A ebꞌ yuninalxo Dios
3
Naec to te xajan on̈ yuj co Mam Dios,
yujto tzon̈ yaloch yuninaloc.
Yuninal on̈xo ton jun.
A ebꞌ ay dꞌa yolyibꞌan̈qꞌuinal tic,
max nachajel-laj yuj ebꞌ tato yuninal on̈xo Dios,
yujto maj yojtaquejel Dios ebꞌ.
2 Ex xajanabꞌil vuuj,
yuninal on̈xo Dios ticnaic.
Maxto nachajel-laj cuuj chajtil ol on̈ aj elcꞌochoc.
Palta cojtac to ayic ol jax Jesucristo,
lajan ol on̈ aj yedꞌoc,
yujto ol quilaꞌ chajtil yilji.
3 A on̈ mach on̈ scacꞌoch juntzan̈ sval tic yipoc co cꞌool,
cactejeccan masanil chucal,
yujto a Cristo malaj chucal dꞌay.
4 A ebꞌ sbꞌeybꞌalan chucal,
man̈ton vanoc scꞌanabꞌajan schecnabꞌil Dios ebꞌ.
Yujto a ebꞌ max cꞌanabꞌajan juntzan̈ checnabꞌil chiꞌ,
a chucal scꞌulej ebꞌ.
5 Cojtacxo to a Jesucristo ix ulecꞌ dꞌa yolyibꞌan̈qꞌuinal tic yic syicꞌanel co mul.
Cojtac paxi to malaj jabꞌoc chucal ayoch dꞌay.
6 Yuj chiꞌ tato junxon̈ej caj yedꞌoc,
maxtzac yal sco bꞌeybꞌalej chucal.
Palta tato an̈ejaꞌ co bꞌeybꞌalan chucal jun,
syalelcꞌochi to man̈ on̈ ayoc ochlaj yedꞌoc,
manto cojtacoclaj.
7 Ex xajanabꞌil vuuj,
malajocabꞌ junoc mach tzex acꞌan musansatil.
Tato tojol syutej sbꞌa junoc mach,
tojol ton spensar icha spensar Cristo,
yujto a Cristo chiꞌ tojol spensar.
8 Palta tato ay mach an̈ejaꞌ sbꞌeybꞌalan chucal,
yictaxon vin̈ diablo yaji.
Yujto a vin̈ diablo chiꞌ,
scꞌulejtaxon chucal vin̈ dꞌa yichbꞌanil.
Yujton jun chiꞌ ix ulecꞌ Yuninal Dios dꞌa yolyibꞌan̈qꞌuinal tic,
yic syacꞌ lajvoc smasanil tas scꞌulej vin̈ diablo chiꞌ.
9 Tato yel yuninal on̈xo Dios,
man̈xo ol co bꞌeybꞌalej chucal,
yujto qꞌuexbꞌilxo co pensar yuuj,
axo yic ayoch dꞌayon̈.
Maxtzac yal pax co bꞌeybꞌalan chucal,
yujto yuninal on̈xo.
10 Icha chiꞌ tzꞌaj scheclajeli,
mach ebꞌ yuninalxo Dios,
mach pax ebꞌ yuninalto vin̈ diablo.
Tato man̈ tojoloc scutej co bꞌeybꞌal,
tato max co xajanej ebꞌ quetcreyenteal,
val yel man̈ on̈ yicoc Dios.
Yovalil sco xajanej co bꞌa
11 A jun checnabꞌil svalbꞌat tic dꞌayex,
atax ix ex och yuninaloc Dios,
ix ex och ijan eyabꞌani:
Sco xajanejec co bꞌa,
xchi jun checnabꞌil tic.
12 Yuj chiꞌ max yal-laj cutan co bꞌa icha yutejnac sbꞌa vin̈aj Caín.
A vin̈ chiꞌ,
a vin̈ diablo ay yic vin̈,
yuj chiꞌ smilnaccham vin̈ yucꞌtac vin̈.
