Salomo el aik dobuka ati, nyabuk yupu
7
Israel ninye, sik ninye deiyoknye Raja Salomo birye, el aik koproba, yuk ton dolamuk. El aik dolamuk talak ara, keting tamun tiga belas (13) tahun deice arye dolamuka ani, dobuka, sirya dakuk. 2 Raja Salomo, el aik tonok dobuk ning ara, anyaik si ara, ‘Balai Hutan Libanon’ nyalamik. Anyaik nong nirya ati, kiklibuk ning, el cang ara, 44 meter kibuk. Anyaik el pala ara, 23 meter kibuk. Tonda, el tikilin ning ara, 13.5 meter kibuk. Acang aik, el memebuka tikeibuk ning ara, memena winilye ara, Libanon mutuku yo, el si cemara yo arye dobuk. 3 Tonda, winilye memena ati ara, cemara yo aryuk ayukumna ara, nukuka memena yuk-yuk ati, lima belas (15) arye ikuk. Tonda, ayukumna yo ikuka deice ara, yo barina ati, Libanon mutuku noutamak arye doprobik cemara yo deice arye baripdeibuk. Anyaik alip tam, el aruma babye, cemara yo 45 deice aryuk deibuka dobuk. Tonda, alip tam barilongona ati ara, cemara yo arye, kwinya yo darapdongobuk.4 Anyaik taram dana-dana kwanim tam babye, sirik tam babye nirya ara, jendela bisik yuk-yuk botobuk. Neiktoto ning winilye lelepdeibukce, jendela ara, kwanim tam urasin deibuka, winilye tikeibukce dobuk touk, winilye ara, urasin sirik tam ton, aning atonun deibuka dobuk. 5 Anyaik bublan ap, bublan dana-dana tam nirya ara, dumbarye deibuk. Adumbarye yo el si bingkai ara, bisik dumbarye memepdeibukce, dobuk. El bublan nirya ara, el lelepdeibuk ara, winilye deibuka dobuk. Ara, kwanim tam urasin deibuka tikeibukce, dobuk atonun, urasin sirik tam babye atonun, deibuka dobuk.
6 Tonda, anyaik noutam bukni, Salomo birye kat ayukumna ton, cang ayukumna ikuka dobuk. Ayukumna deibukak, el si ara, “Balai Pilar” nyabuka dobuk. Adobuk aik el cang ara, 22 meter, tonda el pala ara 13,5 meter arye dobuk. Anyaik dam urasin tam, el atolonga ton dobukce, atolonga welena ati ara, kat yo moropdeibukce dobukce, aning deice tam ara, cang weik ning, el si terpal nyalamik ning deibuk. 7 Lo weik aik tonap dobukce, kintinip deibuk. Anyaik wilibukak ara, el si, “Balai Tahta” nyabuk. Ara, el Raja arye, buna pia teleb ning deice bulamikak, anyaik awamuka ati, nyalamik. Tonda, anyaik bukni, anyaik noutam akunum yanuka bukukopura, “Ninye Yupu Lipsisikuka, Yupu Bokolin Aik” nyabuk. Anyaik ara, amsuna tam arye dipdongobuka, alip tam nirya ara, Libanon mutuku cemara yo arye, pibuka dobuk. Malye winipman ninye ara, anyaik noutam yanura, Salomo birye, ninye yupu lipsisiklamuk.
