A ebꞌ yic Dios yedꞌ ebꞌ man̈ yicoc
4
Ex xajanabꞌil vuuj,
tato ay ebꞌ tzꞌalani to a yic Dios jun syalel ebꞌ,
man̈ e cha eyabꞌ dꞌa ebꞌ dꞌa elan̈chamel.
Yovalil tze bꞌabꞌlaj aqꞌuej proval ebꞌ tato yel a slolonel Dios tzꞌecꞌ yalel ebꞌ.
Yujto tzijtum ebꞌ tzꞌesan van yecꞌ dꞌa jun yolyibꞌan̈qꞌuinal tic,
stzꞌacan yaloch sbꞌa ebꞌ schecabꞌoc Dios.
2 Palta ol val dꞌayex chajtil tzꞌaj cojtacaneli tato yel ayoch Yespíritu Dios dꞌa ebꞌ.
Tato syal ebꞌ:
A Jesucristo ul yacꞌnacoch sbꞌa animail,
tato xchi ebꞌ,
aton ebꞌ chiꞌ ayoch Yespíritu Dios dꞌay.
3 Palta a pax ebꞌ man̈ ichoc taꞌ yalan yuj Jesús,
malaj Yespíritu Dios ayoch dꞌa ebꞌ syal chiꞌ,
yujto lajan spensar ebꞌ yedꞌ jun ayoch ajcꞌolal dꞌa Cristo.
Eyabꞌnacxo to a jun ajcꞌool chiꞌ dꞌay,
yovalil ol pitzvoc chaan̈.
A ticnaic,
ayxo ebꞌ lajan spensar icha ol yutoc sbꞌa chiꞌ.
4 Ex xajanabꞌil vuuj,
yic on̈xo Dios ticnaic.
Ayxocan ebꞌ tzꞌesan chiꞌ dꞌa yalan̈ cuuj,
yujto a Yespíritu Dios ayoch dꞌayon̈,
ecꞌto spoder dꞌa jun ayoch dꞌa ebꞌ yic yolyibꞌan̈qꞌuinal tic.
5 A ebꞌ tzꞌesan chiꞌ,
yic yolyibꞌan̈qꞌuinal tic yaj ebꞌ.
Yuj chiꞌ an̈ej juntzan̈ yic yolyibꞌan̈qꞌuinal tic syal ebꞌ.
Axo ebꞌ yic yolyibꞌan̈qꞌuinal tic scha yabꞌ ebꞌ dꞌa ebꞌ.
6 Palta a on̈xo tic,
yic on̈xo Dios.
Yuj chiꞌ a ebꞌ yicxo Dios quedꞌoc,
syacꞌoch schiquin ebꞌ dꞌa tas scalaꞌ.
Axo ebꞌ man̈ yicoc Dios jun,
max yacꞌochlaj schiquin ebꞌ yabꞌan dꞌayon̈.
Icha chiꞌ scutej cojtacaneli,
mach ebꞌ ayoch Espíritu yel syal dꞌay,
mach pax ebꞌ to a espíritu tzꞌesan ayoch dꞌay.
Xajanabꞌil on̈ yuj Dios
7 Ex xajanabꞌil vuuj,
co xajanejec co bꞌa junjun on̈,
yujto a bꞌaj sco xajanej co bꞌa chiꞌ,
a dꞌa Dios scoti.
Tato sco xajanej co bꞌa,
yuninal on̈xo Dios.
Tato icha chiꞌ,
val yel cojtacxo Dios chiꞌ syal chiꞌ.
8 Tato max co xajanej co bꞌa,
val yel manto cojtacoc Dios chiꞌ syal chiꞌ,
yujto a Dios chiꞌ sxajanan taxon anima.
9 Ix schꞌox Dios to xajanabꞌil on̈ yuuj,
yujto ix scheccot jun pitan̈ Yuninal,
ix ul yacꞌoch sbꞌa dꞌa yol scꞌabꞌ chamel dꞌa yolyibꞌan̈qꞌuinal tic,
yuj yacꞌan co qꞌuinal dꞌa juneln̈ej.
