Allah arye, nyamukba yupu sekamik ning, deiamik yo pum dobuka, Allah el si eren aik, bobiyik yupu
8
Raja Salomo birye, Allah el si eren aik akunum dobuka sirya dakdongobukura, yupu nyapdeibukba, Israel ninye sik deiyok nang, wisi nang nirya ap, Israel yala deiyok nang ap, ati nyalbiyik. Ara, “Yerusalem anyuk bulubuka yalulume. Yamunce, minop talak Raja Daud ulamukak, anyaik si ara, Siona amutuku noutam arye, weik mambul ning doprobibirye, Yerusalem mutuku boyanuka deipnamabe. Ara, Allah el si Yahweh arye, ‘Wininamlume, tonda aning nyapsinye touk winipmunyopura, narye anggunti winibuka melinamsine,’ nyapdeiamukba, ninye arye ayupu kekebikce sekuka, yo lakase arye memamik marikna pum bisik deibik. Amarikna dobuka, Yerusalem mutuku noutam boyanuka deipnamabe. Ayo lakase arye memamik marikna ara, minop talak Raja Daud ulamukak, anyasik si ara, Sion. Mining dam mutuku, Sion mutuku noutam arye amarikna doprobibirye, boyanuka Yerusalem mutuku noutamak, Allah el si eren aik pum tam deipnamabe.” Salomo birye, Israel sik deiyok nang, wisi nang ati nyabuk.2 Nyapre balimikba, Israel deiyok nang nirya arye kekebik. Kekebikopura, nakub barye wala deice arye, bulubuka yayik. Awala si nyalamik ning ara, Etanimb wala bulubuka yayik. (Sik yupu deice Etanim wala nyalamik ning ara, nun wala si September atonun, Oktober atonun nyanyabe). Awala ara, weik kwalina ton kwalilamik talak akunum ubukopura, Israel deiyok nang nirya Salomo damuk bulubuka yayik.
3 Atalak ara, Israel ninye deiyok nang, sik wisi nang nirya akunum yayikopura, Allah el aik pum tam pil dona deiyok nang, sik imam nang arye, Allah el si Yahweh arye, nyabuka sekeibuk yupu, yo lakase arye domik marikna pum tam, Musa birye akeil dobuka dongobuk ning ara, aning dobuka erepdobik.
4 Aning akunum doprobikce, aning delilamik buru tam, cang sapi bol arye dolamik doltakne tenda aik ton ulubukabikce bobiyik. Anyasik ara, ‘Allah ap neika yupu sisikibirye, epdanamap’ tenen, domik ning ati nyapmabe. Acang sapi bol arye domik doltakne tenda aik ara, ‘Allah ap, ninye ap, ansinina aik,’ nyalamik. Tonda, anyaik pum tam delilamik ning, Allah el si erena ati, anyaik pil don ning nirya babye, dobuka bobiyik. Aning-aning nirya dobuka bobiyik ning ara, Allah el si eren aik pum tam pil dona deiyok nang, sik imam nang ap, tonda imam nang, sik pil melin nang, Lewi yala nang ap arye, aning-aning nirya bobuka, Yerusalem mutuku bobiyik.
5 Aning-aning bobanmek talak ara, Raja Salomo ap, el mapu Israel ninye nirya ap, bulubuka wekmekce banmek. Allah el si Yahweh arye nyabuka sekeibuk yupu ara, yo lakase arye memamik marikna pum tam, el si Peti Perjanjian, Musa birye akeil dobuka ayo lakase arye, domik marikna dongobuk ning ara, sik imam nang arye, bobuka banmek talak ara, Salomo ap, Israel nang ap, minop menekuka banmekbuk, sik imam nang ara, aminyan tam banmek. Banmeka ani, amarikna akunum deibikopura, Raja Salomo ap, sik Israel ninye nirya ap arye, kam un ning nukman kumce weik arye obukabikce, Allah si erena ati arenmek ning ara, weik anya arye, nuksekmanto kum ubuk. Wininmek talak ara, Allah ati wininmekce, sapi basam ap, domba basam ap, pia weik arye Allah ati arenmek.
6 Allah el si Yahweh arye nyabuka sekeibuk yupu, yo lakase arye domik marikna pum tam, Musa birye akeil dobuka ayo lakase pum tam dongamuk ning ara, sik imam nang arye, ayo lakase memamik marikna dobukabikce, Allah el si eren aik pum tam, pia Kurun aik nyalamik aik pum tam deibik. Anyaik ara, pia Kurun aik, talye nang ap, talye ning ap, pia kum binmanto aik nyalamik. Tonda, ayo lakase arye memamik marikna ara, Allah el si Yahweh arye, ‘Wininamlume, aning winipmunyopura, narye anggunti winibuka melinamsine,’ nyapdeiamukba, ninye arye kekebuka sekeiamik yupu aubuk. Ayo lakase arye memamik marikna deipmeka ara, anyaik Pia Teleb Koprop aik pum tam bukni, im deice pil don nang, malaikat urasin atonun kibuka puturupdeiamik, amalaikat bitinye, sik pol amu tamak amarikna binuka deibik.
