2
Ex anima malaj jabꞌoc sqꞌuixvelal, molbꞌejec e bꞌa yic tze naan sicꞌlabꞌil,2 yacbꞌan manto javi jun cꞌual naanxo yuj Jehová, jun cꞌual te ay smay. Ol ex saclembꞌat yuuj icha tzꞌaj yicꞌjibꞌat smatzꞌil ixim trigo yuj icꞌ.
3 Mach ex emnaquil tzeyutej e cꞌanabꞌajan tojolal dꞌa jun nación tic, aqꞌuecoch e bꞌa dꞌa yol scꞌabꞌ Jehová e masanil. Bꞌeybꞌalejec tojolal yedꞌ emnaquilal, talaj olto ilchaj bꞌaj ol e col e bꞌa dꞌa jun cꞌual yic yoval scꞌol Jehová chiꞌ.
A yaelal ol javoc dꞌa yibꞌan̈ juntzan̈ nación
4 Tzꞌinini ol ajcan chon̈abꞌ Gaza. Cuseltac ol ajcan chon̈abꞌ Ascalón. Dꞌa cꞌualil ol pechchajel ebꞌ cajan dꞌa Asdod, axo pax ebꞌ cajan dꞌa Ecrón ol icꞌchajel ebꞌ, icha stocꞌchajqꞌueta junoc te teꞌ yedꞌ schꞌan̈al yibꞌ.
5 Mach ex cotnac ex dꞌa Creta, ex cajan ex dꞌa stitac aꞌ mar, toxo ix yal Jehová tas ol javoc dꞌa eyibꞌan̈. Syalan icha tic: Ol in satel chon̈abꞌ Canaán, aton schon̈abꞌ ebꞌ filisteo. Man̈xo junoc mach ol can cajan taꞌ, xchi Jehová.
6 Masanil chon̈abꞌ dꞌa stitac aꞌ mar, axon̈ej nocꞌ calnel ol va dꞌay. Axon̈ej taꞌ ol sbꞌoqꞌue slech pat ebꞌ tan̈vum calnel yedꞌ smacteꞌ nocꞌ scalnel ebꞌ chiꞌ.
7 A ebꞌ man̈ ol cham dꞌa Judá, ol yicꞌ smacbꞌen ebꞌ dꞌa jun lum luum chiꞌ. Ataꞌ ol laj bꞌat ebꞌ stan̈vej nocꞌ scalnel, axo dꞌa teꞌ pat dꞌa Ascalón ol laj vay ebꞌ dꞌacꞌvalil, yujto a Jehová Dios ol tan̈van ebꞌ, ol icꞌjocpaxqꞌue chaan̈ ebꞌ yuuj.
8 A Jehová tzꞌalan icha tic: Ix vabꞌ val sbꞌuchvaj ebꞌ moabita yedꞌ ebꞌ amonita dꞌa ebꞌ in chon̈abꞌ, syalanpax ebꞌ to ol yiqꞌuecꞌ lum sluum ebꞌ in chon̈abꞌ tic ebꞌ yalani.
9 Yuj chiꞌ, a in Jehová in tic svalaꞌ, a Moab yedꞌ Amón chiꞌ, lajan ol aj icha ajnac Sodoma yedꞌ Gomorra, aton meltzajnacoch bꞌaj sqꞌuibꞌqꞌue teꞌ qꞌuiix yedꞌ pax bꞌaj sbꞌo atzꞌam atzꞌam. Tzꞌinini ol ajcan dꞌa juneln̈ej. Axo ebꞌ man̈ ol cham dꞌa in chon̈abꞌ, a ebꞌ ol icꞌanelta tastac ay dꞌa ebꞌ, a ebꞌ ol macbꞌenancan slum ebꞌ chiꞌ, xchi Jehová.
10 Aton spac chiꞌ ol scha Moab yedꞌ Amón, yujto ix bꞌuchvaj ebꞌ dꞌayon̈ schon̈abꞌ on̈ Jehová Yajal dꞌa Smasanil. Ix yalanpax ebꞌ to syiqꞌuecꞌ lum co luum ebꞌ.
11 Ol cot val yoval scꞌool Jehová dꞌa ebꞌ. Ol satel juntzan̈ comon dios ay dꞌa smasanil yolyibꞌan̈qꞌuinal tic. Axo ebꞌ cajan dꞌa juntzan̈ lum luum ay dꞌa snan̈al aꞌ mar, ol och ebꞌ ejmelal dꞌa Jehová bꞌaj cajan junjun.
12 Yedꞌ ex pax tic, ex aj Etiopía, ol ex cham yuj yespada Jehová.
13 Ol yacꞌanpax yaelal Jehová dꞌa yibꞌan̈ ebꞌ cajan dꞌa Asiria ay dꞌa norte yic satel ebꞌ. Tzꞌinini ol ajcan chon̈abꞌ Nínive yuuj, tzꞌinan luum ol ajcanoc.
14 Ol juchajem spat ebꞌ. Axon̈ej nocꞌ molbꞌetzal nocꞌ yedꞌ nocꞌ cꞌultaquil nocꞌ ol aj taꞌ. Axon̈ej nocꞌ cujubꞌ yedꞌ nocꞌ sotzꞌ ol ocꞌ dꞌa schontac yoyal spat ebꞌ chiꞌ, ol laj oqꞌuelta nocꞌ dꞌa ventena. Toxon̈ej ol och bꞌulan nocꞌ joj dꞌa stiꞌ spuertail spat ebꞌ chiꞌ. Axo teꞌ cꞌuteꞌ ayoch schemtealoc yool, ol laj el teꞌ.
15 Icha chiꞌ ol utaj jun chon̈abꞌ te acꞌumtac syutej sbꞌa, malaj tas snaꞌa, syipcꞌolej sbꞌa schꞌocoj, syalan ebꞌ cajan dꞌay icha tic: Malaj junocxo chon̈abꞌ lajan yedꞌ co chon̈abꞌ tic, xchi ebꞌ. Palta ol can tzꞌinan, axon̈ej nocꞌ chium nocꞌ ol cajnajcan taꞌ. A ebꞌ ol ecꞌ dꞌa slacꞌanil chiꞌ, ol schin̈ubꞌtan̈ej scꞌabꞌ ebꞌ, ol bꞌuchvaj ebꞌ dꞌay.