A schucal Jerusalén yedꞌ scolnabꞌil
3
Obꞌiltac ebꞌ aj Jerusalén, aton jun chon̈abꞌ bꞌaj cajan ebꞌ anima te pit, ebꞌ yelxo val te chuc yedꞌ pax ebꞌ ixtum anima.2 Maj scha yabꞌ ebꞌ tas ix yal Jehová, te chuc pax ix yabꞌ ebꞌ ayic ix cachji ebꞌ yuuj. Maj yacꞌoch Jehová sDiosal ebꞌ yipoc scꞌool, maj scꞌanbꞌejpax jabꞌoc sbꞌa ebꞌ dꞌay.
3 A ebꞌ sreyal ebꞌ, lajan ebꞌ icha nocꞌ choj tzꞌel yav yuj vejel. Axo ebꞌ sjuezal ebꞌ, lajan ebꞌ icha nocꞌ oques man̈xo junoc sbꞌaquil schibꞌej syactejcani yic schi dꞌa junxo cꞌu.
4 A ebꞌ syaloch sbꞌa schecabꞌoc Dios, syicꞌchaan̈ sbꞌa ebꞌ, an̈ej dꞌa yol yic ebꞌ scomon loloni. A ebꞌ sacerdote, syixtejbꞌat scajnubꞌ Dios ebꞌ, max scꞌanabꞌajej pax scꞌaybꞌubꞌal Dios chiꞌ ebꞌ.
5 Palta, ayecꞌ Jehová dꞌa co chon̈abꞌ tic, an̈ej tas tojol scꞌulej, malaj juneloc scꞌulej junoc tas man̈ vachꞌoc. Junjun qꞌuin̈ibꞌalil schꞌoxanel stojolal. Axo pax ebꞌ chuc, max qꞌuixvi jabꞌoc ebꞌ.
6 A Jehová tzꞌalan icha tic: Toxo ix laj in satel juntzan̈ nación. Toxo ix laj vec lan̈chaj storreal smuroal schon̈abꞌ ebꞌ. Tzꞌinini ix vutejcan yoltac calle, man̈xalaj junoc mach tzꞌecꞌ taꞌ. A dꞌa juntzan̈ chon̈abꞌ chiꞌ, man̈xa junoc anima cajan.
7 Ix vutej icha chiꞌ, talaj a ebꞌ aj Jerusalén tic, ol ja sxivcꞌolal ebꞌ dꞌayin, yic a ol vacꞌan scachnabꞌil ebꞌ, ol in scꞌanabꞌajej ebꞌ. Tato icha chiꞌ, man̈ ol in juem scajnubꞌ ebꞌ, man̈ ol vacꞌpaxoch syaelal ebꞌ, icha ix aj in naani. Palta axo ebꞌ jun, yelcꞌolal ix tzalaj val ebꞌ scꞌulan masanil macan̈ chucal dꞌa vichan̈.
8 Yuj chiꞌ tan̈vejec sjavi jun cꞌu ayic ol in chꞌoxanel smul masanil ebꞌ scꞌulan chucal. A in Jehová in sval icha tic: Toxo ix in na to ol in molbꞌej masanil nación yedꞌ masanil chon̈abꞌ, yic ol vacꞌoch yoval in cꞌol dꞌa yibꞌan̈ ebꞌ anima cajan dꞌay. Masanil yolyibꞌan̈qꞌuinal ol satel yuj yoval in cꞌool.
9 Ayic ol cꞌoch jun cꞌual chiꞌ, axon̈ej lolonel vachꞌ ol vacꞌ yal ebꞌ anima smasanil, yic vachꞌ a masanil ebꞌ anima dꞌa junjun chon̈abꞌ, ol yal vachꞌ lolonel ebꞌ dꞌayin. Junxon̈ej ol aj yalan sbꞌa ebꞌ dꞌayin.
10 A ebꞌ in chon̈abꞌ sacleminac yajcanbꞌat ticnaic dꞌa scꞌaxepal a aꞌ yic Etiopía, a dꞌa jun cꞌual chiꞌ ol laj javoc ebꞌ smasanil ul yaqꞌuem sbꞌa dꞌayin yedꞌ yofrenda.
