa siuk eremunce na si yanipnumunyopura, wenepnamsine. Aning atonun narye, ‘Aning ara wininamlume, aning ara kum wininamlume,’ nyapdeiamsise yupu ara yanipnumunce, bataknumunyopura, narye wenepnamsine.

7 Anggun wenena ati wininamsin ning ara ani. Ara, narye na mapu Israel ninye ati, ‘Amutuku unamlume,’ nyalamsirye areamsise mutuku ara, tuba tamubuka dopropnamsine. Tonda ance dopnulum aik, ‘Na mambul weik aik unamle. Anyaik pum tam ara na si erenamniyak’’ tenen, na si anyaik deice akunum deipman bukni, anggunce na bataknumunyopura, na babye anyaik arye batakuka bindopnamne. Winipniba, ninye yuk mutuku nang nirya arye Israel ninye ati, malye-malye nyabikirye, nalibuka akutunamake. Tonda Israel ninye ati, ‘Anggunda talye nang dem,’ nyanamake.

8 Wini talak ara, ance dopnulum aik ara, urasin pia teleb aik ulule. Anyaik atonun ton kum ulule. Bukni, sik Israel ninye arye malye-malye ubikirye, na bataknicopura, narye anyaik batakniba, pia malye upnin banamle. Winiplyeura, uluplopnamake. Winiplyopura, anyaik dam banmace nang eibikirye, ‘Se, ara yata ati ubuk do?’ tenen, talima lukdakirye, nyapnamake. “Yata deiyok ati, Allah el si Yahweh arye, anyaik ap, amutuku ap, aninye ap ara, pia malye kipdeibuk do?” nyanamake.

9 Nyabikiba, yuk nang arye nyanamake. “Kume, sik ni koprop Allah, el si Yahweh arye sik apu yapu nang Mesir mutuku arye bobuka, boyanamuknye, el si yanibikce isa mutuku dongonye siuk erebikce, isa mutuku dongonye amu tam ulamika ati, ‘Allah el si Yahweh arye aninye sik wenena ati winibuka,’ tenenamake. Ara, el yu ning anang sik nong deice deibukba, pia kanye imun ning weik tonun arye arelamukba, ‘Sik ikin weik unyake,’ nyanamake,” Allah arye Raja Salomo biti nyabuk.

10 Salomo birye, Allah ap, ninye ap ansinilina ati, el si eren aik ap, ninye deiyoknye, ara Sisinanye Raja Salomo el aik koproba ap ati, dolamuk keting tamun ara, dua puluh (20) tahun deice arye dolamuka ani, sirya dakuk. 11 Anyaik dona ati ara, Salomo birye, ‘Libanon mutuku cemara yo ap, tonda dekna weik ning el si emas ap deice arye, anyaik dopnamne,’ tenyamuka anya arye, ‘Adopnamne,’ tenyamuk ning ati, Tirus mutuku talibuka ulamuknye, Raja Hiram birye, anyaik dona ning ati, weik tonun arye doprobukce, dolilamuk. Winilamukba, Raja Salomo birye, anyaik dolamuka ani, akunum dobukopura, Raja Hiram birye areamuk ning nirya ara, dekna ning pununa ato ara, Raja Salomo birye, Galilea mutuku noutam dolamik mutuku ara, dua puluh (20) mutuku asik dolamikak, tonda, “Ance amutuku nirya talipnalame,” nyabuka nukuk.

12 Akunum arepbukopura, anyasik nukukura, Raja Hiram birye 20 asik dilbana ati, Tirus mutuku arye, Galilea mutuku noutam binuka dipdeyuk bukni, kanye kum deibuk. Ara, Salomo birye Hiram biti, nukmok mutuku nirya ara, ‘Dopropnun’ tenen, kanye teleb kum ubuk. Ati, anyasik nirya ara, Na like,’ tenebuk. 13 Amutuku ara, teleb kum ubuk ati, Raja Hiram birye Raja Salomo biti, nyabuk, “Na kwit, ance nati arepmanilam mutuku ara, yatato mutuku arepmanilam do? Amutuku ara, teleb mutuku kume,” nyabuka tenepce asipdeyuk. Winibuka ati, amutuku-amutuku nirya ara, si sidobuka ara, ‘Kabul mutuku’ nyabuk. Sik Ibrani yupu deice arye, ayupu deiyok ara, ‘Pia malye mutuku,’ tenen, nyalamik touk, tuba nyanyake. Hiram birye, asi dobuka anya arye, wini talak babye, atam ninye arye amutuku tenebikirye, ‘Amutuku ara, malye mutuku,’ tenebikirye, amutuku si ati, ‘Kabul mutuku,’ nyabuka, tuba nyanyake. 14 Raja Hiram birye amutuku ati, ‘Na like,’ tenelamuk bukni, Raja Salomo dam dopdeiamuk dekna weik ning emas, el ikin ara, empat ribu (4,000) kilo bobinuka arebuk.