8 Ninye deiyoknye Raja Salomo el una ap, mana ap ati aik ara, ‘Yupu Bokolin Aik’ balye tam dobuk. Anyaik, el aik koproba ara, weik cang arye dolamik aik urasin atonun ubuka dobuk. Adobuk aik ap, malye upman ninye yupu bokolin aik ap, dobuk balye tam ara, Salomo el domuk kil ati, el aik koproba ton dobuk. Akil ara, Mesir mutuku ninye deiyok kibuka ulamuknye, Firaun el kilmu ulamuk. Salomo birye, akil domuka anya arye, akil ati, el mana aik ati, dobuka kintinibuk. Anyaik babye, eitam aik domuka urasin atonun ubuka, Libanon cemara yo arye dobuk. 9 Anyaik nirya dona ap, weik cang aik dona ap ara, ayukumna yo deiyok tam arye, mouse tam nirya ara, urasin pia teleb-teleb keil deice aryuk, deibuka domuk. Anyaik dona ati keil nirya kintinibuka moupnarye, memelilamik. Akintinip deiamik keil nirya ara, ‘Akeil arye, ayukumna tam ara, “Winibuka dobuka deipnamabe. Tonda, anyaik noutam ara, winibuka dopnamabe’ tenen, kat ning seken ati ning, el si geregaji arye, akeil dana-dana tam sekuka, akeil nirya akunum kiklibuka kintinip deiamik. Aning ara, tuku deice arye, anyaik el keil fondasi arye, akeil taram deice tam deiamik yo amu tam ara, anirya ara, atonun dobuka, kintinip deibikce dobik.
10 Anyaik nirya ayukumna keil deiamik bukni, ayukumna barina ati, el si ‘fondasi’ nyalamik keil ara, ninye yupa weik aryuk memelilamika ati, akeil nirya ara, dekna weik, tonda urasin pia teleb keil, uamuk. Amemelamik keil yuk-yuk bukni, yupa weik ara, ton keil cang ara, tiga setengah (3.5) meter uamuk. Ton keil cang ara, empat (4) meter ton kiklibuka memelilamik.
11 Anyaik alip tam dona ati ara, yuk yala urasin teleb keil ton, pia teleb-teleb ning uamuk. Akeil nirya ara, ninye yupa weik aryuk, akeil memelilamika ati, akeil nirya ara, dekna weik, tonda urasin pia teleb keil, uamuk. Akeil nirya, moubuka kiklibuka memebikce, kintinip deiamik. Winibikce, adice tam siknina ati ara, Libanon mutuku cemara yo arye, siknipdongobuka delina ati, cemara yo kintinip deiamik. 12 Ninye deiyoknye Raja, el aik dam tuku dana-dana dolamik keil poka ap, tonda Allah ap, ninye ap ansinilidana ati, el si eren aik noutam dolamik keil poka ap, tonda, Allah el si eren aik bai tam bukni, anyak urasin tam dolamik keil poka ap, aning nirya ara, cang weik teleb keil arye memepdeiamik. Ara, keil abilinga ati, weik keil arye, talang winilye deiamikak ara, anoutam ton, Libanon cemara yo tonok arye, taplak deibikce dolamik. Aning atonun, anyaik winilye dam tam, keil poka nirya babye, yuk-yuk bukni, aning urasin atonun, weik keil arye, talang winilye deiamikak ara, anoutam ton, Libanon cemara yo tonok arye, tonok ning taplak deibikce dolamik.
Ninye tonok el si Huram, elda Allah Yahweh, el si eren aik pil don ning, kel weiknye ulamuk yupu
13-14 Tirus mutuku noutam ara, ninye tonoknye, el si Huram ulamuk. Huram elda, pia dipkoprob kat dekna weik ning, el si perunggu dobuka memen ning, urasin yala yuk-yuk ning nirya memenak ara, kel weik bikamukce, el anye bira, apiluk talibuka dolamuk. Huram el li Tirus mutukunye babye, perunggu arye memen pil dolamukce, kel weik bikamuknye ulamuka ani, akunum diamuk. Huram el lin bira, Naftali yala kil ulamuk. Huram bira, weik kelnye ulamuk ati, Raja Salomo birye yuk nang ati, “Anggunda, Huram yukupmunyeura, na dam yanamle. Yalirye, kat ning el si perunggu memebuka, urasin teleb kiplirye, pil dona deiyoknye unamle.” Ati, el dam ara, “Raja Salomo dam yanalame,” nyalbiyik. Binuka nyabikopura, Huram bira, Raja Salomo yupu kekebuka yayuk. Yayukopura, Raja Salomo birye nyamuk pil nirya, yanuka dolamuk.