11 Ex in chon̈abꞌ, a dꞌa jun cꞌual chiꞌ, man̈xo ol ex qꞌuixvoc yuj e chuc bꞌeybꞌal, aton bꞌaj ix e pitej e bꞌa dꞌayin. A dꞌa jun cꞌual chiꞌ, ol viqꞌuel ebꞌ stzalaj yedꞌ yacꞌumtaquil dꞌa e cal. Man̈xo acꞌumtacoc ol eyutej e bꞌa dꞌa jun tzalan bꞌaj tzꞌoch ejmelal dꞌayin.
12 Axon̈ej ebꞌ anima emnaquilal syutej sbꞌa ol vacꞌcan cajan dꞌa in chon̈abꞌ chiꞌ, axon̈ej dꞌayin ol scol sbꞌa ebꞌ.
13 A ebꞌ aj Israel olto canoc, man̈xo ol scꞌulej ebꞌ tas man̈ tojoloc, man̈xo ol yalpax lolonel ebꞌ man̈ yeloc. Man̈xalaj pax bꞌaqꞌuin̈ ol yixtej ebꞌ yetanimail ebꞌ. Juncꞌolalxon̈ej ol aj ebꞌ, man̈xalaj mach bꞌaj ol xiv ebꞌ, toxon̈ej ol va ebꞌ, juncꞌolalxon̈ej ol aj ebꞌ, xchi Jehová.
Bꞌit yic tzalajcꞌolal yuj Jerusalén
14 Bꞌitanan̈ec ex aj Sion. Qꞌueocabꞌ chaan̈ e jaj e bꞌitan ex aj Israel. Tzalajan̈ec ex aj Jerusalén, tzalajan̈ec val.
15 A Jehová, toxo ix yicꞌcanel ebꞌ tzꞌacꞌanoch yaelal dꞌa quibꞌan̈, toxo ix spatiquejel ebꞌ ayoch ajcꞌolal dꞌayon̈. A Jehová co Reyal ayecꞌ quedꞌoc. Man̈xalaj bꞌaj ol on̈ xivoc.
16 A dꞌa jun cꞌual chiꞌ, ol yal anima dꞌa ebꞌ aj Jerusalén icha tic: Ex aj Sion, man̈xo ex xivoc, man̈xoocabꞌ el yip e cꞌabꞌ yuj xivelal.
17 A Jehová e Diosal ayecꞌ eyedꞌoc. A spoder tzex colani, ste tzalaj eyedꞌoc. Yujto xajan ex yuuj, yuj chiꞌ man̈xalaj tas ol yalaꞌ. A yuj stzalajcꞌolal chiꞌ ol bꞌitanoc,
18 icha tzꞌaj yoch bꞌit dꞌa scꞌual qꞌuin̈, xcham ebꞌ.
Syalan Jehová: Ol viqꞌuel juntzan̈ cuscꞌolal ayoch dꞌa eyibꞌan̈, ol vicꞌanpaxel qꞌuixvelal tzex icꞌani.
19 A dꞌa jun cꞌual chiꞌ, ol vacꞌ yovalil dꞌa juntzan̈ ebꞌ ix ex ixtani. Ol in colvaj dꞌa ebꞌ yatac val ay yedꞌ dꞌa ebꞌ saclemnaccanbꞌati. Ol vicꞌ val chaan̈ snivanil eyelcꞌoch dꞌa masanil yolyibꞌan̈qꞌuinal yuj bꞌaj ix ex ixtaji.
20 A dꞌa jun cꞌual chiꞌ, ol ex vicꞌcoti. Ol ex in molbꞌej, ol in qꞌuexan tas ayoch dꞌa eyibꞌan̈. Ol ex vicꞌan val chaan̈, nivan ol aj eyelcꞌoch dꞌa scal masanil chon̈abꞌ dꞌa yolyibꞌan̈qꞌuinal tic. Ol eyil val ex vicꞌanxi chaan̈, xchi Jehová.