7 Winibikura, amalaikat urasin atonun ning, dana-dana nirya, sik pol bitinye arye ayo lakase arye domik marikna ap, amarikna bobana ati cang yo ap singnipdongoprik. 8 Ayo lakase arye domik marikna bobana ati, cang yo bitinye ara, pia cang weik ubuk. Ayo lakase arye memamik marikna deibik aik si ara, pia Teleb Aik nyalamik. Anyaik bukni, mitik atam domik aik si ara, Teleb Aik nyalamik. Amarikna bobana ati dukuldongona cang yo ara, Teleb Aik pum tam tikminyopura, acang yo meusa ara eipnamtum bukni, Teleb Aik buru tam arye, dipdetumopura, ayo cang mouse ara kum eiptume. Ayo cang bitinye ara, anyaik tuba aupmale.
9 Ayo lakase arye memamik marikna pum tam minop talak Musa birye dongobuka deiamuk ning ara lak nyapnukine. Tonok ninguk dongamuk. Ara, Allah arye ‘Aning ara wininamlyame, aning ara kum wininamlyame,’ nyapdeiamukce, keil pala bitinye deice sekukabukce, Musa biti arebukba, Musa birye akeil dobuka, ayo lakase arye memamik marikna pum tam deiamuk. Yuk ning ton ayo pum tam kum deiamuk, akeil bitinye uke. Tonda, Musa birye akeil pala dobuka amarikna pum tam dongamuk mutuku si ara, Horeb mutuku ulamuk talak anyapce. Atalak ara, Allah arye sik Israel ninye Mesir mutuku noutam ikin kanye bobuka ulamik talak, lyepdeibuk. Atalak ara, Allah el si Yahweh arye sik Israel ninye ati nyabuk. “Anggunce aning ara wininamlulume, aning ara kum wininamlulume. Na nyapsinye touk winipmunyopura, narye pia kalikuka dilamsinirye, melinamsine,” nyabuk.
10 Ura, sik imam nang arye, ayo lakase memamik marikna bobuka anyaik binuka pia Teleb Aik Koproba akunum deibikopura, anyaik batakuka, tonda pia Teleb Aik Koproba batakuka, tuba tamubuka bai tam biyik. Anyaik binuka deibukura, buru tam biyik talak ara, talye karin arye weik dua bum koulukukce, Allah el si Yahweh, el si eren aik pum tam yanuka siknipdongobuk. Aweik dua ara, Allah el si Yahweh arye arebukba, anyaik pum tam yanuka wekukce siknipdongobuk. 11 Tonda, Allah el si Yahweh arye, adua arebukba, akunum anyaik pum tam wekukopura, Allah el aik pum pil dona deiyok nang, sik imam nang nirya ara, Allah el si erena ati pil dolamik ning ara, pil dopmanto kum kibuk. Deiyok ara, Allah el si Yahweh, el dirina weik, el si eren aik pum tam wekuka ati, anang ara pil dopmanto kum kibuk.
12 Winibuka ati, Raja Salomo birye nyabuk. “Nun ni Allah el si Yahweh arye, minop talak arye akunum nyapdeiamsuke. ‘Nara, weik ulul dua noutamak bukni, mirin dua noutam unamne,’ nyapdeiamsuke. 13 Bukni na ni Allah, wini talak ara narye anti, pia teleb aik akunum kintinibuka dopmakine. Anyaik dopsa deiyok ara, ‘Ance anyaik bimince asukumuk pia unamlame’ tenen, dopkise,” Raja Salomo birye nyabuk. 14 Ura, sik Israel ninye nirya mining dam tuba tikmek talak ara, Salomo birye ‘Israel nang teleb upnamak’ tenen, teleb yupu nyapdeibuk.
15 Salomo birye nyabuk yupu ara ani.
Nun ni Allah, an si Yahweh ati, ‘Anda pia telebe,’ nyapkiyabe. Ancuk nun Israel ninye ati pia kalikuka meliamsulum touk, tuba melisilyame. Anda nun ni Allah tonok ulyame. Na ni koproba Daud biti, an Allah arye, ‘Wininamkine,’ nyapdeiplume. An si bam bol arye nyaplum yupu ara, wini talak an taruk aryuk akunum winipmalame. Nong akunum upmasile. Nun ni Allah, ance nyapdeiamsulum yupu ara ani.