Kat ning, el si perunggu deice arye, weik ayukumna bitinye, memepdeibuk yupu
15 Huram birye, kat ning el si perunggu arye, weik ayukumna bitinye memepdeibuk. Ara, tukwak anirye dipdongobuka eitam, el cang yuk-yuk ara, 8 meter kibuk. Aning antanalongona ati ara, 3,5 meter kibuk. Tonda, perunggu arye dobuk ning bukam ara, 7,4 sentimeter kibuk. Aweik ayukumna memebuk ning, el noutam nirya ara, lo weik ubuk. Aning atonun, Huram birye, weik ayukumnatiang, bitinye ning ton memepdeibuk. 16 Ayukumna deice tam delina ati ara, Huram birye, ayukumna kisok ati, perunggu deice arye, urasin teleb ning bitinye memepdeibuk. Aning bitinye bukni, tonok-tonok cang ara, utam arye dipdongobuka eitam ara, 2,2 meter memebuk.
17 Ayukumna bitinye, nong bol deice arye, urasin teleb ubuka memebuk. Ara, Huram birye, perunggu deice, rantai tapu urasin atonun ning wibukabukce, atiang ayukumna iknamikak nirya, bol deice bukni, mouse tam memepdeibuk. Tonok perunggu ayukumna ikamuka deice ara, rantai tapu wilamak urasin atonun ning, tekbarye kibuka wibuk. Awibuk rantai tapu urasin atonun ning amu tam ara, yo duk, el si ‘buah delima’ arye ton memepdeibukce, taplakuka kwanipdeibuk. Aning atonun, otam perunggu bitinye, ayukumna ikamuka deice ara, urasin atonun memepdeibuk.
18 Acang ayukumna deice tam delina ati memebuk ning, nong bol deice ara, urasin teleb kina ati, perunggu arye, yo duk el si delima yo duk moulamle urasin atonun ubuka, bitinye memepdeibuk. Aning atonun, otam perunggu bitinye ning, ayukumna ikamuka deice ara, neik touk memepdeibuk. 19 Winida, Allah el si erena ap, arena ap ati, domik aik bai tam bukni, anyaik urasin tam ara, cang perunggu ayukumna deice tam memepdeibuk ning, el urasin ara, yo kait atonun ning, el si Bunga Bakung, el kait lelamle atonun memepdeibuk. Aning el tikilin cang ara, 1,8 meter kibuk.
20 Aning perunggu arye memepdeibuka, tiang ayukumna ikika ara, bol deice nirya, delima yo duk moulamle touk kipdeibukce, el yupa ara, dua ratus (200) memepdeibuk. Aning ara, yakna bitinye kintinip deibuk. 21 Kat ning perunggu arye memepdeibuk ayukumna bitinye ap, mouse tam bakung bunga kita lalamla atonun ubuka deiamukak nirya ap, bunga arye kwanibuka, merekeiamuk ning nirya ap ara, adice deibuk. Ayukumna yo nirya ara, Allah el si eren aik, bublan wekelban sukum ikeibuk, ton ning ara, iknaipye tam ikdeibukce, ayukumna el si ara, ‘Yakin’ nyabuk. Ton ayukumna ara, dabu tam ikukce, el si ara, ‘Boas’ nyabuk.
22 Ura, arup nyapman touk, cang perunggu arye memepdeibuk, ayukumna deice tam deibuk ning, el urasin ara, bunga Bakung el kait atonun memepdeibuk. Huram birye, anyaik ayukumna ati, perunggu arye moubuka, ikina ati winibuka pil dobukce, sirya dakuk.
Perunggu deice arye, mek delinak, memebuk yupu
23 Ura, Huram birye, weik mek makau bumang ning ton, perunggu deice arye memepdeibuk. Amemebuk mek makau kiklilden ning ara ani. El noutam ara, 2,2 meter kibuk. Kwanim tam arye dipdongobuka, sirik tam, el kiklilden ning ara, 4,4 meter kibuk. El nong nirya ati, antanapdongobuka kiklildening 13,2 meter kibuk. 24 Amek makau bol deice sirya tam ara, labu duk mulamla atonun, yakna bitinye kibuka, puturupdeibuk. Aputurupdeibuk ning ara, amek makau dona ati, donmok talak arye kintinip deipmok labu ato ning babye, tonok meter kiklipdeyukce, labu urasin atonun taplak deibukce, anirye dipdongobuka, otam tonok meter ton kiklipdeyukce, labu duk urasin atonun, tonap taplak deibukce, darapdongobuk. Aning atonun winibuka, amek makau dana tam nirya, antanapdongobuka deibuk. Amek makau nong ap, amakau deice labu duk atonun ap ara, tonok talak aryuk dopdeibuk.
