Syal scan juntzan̈ chucal dꞌa yalan̈ cuuj
5
Tato scacꞌoch dꞌa co cꞌool to a Jesús aton Cristo,
yuninal on̈xo Dios syal chiꞌ.
Tato sco xajanej junoc anima,
an̈ejtonaꞌ sco xajanej ebꞌ yuninal jun anima chiꞌ.
2 Yuj chiꞌ cojtac to sco xajanej co bꞌa a on̈ yuninal on̈ Dios tic,
tato sco xajanej Dios,
sco cꞌanabꞌajanpax tas syalaꞌ.
3 Tato dꞌa val yel sco xajanej Dios,
sco cꞌanabꞌajej schecnabꞌil.
A juntzan̈ schecnabꞌil chiꞌ,
man̈ ajaltacoc co cꞌanabꞌajani.
4 A juntzan̈ chucal ay dꞌa yolyibꞌan̈qꞌuinal tic,
cannacxo dꞌa yalan̈ cuj a on̈ yuninal on̈xo Dios tic.
Yujto scacꞌoch Dios dꞌa co cꞌool,
yuj chiꞌ scan juntzan̈ chiꞌ dꞌa yalan̈ cuuj.
5 An̈ej ebꞌ tzꞌacꞌanoch dꞌa scꞌool to a Jesús Yuninal ton Dios,
an̈ej ebꞌ chiꞌ,
syal scan jun chucal chiꞌ dꞌa yalan̈ yuuj.
Syacꞌ testigoal sbꞌa Dios yuj Yuninal
6 A Jesucristo ulnaquecꞌ dꞌa yolyibꞌan̈qꞌuinal tic.
Ul yacꞌannac bautizar sbꞌa.
Elnac pax schiqꞌuil.
Man̈ ton̈ejoc ul yacꞌnac bautizar sbꞌa,
elnac pax schiqꞌuil.
A Yespíritu Dios syacꞌ testigoal sbꞌa yuuj,
to Yuninal ton Dios.
A Yespíritu chiꞌ,
te yeln̈ej syalaꞌ.
7-8 Syacꞌ testigoal sbꞌa Espíritu yuuj.
Ay pax chabꞌxo syacꞌ testigoal sbꞌa yuuj,
aton sbautismo yedꞌ schiqꞌuil ix eli.*
A oxeꞌ tic junlajan schaan sbꞌa yalani to a Jesucristo Yuninal ton Dios.
9 Sco cha tax cabꞌ tas syal ebꞌ anima dꞌa yolyibꞌan̈qꞌuinal tic,
ocxom val tas syal Dios ecꞌalxo yelcꞌochi.
A val lacꞌan ix acꞌan testigoal to Yuninal.
10 A on̈ scacꞌoch Yuninal Dios dꞌa co cꞌool,
cojtac sicꞌlabꞌil to yel syal Dios yuj Yuninal chiꞌ.
Axo ebꞌ max acꞌanoch Yuninal chiꞌ dꞌa scꞌool,
van yalan ebꞌ to syesej Dios,
yujto max yacꞌoch ebꞌ dꞌa scꞌool tas syal yuj Yuninal chiꞌ.
11 Aton jun tic yalnaccan Dios to syacꞌ co qꞌuinal dꞌa juneln̈ej.
Yujn̈ej Yuninal syacꞌ jun co qꞌuinal chiꞌ.
12 Yuj chiꞌ,
tato ayxo och Yuninal Dios dꞌayon̈,
ayxo co qꞌuinal dꞌa juneln̈ej.
Axo ebꞌ malaj Yuninal Dios chiꞌ dꞌay,
malaj sqꞌuinal ebꞌ dꞌa juneln̈ej.
Ay co qꞌuinal dꞌa juneln̈ej
13 Tzin tzꞌibꞌejbꞌat jun tic dꞌayex,
a ex ix eyacꞌoch Yuninal Dios dꞌa e cꞌool,
yic vachꞌ ol nachajel eyuuj to ay e qꞌuinal dꞌa juneln̈ej quedꞌoc.
14 Yuj chiꞌ juncꞌolal tzon̈ lesalvi dꞌa Dios,
yujto cojtac to yaln̈ej tas sco cꞌan dꞌay,
ol yabꞌi,
tato sco cꞌan icha sgana.
15 Cojtac to aꞌ tzꞌabꞌan co lesal.
Yuj chiꞌ cojtac paxi to aꞌ tzꞌacꞌan tas sco cꞌan dꞌay.
16 Qꞌuinaloc tato tzeyil junoc quetcreyenteal van scꞌulan junoc chucal,
palta man̈ yicoclaj chamel jun chucal chiꞌ,
tato tzex lesalvi yuuj,
axo Dios ol acꞌan sqꞌuinal.
Palta ay chucal tojoln̈ej co cham yuuj.
Max val-laj dꞌayex tato tzex lesalvi yuj juntzan̈ ebꞌ scꞌulan jun chucal chiꞌ.
17 Masanil juntzan̈ chucal,
mul dꞌa sat Dios.
Palta ay juntzan̈ chucal max on̈ chamlaj yuuj.
18 Cojtac tato yel yuninal on̈xo Dios,
maxtzac co bꞌeybꞌalej chucal,
yujto a Yuninal Dios tzon̈ tan̈vani.
Yuj chiꞌ max yal on̈ yixtan vin̈ diablo.
19 Cojtac to yic on̈xo Dios.
Axo masanil ebꞌ yicto yolyibꞌan̈qꞌuinal tic,
aytooch ebꞌ dꞌa yol scꞌabꞌ vin̈ diablo.
20 An̈ejtonaꞌ,
cojtac to ulnaquecꞌ Yuninal Dios dꞌa yolyibꞌan̈qꞌuinal tic.
A ix acꞌan jacvoc co pensar,
yic vachꞌ scojtaquejel Dios te yel.
Yuj chiꞌ a ticnaic,
ayon̈xooch yedꞌ jun te yel,
aton Jesucristo Yuninal.
A jun Yuninal chiꞌ,
aton Dios te yel.
A tzꞌacꞌan co qꞌuinal dꞌa juneln̈ej.
21 Yuj chiꞌ,
ex xajanabꞌil vuuj,
man̈ eyacꞌoch e pensar dꞌa juntzan̈ comon dios.