16 “Na mapu Israel ninye, Mesir mutuku noutam ulamik bukni, narye lyepsirye anang bobise. Aninye bobise talak arye dipdongobuka, anoutam nirya ara, yuk mutuku si ton kum dopse. Ara, ‘Na si eren aik dopnamniyakak ara, ani, ani ton,’ pia kum nyalamse. Israel yala ninye, anggun yala ap, anggun asik si ap ara, weik aupmal bukni, aning nirya ton kum wipse.
Deiyok ara, na mapu Israel ninye ati, ‘Sik weik deiyoknye kiplirye, na ning koproba tenyamse ninye talinamle,’ tenyamsinye bira, Raja Daud el uka. Ati ara, yuk mutuku noutam ton, ‘Na si eren aik dobikiba, anyaik pum tam na si erenamne’ tenen, pia kum wipdeiamse. Yerusalem mutuku uk wipdeiamse. Allah arye nyabuk. Ati, el si eren aik ara, amutuku uk unamle,” Salomo birye nyabuk.
17 Nyabukce ayupu tonap, dukdongobuka nyabuk. “Na ni Raja Daud bira, el talima noutam utenelamuk. ‘Se, nun ni Allah, nun Israel ninye ati, pia kalikuka melisulule. Allah el si Yahweh ati, el si eren aik doptinye’ tenen, pia patalamukba tenilamuk. 18 Utenelamuk bukni, Allah el si Yahweh arye, na ni koproba Daud biti nyabuk. ‘An talima noutam ara, se, na ni Allah, el si eren aik doptinye,’ tenelalume. Aning tenelamlum ning ara, teleb ulalume.
19 Bukni, na si eren aik dopnamnilanye bira, ance kume. Ance anyaik kum dopnamnilam bukni, ance deipnalam mi, elce anyaik dopnamnile. Ara, an koproba arye deipnalam mi, an nong ap, an ining ap atonun mi, elcuk anyaik dopnamnile. Anyaik doplyopura, anyaik pum tam ara, ninye weik na si erenamniyake. Allah arye na ni koproba Daud biti nyabuke,” Salomo birye nyabuk.
20 Nyabukce ayupu ton nyabuk. “Ati ara, narye nyapsine. Nun ni Allah el si Yahweh arye, na ni koproba Daud biti, ‘Wininamne,’ nyapdeiamuk yupu dipkoprob nong akunum uple. Allah el si Yahweh arye, ‘Winipnamle,’ nyabuka nyalin yupu nyapdeiamuk touk, na ni koprop Daud el bulamukak akunum punupsirye, Israel ninye nirya talina ati, sik weik deiyoknye, Raja akunum unune. Tonda, Allah arye nyapdeiamuk touk, narye Allah el si Yahweh, el si eren aik akunum dopse. Anyaik pum tam ara, ninye weik arye Allah si erenamake. Nun ni Allah, elcuk el mapu Israel ninye ati, tuba kalikuka melilule.
21 Tonda, nun ni Allah el si Yahweh arye, nun apu yapu ati lyepdomukce, Mesir mutuku noutam arye, bobiyuk talak ara, nun apu yapu ati nyabuk, ‘Aning ara, wininamlulume aning ara kum wininamlulume. Winipmunyopura, narye kalikuka melinamsine,’ nyabuka nyalin yupu nyapdeibuk. Ayupu ara, Allah arye Musa biti, ayupu nyabukce, keil pala deice sekuka arebukba, Musa birye akeil bitinye dobuka, yo lakase arye memamik marikna pum tam dongobuka deiamuk. Ayo lakase arye memamik marikna delin aik ara, narye akunum kintinibuka dopse, nyapsine,” Raja Salomo birye sik Israel ninye nirya ati nyabuk.
Salomo birye Allah morobuk yupu
22 Raja Salomo birye ayupu nirya akunum nyabuka sirya dakukopura, aning ton winibuk. Israel ninye nirya bulubuka tikmeka urasin dam tikilyayuk. Tonda, Allah el si Yahweh ati, kam ning obuka, el si erena ati, arenmekak arye, pala keil yangapdeiamik dam tikukce, Salomo el taruk bitinye erebuka im deice dinmokce, ayupu dukdongobuka nyabukce, Allah morobuk.
23 “Na ni Allah, an si Yahweh ati, an si erepkine. Na nio, Israel ninye ati pia kalikuka melisilyame. Nun deiyoknye an tonok ulyame. Im deice babye, tukwak mutuku babye, an atonunye ton pia kum ulule. Anda Allah tonoka. Anti pia tuba diba tenekinyak nang arye, yuk talye ning patana kumce, an nyalyam yupu moubuka talibikirye dobolbanyak nang ati ara, ance pia bico tenesilyame. An amu tam unyak nang ati, ‘Wininamsine,’ nyapdeiamsulum yupu ara, dipkoprob tuba winisilyame. Ati tukwak mutuku babye, im deice babye, an atonunye ton pia kum ulule.