25 Adopdeibuk mek kwen bumang makau el si ara, ‘Laut’ nyabuk. Amek makau dobuka, perunggu deice arye, memepdeiamuk sapi basam 12 ara, aning deice bobinuka dopdeibuk. Sapi basam 12 urasin atonun uamuk bukni, asapi basam winilye ara, sik urasin iknapye tam ton kintinip deibuk. Ton winilye ara, keting wekelban tam, urasin kintinibuka deiamuk. Ton ning ara, dabu tam ton urasin kipdeiamuk. Tonda winilye ning ara, keting panalyangan tam urasin memebuka deiamuk. Akoklombarye sapi basam urasin atonun ning deice tam ara aweik mek makau bumang makau ara dobuka, sik balye deice deibuk. 26 Bukam weik mek makau bola ara, 75 milimeter ubuk. Bukam weik mek makau bai tam ara, mitik mek makau el si cangkir, el talena ati moubuka delilamak atonun winibuka deibukce, bunga si Bunga Bakung, kita lalamleto ning dobuka memepdeibuk. Adobuka deibuk mek makau, mek kwen makau noutam mek delina ara, winipmanto empat puluh ribu (40,000) liter atonun kintinip deibuk.
Perunggu arye, weik mek makau delina ati, tuku deice bana ning, el si kereta, ton dobuka deibuk yupu
27 Huram bira perunggu deice arye, weik mek makau bobana ati, sepuluh kereta memepdeibuk. Akereta el cang yuk-yuk ara 1,8 meter. El pala ara, 1,8 meter. El tikilin yo cang ara, 1,3 meter kintinibuk. 28 Amek makau bobana ati, kereta yuk-yuk ara, yo lakase yapla yuk-yuk Huram birye, ayo lakase mouse tam, dana-dana urasin ara, pia teleb kipdeibukce, darapdongobuka, antapdongobuk. 29 Ayo lakase deice ara, singa kuse urasin ato ning ap, sapi basam urasin ato ning ap, malaikat urasin ato ning, el si Kerub ap, memepdeibukce, teleb-teleb kipdeibuk. Ayo lakase deiyok tam babye, urup tam babye, sapi basam urasin ap, singa kus urasin ato ning ap, puturupdeibuk. Winibukce, bunga keit lalamle atonun kibuka, diripkwetebuk.
30 Aweik mek makau bobana ati, kereta uamukak ara, sik yan, yuk-yuk roda dumbarye, dumbarye kibuka, perunggu arye moubuka mememamuk. Tonda, akereta yan tam roda, noutam dukulongon ning babye, perunggu deice aryuk memepdeiamuk. Tonda kereta memepdeibuka, sirik tam kup-kup dumbarye nirya ara, kereta talin sukum, katana ati perunggu aryuk mek yangalin ning, el si baskom ton, el barin ning ton memepdeiamuk. Winibukce, aning el bol deice bai tam nirya ara, urasin teleb una ati, bunga kait teleb ning arye taplak deiamuk.
31 Barilina ati, ayukumna dumbarye iknamikak eitam ara, weik yo pala bisik botopdeibukce, adeice ara, weik mek makau, yangalin ning deiamuk. Ayangalin ning barina ati, ikamuk ayukumna dumbarye deice ara, weik pala yo lakase papan deiamuk ning, el tikilin yo yuk-yuk dekna ati, laka kina cang ara, 44 sentimeter kiamuk. Outam ati ara, yuk-yuk akunum kiklibuka ara, 22 sentimeter uamuk. Adeiamuk papan yo lakase kup-kup dam nirya ara, urasin, teleb una ati, puturubuka segi empat nyalamak touk deiamuk.