15 Allah el si eren aik dona ap, Raja Salomo el un aik koproba dona ap, anyaik-anyaik atolonga lana ap, weik asik antanapdongobuka, cang keil poka dona ap, tonda weik asik winilye, akota si ara, Hasor asik ap, Megido asik ap, Gezer asik ap, dona ati ara, Raja Salomo birye, bona utotoa pia kum nang dekukce, ikin pil dilamukba, sik anang arye, aning-aning nirya pil pia weik tonun arye dolamik. 16 Winibuk talak noutam ara, Raja Salomo birye mutuku si, Gezer mutuku asik tamubuka lipsisikuka domuk. Min talak Gezer mutuku dolamik asik ara, Mesir mutuku sisinanye Piraun birye, amutuku ulamik ninye nirya ara, yanuka obukabukce, amutuku ulamik ninye nirya, obuka sirya dakukce, sik asik nirya ara, uku damuk. Winyamuk mutuku ara, Mesir mutuku sisinanye Piraun el kilmu ara, Salomo dopnamuka ati, taruk murubuk sum arye, Gezer mutuku babye, el kilmu ati, talye nukuk.

17 Min talak ara, Mesir mutuku deiyoknye birye, Gezer mutuku asik nirya, uku dongobuka sirya dakuk ati, aminyan talak ara, Raja Salomo birye, weik ikin pil dilamukba, el pil don nang arye anyasik tamubuka lipsisikuka domik. Aning atonun, mutuku si, Bet-Horon babye, lipsisikuka teleb kibuka domik. 18 Aning atonun ton, mutuku si Bahalat mutuku ap, Tamar mutuku noutam ap, dolamik asik nirya ara, malye ubuka ati, anya asik nirya tuba tamubuka lipsisikuka dobukba, teleb ubuk. Ara, Yehuda tam noutam bukni, amutuku pata uamuk mutuku babye, Raja Salomo birye, ikin weik piluk dilamukba, elti, pil don nang arye, anyasik-anyasik nirya ara, tuba tamubuka dolamik.

19 Anyasik nirya ara, ‘Aning-aning nirya patapsilye talak, adopnamne mutuku arye doproptinye’ tenen, tonda, ‘Amutuku nirya kintinip deipnamne, tonda na yin talen nang arye, mal oldanamak talak, sik tuku deice ban ning, kuda kereta ap, aning libuka bobana ati, kuda basam ap, amutuku tia ati, dadeiamna ani, mal oldan talak ara, anyaik arye dobuka, mal olalbinamabe,’ tenelamukce, anyasik-anyasik nirya ara, kintinyamuk.

Winibuka tenelamuk ati, kintinyamuk mutuku si ara, ani. Ara, mutuku si Bahalat mutuku ap, Tamar mutuku ap dolamukce, amutuku noutam ara, el patapnamuk ning dopdeiamuk. Aning atonun, Raja Salomo birye, taleamuk mutuku nirya noutam ara, ‘Aning dopnamne, aning ton dopnamne,’ tenelamuk ning nirya ara, talye luparabuka dolamukce, teleb kipdeibuk. Ara, Yerusalem mutuku babye, Libanon mutuku babye, amutuku noutam nirya ara, Salomo birye, ‘Winipnamne,’ tenyamuk touk, kintinip deibukce, pil dolamuk.

20 Anoutam talak ara, Salomo el pil dona ati, ikin weik pil dilamukba, anyasik-anyasik pil dolamik talak ara, weik asik ulamik ninye, Israel yala kum ninye ara, sik si ara ani. Ara, Amori yala ninye ap, Het yala ninye ap, Feris yala ninye ap, Hewi yala ninye ap, Yebus yala ninye ap, amutuku noutam tuba talye daulamik. 21 Sik ayala-ayala ninye nirya ara, minop talak Israel ninye arye, Kanaan mutuku binuyik talak ara, Allah arye, ‘Ayala-yala ninye nirya, opmunce, sirya daknamlume,’ nyapdeibuk bukni, sik Israel ninye arye, ayala ninye nirya, obuka kume kum danaiyamik.