24 Aning atonun, ancuk na ni koprop Daud biti, ‘Wininamkine,’ nyapdeiamlum yupu ara, akunum winipmasilame. An si bam bol arye nyaplum yupu ara, wini talak an taruk aryuk akunum winipmasilame. Nong akunum upmasilba, arup arye eipmabe.”
25 “Wini talak ara, na ni Allah, an si Yahweh unmalame. Na nio, Israel ninye ati pia kalikuka melisilyame. Na ni koprop Daud bira an amu tam ulamukce, an piluk dolamuk. Ati ance elti, nyalin yupu nyamlum ning ara, ‘Dipkoprop tuba winipnamsilam’ tenen, moropkine. Daud biti nyamlum yupu ara, ani. ‘Daud, ance na nyapdeiamse yupu nirya moubuka taleamlumce, dobolbalalum tonun, ance deipminba dadeipdanin, binamak ninye babye, na yupu moubuka kekebikirye, aninguk winibicopura, na dam pia unamake. Ara, ance Israel ninye weik deiyoknye Raja ulalum atonun, aminyan yanamle noutam babye, an mapu Raja nang pia unamake. Na dam ton pia min kum unamake,’ nyaplume.
26 Ati ara, na ni Allah, an si Yahweh umince, Israel ninye ati pia kalikuka melisilyame. Na ni koprop Daud bira an amu tam ulamukce, an piluk dolamuk. Ati ance elti, nyalin yupu nyamlum ara, ‘Dipkoprop tuba winipsilyam’ tenen, moropkine,” Salomo birye nyabuka Allah ati morobuk.
27 Morobukce ayupu ton nyabuk. “Bukni, dipkoprob Allah anda atukwak mutuku noutamakuk ulamtum do? Kume, im deice babye weik mutukue. Tonda im deice pia eitam babye, dinap weik aulul bukni, Allah anda amutuku babye, kum suktalipnamtume. Anda weik mambulnye biti nyapkine. Ati ara, aning atonun, na dopse aik ara, pia mitik aik dopse ati, anyaik pum tam babye kum uptume. Anda tonok sukumuk kum ulyama ati nyapne. 28 Bukni na nio, an amu tam ununa ati ara, ‘Na moropnukin yupu kekepnutum’ tenen, moropnukine. Nara malinye binya arye, adiparyuk wenebuka oplopnutum bukni, ‘An kanye aryuk bico tenepnimince melinamnilam’ tenen, moropkine. Na nio, an si Yahweh ati erekunune. Anda na si erenun Allah uka. Ati, asum arye, na engebuka moropmakin yupu ara, ‘Kekepnamnilam’ tenen, moropkine.”
29 “Moropkin ning ara, Allah ance, ‘Anyaik ara, anyaka dopminyeba, na si anyaka deipnamne,’ nyapdeiamnuluma ati ara, keting noutam babye, lukunyan babye, an asing labuka anyaik pia dimince, kekenamsilyame. Ara, ‘Winipmince, an amu tam ulamnanye, narye moronamkin yupu kekenamnilam’ tenen, moropkine. 30 Tonda, na ap, an mapu Israel nang nirya arye, anyaik yanmanto kum ubibye talak babye an si eren aik tuba tenebibirye, anti tenibuka moropkipyopura, ‘Kekenamsilam’ tenen, moropkine. Ara, ‘An unak im deice arye kekepsimince, nun malye wininyap ning ati, namin kipsimince, lyelonamsilam’ tenen, moropkine.”
31 “Winipmanto, tonoknye birye, el ka biti, malye uplyopura, deiyok nang arye, ‘Aning lipsisikilina ati, weik yupu nyapnamlyame,’ nyapdeipminba, anye anyaik dam yalirye, an arena ati pala keil yangapdeiamikcak tiklirye, weik yupu nyanamle talak ara, ‘Ance kekepnamlam’ tenen, moropkine. 32 Aning atonun nang, an aik dam yakirye morobicopura, an im deice arye kekepnamsilyame. ‘Kekepsimince, yupu bokeipnamsilam’ tenen, ati nyapkine. Allah im deice arye kekepsimince, kel bikuka ‘Anye bira dipkoprob malye winipmale. Anye bira malye kum winipmale,’ tenepsimince, amalye winipmalinye bira, el malye winipmalye touk wenen ning arenamlyame. Tonda malye kum winipmalinye bira, talye batakanamlyame. Winipminyopura, nunce, ‘Teleb ning ani, malye ning ani’ tenen, kel biktibye,” Raja Salomo nyabukce morobuk.