32 Ayo lakase amu tam ara, amek makau bobana ati kereta, el roda yan, el cang nirya ara, 66 sentimeter deice arye, kiklibuka domuk. Adomuk ning ara, papan yo lakase amu tam deiamuk. Akereta el roda yan ban ning ap, aroda ati anoutam dukdongobuka, talen ning el si poros roda ap, akereta nong ap ara, tonok nong atonunuk memepdeibuk.
33 Aroda yan urasin nirya ara, kereta perang urasin atonunuk, ubuka memepdeiamuk. Roda yan kwanibuka, bum kipdeiamuk ning babye, kup-kup dana-dana belyamuk ning babye, roda yan barina ati memelamak ning babye, tonda, roda noutam balamle ning memepdeiamuk ning nirya ara, perunggu aryuk memepdeiamuk. Aning-aning nirya ara, perunggu deiyok ning, uku deice deibikba, uku buk arye, buppu weik kibukce, mitang ubukba, perunggu amitang ning dobuka, aning urasin atonun puturubuka, deiamik ning pum tam dongobikba, el urasin ap, nong ap, tonok kibukce, akunum teleb ubukba, dobuka deibuk. 34 Amek makau bobana ati, kereta domuk ning ara, el talena ati, ayukumna yo urasin ato ning ton, dumbarye amu tam kup-kup dana-dana nirya ara, baribuka talena ati domuk. Ayukumna yo nirya ara, akereta nong, tonok kipdeibukce, memepdeiamuk. Nong yuk-yuk kum dopdeiamuk.
35 Akereta eitam kup-kup sirik tam nirya, akunum kiklibuka ara, 22 sentimeter atonun kibuka domuk. Tonda, barilongona ati, ayukumna yo urasin ato ning ap, pala yo lakase ato ning ap nirya ara, akereta ap, nong tonok kipdeibukce, memepdeiamuk. Aning nirya nong yuk-yuk dobuka, delina kume. Nong tonok dem kibuk. 36 Barina ap, talena ap ati, ikamik ayukumna yo urasin ato ning nirya ap, papan yo lakase ato ning ap, aning deice ap nirya ara, urasin teleb una ati, gambar puturupdeibuk. Ara, Kerub urasin ato ning ap, singa kus urasin atonun ap, daun palem ap, tabakuka taplak deibukce domuk. Lo ton uamukak ara, aninguk taplakdebuka domuk. Adopdeibuk kup-kup tam ara, bunga keit urasin aton ning arye, deibuka antanap dongomuk.
37 Aweik mek makau bobana ati, kereta aik dona ati ara, neiktoto dem kibukce, dukdongobuka nong tonok kipdeibuk. Aning kereta takubarye (10) nirya ara, sik urasin ap, kiklina ap nirya ara, urasin tonok kipdeibukce, dopdeibuk. 38 Aning upmok touk, Huram birye weik mek makau yangalina ato ning, el si baskom, sepuluh (10) ton dopdeibuk. Tonok yangalin ning ara, tonok mek makau bobana kereta ati, dopdeibuk. Yangabuka deilin ning baskom, el noutam wilina ati ara, 1,8 meter. Tonda, mek lin ning ikin ara, 800 liter memebuk. 39 Huram birye, weik mek makau bobana ati, kereta pamubarye ara, Allah Yahweh si eren aik ati utam, selatan tam dopdeibuk. Atonun, pamubarye ton dobuka, itam ap, outam tam ap ton dopdeibuk. Bumang weik mek makau, perunggu deice arye dobuk ning ara, adomuk ning dobuka keting panalyangan tam wilinak ap, iknapye tam outam wilinak ap, asukum noutamak dopdeibuk.
Allah Yahweh, el si eren aik noutam una ning nirya ati, si sekuka deibik yupu
40-45 Huram arye yangabuka yulamak ning kuali ap, tuku palin ning sikop ap, mek din makau mitik ning mangkok ap, dopdeibuk. Aning nirya ara, Huram birye, Allah si eren aik ati, Raja Salomo si deice arye, aning nirya akunum pil dobuka sirya dakuk. Anyaik noutam una ati, dopdeibuk ning nirya ara ani.
