A Sbꞌabꞌel Carta
SAN JUAN
A yabꞌixal jun tzꞌacꞌan co qꞌuinal
1
Tic sco tzꞌibꞌejbꞌat yabꞌixal jun Lolonel sbꞌi dꞌayex,
aton jun tzꞌacꞌan co qꞌuinal.
Aytax ecꞌ dꞌa yichbꞌanil.
Ix cabꞌ sloloni.
Ix quil val ochi.
Ix on̈ och qꞌuelan dꞌay,
ix co yamlan yedꞌ co cꞌabꞌ.
2 A jun tzꞌacꞌan co qꞌuinal chiꞌ,
ix chꞌoxchaj quilaꞌ,
ix quilanoch a on̈ tic,
yuj chiꞌ scacꞌ testigoal co bꞌa yuuj,
scalanpax eyabꞌi to a tzꞌacꞌan co qꞌuinal dꞌa juneln̈ej.
A jun chiꞌ,
aytaxon ecꞌ yedꞌ Dios,
palta ix chꞌoxji dꞌayon̈.
3 Yuj chiꞌ a jun ix quil chiꞌ,
jun ix cabꞌ slolon chiꞌ,
aꞌ scal dꞌayex yic vachꞌ junxon̈ej tzex aj a ex tic quedꞌoc.
Yujto dꞌa val yel vachꞌxo cacꞌan yedꞌ co Mam Dios yedꞌ Jesucristo Yuninal.
4 Yuj chiꞌ sco tzꞌibꞌejbꞌat juntzan̈ tic dꞌayex,
yic vachꞌ ol te tzꞌacvoc co tzalajcꞌolal.
Icha saquilqꞌuinal yaj Dios
5 Scalbꞌat eyabꞌi tas albꞌilcan yuj Jesucristo dꞌayon̈ to a Dios saquilqꞌuinal yaji,
malaj val jabꞌoc qꞌuicꞌalqꞌuinal dꞌay.
6 Tato scalaꞌ to vachꞌ caj yedꞌoc,
palta an̈ejaꞌ ay on̈ to ecꞌ dꞌa qꞌuicꞌalqꞌuinal,
ton̈ej scal syal chiꞌ,
a tas sco cꞌulej man̈ yeloclaj.
7 A Dios saquilqꞌuinal yaji.
Yuj chiꞌ tato a saquilqꞌuinal sco bꞌeybꞌalej,
vachꞌ cacꞌan yedꞌoc junjun on̈,
axo schiqꞌuil Jesucristo Yuninal,
aꞌ tzꞌicꞌanel masanil co chucal ayoch dꞌayon̈.
8 Tato scalaꞌ to malaj co chucal,
ton̈ej scacꞌ musansatil co bꞌa,
man̈ yeloclaj tas scal chiꞌ.
9 Tato dꞌa val yel sco cha co mulej co chucal,
a Dios sucan sat smasanil,
syicꞌanpaxel masanil tas man̈ vachꞌoc ayoch dꞌayon̈,
yujto tojol toni,
tzꞌeln̈ejcꞌoch tas syalaꞌ.
10 Tato scalaꞌ:
Malaj bꞌaj ix och co mul,
ta xco chi,
syalelcꞌochi to van cacꞌanoch Dios esalvumal.
Tato icha chiꞌ,
man̈ chabꞌiloclaj slolonel cuuj.