33 Tonda, ayupu nyabuka morobuk. “Winipmanto ara ton, Allah an mapu Israel nang arye, an dam malye winibikcopura, ance wenen ning arepsiminyeba, nun oldan nang arye sirya obuka daksikiba, ilil kanye bobibirye, an aik dam ton tamubuka yabirye, ‘Se na nio, nun malye wininyap ning batakabe. Anda nun ni Allah tonok ulyama ati ara, ancuk lyepsilyame,’ nyabuka moropkeipyopura, ‘Ance kekenamsilam’ tenen, moropkine.
34 Yanuka moropkipyopura, an im deice arye, aning kekepsimince, Israel nang nun malye ning adiparyuk namin kipsimince, lyenamsilyame. Tonda, winipmince nun apu yapu ati areamlum mutuku uk, yuk mutuku nang arye nunti sirya obuka daksikirye, yuk mutuku bobisicopura, ‘Aminyan talak ance nun Israel ninye lyepsimince, tuba tamubuka boyasimince, amutuku tamubuka arepnamsilam’ tenen, moropkine.”
35 “Winipmanto ning ton, Israel ninye malye winibikiba, sik wenena ati ara, mok kum ceplirye dou uk maplyopura, sik malye winilamice ning loplobuka anyaik dam kum yanmanto unamak bukni, an si eren aik tuba tenebikirye, antibuk tenibuka moropkikirye, ‘Se na nio, anda nun ni Allah tonok ulyame. Ance wenepmasilama ati, nun malye wininyap ning akunum batakabe. An siuk erenamabe,’ nyabipyopura, ance kekenamsilame, na nio.
36 Winibikcopura, an im deice arye kekepmince, ‘Israel nang sik malye winin ning nirya ati namin kipmince, lyepnamlam’ tenen, moropkine. Winipmince, ancuk sikti, ara, ‘Teleb bisik ara ani, teleb wininamlum ning ara, ani,’ nyapminba, sik abisikuk dukdongobuka banamake. Winibikiba, ance nunti, ‘Amutuku talibuka upnamak’ tenen, areamsulum mutuku, amutuku deice arye, ‘Mok arepsiminyeba, pia cenamsil’ tenen, moropkine.”
37 “Tonda winipmanto ning ara, amutuku din patana ap, weik mambul uk talibuka ninye dipna ap, tonda sik koun ning koubikiba lyulamle ning ap, tonda koun ning koluna ap, tonda weik sul kwising arye, weik yakirye nun koulamap ning nirya dibikce talak ap, tonda anggun oldan nang arye yanuka olyasice talak ap, tonda, yata kanye imun ning yanamle talak do nirya, Israel nang arye anti morobikcopura, ‘Ance kekenamsilam’ tenen, moropkine. 38 Kanye imun ning akunum uplyopura, sik Israel ninye nirya, sik yuk-yuk arye, ‘Se na talima malye wininye ning ani,’ tenebikirye, moropnamake. Winibikirye, anyaik dam kum yanmanto unamak bukni, an si eren aik tenebikirye, antibuk tenibuka, taruk erebuka anti, ‘Nun ni melipsilyame,’ nyabuka moronamkiyak talak ara, ‘Ance kekenamsilam’ tenen, moropkine.”
39 “Morobikcopura, an adiparyuk im deice, an un dam arye kekenamlyame. Kekepmince, nun malye winin ning ati namin kipsimince, lyenamsilyame. Nun nie, ance tukwak unyak ninye nirya, sik talimak ulul ning an kel ati ara, teleb do, malye do, ninye arye sik yuk-yuk ulamikce touk, ance yupu bokeipnamsilame. Ancuk ninye tukwak nang sik talima noutam ulul ning dimince kel bikilyame, yuk nang arye ton kum winiptinge.
40 Ninye talima eipmince, yupu bokeipsiminyopura, Israel ninye nirya arye anti ‘Se, Allah ara dipkoprob mambul weiknye’ tenen, ilil weik unamake. Winibikiba, ance sikti, kam una ati lo tonap arepminba, kam tuba unamak talak ara, anti si erenamkiyake. Tonda, ance nun apu yapu ati areamlum mutuku aunamake. ‘Wininamsilam’ tenen, moropkine.”
41 “Tonda tikilyangan nang, an mapu Israel nang kum bukni, Allah an si erena ati sik yuk mutuku nang arye, amutuku yanamak nang ati nyapnune. 42 Anang ara, pera mutuku unyak bukni, yuk nang arye nyabikiba, an si ton kekepnamake. Ton ning ara, Allah an mikip ap, an weik mambul si ap, an taruk mikip arye mutuku-mutuku nirya noutam, weik mambul pil donalam ning, kekebikirye kel biknamake. Kekebikcopura, an morona ati, anyaik dam yakirye antibuk si erenamkiyake.”