Icha chiꞌ yutejnac sbꞌa vin̈,
yujto man̈ tojoloc sbꞌeybꞌal vin̈,
axo vin̈ yucꞌtac vin̈ chiꞌ,
tojol sbꞌeybꞌal vin̈.
13 Ex vucꞌtac ex vanabꞌ,
man̈ eyacꞌ sat e cꞌool tato tzꞌoch ebꞌ yic yolyibꞌan̈qꞌuinal tic ajcꞌolal dꞌayex.
14 A dꞌa yalan̈taxo,
yic on̈ chamel,
axo ticnaic,
toxo ix acꞌji co qꞌuinal dꞌa juneln̈ej.
Cojtac to ix co cha co qꞌuinal tic yujto sco xajanej co bꞌa yedꞌ ebꞌ quetcreyenteal.
Tato max co xajanej co bꞌa yedꞌ ebꞌ,
yic on̈to chamel syal chiꞌ.
15 Tato an̈ejaꞌ schichonoch co cꞌool dꞌa ebꞌ quetcreyenteal,
macꞌumcham anima on̈ dꞌa yichan̈ Dios.
Palta cojtac to malaj junoc macꞌumcham anima ay sqꞌuinal dꞌa juneln̈ej.
16 Cojtac chajtil tzꞌaj on̈ xajanan Dios to ix yacꞌoch sbꞌa Jesucristo dꞌa yol scꞌabꞌ chamel cuuj.
Yuj chiꞌ yovalil ichocabꞌ taꞌ scutej co xajanan ebꞌ quetcreyenteal,
ta syalaꞌ bꞌecanocabꞌ co cꞌool co cham yuj ebꞌ.
17 Qꞌuinaloc ay tas ay dꞌayon̈,
axo squilan junoc quetcreyenteal te mebꞌaꞌ,
tato malaj jabꞌoc tas scacꞌ dꞌay,
man̈ xajanoc co Mam Dios cuuj syal chiꞌ.
18 Ex xajanabꞌil vuuj,
man̈ ton̈ejoc scal yedꞌ co tiꞌ to sco xajanej co bꞌa.
Yovalil tzon̈ colvaj dꞌa ebꞌ quetcreyenteal.
Icha chiꞌ scutej co chꞌoxaneli to dꞌa val yel sco xajanej co bꞌa.
Man̈xa co xivcꞌolal dꞌa yichan̈ Dios
19 Tato sco xajanej co bꞌa,
cojtac to yic on̈xo jun cꞌaybꞌubꞌal te yel.
Tato icha chiꞌ,
man̈xa co xivcꞌolal dꞌa yichan̈ Dios
20 ayic sco naani to ay co mul yuj junoc tas chuclaj ix co cꞌulej.
A Dios ecꞌto yojtac dꞌa quichan̈.
Val yel,
Aꞌ tzꞌojtacaneli yujto yojtac smasanil.
21 Yuj chiꞌ,
ex xajanabꞌil vuuj,
tato cojtac to vachꞌ co bꞌeybꞌal dꞌa yichan̈ Dios,
max on̈ xiv co lesalvi dꞌay.
22 Tato icha chiꞌ,
yaln̈ej tas sco cꞌan dꞌay,
ol yacꞌ dꞌayon̈,
yujto sco cꞌanabꞌajej schecnabꞌil,
van co cꞌulanpax icha tas scha scꞌool.
23 Syal schecnabꞌil icha tic to scacꞌoch Yuninal dꞌa co cꞌool,
aton Jesucristo.
Sco xajanej pax co bꞌa junjun on̈ icha ix yutej yalan dꞌayon̈.
24 Tato sco cꞌanabꞌajej juntzan̈ schecnabꞌil chiꞌ,
junn̈ej caj yedꞌoc,
junn̈ej pax yaj quedꞌoc.
Cojtac to ayn̈ejoch dꞌayon̈,
yujto yacꞌnac Yespíritu dꞌayon̈.