A Cristo tzꞌacꞌanoch co tiꞌ dꞌa Dios
2
Ex xajanabꞌil vuuj,
tzin tzꞌibꞌejbꞌat juntzan̈ tic dꞌayex yic vachꞌ maxtzac e cꞌulej chucal.
Palta tato ay bꞌaj tzꞌoch co mul,
ay jun van yacꞌanoch co tiꞌ dꞌa Dios,
aton Jesucristo,
te tojoln̈ej spensar.
2 Icha val junoc silabꞌ,
icha chiꞌ ix aj scham Cristo yuj stupanel co mul.
Man̈ yujocn̈ej co mul a on̈ tic ix chami,
palta yuj smul masanil anima ay dꞌa yolyibꞌan̈qꞌuinal tic,
yuj chiꞌ ix chami.
3 Tato sco cꞌanabꞌajej tas schecji co bꞌeybꞌalej yuj Dios,
cojtacton Dios sicꞌlabꞌil syal chiꞌ.
4 Tato scalaꞌ to cojtacxo Dios,
palta max co cꞌanabꞌajej tas schecji co bꞌeybꞌalej yuuj,
esalvum on̈ syal chiꞌ,
malaj jabꞌoc tas yel scalaꞌ.
5 Tato sco cꞌanabꞌajej tas syal slolonel,
dꞌa val yel xajan ton Dios chiꞌ cuuj sicꞌlabꞌil.
Ichaton chiꞌ tzꞌaj cojtacaneli to ayon̈ och dꞌay.
6 Tato scal icha tic:
A in tic ay in och dꞌa Cristo,
tato xco chi,
yovalil sco bꞌeybꞌalej sbꞌeybꞌal Cristo chiꞌ.
A jun checnabꞌil nivan yelcꞌochi
7 Ex xajanabꞌil vuuj,
a jun checnabꞌil svalbꞌat tic dꞌayex,
mantoc ato ticnaic ol eyabꞌi.
Yujto a jun checnabꞌil tic,
atax ix ex och yuninaloc Dios ix alji dꞌayex.
Eyabꞌnacxo jun checnabꞌil tic dꞌa pecaꞌ to yovalil sco xajanej co bꞌa.
8 Palta svalxibꞌat jun checnabꞌil tic dꞌayex.
Van co bꞌeybꞌalan jun checnabꞌil tic icha yutejnac sbꞌa Jesucristo,
yujto a jun qꞌuicꞌalqꞌuinal ayoch dꞌayon̈,
van yecꞌcaneli,
axo jun saquilqꞌuinal te yel van yochcani.
9 Tato ay on̈ mach on̈ scalaꞌ:
Sacqꞌuinalxo yaj in pixan,
tato xco chi,
palta tato van schichonpaxoch co cꞌool dꞌa junoc quetcreyenteal,
ay on̈to och dꞌa qꞌuicꞌalqꞌuinal syal chiꞌ.
10 Tato sco xajanej ebꞌ quetcreyenteal,
ayon̈xo och dꞌa saquilqꞌuinal syal chiꞌ.
Yuj chiꞌ malaj junoc tas ayoch dꞌayon̈ tzꞌicꞌan co juvieli.
11 Palta a ebꞌ an̈ejaꞌ schichonoch scꞌool dꞌa ebꞌ yetcreyenteal,
qꞌuicꞌalqꞌuinalto yaj ebꞌ.
Icha val junoc mach sbꞌeyecꞌ dꞌa qꞌuicꞌalqꞌuinal max yil-laj bꞌaj sbꞌati,
icha chiꞌ ebꞌ,
yujto juvinaquel spensar ebꞌ.
12 Tzin tzꞌibꞌejbꞌat juntzan̈ tic dꞌayex a ex unin creyente exto,
yujto a Dios ix acꞌan lajvoc e mul yuj Jesucristo.
13 Tzin tzꞌibꞌejbꞌat dꞌayex a ex ayxo eyoch creyenteal,
yujto eyojtacxo Dios,
jun aytaxon eqꞌui atax manto bꞌo jun yolyibꞌan̈qꞌuinal tic.
Tzin tzꞌibꞌejbꞌat jun tic dꞌayex ex creyente ayxo e tecꞌanil,
yujto ix can vin̈ diablo dꞌa yalan̈ eyuuj vedꞌoc.
Tzin tzꞌibꞌejxibꞌat jun tic dꞌayex a ex unin creyente exto,
yujto eyojtacxo co Mam Dios.
14 Tzin tzꞌibꞌejxibꞌat jun tic dꞌayex ex ayxo eyoch creyenteal,
yujto eyojtacxo pax Dios,
jun aytaxon eqꞌui atax manto bꞌo jun yolyibꞌan̈qꞌuinal tic.
A exxo creyente ex ayxo e tecꞌanil,
ix ex tecꞌcꞌaji,
yujto chabꞌilxo slolonel Dios eyuuj.
Ix can pax vin̈ diablo dꞌa yalan̈ eyuuj vedꞌoc.
Yuj chiꞌ tzin tzꞌibꞌejbꞌat jun uum tic dꞌayex.
15 Max yal co xajanan jun yolyibꞌan̈qꞌuinal tic yedꞌ pax juntzan̈ tas ay dꞌay.
Tato sco xajanej,
man̈ vanoc co xajanan co Mam Dios syal chiꞌ.