43 “Sik yuk mutuku nang, talye tikilyangan nang arye, anti anyaik dam moropkikcopura, an adiparyuk im deice an uminyak arye, sik morobikce ning ara kekepmince, melinamlyame. Winipmince sik moropmakikce touk melipminyopura, amutuku talye tikilyangan nang babye, winipminye deice arye, eipkikirye yuk mutuku binuka nyabikcopura, ninye mutuku-mutuku nirya, an siuk kel biknamake.
Winibikirye, anti, ‘Se Allah ara weik mambule’ tenen, ilil unamake. Winibikirye anti sik babye ilil upliba, an mapu Israel nang arye an si erelamika atonun, yuk mutuku nang babye, wininamake. Tonda, an si erena ati, dopkise aik ara, ‘E Raja Salomo birye anyaik ara dobuka deiyok ara, talye ati kume. Ara, dipkoprob Allah el si erena ati dobuke,’ tenenamake. Winipnamak tenen ati moropkine.” Salomo birye nyabuka morobuk.
44 Morobukce ayupu ton dukdongobuka morobuk. “Tonda winipmanto, an mapu Israel nang ati dan mutuku do nirya, anang dopdeipnamlamak nirya, anang arye sik oldan nang dam binukce talak ara, anti moronamkiake. Ara, anda Allah an si Yahweh ati si erebikirye moronamkiake. Tonda, ance wiamlum asik Yerusalem si ton teninamake. Tonda, an si eren aik dopse ning ara, aning ton tenebikirye, anti moronamkiake. Winibikcopura, ‘Ance kekenamsilyam’ tenen, moropkine.
45 An mapu Israel nang arye, sik oldan nang dam binukce talak, anti morobikcopura, an adiparyuk im deice arye, kekenamlyame. Kekepmince, sik moropnamak ning ap, sikce olbanamak ning ap ati, melinamlyame. ‘Sik moropnamkiak touk wininamlam’ tenen, moropkine.” 46 “Bukni, an mapu Israel ninye, aminyan talak malye winin ning an dam wininamkiyake. Ara, ninye tonoknye babye ton, telebnye ton kum unyabe. Ati malye ubikcopura, ance anang dobuka sik oldan nang deice deipminba, ayu nang arye an mapu tongobikirye wenen aik yukak do, dam do, delilbinamake.
47 Winibikiba, an mapu Israel nang arye, ‘Se, nun dipkoprob malye winibupa deice arye, Allah wenepmasilba awenen aik bukmabe’ tenen, sik bidamnye arye tenebikirye, talima noutam arye kel bikikirye wenen aik binuka deiamikce diparyuk, ‘Se nun dipkoprob malye winibupe. Nun ni Allah ati yanibupe. Pia malye-malye ulamupu ning ara, batakabe. Nun ni Allah lyepsilyame,’ nyabuka morobikcopura, ance kekenalam tenen, moropkine.”
48 “Ara talye si bama arye nyaltakna kum bukni, sik Israel nang arye, sik oldan nang sirya obuka dakikirye, wenen aik bobinuka dongobikcopura, amutuku noutam arye, ‘Dipkoprop sik talima noutam arye, malye winilamice ning batakikirye, anti sik talima ap, kanye ap, nong ap nirya an deice deipkikcopura, aning ton eibuka bikinalam’ tenen, moropkine na nio. Winibikirye an ap, sik apu yapu areamlum mutuku ap, ance wiamlum asik Yerusalem ap, an si eren aik dopse ning ap, aning-aning nirya tuba tonap tenebikirye, anti moropkikcopura, ance kekenamlyame na nio.
49 Dipkoprop anti morobikcopura, an adiparyuk im deice arye, kekenamlyame. Kekepmince, sik moropnamak ning ap, sik kanye imun uplye ning ap ati, melinamlyame. ‘Sik moropnamkiyak touk wininamlam’ tenen, moropkine.” Salomo birye Allah ati nyabuka morobuk.
50 Aning morobukopura, aning ton morobuk. “Ati ara, Israel ninye an dam malye wininamak ning ara, lyelonalyame. Ance sikti, ‘Wininamlyame,’ nyapdeiamsulum yupu yaniplobuka malye winilamice nang ati, namin kum kipdeipnalyame na ni. Tonda, sik oldan nang arye obisibice talak, anang ati, ance bico tenena deiyok ning arepminba, anang arye, ‘Pia ikin ning Israel ninye sik nong deice kum delinamak’ tenen, moropkine.