Tonda, ‘Daulamnyake,’ tenebikce, batakamikba, kam tuba ulamik. Kam ulamikce, ayala ninye arye deiamikba, dadeipdanin yangalamik ninye weik, tonap tabakuka amutuku noutamuk ulamik. Anyapce, aninye nirya tuba kam ulamika ati, Raja Salomo birye, ‘Na pil urdem donamniyak’ tenen, elce ikin weik pil dilamukba anyasik-anyasik nirya, lipsisikuka dolamik. Tonda, aning atonun, sik aninye babye, atalak babye, Israel ninye sik pil melibuka don nang dem ulamik.

22 Bukni, Raja Salomo birye, Israel yala ninye koprop ara, ikin pil ton dipnaba, asik dona ati pil kum dolamik. Aning ara kum bukni, sik Israel yala ninye koproba ara, yin talen nang kina ap, yin talen nang yupa yuk-yuk ati deiyok kina ap, sik ayin talen nang nirya, sik deiyoknye kina ap, tonda mal olalbana ati, perang kin talak kuda kereta talena deiyok nang ap, kereta talen nang, sik deiyok nang ap, Raja Salomo taleamuk mutuku nirya dina ap, kalekina ap, ‘Winipnamlume,’ nyana deiyok nang ap, pil dona ati, Israel yala ninye koprop wililamukba, apiluk talibuka dolamik. Sik ti ara, ikin pil kum dilamuk. 23 Bukni, Raja Salomo birye, anyasik-anyasik tamubuka lipsisikuka dona ati ara, apil eibikirye, ‘Winipnamlume, aning ton winipnamlume,’ nyana deiyok nang ati, Israel yala ninye koproba ton, wipdeibukba, apil talibuka dolamik. Salomo el pil yala-yala nirya dona ati wipdeibukba, deiyok nang kibuka, pil dolamik nang ara, yupa weik lima ratus lima puluh (550) wipdeibukba, apil ati kaliklamik. Sikda deiyok kibuka ulamikce, ikin pil dilamuk ninye, yuk mutuku ninye ati, “Wininamlume,” nyabuka, pil dolamik.

24 Raja Salomo birye, Mesir mutuku ninye deiyoknye Piraun, el kilmu dobuka domukce, daulamuka ani, aminyan talak ara, ‘Yuk mutuku binuka unamle’ tenen, nyaibukba biyuk. Ara, Salomo el li Daud ulamuk asik noutam daulamuka ani, batakuka Salomo birye, akil ati winiryuk dobuk aik binuka ulamuk. Winibukba, Allah el si eren aik dam, eitam iknapye tam, (arah selatan) uamuk tuku ara, Salomo birye dobukce, teleb kipdeibuk. Tonda, asik si ara, Milo mutuku ton domuk.

25 Salomo birye, Allah Yahweh el si eren aik akunum dobuka kintinibuk. Winibukopura, tonok keting tamun noutam ara, ‘Nun malye un ning kilibuka, teleb kilinamsil’ tenen ati, like winilye deice arye, kam ning obuka, mesba dam boyangalamukce, imam nang ati arelamukba, sikce aning boyanuka uku dongolamik. Tonda, tonok keting tamun noutam ara, like winilye deice arye, ‘Allah ap ninye ap, ansinipdabirye, teleb ubuka neika uptibye’ tenen ati, yuk kam ning ton oyanuka arelamukba, imam nang arye uku dongolamik. Atonun tonda, Allah si erena ati siltong teleb ning yanuka arelamukba, imam nang arye uku dongolamik. Aning-aning nirya Salomo birye, akunum winipnin balamuka ani, sirya ara, Allah el si eren aik ara, akunum sirya dakuka dobukce, aning winilamuk.

26 Ura, yuk pil ara, Raja Salomo birye, el laut mekwen deice bana ati, kapal laut nyalamak kapal ara, domukce memebuka deiamuk. Ara, mutuku si Ezion-Geber mutuku arye domuk. Amutuku ara, weik laut mekwen el si, Laut Teberau^a lilun asik ara ani. Ara, Edom yala ninye ulamik mutuku noutam bukni, mutuku si ton, Elot mutuku nyalamik. 27 Salomo el laut mekwen deice bana ati kapal, el si kapal laut akunum memebukopura, el kwit Raja Hiram birye, el tam nang ara, mekwen deice kapal bobuka bana weik kel nang ton, wibuka dopdeibukba, Raja Salomo el tam nang ap, sik neika akapal bobalamik. 28 Sik anang arye, akapal deice balamika ani, Ofir mutuku binukabikce, dekna weik kat ning emas, el ikin ara, empat belas ribu (14,000) kilo gram bobuka, Ofir mutuku arye tamubuka, Raja Salomo el dam boyanamik.