16 A ebꞌ anima ay dꞌa yolyibꞌan̈qꞌuinal tic,
a juntzan̈ sgana snivanil ebꞌ snibꞌejochi.
Snibꞌanxioch juntzan̈ tas vachꞌ yilji ebꞌ.
Say ebꞌ yic nivan tzꞌaj yelcꞌochi.
A juntzan̈ bꞌeybꞌal chiꞌ,
man̈ yicoc co Mam Dios,
a yolyibꞌan̈qꞌuinal tic ay yicoꞌ.
17 A jun yolyibꞌan̈qꞌuinal tic yedꞌ juntzan̈ snibꞌejoch ebꞌ anima chiꞌ dꞌay,
eqꞌuelbꞌan̈ej yaji.
Palta tato sco cꞌulej icha sgana Dios,
pitzan on̈ dꞌa juneln̈ej yedꞌoc.
A jun lolonel yel yedꞌ jun es
18 Ex xajanabꞌil vuuj,
ay on̈ ecꞌ dꞌa jun slajvubꞌ tiempoal.
Ix cabꞌ eyedꞌoc to ay jun ayoch ajcꞌolal dꞌa Cristo ol pitzvoc chaan̈.
Ilec nabꞌi,
tzijtumxo ebꞌ ayoch ajcꞌolal dꞌay toxo ix pitzvi chaan̈.
Yuj chiꞌ cojtac to ay on̈xo ecꞌ dꞌa slajvubꞌ tiempoal tic.
19 A dꞌa co cal ix elta ebꞌ chiꞌ,
yujto toxonton man̈ quetbꞌeyumoc ebꞌ.
Qꞌuinaloc tato quetbꞌeyum ebꞌ,
ix am ajn̈ej ebꞌ quedꞌoc,
palta ix elta ebꞌ yic vachꞌ scheclajeli to toxonton man̈ quetbꞌeyumoc ebꞌ.
20 A Cristo acꞌannacoch Yespíritu Dios dꞌayex quedꞌoc,
yuj chiꞌ cojtac jun cꞌaybꞌubꞌal yel co masanil.
21 Yuj chiꞌ tzin tzꞌibꞌejbꞌat jun in carta tic dꞌayex,
man̈ yujoc to man̈ eyojtacoc jun cꞌaybꞌubꞌal yel chiꞌ tzin tzꞌibꞌanbꞌati,
palta yujto eyojtacxo.
Eyojtacpaxi to malaj junoc es ayoch dꞌay.
22 Ol val dꞌayex machtac ebꞌ tzꞌesani:
Aton ebꞌ tzꞌalani to a Jesús man̈ Cristooc,
syalelcꞌochi to man̈ acꞌbꞌiloc yopisio yuj Dios.
Aton ebꞌ chiꞌ ayoch ajcꞌolal dꞌa Cristo,
yujto max scha yabꞌ ebꞌ to a Dios ay Yuninal,
yuj chiꞌ aypaxoch ebꞌ ajcꞌolal dꞌa Dios aton Mamabꞌil.
23 A ebꞌ tzꞌalani to a Jesucristo man̈ Yuninaloc Dios,
man̈ ayococh co Mam Dios dꞌa ebꞌ.
Axo pax ebꞌ tzꞌalan jun to a Jesucristo Yuninal Dios,
ayton och Dios dꞌa ebꞌ.
24 Yuj chiꞌ,
a jun cꞌaybꞌubꞌal ix cabꞌi atax yic ix on̈ och yicoc Dios,
yovalil scacꞌn̈ejoch dꞌa co cꞌool.
Tato icha chiꞌ scutej cacꞌanoch dꞌa co cꞌool,
junxon̈ej ol on̈ aj yedꞌ co Mam Dios,
junxon̈ej ol on̈ aj pax yedꞌ Yuninal.
25 Yalnaccan Dios to ol yacꞌ co qꞌuinal dꞌa juneln̈ej.
26 Tic tzin tzꞌibꞌejbꞌat dꞌayex yuj ebꞌ sgana ex yacꞌan musansatil.
27 A Espíritu acꞌbꞌil dꞌayon̈ yuj Jesucristo,
ayn̈ejcanoch dꞌayon̈.
Yuj chiꞌ man̈ yovaliloc chꞌoc mach tzon̈ cꞌaybꞌani,
yujto a Yespíritu chiꞌ tzon̈ cꞌaybꞌan dꞌa masanil tasi.
A jun cꞌaybꞌubꞌal syacꞌ dꞌayon̈ chiꞌ te yel,
malaj jabꞌoc es ayoch dꞌa scal.
Yuj chiꞌ,
yovalil junxon̈ej tzon̈ aj yedꞌ Cristo,
yujto icha chiꞌ tzꞌaj yalan Yespíritu dꞌayon̈.
28 Axo ticnaic ex xajanabꞌil vuuj,
yovalil junn̈ej tzon̈ aj yedꞌ Cristo dꞌa masanil tiempo,
yic vachꞌ juncꞌolal tzon̈ aj dꞌa yichan̈,
man̈ ol on̈ qꞌuixvoclaj ayic ol jaxoc.
29 Cojtac to a Jesucristo te tojol toni.
Yuj chiꞌ ichocabꞌ tic tzꞌaj snachajel cuuj:
Tato tojol scutej co bꞌeybꞌal,
yuninal on̈ ton Dios syal chiꞌ.