51 Aning wininalam ara, talye ati kume. Deiyok ara, Israel ninye ara, an mapu koprop atonun unyake. Ance, ‘Israel nang, na ninye koproba unamake. Winibiceba neikto touk, unamabe,’ tenyamlumce aninye wibuka deiamsuluma ati nyapne. Tonda, Mesir mutuku noutam arye weik pil dilamikba, pia kanye imun kanye bobuka ulamika noutam arye lyebuka boyanalume. Aning ati, ‘Israel ninye melinalyame’ tenen, moropkine na nio.”
52 “Ati ara, ance moubuka eipsimince, bico tenepsutum toura, narye an moropkin ning ap, dan talak do nirya, an mapu Israel ninye arye moronamkiyak ning nirya ara, ‘Kekepmince melinamsilam’ tenen, moropkine. 53 Aning ara, talye ati kum moropkine. Deiyok ara, tukwak mutuku noutam nirya ara, ninye pia weik aulamik bukni, ance anang, Israel nang ati, ‘Israel nang, na ninye koprop unamak tenen wiamlumce neika unamabe,’ tenyamlumce aninye wipdeiamsulume. Ance, ‘Na mapu’ tenen, wiamsulumce, Musa dam nyapdeiamlumba, elce nyapdeiamsuk atonun, ‘Israel ninye na ninye koprop unmake,’ nyapdeiamsulume.
Ayupu nyapdeamsulum talak ara, nun yok punun nang Mesir mutuku arye, boyanamlum talak arye nyapsulume. Se na ni Allah, an si Yahweh ulyame. Anda aning-aning deice tam talibuka Erenena Weik Deiyoknye umince, an tenyamlum touk ulyame. Ati ara, narye moropkine.” Salomo birye nyabuka morobuk.
Salomo birye sirya dakdongobuka, Allah morobuk yupu
54 Salomo birye Allah el si Yahweh ati, moron yupu nirya akunum nyapnin banmoka ani, sirya moropnuyuk talak ara, tuba tonap tikuke. Ara, Allah el si Yahweh, el arena ati pala keil taplakuka yangapdeipmek urasin dam, kutam tuku dipdongobukce, tikuke. Allah ati moronmok talak ara el taruk bitinye im tam erebuka moronmoke. Atalak ara, sirya dakdongobuka Allah ati morobuk. 55 Akunum morobukopura, tikikabukce, sik Israel ninye bulupmeka urasin dam tikukce weik yupu deice arye nyabuk. Ara, ‘Nun ni Allah arye Israel ninye teleb updeipnamle’ tenen, nyabuk. Elce nyabuk yupu ara, ani.
56 “Nun ni Allah, el si Yahweh ati, pia telebe nyapkiabe. Na nio, diba ance Musa biti nyapdeiamlum atonun, ance nun Israel ninye ati talibuka lyepsilyame. Winipminyeba, wini talak ara, nun talye kanye bobuka unamabe. Kanye imun ning ton pia kum upmasilba, telebuk unyabe. Ance an amu tam pil dolamuknye Musa deice arye, nyapdeipsulum yupu, pia teleb nyalin yupu nirya ara, akunum winipmasilame. Anyalin yupu nirya ara, nong akunum uple. Tonok yupu babye kum bataksuke, aning nirya sirya akunum dakasulule.
57 Ati nun ni koprop Allah, anda Yahweh ulyame. Ancuk nun apu yapu babye melipnin yangalamluma atonun, ‘Ance nun babye tuba melinamsilam’ tenen, moropkiyabe. Tonda, ‘Namin kipsimince, kum batakanamsilam’ tenen, moropkiyabe.” 58 “Winipsiminya deice arye, ance melipsiminba, nun kanye talima ap, nong ap dobuka, an deice deipnamabe. Winibibirye, ance, ‘Aning ara wininamlume, aning ara ton kum wininamlume,’ nyapdeipsulum yupu nirya moubuka kekebibirye, pia dobolbanamabe. Ara, nun apu yapu ati nyamlum touk, ‘Dukdongobuka winibibirye, pia kum bataknamap’ tenen, moropkiyabe.”
59 “Narye Allah an si Yahweh ati moropmana atonun, ‘An dam pia upkilyeba, pia tenenamnilam’ tenen, moropkine. Ara, keting noutam babye, lukunyan babye nirya, narye moropmakin yupu tuba teninamlyame na nio. Aning deiyok ara, nun ni Allah, ara an amu tam pil donanye ap, ance wiamlum ninye Israel ninye ap, ‘Asum-asum nirya nun patapsilye touk eipsimince melinamsilam,’ tenen, ati nyapkine na ni. 60 Winibuka melipsiminyopura, ninye mutuku-mutuku nirya eipsikirye, kel bikikcopura, ‘Se, Allah el si Yahweh, elda weik mambule. Yuk ton kum ulule, el tonoka,’ tenebuka el siuk erenamake. Utenena ati moropkiyabe na ni.” Raja Salomo birye Israel ninye ati nyabuk.