Weik yo ayukumna bitinye dopdeibuk. Ayukumna yo bitinye ikik ning deiyok eitam mouse ara, urasin teleb kibuka dobuk ayukumna yo dup tam ara, mangkok mek makau urasin ato ning arye dobuka kintinibuk. Tonda, ayukumna deice nirya ara, rantai tapu arye wibuk. Tonda, empat ratus yo duk, el si delima urasin ato ning, perunggu arye ton doprobukce, lonceng nyelamak ning bitinye memepdeibukce, rantai tapu arye wibuka, ayukumna yo mouse tam deipmok sukumuk binuka, dopdeibuk ning ara, takunya dam outam ton dopdeibuk. Tonda, weik mek makau bobana ati, takunya arye outam kereta dobukce, adice arye, yangalin ning ton takubarye (10) dopdeibuk. Weik bumang makau perunggu deice arye ton dopdeibuk. Amek makau talena ati, sapi basam atonun, dua belas ton perunggu deice arye dopdeibuk. Kuali ap, mitik sikop ap, tonda mitik mek makau mangkok-mangkok ton dobukce, kintinibuk. Allah Yahweh el si erena aik noutam, Allah si erena pil don ning nirya ara, Raja Salomo birye, “Winibuka dopdeipnamnilame,” nyapdeiamuk ning nirya ara, Huram birye akunum dobuka memebuk. Ara, perunggu deice arye cakuka dobukce, urasin teleb una ati, alam-alam apdeibukba, mel parabuk.
46 Raja Salomo birye, “Aning nirya ara, winibuka-winibuka memep deipnamnilyame,” nyapdeiamukba, logam deice arye donmok mutuku ara, Sartan mutuku ap, Sukot mutuku ap arye, dobuka delilamuk. Ara, Yordan mek dumanak binuka dolamuk. 47 Raja Salomo birye, perunggu deice pil memebik ning nirya, ‘El ikin ara, yata barye do?’ tenen, “Nukuka dipdenamlume,” nyana ara, kum nyabukba, nukuka kum bikik. Ara, aning nirya pia weik kum nukmanto ati ubik. Ati ara, aning sik ikin nirya ara, nukuka kum bikik.
48-50 Raja Salomo birye Huram biti, Allah el si eren aik noutam pil dona ap, una ap ati yala yuk ning ara, kat ning emas deice arye, dalamik ning ton, “Dopnalyame,” nyabuka, arukukba dolamuk. Anyaik noutam ton delina ati, “Aning ara, winibuka dopnalyame,” nyapdeiamikba, dobuk ning si ara ani. Allah ati aren ning deliyanganak ara, mesba ap, roti kwaning delilyanga ati meja ap, ton memepdeibuk. Abitinye ara, emas deice arye memepdeibuk. Tonda, upna lana deiyok ning takubarye (10) memepdeibuk.
Aning ara dobuka, Allah Yahweh el Pia Lek Aik, mem aik noutamuk deibuk. Ara, pamubarye ton bokuka eitam, iknapye tam ton deibuk. Ton pamubarye ara, bokuka outam dabu tam ton deibuk. Bunga keit arye, ton dobuka, mitik-mitik upna deiamnaba, lan ning ton dobuka, memebik. Ton dobuk ning ara, mek buppu din makau ap, pelita uku dinibikiba, dinmalye ning ati, batakna ning ton dobuk. Mek buppu dimakau ap, mek kwebuka din makau yala-yala ap, yangabuka lukulin ning ara, siltong teleb nyan ning ara, dupa deice delinak ati, ton dobuk. Uku kalum arekra dobuka delina ati, piring ton dobuk. Allah el mem aik, Pia Lek Aik noutam, bublan don engsel ap, buru tam bublan don ning engsel ap, ton dobuk.
51 Raja Salomo birye, Allah Yahweh si eren aik ati akunum dobukura, emas ap, perak ap, yuk-yuk bona nirya, delin aik noutam ton memepdeibuk. Ara, Salomo el li koproba, Raja Daud birye, Allah si erena ati arelamuk ning nirya ara, dobukabukce, anyaik pum tam, deipnamuk ati, anyaik bobinuka deibuk.