A snivanil yelcꞌoch acꞌ templo
2
Ayic 21 yoch yuquil uj, ix lolonxi Jehová dꞌayin Hageo in tic. 2 Ix yalani to sval dꞌa vin̈aj Zorobabel yedꞌ dꞌa vin̈aj Josué yedꞌ pax dꞌa masanil ebꞌ anima icha tic: 3 A ex eyilnacto svachꞌil yilji jun templo dꞌa yalan̈taxo, alec tato lajan yedꞌ jun sco sbꞌo tic ticnaic. Tecan tze naꞌa to malaj jabꞌoc yelcꞌochi tato sco lajbꞌej yedꞌ junxo chiꞌ. 4 Ach Zorobabel, mocabꞌ chabꞌax a cꞌool yedꞌ ach Josué sat sacerdote. Mocabꞌ chabꞌax e cꞌol ex chon̈abꞌ. Munlajan̈ec, yujto a in Jehová Yajal in dꞌa Smasanil, ayinecꞌ eyedꞌoc. 5 Ayn̈ej och Vespíritu eyedꞌoc icha ajnac vacꞌan can in tiꞌ ayic vicꞌannaquelta ebꞌ e mam eyicham dꞌa Egipto, yuj chiꞌ man̈ ex xivoc.6 Toxo val ol in tzicubꞌtan̈ej yolyibꞌan̈qꞌuinal tic, aton satchaan̈, aꞌ mar yedꞌ lum luum tic. 7 Ol laj vacꞌ ibꞌxoc masanil nación, axo sbꞌeyumal ebꞌ, ol laj yicꞌcot ebꞌ dꞌa in cajnubꞌ. A in Jehová Yajal dꞌa Smasanil svalaꞌ, ol bꞌudꞌjoquel in cajnubꞌ tic yuj sbꞌeyumal ebꞌ chiꞌ. 8 A in ay vic qꞌuen plata yedꞌ qꞌuen oro. 9 A in Jehová Yajal in dꞌa Smasanil svalaꞌ: A snivanil yelcꞌoch in cajnubꞌ tic, ecꞌto ol aj sbꞌinaj dꞌa yichan̈ jun bꞌabꞌel. A tic ol vacꞌ pitzvoc juncꞌolal, xchi Jehová, xin chi.
A Dios ix cachan ebꞌ schon̈abꞌ
10 Ayic 24 yoch sbꞌalun̈il uj, an̈ejaꞌ dꞌa schabꞌil abꞌilxo yoch vin̈aj Darío reyal, ix yal Jehová dꞌayin Hageo in tic icha tic: 11 Cꞌanbꞌej dꞌa ebꞌ vin̈ sacerdote tas syal ley yuj tas tzꞌabꞌlaji, xchi dꞌayin. 12 Yuj chiꞌ, ix valan dꞌa ebꞌ vin̈ sacerdote chiꞌ icha tic: Qꞌuinaloc ay junoc mach edꞌjinac jabꞌoc chibꞌej, pichbꞌiloch dꞌa stiꞌ spichul, yic Dios jabꞌ chibꞌej chiꞌ yujto ix acꞌji silabꞌil dꞌay. Qꞌuinaloc a stitac spichul chiꞌ tzꞌoch dꞌa ixim pan, ma dꞌa junoc vael toxo ix taji, ma dꞌa vino, ma dꞌa aceite, ma dꞌa junocxo tas vachꞌ svaji. ¿Am yuj chiꞌ yicxon̈ej Dios tzꞌajcan juntzan̈ vael chiꞌ? xin chi dꞌa ebꞌ vin̈.
—Maay, xchi ebꞌ vin̈ dꞌayin.
13 Ix valanxi icha tic: Qꞌuinaloc ay junoc mach man̈ vachꞌoc dꞌa yichan̈ ley yujto ix syam snivanil junoc chamnac, slajvi chiꞌ syaman juntzan̈ tas tzꞌabꞌlaj ix laj cal chiꞌ: ¿Tzam ixtax juntzan̈ chiꞌ icha yalan ley? xin chi. Ix tacꞌvi ebꞌ vin̈: Iꞌ... tzꞌixtaxi, xchi ebꞌ vin̈.
14 Yuj chiꞌ ix valani: A Jehová tzꞌalan icha tic: Icha chiꞌ yaj juntzan̈ anima tic. Masanil tas scꞌulej ebꞌ yedꞌ tas syacꞌ ebꞌ dꞌayin, juneln̈ej malaj svachꞌil. 15 Naec nabꞌi, tas eyaji ayic manto eyamoch e bꞌoanxiqꞌue in cajnubꞌ tic. 16 Yujto a dꞌa yic chiꞌ, ay mach bꞌat icꞌancot 20 echlabꞌoc ixim trigo yalani, axo scꞌoch bꞌaj molbꞌabꞌil ixim chiꞌ yuuj, an̈ej lajun̈eꞌ echlabꞌ ixim ayeqꞌui. An̈ejtonaꞌ ay mach sbꞌat bꞌaj smolbꞌaj vino, bꞌat yicꞌancot 50 chꞌubꞌoc yalani, axo syicꞌanqꞌueta, an̈ej 20 chꞌubꞌ sqꞌueta. 17 A in tic, ix in satel masanil tas tzeyavej yedꞌ juntzan̈ yabꞌil yedꞌ pax qꞌuen sacbꞌat, palta maj ex meltzajcotlaj dꞌayin. 18 A dꞌa jun cꞌu 24 yic sbꞌalun̈il uj tic, ix eyaqꞌuem yich in templo. 19 A ticnaic, cham val ol eyilaꞌ tas ol ex ajoc. Vachꞌchom man̈xalaj ixim trigo dꞌa yedꞌtal, ma manto yacꞌ sat teꞌ uva, teꞌ higo, teꞌ granado yedꞌ teꞌ olivo, palta a ticnaic yedꞌ yic ol bꞌeyn̈ejbꞌatoc, ol vacꞌ val in vachꞌcꞌolal dꞌa eyibꞌan̈, xchi Jehová, xin chi.
A stiꞌ Jehová ix yacꞌ dꞌa vin̈aj Zorobabel
20 An̈ejaꞌ dꞌa jun cꞌu chiꞌ ix lolon Jehová dꞌayin Hageo in tic. 21 Ix yalan icha tic: Al dꞌa vin̈aj Zorobabel sgobernadoral Judá to a in Jehová in sval icha tic: Ol in tzicubꞌtan̈ej satchaan̈ yedꞌ lum luum tic. 22 Masanil yipal juntzan̈ nación dꞌa yolyibꞌan̈qꞌuinal tic, ol laj in sateli, ol vicꞌancanel yopisio ebꞌ yajal. Ol laj vecqꞌue pacꞌaljoc masanil carruaje yic oval yedꞌ masanil ebꞌ ayqꞌue dꞌa yibꞌan̈. Ol laj cham nocꞌ chej yedꞌ ebꞌ ayqꞌue dꞌa yibꞌan̈ nocꞌ. Junjun soldado ol xiclajcham sbꞌa yedꞌ yetsoldadoal ajun yedꞌoc. 23 A in Jehová Yajal in dꞌa Smasanil sval dꞌayach ach in checabꞌ Zorobabel yuninal vin̈aj Salatiel, a dꞌa jun cꞌual chiꞌ, ol vacꞌoch opisio icha yopisio in sello, yujto a in ix ach in siqꞌuelta, xchi Jehová, xin chi dꞌa vin̈aj Zorobabel chiꞌ.