61 Nyabukce ayupu ton dukdongobuka nyabuk. “Ati ara, anggun adiparyuk Allah el si Yahweh ati, diba tenepmunce anggun kanye talima ap, nong ap, tuba Allah arenamlume. Winipmunye deice arye, elce ‘Aning ara wininamlume, aning ara ton kum wininamlume,’ nyapsilye yupu moubuka kekepmunce, talibuka unamlulume. ‘Ara, arup unmaluma atonun pia wininamlum’ tenen, nyapsine.” Raja Salomo birye sik Israel ninye nirya ati nyabuk.
Raja Salomo ap, Israel nang ap arye, ‘Allah el si eren aik ilil kanye bobuka, aik bisik bublan kuknamap’ tenen, winibik ning ati, nyabuk yupu
62 Raja Salomo ap, Israel nang ap arye, ‘Allah el si eren aik ara, akunum dobuba anya arye, nun ni Allah el si Yahweh ati, si erebuka anyaik arepnuyabe’ tenen, kam ning obukabikce weik arye arebik. 63 Winibik talak ara, Raja Salomo birye Allah el si Yahweh ati ninye weilamak kam tuba ulamle ning sapi basam 22.000 ap, domba basam ap, kambing basam ap, tabakuka 20.000 ton obuka arebuk. Ara, ‘Na ni Allah, el si Yahweh ap, nun Israel ninye ap, teleb ubuka neika unamap’ tenen, aning arebuk. El ap, sik Israel ninye ap arye, winipmeka deice arye, Allah el si Yahweh, el si eren aik ara, bisik bublan kukna nyalamak touk, anyaik ara bisik bublan kukik.
64 Tonda asum aryuk, Allah el si Yahweh, el si eren aik urasin dam ara, weik lo ton aupmok ning ara, Salomo birye bublan kuka, teleb kipdeibuk. Winina ati ara, alo noutam Salomo birye aning-aning weik arye Allah ati arebuk. Elce arebuk ning ara, ‘Allah si erepnuyap’ tenen, kam ning obukabukce, uku dongobuk. Tonda, ninye koulamak ning gandum ap, aning atonun bukni, yuk ning ap arebuk.
Tonda, ‘Allah ap, ninye ap, teleb ubuka neika unamap’ tenen, kam ning arepmek ning arye, meta ap, tuba aupmok ning ara, weik arye ton arebukce uku dongobuk.
Ura, Salomo birye, aning-aning nirya, Allah el si eren aik buru tam weik lo noutam arye arebuka deiyok ara, ani. Ara, Allah arena ati weik pala keil dobuka, pala keil yangapdeiamik ning ara, mitik ati ara, asum arye aning-aning nirya arebik ning ara, pia weik ati, akeil pala kintinip deiamik adeice arye, aning nirya deipmanto kum ubuk. Akeil deice ara mitik lo ubuka ati ara, talye arye yuk sukumuk arebuk.
65 Ati ara, Raja Salomo ap, sik Israel ninye nirya ap, ninye kum nukmanto, pia weik arye bulubukabikce, weik kwalina yubuka Allah ati si erenmekce, Allah el si eren aik bisik bublan kukik. ‘Wininamap’ tenen, yanmek nang ara pia weik. Ara, Hamat mutuku bana ati deiyok koubuka balamikak arye, anerye dukdongobuka otam nirya, Mesir mutuku weik mek balamukak arye bulubuka yanmek. Amutuku-amutuku nang nirya arye, like empat belas (14) sum deice arye, kwalina kwalinmekce, Allah el si Yahweh ati si erenmek.
66 Wininmeka ani, akunum sirya dakikopura, Salomo birye nyapdeibukba, ayala-ayala nang nirya sik mutuku tamubuka bindobik. Sik banuyik talak ara, Raja Salomo biti teleb yupu nyabik. Ara, ‘Allah arye Raja Salomo biti teleb winipdeipnamle’ tenen, teleb yupu nyabuka, el deice deibikce bindobik. Sik mutuku tamubuka banmek talak ara, teleb kanye bobuka pin-pin asa arye biyik. Ara, ‘Se Allah el si Yahweh arye, el amu tam pil dolamuknye Raja Daud ap, Allah elce wibuka diamuk nang, Israel ninye ap ati, pia teleb ubuka melilamuk,’ teninmekce banmeka ani, sik mutuku biyik.