2-3 A Jehová Yajal dꞌa Smasanil ix in checanbꞌat val juntzan̈ tic: A ex tic, tzeyalaꞌ to ayto scꞌoch scꞌual yic sbꞌochajxiqꞌue in cajnubꞌ. 4 Palta vachꞌ jun, aocabꞌ dꞌa pat te vachꞌ yilji bꞌaj tzex cajnaji yacbꞌan axo in cajnubꞌ max eyamochlaj e bꞌoanxi. 5 A in Jehová Yajal in dꞌa Smasanil, a in svalaꞌ, ¿tom max e na val jabꞌoc yuj tas van yecꞌ dꞌa eyibꞌan̈ tic? 6 Te nivan tastac tzeyavej, palta quenn̈ej sat tze moloꞌ. Tzex vaꞌi, palta max ex bꞌudꞌjilaj. Tzeyuqꞌuej aꞌ, palta max ecꞌlaj e taquin̈tial. Tzeyacꞌoch e pichul, palta max ex qꞌuixnajlaj yuuj. Axo mach scha stojol bꞌaj smunlaj dꞌa junoc cꞌu, ichato dꞌa yol mucuc olan yich syaqꞌuem stojol chiꞌ. 7 A in Jehová Yajal in dꞌa Smasanil sval dꞌayex, ¿tom max e na val jabꞌoc yuj tas van yecꞌ dꞌa eyibꞌan̈ tic? 8 A ticnaic jun, ixiquec dꞌa caltac yax luum, tzeyicꞌancot te teꞌ yic tze bꞌoanxiqꞌue in cajnubꞌ. Ichato chiꞌ bꞌian, ol in aj taꞌ dꞌa tzalajcꞌolal, ol eyicꞌanxichaan̈ in bꞌi.

9 A ex tic tze naꞌa to te nivan sat tas ol eyicꞌ dꞌa tas ix eyavej chiꞌ, palta quenn̈ej pax tzeyicꞌaꞌ. A in Jehová in svalaꞌ, a jabꞌoc tze molbꞌejcan dꞌa e pat, a in tzin pu saclem dꞌayex. ¿Tas yuuj? Yujto a in cajnubꞌ, lan̈chimtac yajcani, a exxo tic, an̈ej e bꞌoanqꞌue e pat bꞌaj ayoch e pensar. 10 Yujton chiꞌ max yacꞌlaj n̈abꞌ bꞌaj cajan ex tic, malaj tas syacꞌ lum luum tic dꞌayex. 11 Ix in yamoch vaan yem n̈abꞌ dꞌa yibꞌan̈ tas tzeyavej yedꞌ dꞌa jolomtac vitz, yic stacjiel ixim trigo, teꞌ uva, teꞌ olivo yedꞌ masanil sat avbꞌen slaj molji. Man̈xalaj n̈abꞌ tzꞌem dꞌa eyibꞌan̈, man̈xooc dꞌa yibꞌan̈ nocꞌ e molbꞌetz, man̈xooc pax dꞌa yibꞌan̈ masanil e munlajel, xchi Jehová.

12 A juntzan̈ slolonel Jehová Dios ix valaꞌ, ayic ix yabꞌan vin̈aj Zorobabel yedꞌ vin̈aj Josué, aton vin̈ sat sacerdote yedꞌ masanil ebꞌ anima, ix te xiv ebꞌ dꞌa Jehová, yuj chiꞌ ix scꞌanabꞌajej ebꞌ. 13 Yuj chiꞌ, ix valan icha tic: A Jehová tzꞌalani: Ayinn̈ejecꞌ eyedꞌoc xchi, xin chi.

14-15 Icha chiꞌ ix aj yiptzitaj vin̈aj Zorobabel gobernador dꞌa Judá yedꞌ vin̈aj Josué sat sacerdote yedꞌ pax masanil ebꞌ anima yuj Jehová. Ayic 24 cꞌual yoch svaquil uj, dꞌa schabꞌil abꞌil yoch vin̈aj Darío reyal, aton taꞌ ix syamoch ebꞌ sbꞌoanxi scajnubꞌ sDiosal, aton Jehová Yajal dꞌa Smasanil.