10 Icha tic tzꞌaj scheclajeli to dꞌa val yel xajan on̈ yuj Dios:
Man̈oc on̈ ix co bꞌabꞌlaj xajanej Dios,
palta to Aꞌ ix on̈ xajanani ayic ix schecancot Yuninal ul yacꞌcham sbꞌa stojoloc co mul.
11 Ex xajanabꞌil vuuj,
tato icha chiꞌ ix aj on̈ xajanan Dios chiꞌ,
yovalil sco xajanej co bꞌa junjun on̈.
12 Vachꞌchom malaj junoc mach ix ilan Dios juneloc,
palta tato sco xajanej co bꞌa,
ayn̈ejoch Dios chiꞌ dꞌayon̈ syal chiꞌ,
yuj chiꞌ jabꞌjabꞌil scheclajel scꞌolbꞌal Dios chiꞌ dꞌayon̈
13 Yuj Yespíritu ix yacꞌoch cajan dꞌayon̈,
yuj chiꞌ cojtac to ayon̈ och dꞌay,
ayn̈ejpaxoch dꞌayon̈ junjun on̈.
14 A on̈ tic quilnac val Yuninal Dios,
yuj chiꞌ scacꞌ val testigoal yuuj to a co Mam Dios checjinaccot Yuninal chiꞌ yic tzul scolel ebꞌ anima ay dꞌa yolyibꞌan̈qꞌuinal tic.
15 Tato a on̈ scalaꞌ:
A Jesús Yuninal ton Dios,
tato xco chi,
a Dios ayoch dꞌayon̈,
ayn̈ej on̈ pax och dꞌay.
16 Scacꞌanoch dꞌa co cꞌool to a Dios xajan on̈ yuuj.
Cojtac val jun tic sicꞌlabꞌil yujto a Dios chiꞌ sxajanan taxon anima.
Yuj chiꞌ tato sco xajanej co bꞌa a on̈ tic,
ay on̈ ton och dꞌay syal chiꞌ,
ayn̈ejpaxoch dꞌayon̈.
17 Icha chiꞌ tzꞌaj svachꞌ tzꞌacvi co xajanan co bꞌa,
yic vachꞌ ayic ol ja scꞌual schꞌolbꞌitaj yaj ebꞌ anima,
man̈ ol on̈ xivlaj dꞌa yichan̈ Dios,
yujto icha sbꞌeybꞌal,
icha chiꞌ scutej co bꞌeybꞌal dꞌa yolyibꞌan̈qꞌuinal tic.
18 Tato yel sco xajanej Dios,
maxtzac on̈ xivlaj,
yujto ayic sco xajanan Dios chiꞌ,
tzꞌicꞌjiel co xivcꞌolal.
Tato tzon̈ xivi,
syalelcꞌochi to xivnac on̈ dꞌa jun yaelal ol cot yuj yoval scꞌool Dios.
Yuj chiꞌ a ebꞌ tzato xivi,
ayto palta stzꞌacvi xajanan Dios chiꞌ ebꞌ.
19 Sco xajanej Dios ticnaic,
yujto Aꞌ ix on̈ bꞌabꞌlaj xajanani.
20 Qꞌuinaloc tato scalaꞌ to xajan Dios cuuj,
palta schichonpaxoch co cꞌool dꞌa junoc quetanimail,
quesn̈ej syal chiꞌ.
Tato max co xajanej ebꞌ quetanimail squiloch chiꞌ,
¿tas val ol cutoc co xajanan Dios max quilochlaj?
21 Yuj chiꞌ yacꞌnaccan jun schecnabꞌil dꞌayon̈ tzꞌalan icha tic:
A mach xajanan Dios,
yovalil xajanej ebꞌ yetanimail,
xchi.